Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  May 2015

 NYATI SI LE AKPAA DZI

Ðe Nuwuwua Gogoa?

Ðe Nuwuwua Gogoa?

Ðe Mawu aɖe mɔ be amegbetɔwo nayi edzi anɔ wo ɖokuiwo dzi ɖum ʋuu keke woava tsrɔ̃ amegbetɔƒomea katã mlɔeba? Ao. Abe ale si míekpɔe le nyati gbãtɔa me ene la, Mawu ade nu nyaa me ahaɖe xaxa kple fukpekpe siwo me tom ameƒomea le ƒe alafa geɖewoe nye esia la ɖa. Amegbetɔwo kple anyigbaa Wɔla la di be nànya be ɣeyiɣi si me yele afɔ ɖe ge la le aƒe tum. Aleke Mawu na míenya nya vevi siae?

Bu kpɔɖeŋu sia ŋu kpɔ: Tsɔe be ètsɔ ʋu yina teƒe aɖe si mènya o. Ðewohĩ àwɔ numekuku le Internet nyadiƒewo, anyigbatatawo, kple mɔfiamegbalẽ bubuwo me hafi adze mɔ. Ne èle mɔa dzi yina eye nèkpɔ mɔfiadzesi siwo wɔ ɖeka kple nyatakaka siwo ŋu nèke ɖo le wò numekukua me la, àka ɖe edzi godoo be madidi o yeaɖo afi si yim yele. Nenema kee, Mawu hã tsɔ eƒe Nya, si ƒo nu tso nu ɖedzesi siwo anɔ dzɔdzɔm le xexea me godoo ŋu la na mí be wòafia mɔ mí. Eya ta esi míekpɔe be nudzɔdzɔ mawo, siwo le abe mɔfiadzesiwo ene la, le eme vam la, ena míeka ɖe edzi be míele ɣeyiɣi si me nuwuwua ava la me.

Biblia gblɔ tso blema ke be, xexea ava ɖo ɣeyiɣi tɔxɛ aɖe me, le esi me nuwuwua ava. Egblɔ be le ɣeyiɣi ma me la, xexemenudzɔdzɔwo kple nu siwo ava ameƒomea dzi la ato vovo kura le ŋutinya katã me. Bu dzesi siwo ŋu Mawu ƒe Nya ƒo nu tsoe la dometɔ aɖewo ŋu kpɔ.

1. TƆTRƆ GÃWO AVA XEXEA ME GODOO Wogblɔ nu vovovo siwo adzɔ le anyigba dzi, siwo anye dzesi ƒokpli la le nyagblɔɖi aɖe me le Mateo ta 24 lia me. Nudzɔdzɔ mawo anye dzesi na ‘nuɖoanyia ƒe nuwuɣi,’ eye woanɔ edzi yim va se ɖe esime “nuwuwu la ava.” (Kpukpui 3, 14) Nudzɔdzɔ mawo dometɔ aɖewoe nye be aʋawɔwɔ gãwo adzɔ, nuɖuɖu ave, anyigba aʋuʋu le teƒeteƒewo, sedzimawɔmawɔ adzi ɖe edzi, amewo ƒe lɔlɔ̃ ayi to, eye subɔsubɔhakplɔlawo ato ayemenuwɔnawo dzi akplɔ amewo atrae. (Kpukpui 6-26) Enye nyateƒe be, nu mawo dometɔ aɖewo le dzɔdzɔm ƒe alafa geɖewoe nye esia ya. Ke hã, esi nuwuwua le aƒe tum la, nu mawo katã anɔ dzɔdzɔm le nuwuɣia, si me kuxiwo ado agbogbo ɖo la, me. Woanɔ dzɔdzɔm kpe ɖe nuxlɔ̃amedzesi etɔ̃ siwo gbɔna ŋu.

2. AMEWO ƑE NƆNƆME Biblia gblɔ be le “ŋkeke mamlɛawo,” siwo nye ɣeyiɣi si me nuwuwua ava me la, amewo ƒe nɔnɔme agblẽ keŋ wòaɖe dzesi. Egblɔ be: “Amewo anye ɖokuilɔ̃lawo, galɔ̃lawo, adegbeƒolawo, dadalawo, busunyagblɔlawo, ame maɖoto dzilawo, ame madakpewo, ame mawɔnuteƒewo, ame siwo melɔ̃a ame ƒe nya o, ame siwo melɔ̃na ɖe ɖoɖo aɖeke dzi o, ameŋugblẽlawo, ame siwo meɖua wo ɖokuiwo dzi o, ame wɔadãwo, ame siwo melɔ̃a nu nyui o, yomemɔfialawo, totrilawo, ame siwo doa wo ɖokuiwo ɖe dzi glodzoo, ame siwo lɔ̃a dzidzɔkpɔkpɔ wu esi woalɔ̃ Mawu.” (2 Timoteo 3:1-4) Enye nyateƒe be, menye nu yeyee amemabumabu nye ya o, ke hã, “ŋkeke mamlɛawo” me koe nɔnɔme sia agblẽ ɖe edzi le ale gbegbe be, esɔ be woagblɔ be anye “ɣeyiɣi sesẽ siwo me nɔnɔ asesẽ.” Ðe wò hã ède dzesii be amewo ƒe nɔnɔme le gbegblẽm ɖe edzia?

3. WOLE ANYIGBA LA GBLẼM Biblia gblɔ be Mawu ‘atsrɔ̃ ame siwo le anyigba la gblẽm.’ (Nyaɖeɖefia 11:18) Aleke wole anyigba la gblẽm? Alea tɔgbie wogblɔ be nuwo nɔ le Noa ƒe ŋkekea me esi Biblia gblɔ be: “Anyigba la gblẽ le Mawu vavã la ŋkume, eye ŋutasesẽ yɔ anyigba la dzi. Ɛ̃, Mawu kpɔ anyigba la, eye wòkpɔ be wogblẽe.” Eya ta Mawu gblɔ le ame gblẽku mawo ŋu be: “Matsrɔ̃ wo.” (1 Mose 6:11-13) Ðe nède dzesii be ŋutasẽnuwɔwɔ le dzidzim ɖe edzi le anyigbaa katã dzia? Gakpe ɖe eŋu la, amegbetɔwo ƒe mɔ̃ɖaŋununya va ɖo teƒe aɖe si ɖe dzesi ŋutɔ le ŋutinya me: Ŋutete le wo si fifia be woatsrɔ̃ amegbetɔwo katã ɖa le anyigba dzi. Elabena aʋawɔnu sesẽwo le wo si. Eye wogale anyigbaa gblẽm le mɔ bubu nu. Amegbetɔwo to woƒe nuwɔnawo dzi le ɖoɖo si Mawu wɔ be wòalé agbe ɖe te le anyigba dzi, siwo  dome ya si míegbɔna, lãwo, atiwo kple nu miemiewo kple wo nɔƒewo kpakple atsiaƒuwo le la dome gblẽm madzudzɔmadzudzɔe.

Bia ɖokuiwò be, ‘Le ƒe alafa ɖeka si va yi me la, ɖe ŋutete nɔ amegbetɔwo si be woatsrɔ̃ wo ɖokuiwo kple anyigbaa siaa?’ Gake fifia ŋusẽ ma le amegbetɔwo si, elabena wole aʋawɔnu gãgãwo nu ƒom ƒu eye wole anyigba ƒe teƒeteƒewo gblẽm keŋkeŋ. Eye edze abe wole ŋgɔyiyi wɔm le mɔ̃ɖaŋununya me kabakaba ale gbegbe be amegbetɔwo ŋutɔwo mete ŋu le egɔme sem kaka woahayi asa ƒo ge na emetsonu gbegblẽawo o ene. Gake menye amegbetɔwo si mee anyigbaa ƒe etsɔme le o, eye menye woawoe atso nya me le eŋu hã o. Mawu maɖe mɔ be woatsrɔ̃ amegbetɔwo katã ɖa le anyigba dzi o, ke boŋ ade nu nyaa me ahatsrɔ̃ ame siwo le anyigbaa gblẽm. Aleae wòdo ŋugbee, eye awɔe hã!

4. GBEƑÃÐEÐEDƆ SI WƆM WOLE LE XEXEA ME KATà Dzesi si wogblɔ ɖi be wòafia be nuwuwua gogo la ƒe akpa aɖee nye be woanɔ dɔ aɖe si womewɔ kpɔ o la wɔm, esi Biblia gblɔ be: “Woaɖe gbeƒã Fiaɖuƒe ŋuti nya nyui sia le anyigba blibo la katã dzi be wòanye ɖaseɖiɖi na dukɔwo katã, eye ekema nuwuwu la ava.” (Mateo 24:14) Gbeƒãɖeɖedɔ sia ato vovo sãsãsã na agbagba si subɔsubɔhawo dze be yewoatrɔ dzi me na amewoe la. Gake le ŋkeke mamlɛawo me la, gbedeasi aɖe koŋ dzie gbeƒãɖelawo ate gbe ɖo le gbeƒãɖeɖedɔ sia me; eyae nye “Fiaɖuƒe ŋuti nya nyui sia.” Ðe nènya subɔsubɔha aɖe si yia edzi ƒoa nu tso gbedeasi ma tututu ŋua? Eye ne edze abe ame aɖewo ɖea gbeƒã gbedeasi sia ene hã la, ƒuƒoƒo sue aɖe koe wonye le nuto aɖe mea, alo wokaka nya nyui sia wòɖo “anyigba blibo la katã dzi be wòanye ɖaseɖiɖi na dukɔwo katã”?

Wole gbeƒã ɖem Mawu Fiaɖuƒea le gbegbɔgblɔ alafa geɖe me le xexea me godoo

“Fiaɖuƒe ŋuti nya nyui sia” koŋ ŋue Internet ƒe nyatakakadzraɖoƒe si nye www.jw.org/ee ƒoa nu tsoe. Agbalẽ vovovowo le nyatakakadzraɖoƒe sia le gbegbɔgblɔ siwo wu 700 me, siwo ƒo nu tso gbedeasi ma ke ŋu. Ðe nènya ɖoɖo bubu aɖe si dzi tom wole le gbeƒã ɖem nya nyuia le anyigba katã dzia? Hafi woava to Internet vɛ gɔ̃ hã la, wonya Yehowa Ðasefowo nyuie le ale si wodze agbagba kaka Mawu Fiaɖuƒe ŋuti nya nyuia ta. Tso ƒe 1939 me ke la, nya siwo nye Gbetakpɔxɔ “Le Gbeƒã Ðem Yehowa Ƒe Fiaɖuƒe” dzena le magazine sia ƒe tata ɖe sia ɖe ƒe akpa dzi. Agbalẽ aɖe si ƒo nu tso subɔsubɔhawo ŋu gblɔ be, ale si Yehowa Ðasefowo ɖe gbeƒã nya nyuia “dzonɔamemetɔe kple afi si gbegbe woɖe gbeƒã ɖoe la ƒo ɖe sia ɖe ta kloe.” Gbeƒãɖeɖedɔ sia le kpe ɖom edzi be eteƒe madidi o, Mawu Fiaɖuƒea aɖe afɔ ahana nya nyui si nye be “nuwuwu la ava” nava eme.

ƔEYIƔI SI TO VOVO KURA LE AMEƑOMEA ƑE ŊUTINYA ME

Ède dzesii be Biblia ƒe nuxlɔ̃amedzesi ene siwo katã me míedzro le nyati sia me la le eme vam le wò agbenɔɣia? Ƒe alafa ɖeka kple edzivɔe nye esia  magazine sia le nyatakaka nam exlẽlawo tso xexemenudzɔdzɔ siwo akpe ɖe wo ŋu woawo ŋutɔwo nade dzesii be nuwuwua le aƒe tum la ŋu. Ke hã, ɖikela aɖewo gbe be yewomalɔ̃ ɖe edzi o; wogblɔna be nyateƒenya siawo kple akɔntabubuawo nye ame ŋutɔ ƒe nuŋububu dzro ko, eye woate ŋu atrɔ asi le wo ŋu woadze abe ŋkubiãnya ene. Eye wogblɔna hã be, esi wònye be wole ŋgɔyiyi wɔm le kadodomɔnuwo me le xexea me godoo ta la, eva le dzedzem abe ɖe xexemekuxiwo le gã dom ɖe edzi ene. Aleke kee wòɖale o, kpeɖodzi gbogboawo ɖee fia be míele ɣeyiɣi si to vovo kura le ameƒomea ƒe ŋutinya me la ƒe nuwuɣi.

Nunyala aɖewo xɔe se be tɔtrɔ gãwo ava anyigba sia dzi kpuie. Le kpɔɖeŋu me, le ƒe 2014 me la, Dzɔdzɔmeŋutinunya Kple Dedienɔnɔ Habɔbɔ ƒe magazine si nye Atɔmŋusẽ Ŋuti Nunyalawo Ƒe Nyatakakagbalẽ (si le Eŋlisigbe me) xlɔ̃ nu Dukɔ Ƒoƒuawo ƒe Dedienɔnɔ Ŋuti Ðaŋuɖoha tso kuxi gã siwo ate ŋu ade ameƒomea ƒe agbe afɔku me ŋu. Numekula mawo gblɔ be: “Esi míewɔ numekuku le kuxi siawo ŋu nyuie la, míeƒo nya ta be vɔvɔ̃ si li be mɔ̃ɖaŋununya ƒe ŋgɔyiyi ate ŋu ahe tsɔtsrɔ̃ avɛ na ameƒomea la gakpɔtɔ li kokoko.” Ame geɖe xɔe se be míeva ɖo ɣeyiɣi aɖe si to vovo kura le ameƒomea ƒe ŋutinya me la me. Magazine sia si xlẽm nèle la talawo kple exlẽlawo dometɔ geɖe ka ɖe edzi be ɣeyiɣi si me míele la to vovo kura eye eya tututue nye ŋkeke mamlɛawo, eya ta, nuwuwua gogo. Gake mehiã be nànɔ vɔvɔ̃m na nu si adzɔ le etsɔme o, ke boŋ dzidzɔnyae emetsonua anye. Nu ka tae míegblɔe alea? Nu si tae nye be àte ŋu atsi agbe ne nuwuwua va!