Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  September 2015

 NYATI SI LE AKPAA DZI | AME KAWOE YEHOWA ÐASEFOWO NYE?

Nu Kawoe Nye Yehowa Ðasefowo Ƒe Dzixɔse?

Nu Kawoe Nye Yehowa Ðasefowo Ƒe Dzixɔse?

Yehowa Ðasefowo xɔe se be “Ŋɔŋlɔ blibo la tso Mawu ƒe gbɔgbɔ me, eye wònyo.” (2 Timoteo 3:16) Biblia nye mɔfiagbalẽ si kpena ɖe mía ŋu míesrɔ̃a nu tso Wɔlaa ŋu henɔa agbe si ŋu viɖe le.

Biblia gblɔ be: “Na woadze sii be wò, ame si ŋkɔe nye Yehowa la, wò ɖeɖe koe nye Dziƒoʋĩtɔ ɖe anyigba blibo la dzi.” (Psalmo 83:18) Eya ta Yehowa Mawu ɖeɖe koe míesubɔna, eye esi míenye eƒe Ðasefowo ta la, míedzea agbagba nana amewo nyaa eƒe ŋkɔ ŋutɔŋutɔa.—Yesaya 43:10-12.

Míenye Kristotɔwo, eya ta míexɔe se be Yesu, si nye “Mawu ƒe Vi la,” * va anyigba dzi heva zu Mesia la. (Yohanes 1:34, 41; 4:25, 26) Le Yesu ƒe ku megbe la, Mawu fɔe ɖe tsitre wòyi dziƒo. (1 Korintotɔwo 15:3, 4) Emegbe eva zu Mawu Fiaɖuƒea ƒe Fia. (Nyaɖeɖefia 11:15) Fiaɖuƒe ma nye dziɖuɖu ŋutɔŋutɔ si atrɔ anyigba la wòagazu Paradiso ake. (Daniel 2:44) Biblia gblɔ be: “Ame fafawo anyi anyigba la dome, eye dzi adzɔ wo geɖe ɖe ŋutifafa gbogbo la ŋuti.”—Psalmo 37:11, 29.

“Ne woxlẽ nya aɖe le Biblia me la, woxɔnɛ sena be Mawue le nu ƒom na yewo. Ne wodo go kuxiwo le agbe me la, wodia mɔfiafia le Mawu ƒe Nyaa me be yewoatsɔ akpɔ kuxia gbɔ. . . . Wobunɛ be Mawu ƒe Nya la gale agbe.”—Katoliko nunɔla Benjamin Cherayath ƒe nya si dze le Germany ƒe nyadzɔdzɔgbalẽ si nye Münsterländische Volkszeitung me

Yehowa Ðasefowo xɔe se be Biblia me mɔfiamewo ate ŋu aɖe vi na amewo egbea gɔ̃ hã. (Yesaya 48:17, 18) Eya ta míewɔna ɖe mɔfiame mawo dzi pɛpɛpɛ. Le kpɔɖeŋu me, esi wònye be Biblia xlɔ̃ nu mí ku ɖe nuwɔna siwo ƒoa ɖi míaƒe ŋutilã kple míaƒe susu ŋu ta la, míenoa atama loo alo zãa atike vɔ̃ɖiwo o. (2 Korintotɔwo 7:1) Míetsria nuwɔna siwo ŋu woƒo nu tsi tre ɖo tẽe le Biblia me la hã, abe ahamumu, gbɔdɔdɔ manɔsenu kple fififi ene.—1 Korintotɔwo 6:9-11.

^ mm. 5 Biblia gagblɔ tso Yesu ŋu be eyae nye “Mawu ƒe Tenuvi la,” elabena eyae nye Yehowa ƒe nuwɔwɔ gbãtɔ, eye eya ɖeka koe Mawu ŋutɔ wɔ tẽe.—Yohanes 3:18; Kolosetɔwo 1:13-15.