Dzo kpo yi emenuwo dzi

Dzo kpo yi emenuawo dzi

Ame Kae Nye Kristo Ƒe Futɔ La?

Ame Kae Nye Kristo Ƒe Futɔ La?

Wona ŋkɔ film aɖe si me nu dziŋɔwo le, si woɖe ɖe go nyitsɔ laa la be Kristo Ƒe Futɔ.

Hadziha xɔŋkɔ aɖe na ŋkɔ woƒe hawo dometɔ ɖeka be Kristo Ƒe Futɔ Xɔŋkɔ La.

Friedrich Nietzsche, si nye xexemenunyala le ƒe alafa 19 lia me la na ŋkɔ eƒe agbalẽ aɖe be Kristo Ƒe Futɔ La.

Fiawo kple Fiagã siwo nɔ anyi le ƒe alafa 5 lia va ɖo 15 lia me la yɔa woƒe futɔwo zi geɖe be Kristo ƒe futɔwo.

Martin Luther, si nye Germanytɔ Ðɔɖɔɖotaʋlilawo ƒe kplɔla yɔ Roma Katoliko papawo be Kristo ƒe futɔwo.

ESI wònye be wozã ŋkɔnya “Kristo ƒe futɔ” ɣeyiɣi didi aɖe na nu vovovowo, tso fiagãwo dzi va ɖo film siwo woɖe ɖe go dzi ta la, esɔ nyuie be míabia be: Ame kae nye Kristo ƒe futɔ la? Ðe nya sia ka mí egbea tututua? Ne míedi be míanya nu si ŋkɔnya Kristo ƒe futɔ nye la, afi si koŋ wòsɔ be míadii le ye nye Biblia me, elabena edze le eme zi atɔ̃ sɔŋ.

NU SI KRISTO ƑE FUTƆ LA NYE

Biblia-ŋlɔla ɖeka pɛ si zã ŋkɔnya “Kristo ƒe futɔ” lae nye apostolo Yohanes. Aleke wòɖɔ Kristo ƒe futɔ lae? Nya siwo wògblɔ tso eŋu le eƒe agbalẽ gbãtɔ si ŋu eƒe ŋkɔ le la mee nye esi: “Vinye suewo, gaƒoƒo  mamlɛtɔ lae nye esia, eye abe ale si miesee be Kristo ƒe futɔ la gbɔna ene la, Kristo ƒe futɔ geɖewo do fifia gɔ̃ hã xoxo, eye esia mee míenyae le be gaƒoƒo mamlɛtɔ lae nye esia. Mía domee wodo go tso, gake womele abe míawo ene o . . . Ame si gbe be menye Yesue nye Kristo la o la, menye eyae nye aʋatsokala oa? Ame si gbe nu le Fofo la kple Vi la gbɔ la, ame siae nye Kristo ƒe futɔ la.”—1 Yohanes 2:18, 19, 22.

Nu si apostolo Yohanes wɔnɛ ye be, Kristo ƒe futɔ lae nye ame siwo katã ɖoe koŋ kakaa alakpanyawo tso Yesu Kristo kple Eƒe nufiafiawo ŋu

Nu kae míesrɔ̃ tso nya mawo me? Esi Yohanes zã nyagbɔgblɔ “Kristo ƒe futɔ geɖewo” la, menye ame ɖeka aɖee wòwɔnɛ o, ke boŋ enye dzesideŋkɔ na Kristo ƒe futɔwo katã. Amehawo alo ƒuƒoƒo siwo woyɔ be Kristo ƒe futɔ la kaa aʋatso hegblɔna be menye Yesue nye Kristo la alo Mesia la o, eye wodzea agbagba toa mɔ ɖe sia ɖe dzi be amewo nagakpɔ ƒomedodo si le Mawu kple Via, Yesu Kristo, dome la adze sii o. Ame siwo nye Kristo ƒe futɔa la gblɔna be Kristo teƒenɔlawoe yewonye, gake esi wònye be “mía domee wodo go tso” ta la, wotra ɖa tso Biblia ƒe nyateƒenufiafiawo gbɔ. Gakpe ɖe eŋu la, ƒuƒoƒo sia li esime Yohanes ŋlɔ eƒe agbalẽa, le “gaƒoƒo mamlɛtɔ” la me, si anya nye ɣeyiɣi si me apostoloawo ku.

Nya bubu kae Yohanes gagblɔ tso Kristo ƒe futɔ la ŋu? Esi wònɔ nu ƒom tso aʋatsonyagblɔɖilawo ŋu la, egblɔ nuxlɔ̃amenya sia be: “Nya sia nya si tso gbɔgbɔ me si ʋua eme be Yesu Kristo va le ŋutilã me la, tso Mawu gbɔ. Gake nya sia nya si tso gbɔgbɔ me si meʋua Yesu me o la, metso Mawu gbɔ o. Gawu la, esiae nye Kristo ƒe futɔ la ƒe nya, si miese be egbɔna, eye azɔ ele xexea me xoxo.” (1 Yohanes 4:2, 3) Emegbe la, Yohanes gate gbe ɖe nya sia dzi le eƒe agbalẽ evelia me esi wògblɔ be: “Ameblela geɖewo do go yi xexea me, ame siwo meʋua Yesu Kristo me be eva le ŋutilã me o. Esiae nye ameblela la kple Kristo ƒe futɔ la.” (2 Yohanes 7) Eme kɔ ƒãa be, nu si Yohanes wɔnɛ ye be, Kristo ƒe futɔ lae nye ame siwo katã ɖoe koŋ kakaa alakpanyawo tso Yesu Kristo kple Eƒe nufiafiawo ŋu.

‘AƲATSONYAGBLƆÐILAWO’ KPLE “SEDZIMAWƆLA” LA

Yesu xlɔ̃ nu be aʋatsonyagblɔɖilawo ava ‘le alẽgbalẽwo me, evɔ wonye amegãxi nyanyrawo’

Hafi Yohanes nava ŋlɔ nu tso mawusubɔsubɔ me ameflula mawo ŋu la, Yesu Kristo ɖo aɖaŋu na eyomedzelawo  be: “Mikpɔ nyuie le aʋatsonyagblɔɖila siwo vaa mia gbɔ le alẽgbalẽ me, evɔ le ememe la, wonye amegãxi nyanyrawo la ŋuti.” (Mateo 7:15) Nenema kee apostolo Paulo hã xlɔ̃ nu Kristotɔwo le Tesalonika be: “Migana ame aɖeke nakplɔ mi atrae le mɔ aɖeke nu o, elabena ŋkeke ma mava o, negbe ɖe xɔsegbegbe la va gbã, eye woɖe sedzimawɔla, si nye tsɔtsrɔ̃vi la fia hafi.”—2 Tesalonikatɔwo 2:3.

Eya ta le ƒe alafa gbãtɔ me la, aʋatsonyagblɔɖilawo kple xɔsegbelawo nɔ dɔ dzi henɔ agbagba dzem xoxo be yewoagblẽ nu le Kristo-hamea ŋu. Ame siwo katã kakaa aʋatsonufiafiawo le Yesu Kristo kple eƒe nufiafiawo ŋu lae Yohanes yɔ be “Kristo ƒe futɔ la.” Ale si Yehowa bua woe la dze ƒãa esi Paulo yɔ wo be “tsɔtsrɔ̃vi la.”

KPƆ NYUIE LE KRISTO ƑE FUTƆ LA ƑE AMEBEBLEWO ŊU EGBEA

Ke egbea ya ɖe? Amehawo kple ƒuƒoƒo siwo nye Kristo ƒe futɔ la gatsia tsitre ɖe Kristo kple eƒe nufiafiawo ŋu kokoko. Woɖonɛ koŋ kakaa alakpanyawo kple susu be yewoana amewo naganya Fofo la, si nye Yehowa Mawu, kple Via, Yesu Kristo, nyuie o. Esɔ be míakpɔ nyuie le subɔsubɔhawo ƒe aʋatsonufiafia mawo ŋu. Na míakpɔ eƒe kpɔɖeŋu eve aɖewo ɖa.

Ƒe alafa geɖee enye esia subɔsubɔhawo kakaa Mawuɖekaetɔ̃ ƒe nufiafiaa hegblɔna be Fofo la kple Vi la siaa nye ame ɖeka. Eya ta Kristo ƒe futɔ la na amewo meganya ame si tututu Yehowa Mawu kple Yesu Kristo nye o. Esia wɔe be dzianukwaretɔwo mete ŋu dzesi Yesu Kristo nyuie ne woasrɔ̃ eƒe kpɔɖeŋu o, eye womete ŋu te ɖe Mawu hã ŋu abe ale si Biblia de eƒe dzi ƒo na wo ene o.—1 Korintotɔwo 11:1; Yakobo 4:8.

Subɔsubɔhawo gana amewo tɔtɔ ɖe edzi le esi womaa Biblia siwo me woɖe Mawu ƒe ŋkɔ ŋutɔŋutɔ, Yehowa, ɖa le ta. Wowɔa esia togbɔ be ŋkɔ Yehowa dze le Biblia ƒe nuŋlɔɖi gbãtɔawo me zi gbɔ zi 7,000 sɔŋ gɔ̃ hã. Nu kae do tso eme? Esia wɔe be amewo meganya ame si tututu Mawu vavã la nye kura o.

Gake ne ame siwo dina be yewoasubɔ Mawu le anukware me la va nya Mawu ƒe ŋkɔ Yehowa la, esia wɔnɛ be woa kplii dome va nɔa kplikplikpli. Aleae wòdzɔ le Richard, si gblɔ be yeɖo dze kple Yehowa Ðasefo eve la gome. Egblɔ be: “Wotsɔ Mawu vavã la ƒe ŋkɔ Yehowa fiam le Biblia me. Nyemenya tsã be ŋkɔ le Mawu si o, gake esi mekpɔe be ŋkɔ le esi la, edo dzidzɔ nam ale gbegbe.” Tso ɣemaɣi la, ewɔ tɔtrɔwo le eƒe agbenɔnɔ me wòwɔ ɖeka kple Biblia ƒe nufiafiawo ale be yeadze Yehowa ŋu. Egblɔ be: “Mawu ƒe ŋkɔ nyanya kpe ɖe ŋunye nye kplii dome va le kplikplikpli.”

Kristo ƒe futɔ la na ame miliɔn geɖe le gbɔgbɔmeviviti me ƒe alafa geɖee enye esia. Gake ne míesrɔ̃ Mawu ƒe Nya, Bibliaa la, míanya ame si tututu Kristo ƒe futɔ la nye eye míavo tso Kristo ƒe futɔ la ƒe aʋatsonufiafiawo kple amebebleawo me.—Yohanes 17:17.