Dzo kpo yi emenuwo dzi

NU SI AKPE ÐE ƑOMEWO ŊU

Ale Si Nàkpe Ðe Viwò Ŋu Wòawɔ Dɔ Nyuie Le Suku

Ale Si Nàkpe Ðe Viwò Ŋu Wòawɔ Dɔ Nyuie Le Suku

Ède dzesii be viwòa metsɔa ɖeke le sukunyawo me o, mewɔa eƒe sukudɔdeasiwo o eye mesrɔ̃a nu hã o. Nu kae do tso eme? Megawɔa dɔ nyuie le suku o eye eƒe agbenɔnɔ hã trɔ bubui. Aleke nàte ŋu akpe ɖe viwòa ŋu wòawɔ dɔ nyuie wu le suku?

 Nu si wòle be nànya

Ðevia dzi zizi agblẽ nyaa ɖe edzi. Viwò dzi zizi be wòawɔ dɔ nyuie le suku ate ŋu ana wòatsi dzodzodzoe le suku kple aƒe me siaa! Le esia ta la, ate ŋu ada alakpa, aɣla dɔ siwo me medze agbagba le o ɖe wò, alo anɔ sukua yiyi dam ɖe eme. Ðeko esia ana kuxia nanyrã ɖe edzi.

Nunana ɖevia ate ŋu agblẽ nyaa ɖe edzi. Vifofo aɖe si ŋkɔe nye Andrew gblɔ be: “Esi míedi be míade dzi ƒo na mía vinyɔnua ta la, míenaa nui ne ewɔ dɔ nyuie le suku, gake ɖeko esia nana eƒe susu va nɔa nunanaa boŋ ŋu. Ne mexɔ dzesi nyui le dodokpɔ aɖe me o la, nunana si masu esi o la tena ɖe edzi wu agbagba si medze le dodokpɔa me o.”

Fɔbubu nufialawo meɖea vi o. Viwòa ate ŋu aƒo nya ta be mehiã be ye ŋutɔ yeaku kutri hafi akpɔ dzidzedze o. Ate ŋu ava nɔ fɔ bum amewo ɖe eƒe vodadawo ta eye wòanɔ mɔ kpɔm be ame bubuwo nakpɔ yeƒe kuxiwo gbɔ na ye. Kpuie ko la, awɔe be viwòa masrɔ̃ nu vevi aɖe si wòava hiã ne etsi o. Eyae nye be eya ŋutɔe atsɔ eƒe nuwɔnawo me tsonuwo ƒe agba.

 Nu si nàte ŋu awɔ

Ðu ɖokuiwò dzi. Ne èdo dziku le esi viwòa mewɔ dɔ nyuie le suku o ta la, mègaɖo dze kplii tso eŋu ɣemaɣi o. Vifofo aɖe si ŋkɔe nye Brett gblɔ be: “Nu nyui geɖe do tso eme esi nye kple srɔ̃nye míefa tu na mía viwo eye míewɔ nu ɖe wo ŋu veveseɖeamenutɔe.”

Biblia ƒe mɔfiame: ‘Ðe abla le nusese me, nɔ blewu le nuƒoƒo me, nɔ blewu le dziku me.’—Yakobo 1:19.

De dzesi nu si tututu nye kuxia. Nu siwo wɔnɛ be ɖeviwo mewɔa dɔ nyuie le suku o zi geɖe ƒe ɖewoe nye sukuhatiwo ƒe ŋlɔmiwɔwɔ, suku ɖɔliɖɔli, dodokpɔŋɔŋlɔ ŋuti dzimaɖitsitsiwo, ƒomekuxiwo, alɔ̃madɔmadɔ, ɖoɖowɔɖi ƒe ame si manɔmanɔ, alo susu ƒe nu ŋu manɔmanɔ. Mègaƒo nya ta be kuvia wɔmee viwòa le o.

Biblia ƒe mɔfiame: “Ame si ɖea nugɔmesese deto fiana le nyawo me la, nu adze edzi nɛ.”—Lododowo 16:20.

Na nɔnɔmeawo nasɔ nyuie be ɖevia nasrɔ̃ nu. Wɔ ɖoɖowɔɖi na ɖevia hena eƒe nusɔsrɔ̃ kple sukudɔdeasiwo wɔwɔ. Ðo teƒe aɖe koŋ ɖi be viwòa nanɔ eƒe sukudɔdeasiwo wɔm le, afi si nuwo abe television kple asitelefon ene mahe eƒe susu le o. Na ɣeyiɣi siwo viwòa atsɔ awɔ eƒe sukudɔdeasiwo la nanɔ kpuikpuikpui ale be eƒe susu nate ŋu anɔ nusɔsrɔ̃a ŋu. Vifofo aɖe si ŋkɔe nye Hector, si tso Germany la gblɔ be, “Hafi dodokpɔ aɖe naɖo edzi la, míedzroa nu vi aɖe me kple mía via gbe sia gbe, tsɔ wu be míalala va se ɖe esime dodokpɔa ŋlɔɣi naɖo.”

Biblia ƒe mɔfiame: “Ɣeyiɣi li na nu sia nu.”—Nyagblɔla 3:1.

De nusɔsrɔ̃ ƒe dzi ƒo nɛ. Zi ale si viwòa se ale si sukudede aɖe vi nɛ fifia gɔmee la, zi nenemae wòaʋãe geɖe wu be wòasrɔ̃ nu. Le kpɔɖeŋu me, sukunusɔsrɔ̃ si nye akɔntabubu ate ŋu akpe ɖe viwòa ŋu wòanya ale si wòazã eƒe kotokumegae.

Biblia ƒe mɔfiame: “Ƒle nunya, eye nàƒle gɔmesese. . . . De asixɔxɔ gã eŋu.”—Lododowo 4:5, 8.

Kpekpeɖeŋu: Kpe ɖe viwòa ŋu wòawɔ eƒe sukudɔdeasia, gake mègaxɔ dɔa awɔ nɛ o. Andrew gblɔ be, “Mía vinyɔnua ɖoa ŋu ɖe míaƒe susu ŋu le eƒe sukudɔdeasiwo wɔwɔ me, eye medina be yeawɔ ye ŋutɔ yeƒe susu ŋu dɔ o.” Fia viwòa ale si wòawɔ sukudɔdeasiwo le eɖokui si.