Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  June 2015

 AGBEMEŊUTINYA

Domenyinu Si Li Dzidzime Adre Sɔŋ Ye Nye Esia

Domenyinu Si Li Dzidzime Adre Sɔŋ Ye Nye Esia

Amewo gblɔna be meɖi fofonye ŋutɔ. Wogblɔna be mexɔ ale si menɔa tsitrenu kple ale si menɔa anyii, nye ŋkuwo kple nye nukokoedoname katã tso egbɔ. Ke hã mexɔ nu bubu aɖe hã tso egbɔ—eyae nye domenyinu aɖe si ŋu míaƒe ƒomea ƒe dzidzime adreawo katã de asixɔxɔe ŋutɔ. Na maɖe eme.

Fofonye le míaƒe ƒomea ƒe domenyinua me ɖem nam

Wodzi Tɔgbuigã Thomas (1) * Williams, si nye míaƒe ƒome bliboa ƒe dzidzime gbãtɔ le January 20, 1815 dzi, le Horncastle, England. Ƒe eve megbe la, dadaa ku, eya ta eya kple nɔvia etɔ̃awo dzi kpɔkpɔ va tsi wo fofo, John Williams, ɖeɖe dzi. John fia atikpakpadɔ Thomas, gake Thomas ya ƒe dzi va ku ɖe dɔ bubu aɖe ŋu.

Ɣemaɣi la, mawusubɔsubɔ ƒe dzo yeye aɖe ɖo amewo me le England katã. Gbeƒãɖela John Wesley do le England Sɔlemehaa me yi ɖaɖo Metodist Habɔbɔ, si nye ƒuƒoƒo si te gbe ɖe ɖokuisi Biblia-sɔsrɔ̃ kple nya nyui gbɔgblɔ dzi. Wesley ƒe nufiafiawo kaka kabakaba abe dzo dzeave ene, eye Williams ƒomea hã lé eƒe nufiafiawo me ɖe asi sesĩe. Tɔgbuigã Thomas va zu Wesley ƒe mawunyakakala, eye wòtsɔ eɖokui na faa be yeayi mawunyadɔgbe le Anyiehe Pasifik nutoa me. Eya ta le July 1840 me la, eya kple srɔ̃a, Mary, (2) si wòɖe teti koe nye ema la ʋu yi Lakeba Ƒukpo, * si nye ƒukpo sue si dzi dzotowo le, afi si amelãɖulawo nɔ la dzi, le Fiji.

WONƆ AMELÃÐULAWO DOME

Esi mía tɔgbuigã Thomas kple Mary ʋu yi Fiji la, woto kuxi sesẽwo me le woƒe ƒe gbãtɔawo me. Wowɔa dɔ gaƒoƒo geɖe le nɔnɔme madeamedziwo me kple ŋdɔ si vena ganagana la gbe. Wokpɔ nu dziŋɔ siwo nye dukɔmeviʋawɔwɔ, vemiamia na ahosiwo woaku, vidzĩwo wuwu kple amelãɖuɖu hã teƒe, eye zi geɖe la, nutoa me tɔwo mekpɔa dzidzɔ ɖe woƒe gbedeasia ŋu o. Mary kple viaŋutsu gbãtɔ, John, va dze dɔ vevie eye woku kloe. Le ƒe 1843 me la, Tɔgbuigã Thomas ŋlɔ ɖe eƒe nuŋlɔɖigbalẽ me be: “Nye dzi lólo le menye. . . . Dzi ɖe le ƒonye kloe.” Ke hã eya kple Mary woku kutri vevie, eye woƒe Yehowa Mawu dzi xɔse lé wo ɖe te.

Le ɣeyiɣi mawo me la, Tɔgbuigã Thomas wɔ atikpakpa ƒe aɖaŋu si wòsrɔ̃ le fofoa gbɔ la ŋu dɔ nyuie hetu Europatɔwo ƒe aƒe gbãtɔ ɖe Fiji. Etrɔ asi le aƒea ƒe gɔmeɖoanyia ŋu ale gbegbe be ya ƒona toa xɔa me nyuie, eye edo atsyã bubuwo na aƒea, si wɔe be wòdzro Fijitɔ geɖewo. Do ŋgɔ teti na aƒea nu wuwu la, Mary dzi viaŋutsu evelia, si ŋkɔe nye Thomas Whitton (3) Williams, eyae nye míaƒe ƒomea ƒe dzidzime evelia.

Le ƒe 1843 me la, Tɔgbuigã Thomas hã kpe asi ɖe eŋu woɖe Yohanes ƒe Nyanyuigbalẽa gɔme ɖe Fijigbe me; ekpɔe be dɔa menɔ bɔbɔe kura o. * Ke hã dzɔdzɔmeŋutete aɖe nɔ esi si na wòtea ŋu dea dzesi nyatakaka veviwo to ŋkuléleɖenuŋu me. Eŋlɔ nu siwo ŋu wòke ɖo le eƒe numekukuwo me ɖe eƒe agbalẽ si nye Fiji Kple Fijitɔwo (Ƒe 1858 Tɔ) (si le Eŋlisigbe me) la me; enye agbalẽ  nyui aɖe si ƒo nu tso ale si Fijitɔwo nɔ agbe le ƒe alafa 19 lia me ŋu.

Esi Tɔgbuigã Thomas wɔ dɔ sesẽ kutrikukutɔe le Fiji ƒe 13 sɔŋ ta la, eƒe lãme va gblẽ mlɔeba, eye wòʋu kple eƒe ƒomea yi Australia. Tɔgbuigã Thomas wɔ dɔ abe subɔsubɔhakplɔla xɔŋkɔ aɖe ene ƒe geɖe, eye wòku le Ballarat, Victoria, le ƒe 1891 me.

“SIKA” LE ƔETOÐOƑE

Le ƒe 1883 me la, Tɔgbui Thomas Whitton Williams kple srɔ̃a, Phoebe, (4) kpakple wo vi sueawo ʋu yi Perth, Ɣetoɖoƒe Australia. Ɣemaɣi la, wo viŋutsu tsitsitɔ evelia, Arthur Bakewell (5) Williams, si nye dzidzime etɔ̃lia la, xɔ ƒe asieke.

Esi Tɔgbui Arthur Bakewell xɔ ƒe 22 la, eyi ɖadi kesinɔnu le Kalgoorlie, si nye du si me sika bɔ ɖo amewo va nɔ kukum la me; du sia nɔ Perth ƒe ɣedzeƒe gome, abe kilometa 600 ene. Esi wònɔ afi ma la, exlẽ Yehowa Ðasefo, siwo woyɔna ɣemaɣi be Biblia Nusrɔ̃viwo la ƒe agbalẽ aɖewo. Eye ewɔ ɖoɖo be woanɔ Zion’s Watch Tower magazinea ɖom ɖe ye ɣleti sia ɣleti. Esi nu si Tɔgbui Arthur Bakewell nɔ xexlẽm la do dzidzɔ nɛ ŋutɔ ta la, ete nuƒoƒo tso gɔmesese yeye si su esi ŋu na ame bubuwo, eye woƒoa ƒu srɔ̃a Biblia hã. Gɔmedzedze nyaŋui mae keke ta va zu dɔ gã si wɔm Yehowa Ðasefowo le le Ɣetoɖoƒe Australia egbea.

Tɔgbui Arthur Bakewell ƒo nu tso nu si srɔ̃m wònɔ ŋu na eƒe ƒometɔwo hã. Fofoa, Thomas Whitton, hã kpe asi ɖe Biblia Nusrɔ̃viwo ƒe ƒuƒoƒo si Tɔgbui Arthur ɖo la ŋu hafi ku le ɣeyiɣi kpui aɖe megbe. Dadaa, Phoebe, kple nɔvianyɔnu siwo ŋkɔe nye, Violet kple Mary, hã va zu Biblia Nusrɔ̃viwo. Violet zu nyanyuigblɔla mɔɖela, si fia be, etsɔ gbeƒãɖeɖe nya nyuia wɔ eƒe agbemedɔe. Tɔgbui Arthur Bakewell gblɔ tso eŋu be eyae nye “mɔɖela bibi dovevienu si me dzo nɔ wu ɖe sia ɖe le Ɣetoɖoƒe Australia.” Anɔ eme be Tɔgbui Arthur Bakewell ɖe ami ɖe eƒe nyaa ya, ke hã Violet ƒe dzonɔamemea kpɔ ŋusẽ gã aɖe ɖe Williams ƒomea ƒe dzidzime siwo va ɖe wo yome la dzi.

Ɣeyiɣi aɖe megbe la, Tɔgbui Arthur Bakewell ɖe srɔ̃ heʋu yi Donnybrook, si nye du si me wodea atikutsetsegble le, le Ɣetoɖoƒe Australia ƒe anyieheɣetoɖoƒe gome. Wona ŋkɔ mía tɔgbui le afi ma be “Amegã Ƒe 1914!” le esi wòɖea gbeƒã dzonɔamemetɔe be Biblia ƒe nyagblɔɖiwo ava eme le ƒe ma me ta. * Gake esi Xexemeʋa I fe ati la, wodzudzɔ fewuɖuɖua. Zi geɖe la, Tɔgbui Arthur Bakewell ɖea gbeƒã na eƒe asisiwo ne wova nu ƒle ge le eƒe fiasea me, eye eɖo Biblia-srɔ̃gbalẽwo hã nyuie ɖe fiasea ƒe fesre to be amewo nakpɔ. Etsɔ dzesi aɖe hã da ɖe fesrea to, si gblɔ be, ame sia ame si ate ŋu aɖe eme be Mawuɖekaetɔ̃ ƒe nufiafiaa nye nyateƒe la, yeaxe pounde 100 nɛ, elabena Tɔgbui Arthur Bakewell lé fu nufiafia ma si mewɔ ɖeka kple Ŋɔŋlɔawo o la vevie. Ke hã ame aɖeke mexɔ ga ma kpɔ o.

Williams ƒomea ƒe aƒe me va zu Biblia-srɔ̃ƒe kple Donnybrook hamea ƒe ƒuƒoƒe. Ɣeyiɣi aɖe megbe la, Tɔgbui Arthur Bakewell tu Fiaɖuƒe Akpata alo kpekpewɔƒe aɖe, ɖe dugã la me—eyae nye gbãtɔ si wotu ɖe Ɣetoɖoƒe Australia. Esi wòxɔ ƒe 70 kple edzivɔ la, edoa kotu  heblaa kɔla ɖe edzi, eye wòdoa eƒe sɔ tsitsi si wòyɔna be Doll la yia kpuiƒe kple didiƒewo ɖaɖea gbeƒã le Donnybrook nutoa ƒe akpa ɖe sia ɖe.

Tɔgbui Arthur Bakewell, si nye ame fatu kple bubume, si doa vevie nu ŋutɔ la ƒe kpɔɖeŋua kpɔ ŋusẽ gã aɖe ɖe viawo dzi. Vianyɔnu Florence (6) subɔ abe dutanyanyuigblɔla ene le India. Viaŋutsu siwo ŋkɔe nye, Arthur Lindsay (7) kple Thomas, hã subɔ abe hamemetsitsiwo ene ƒe geɖe, abe wo fofo ke ene.

ATƆTƆŊUTI VIVI SI WOYƆNA BE LADY WILLIAMS

Amewo nya Tɔgbui Arthur Lindsay Williams, si nye dzidzime enelia, ɖe eƒe dɔmenyonyo ta, eye wolɔ̃e ŋutɔ. Ekpɔa vovo ɖe amewo ŋu hedea bubu wo ŋu ɣesiaɣi. Ebi ɖe fíadada me ale gbegbe be eɖu dzi zi 18 sɔŋ le ƒe 12 me, le atitsotso ƒe hoʋiʋli si wowɔna le nutoa me la me.

Ke hã medo dzidzɔ na Tɔgbui Arthur Lindsay kura o esi wòkpɔe be ye viŋutsuvi sue si xɔ ƒe eve ko, si ŋkɔe nye Ronald (8) (dzidzime atɔ̃lia, si dzi fofonye), la ɖe fía ɖe atɔtɔŋutiti sue si le míaƒe aƒea xa la dzi. Tɔgbui Ronald dada tsɔ ɖovu bla atia nyuie, eye mlɔeba, eva tse ku vivi si to vovo na ɖe sia ɖe. Wona ŋkɔ atɔtɔŋuti sia be Lady Williams, eye eyae va zu Atɔtɔŋuti Dzĩ Si Kana Fomfom la ƒomevi siwo ame geɖe nya le xexea me godoo la ƒe gbãtɔ.

Emegbe la, Tɔgbui Ronald va lé fɔ ɖe dɔ siwo ɖea vi wu la wɔwɔ ŋu. Eya kple Mama wotsɔ wo ɖokuiwo na faa le asi kpem ɖe xɔtudɔwo ŋu le Australia kple Solomon Islands (alo Iles Salomon), eye wole subɔsubɔdɔ sia wɔm ƒe geɖe enye esia. Togbɔ be esusɔ vie Tɔgbui naxɔ ƒe 80 fifia hã la, egakpɔtɔ le subɔsubɔm abe hamemetsitsi ene eye wòle asi kpem ɖe Fiaɖuƒe Akpatawo tutu kple wo dzadzraɖo ŋu le Ɣetoɖoƒe Australia.

MEDEA ASIXƆXƆ NYE DOMENYINUA ŊU

Esi fofonye Geoffrey (9) (si nye dzidzime adelia) kple danye Janice(10) Williams hã dea asixɔxɔ míaƒe ƒomea ƒe domenyinua ŋu ta la, woku kutri vevie he nɔvinyenyɔnu Katharine (11) kple nye ŋutɔ (12) be míade asixɔxɔ Kristotɔwo ƒe sewo kple mɔfiamewo ŋu. Eya ta esi mexɔ ƒe 13 la, metso nya me be masubɔ Yehowa. Le Kristotɔwo ƒe takpekpe aɖe si míede me la, mese Nɔviŋutsu John E. Barr, si nye Yehowa Ðasefowo ƒe Dɔdzikpɔha me tɔ la de dzi ƒo na sɔhɛ siwo le nyaselawo dome be: “Migagblẽ nu xɔasitɔ si le mia si, si nye mɔnukpɔkpɔ si su mía si be míanya Yehowa ahalɔ̃e, la dome o.” Eya ta metsɔ nye agbe ɖe adzɔgbe na Yehowa le zã ma me. Ƒe eve megbe la, medze mɔɖeɖedɔa gɔme.

Egbea, nye kple srɔ̃nye, Chloe, míele dzidzɔ kpɔm le nya nyui gbɔgblɔ dɔ sia me le Tom Price, si nye Ɣetoɖoƒe Australia ƒe du saɖeaga, si me wokua tomenu le la me. Míewɔa dɔ ɣeyiɣi aɖe le ŋkekea me ale be míate ŋu akpɔ mía ɖokuiwo dzi le nya nyui gbɔgblɔ dɔa me. Dzinyelawo kple nɔvinyenyɔnu, Katharine kple srɔ̃a, Andrew, hã le mɔɖeɖedɔa wɔm le Port Hedland, si le míaƒe dziehe gome abe kilometa 420 ene. Eye nye kple Papa míele subɔsubɔm hã abe hamemetsitsiwo ene.

Dzidzime adre sɔŋ ye nye esi va yi la, mía tɔgbuigã Thomas Williams tso nya me be yeasubɔ Yehowa Mawu. Mawudzixɔse kple mawusubɔsubɔ ƒe domenyinu ma va su nye hã asinye egbea. Mekpɔe be yayra gã aɖee wònye nam be mawusubɔsubɔ ƒe domenyinu xɔasi sia va su asinye.

^ mm. 5 Xexlẽdzesi siwo le ŋkɔawo gbɔ la wɔ ɖeka kple esiwo dze le fotoawo me.

^ mm. 6 Tsã la, woyɔnɛ be Lakemba Ƒukpo; ele Lau Ƒukpo Ƒoƒuawo, siwo le Fiji ƒe ɣedzeƒe gome la, dome.

^ mm. 10 Mawunyadɔgbedela John Hunt ye ɖe Fijigbe Me Nubabla Yeye, si wota le ƒe 1847 me, la ƒe akpa gãtɔ gɔme. Gɔmeɖeɖea ɖe dzesi le esi wozã Mawu ƒe ŋkɔ, “Jiova,” le Marko 12:36, Luka 20:42 kple Dɔwɔwɔwo 2:34 ta.

^ mm. 16 Kpɔ tanya si nye “1914—Ƒe Ðedzesi Aɖee Wònye le Biblia ƒe Nyagblɔɖi Me,” si dze le agbalẽ si nye Nuka Tututue Nye Biblia ƒe Nufiafia? ƒe megbenyawo me. Yehowa Ðasefowoe tae. Àkpɔe le internet hã dzi le www.jw.org/ee.