“Nunana nyuiwo katã kple nunana blibowo katã tso dziƒo, tso kekeliwo Fofo la gbɔ.” (Yakobo 1:17) Mawunyakpukpui sia le nu ƒom tso mía Fofo, Yehowa Mawu, si le dziƒo la ƒe dɔmenyonyo ŋu. Ke hã, le nunana gbogbo siwo Mawu na amegbetɔwo dome la, wo dometɔ aɖe ƒo ɖe sia ɖe ta. Eyae nye ka? Edze le Yesu ƒe nya si ame geɖe nya si dze le Yohanes 3:16. Afi ma gblɔ be: “Elabena Mawu lɔ̃ xexea ale gbegbe be wòtsɔ eƒe Tenuvi la na, be ame sia ame si xɔa edzi sena la nagatsrɔ̃ o, ke boŋ wòakpɔ agbe mavɔ.”

Mawu ƒe Tenuvi si wòtsɔ na lae nye nunana gãtɔ kekeake si wona mía dometɔ ɖe sia ɖe kpɔ, ale be míato edzi avo tso nu vɔ̃, tsitsi kple ku ƒe kluvi siwo míenye la me. (Psalmo 51:5; Yohanes 8:34) Aleke kee míeɖadze agbagbae o, mía dometɔ aɖeke mate ŋu awɔ naneke ado le kluvi ƒe nɔnɔme sia me o. Gake le lɔlɔ̃ gã si le Mawu si ta la, ena nu si awɔe be míavo tso kluvinyenye sia me. Esi Yehowa Mawu tsɔ eƒe Tenuvi si nye Yesu Kristo na wònye tafe ta la, ena mɔnukpɔkpɔ amegbetɔwo be woate ŋu ava nɔ agbe tegbee. Gake nu ka tututue nye tafea? Nu ka tae wòva hiã? Eye mɔ ka nue wòaɖe vi na mí le?

Tafe nye fe si woxe ɖe nane si bu la ta, alo fe si woxe be woana ablɔɖe ame aɖe tso kluvinyenye me. Biblia gblɔ be esi wowɔ mía dzila gbãtɔ Adam kple Xawa la, nu vɔ̃ menɔ wo ŋu o, eye mɔkpɔkpɔ nɔ wo kple vi siwo woava dzi la si be woanɔ agbe tegbee le paradiso me le anyigba dzi. (1 Mose 1:26-28) Nublanuitɔe la, esi wogbe toɖoɖo Mawu ta la, wozu nu vɔ̃ mewo eye mɔkpɔkpɔ sia bu ɖe wo. Nu kae va do tso eme? Biblia ɖo eŋu be: “To ame ɖeka dzi nu vɔ̃ va xexea me, eye to nu vɔ̃ me ku la va, ale ku la kaka ɖe amewo katã dome, esi wo katã wɔ nu vɔ̃ ŋuti.” (Romatɔwo 5:12) Agbe deblibo domee wòle be Adam ƒe dzidzimeviwo nanyi hafi, gake nu vɔ̃ kple emetsonu si nye ku ƒe dome boŋue viawo nyi.

Ele be tafe si woaxe ɖe nane ta la nasɔ kple nu si bu la pɛpɛpɛ. Esi Adam ɖoe koŋ gbe toɖoɖo Mawu la, ewɔ nu vɔ̃, eye nu si do tso emee nye be Adam magate ŋu anɔ agbe tegbee o. Le Biblia ƒe nya nu la, esia na Adam ƒe dzidzimeviwo va zu nu vɔ̃ kple ku ƒe kluviwo. Eya ta eva hiã be woatsɔ ame deblibo Yesu ƒe agbe asa vɔe be wòanɔ bɔbɔe be woaɖe amegbetɔwo tso nɔnɔme sia me. (Romatɔwo 5:19; Efesotɔwo 1:7) Esi lɔlɔ̃ ʋã Mawu wòxe tafe sia ta la, eʋu mɔ na amegbetɔwo be woate ŋu ava nɔ agbe tegbee le paradiso me le anyigba dzi, nu siae Adam kple Xawa bu.—Nyaɖeɖefia 21:3-5.

Le nu si tafea te ŋu wɔ ta la, ɖikeke mele eme o be Mawu ƒe nunana sia si na be míate ŋu ava nɔ agbe mavɔ la, ye nye nunana gãtɔ kekeake. Abe ale si míedzro eme le nyati si do ŋgɔ me ene la, nanewoe nana nunana aɖe nɔa etɔxɛ. Eya ta mina míade ŋugble le ale si tafea ɖo nu mawo gbɔ le mɔ ɖedzesiwo nu la ŋu, eye esia awɔe be míakpɔ ŋudzedze ɖe ale si tafea nye ‘nunana bliboe’ la ŋu wu.

Ekpɔa míaƒe didiwo gbɔ. Didi sesẽ aɖe le amegbetɔwo me be yewoanɔ agbe ɖaa. (Nyagblɔla 3:11) Togbɔ be míawo ŋutɔwo míate ŋu ana didi sia  nava eme o hã la, tafea na wòle bɔbɔe be wòate ŋu ava eme. Biblia gblɔ be: “Elabena nu vɔ̃ ƒe fetue nye ku, ke Mawu ƒe nunanae nye agbe mavɔ to Kristo Yesu mía Aƒetɔ la dzi.”—Romatɔwo 6:23.

Ekpɔa míaƒe hiahiãwo gbɔ. Amegbetɔwo mate ŋu axe tafea o. Biblia gblɔ be: “Fexexe ɖe woƒe agbe ta xɔ asi ale gbegbe be, womate ŋui akpɔ gbeɖe o.” (Psalmo 49:8) Eya ta míehiã Mawu ƒe kpekpeɖeŋu be míavo tso nu vɔ̃ kple ku si me. Gake Mawu to “tafe si Kristo Yesu xe la dzi na ablɔɖe” mí, eye esia nye nu si tututu míehiã.—Romatɔwo 3:23, 24.

Eva ɖe ɣeyiɣi dzi. Biblia gblɔ na mí be: “Esime míeganye nu vɔ̃ wɔlawo la, Kristo ku ɖe mía ta.” (Romatɔwo 5:8) Esi wònye wona tafea “esime míeganye nu vɔ̃ wɔlawo” ta la, tafea ɖe ale si gbegbe Mawu lɔ̃ míi la fia. Eye ena míele mɔ kpɔm na nu nyui geɖewo togbɔ be ele be míado dzi akpe nu vɔ̃ me tsonuwo ƒe fu hã.

Nunana si ŋu ɖokuitɔdidi ƒe susu aɖeke mekpe ɖo o. Biblia gblɔ nu si ʋã Mawu wòtsɔ Via na abe tafe ene be: “Esia me woɖe Mawu ƒe lɔlɔ̃ ɖe go fia le le mía me, be Mawu dɔ eƒe Tenuvi la ɖo ɖe xexea me, be míakpɔ agbe to eya amea dzi. Esia me lɔlɔ̃ la le, menye be míawo míelɔ̃ Mawu o, ke boŋ be eya lɔ̃ mí, eye wòdɔ Via be wòanye avulévɔsa ɖe míaƒe nu vɔ̃wo ta.”—1 Yohanes 4:9, 10.

Nu kae nàwɔ atsɔ aɖee afia be yekpɔ ŋudzedze ɖe nunana gãtɔ kekeake sia ŋu? Ðo ŋku edzi be Yesu ƒe nya siwo le Yohanes 3:16 gblɔ be ame siwo “xɔa edzi sena” la akpɔ ɖeɖe. Le Biblia ƒe nya nu la, xɔse nye “dziɖoɖo ɖe nu si wole mɔ kpɔm na la ŋu kakaɖedzitɔe.” (Hebritɔwo 11:1) Hafi kakaɖedzi sia nasu mía si la, ele be míadze si Mawu nyuie wu. Le esia ta, míele dzi dem ƒo na wò be nàdi ɣeyiɣi asrɔ̃ nu tso Yehowa Mawu, Ame si na ‘nunana blibo’ sia mí la ŋu, eye anyo hã be nàsrɔ̃ nu si nàwɔ be agbe mavɔ nɔnɔ si Yesu ƒe tafevɔsa ʋu ɖi na mí la nasu asiwò.

Àte ŋu asrɔ̃ nu tso nu si Biblia gblɔ tso nya siawo ŋu la ŋu le Internet dzi le www.jw.org/ee. Adzɔ dzi na Yehowa Ðasefowo be yewoakpe ɖe ŋuwò. Míeka ɖe edzi be ne èyi edzi le nu srɔ̃m tso nunana gãtɔ kekeake sia kple vi si wòaɖe na wò ŋu la, aʋã wò nàgblɔ be: “Meda akpe na Mawu to Yesu Kristo, mía Aƒetɔ la dzi!”—Romatɔwo 7:25.