Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  September 2015

 NYATI SI LE AKPAA DZI | AME KAWOE YEHOWA ÐASEFOWO NYE?

Ame Ka Ƒomeviwoe Yehowa Ðasefowo Nye?

Ame Ka Ƒomeviwoe Yehowa Ðasefowo Nye?

Míenye subɔsubɔha si me tɔwo le xexea me godoo, eye míedo ka kple ha bubu aɖeke o. Togbɔ be Yehowa Ðasefowo ƒe dɔwɔƒegã la le United States hã la, Ðasefo akpa gãtɔ le dukɔ bubuwo me. Le nyateƒe me la, Ðasefo miliɔn enyi le Biblia fiam amewo le dukɔ siwo wu 230 me. Esia wɔ ɖeka kple nya si Yesu gblɔ be: “Woaɖe gbeƒã Fiaɖuƒe ŋuti nya nyui sia le anyigba blibo la katã dzi be wòanye ɖaseɖiɖi na dukɔwo katã.”—Mateo 24:14.

Afi ka kee míeɖale o, míewɔa se dzi pɛpɛpɛ. Ke hã míedzea agbagba be míagade nu dunyahehe me o. Susu si tae nye be, míewɔa nya si Yesu gblɔ be Kristotɔwo naganye “xexea ƒe akpa aɖeke o” la dzi. Eya ta míedea nu dunyahehe me o, eye míeyia aʋa alo kpea asi ɖe aʋawɔwɔwo ŋu o. (Yohanes 15:19; 17:16) Le Xexemeʋa II me la, wode Yehowa Ðasefo geɖewo gaxɔ me, wowɔ funyafunya wo hewu wo dometɔ aɖewo le esi womeyi aʋa o ta. Germanytɔ aɖe si nye bisiɔp tsã la ŋlɔ tso wo ŋu be: “Woate ŋu aƒu asi akɔ be yewo koe nye habɔbɔ si gbe aʋayiyi le dzitsinya ta le Nazi Dziɖuɖua te.”

“Agbe nyui nɔnɔ ƒe ŋutete wɔnuku aɖe le [Yehowa Ðasefowo] si. Míate ŋu azã ɖokuitɔmadila siawo le dziɖuɖu ƒe ɖoƒe kɔkɔtɔwo gɔ̃ hã—gake míele wo kpɔ ge aɖo nɔƒe mawo gbeɖe o. . . . Wodea bubu ɖoƒe siwo dziɖuɖuwo le ŋu, gake woxɔe se be Mawu Fiaɖuƒea koe ate ŋu akpɔ amegbetɔwo ƒe kuxiwo katã gbɔ.”—Nová Svoboda newspaper, Czech Republic.

Ke hã, míeɖea mía ɖokui ɖe aga o. Yesu do gbe ɖa na Mawu ku ɖe eyomedzelawo ŋu ale: “Nyemele biabiam be nàɖe wo ɖa le xexea me o.” (Yohanes 17:15) Eya ta ànya kpɔe be míewɔa dɔ, ƒlea nu hedea suku le nuto si me nèle.