Dzo kpo yi emenuwo dzi

Dzo kpo yi emenuawo dzi

 AGBEMEŊUTINYA

Jairo Ƒe Ŋkuwoe Kpena Ðe Eŋu Wòsubɔa Mawu

Jairo Ƒe Ŋkuwoe Kpena Ðe Eŋu Wòsubɔa Mawu

Ðe nàte ŋu abu ale si agbea anɔ na wò nenye be màte ŋu aʋã wò abɔwo kple afɔwo o, negbe wò ŋkuwo ko ŋu kpɔa? Nɔnɔme ma mee nɔvinyeŋutsu Jairo le. Ke hã taɖodzinu le eƒe agbe ŋu. Hafi maƒo nu tso nu si tae Jairo kpɔe be enyo be yele agbe ŋu la, anyo be magblɔ eƒe agbemeŋutinya.

Esi wodzi Jairo la, ahɔhɔ̃medɔ si nye cerebral palsy, * si nana ame ƒe abɔwo kple afɔwo siaa tuna, si woyɔna be spastic quadriplegia la, le eŋu. Esia wɔe be mekpɔ ŋusẽ ɖe eƒe abɔɖeɖe kple afɔɖeɖe dzi o. Eƒe ahɔhɔ̃ metea ŋu fiaa mɔ eƒe lãkusiwo o, eya ta eƒe afɔwo dana hetrona le wo ɖokui si. Ale si Jairo ƒe abɔwo kple afɔwo ŋutɔwo ʋãna le wo ɖokuiwo si alea nana wòwɔa nu vevi eɖokui ɣeaɖewoɣi. Ne ame siwo tsɔ ɖe egbɔ mele ŋudzɔ o la, ate ŋu awɔ nu vevi woawo hã. Nublanuitɔe la, ele be woabla eƒe abɔwo kple afɔwo ɖe eƒe bunɔkekea ŋu be wòagawɔ nu vevi amewo o.

FU SIWO WÒKPE ESI WÒNƆ TSITSIM

Esi Jairo nɔ tsitsim la, ekpe fu ale gbegbe. Esi wòxɔ ɣleti etɔ̃ ye eƒe dɔa ƒe dzesiwo dze egɔme; edzea ti eye esia nana wòyia ɖi me. Zi geɖe la, Dada fanae ɖe akɔnu hedea afɔ du me yia kɔdzi. Eya ŋutɔ susuna be eku vɔ.

Esi wònye be Jairo ƒe abɔwo kple afɔwo me hena hetrona ta la, ewɔe be eƒe ƒuwo glɔ̃. Esi wòxɔ ƒe 16 la, eɖɔli eƒe aligo, si wɔe be ehiã be woawɔ dɔ sesẽ aɖe nɛ ako eƒe ata, ali, kple eƒe aligo siaa. Megaɖoa ŋku ale si Jairo nɔa avi fam zã sia zã esi wonɔ hayahayam la dzi kokoko.

Jairo ƒe dɔa na be amewoe wɔa nu sia nu nɛ, abe nuɖuɖu, awudodo, kple ekɔkɔ ada ɖe aba dzi ene. Dada kple Papa ye kpɔa eƒe hiahiã mawo gbɔ nɛ. Togbɔ be Jairo hiã kpekpeɖeŋu ɣeawokatãɣi hã, mía dzilawo ɖoa ŋku edzi nɛ ɣesiaɣi be menye amegbetɔwo si me koe eƒe agbe le o, ke boŋ Mawue lé eƒe agbe ɖe te.

WOVA KE ÐE DZEÐOÐO ƑE MƆNU AÐE ŊU

Yehowa Ðasefowoe mía dzilawo nye, eye woxlẽa Biblia me ŋutinyawo na Jairo tso eƒe ɖevime ke. Wonya nyuie be tameɖoɖo nɔa ame ƒe agbe ŋu wu ne ƒomedodo le woa kple Mawu dome. Ðeko wòdzɔ be Jairo ƒe ametia, si ʋãna enuenu la mede edzi o, gake etsɔmemɔkpɔkpɔ nyui si ŋu kakaɖedzi le ate ŋu asu esi. Ke hã womeka ɖe edzi nenye be Jairo ate ŋu ase Biblia me nyateƒea gɔme o.

Gbe ɖeka, le Jairo ƒe ɖevime la, Papa biae be, “Jairo, meɖe kuku, àte ŋu aƒo nu nama?” Eyome wògblɔ  nɛ be, “Ne èlɔ̃m vavã la, àƒo nu nam!” Esi Papa ɖe kuku nɛ be wòagblɔ nya ɖeka pɛ ko na ye la, aɖatsi lólo ɖe ŋku dzi na Jairo enumake. Togbɔ be Jairo dze agbagba be yeaɖe yeƒe seselelãmewo agblɔ hã la, ɖeko nàsee be ete gbe me. Ete ɖe Papa dzi be yena Jairo fa avi. Ke hã nudzɔdzɔ ma na Papa kpɔe be Jairo se nya si yegblɔ la gɔme. Gake kuxiae nye be mate ŋu aƒo nu o.

Eteƒe medidi o, mía dzilawo de dzesii be ɣeaɖewoɣi la, Jairo ʋãa eƒe ŋkuwo kabakaba abe ɖe wòle agbagba dzem be yeagblɔ nya aɖe ene. Etena ɖe Jairo dzi ŋutɔ be ame aɖeke metea ŋu sea nya si yedi be yeagblɔ la gɔme o. Gake ne dzinyelawo te ŋu se dzesi siwo wɔm wòle kple nu si ta wòle ŋku ɖem ɖo gɔme la, enumake Jairo ɖoa nukomo gã aɖe. Ema dzi wòtona daa akpe na wo.

Nuƒoƒoŋutete ŋuti aɖaŋuɖola aɖe ɖo aɖaŋu na mí be, be ƒomea nate ŋu aɖo dze kplii nyuie la, anyo be míado míaƒe asiwo ɖe dzi ne míele nya aɖe si ƒe ŋuɖoɖo anye ɛ̃ alo ao biamee. Nuɖusi afia ɛ̃, eye miasi afia oa. Ne míewɔe alea la, ana míanya nu si dim wòle ne etrɔ eƒe ŋkuwo ɖe abɔ si alo ekemɛ ŋu.

NU ÐEDZESI AÐE LE JAIRO ƑE AGBE ME

Yehowa Ðasefowo dea takpekpewo zi etɔ̃ le ƒea me, eye le takpekpe mawo me la, woƒoa nuƒo siwo me woɖea Biblia me na nyasela gbogbowo le. Ɣesiaɣi si wole nuƒo siawo ƒomevi ƒom na ame siwo di be yewoaxɔ nyɔnyrɔ la, dzi dzɔa Jairo ale gbegbe. Gbe ɖeka, esime Jairo xɔ ƒe 16 la, Papa biae be, “Jairo, àdi be yeaxɔ nyɔnyrɔa?” Ðeko wòtrɔ eƒe ŋkuwo ɖe Papa ƒe nuɖusi ŋu enumake, eye esia ɖee fia be edi be yeaxɔ nyɔnyrɔ. Eyome Papa biae be, “Ðe nèdo gbe ɖa na Mawu hedo ŋugbe nɛ be yeasubɔe tegbeea?” Jairo gatrɔ eƒe ŋkuwo ɖe Papa ƒe nuɖusi ŋu ake. Eme kɔ ƒãa be Jairo tsɔ eƒe agbe ɖe adzɔgbe na Yehowa xoxo.

Esi wowɔ Biblia me numedzodzro vovovowo kplii megbe la, esia hã ɖee fia be Jairo se nu si ta wòle vevie be Kristotɔ naxɔ nyɔnyrɔ la gɔme. Esia wɔe be Jairo va ɖo biabia vevitɔ si wobiae kpɔ la ŋu, le ƒe 2004 me, esi wobiae be, “Ðe nètsɔ ɖokuiwò ɖe adzɔgbe na Mawu be yeawɔ eƒe lɔlɔ̃nua?” Jairo trɔ eƒe ŋkuwo kpɔ dziƒo. Emae nye nyaŋuɖoɖo be ɛ̃ ƒe ɖoɖo si wowɔ nɛ do ŋgɔ. Esia wɔe be, wòxɔ nyɔnyrɔ hezu Yehowa Ðasefo esime wòxɔ ƒe 17.

EƑE ŊKUWO LE MAWU ƑE NUWO ŊU

Le ƒe 2011 me la, mɔ yeye aɖe si dzi Jairo ato aɖo dze kple amewo la ʋu ɖi nɛ azɔ—si nye kɔmpiuta si wotsɔa ŋku fiaa mɔe. Mɔ̃ɖaŋunu sia tea ŋu dea dzesi afi sia afi si ame trɔ eƒe ŋku yibɔea ɖo. Ne eɖe ŋku ɖe nutata aɖe le kɔmpiutaa dzi alo ƒo aɖaba ɖee ko la, ewɔa dɔ abe ɖe wòzi edzi kple asi ene. Eya ta wowɔ kɔmpiutakpe aɖe si dzi nutata vovovowo le la na Jairo be wòakpe ɖe eŋu wòate ŋu aɖo dze  kple amewo. Ne ele nutatawo dometɔ aɖe kpɔm eye wòƒo aɖaba zi ɖeka ko la, ɖoɖo siwo wowɔ ɖe mɔ̃a me la nana kɔmpiutaa gblɔa nya siwo wolé ɖe mɔ̃a dzi.

Esi Jairo va le Biblia gɔme sem ɖe edzi la, edi vevie be yeakpe ɖe ame bubuwo ŋu woasrɔ̃ nu tso Mawu ŋu. Ne míaƒe ƒomea le Biblia srɔ̃m abe ale si míewɔnɛ Kwasiɖa sia Kwasiɖa ene la, sẽe kple sẽe la, eɖea ŋku ɖem hekpɔa kɔmpiutaa dzi, eye wòwɔa esia enuenu. Aleae wòɖoa ŋku edzi nam be maŋlɔ ale si yeaɖo nya ŋui ne míeyi Kristotɔwo ƒe kpekpewo la ɖe mɔ̃a dzi na ye.

Ne míeyi nusrɔ̃ƒe la, egbɔa dzi ɖi kpɔa kɔmpiutaa dzi heƒoa aɖaba ɖe nutata si sɔ la le kɔmpiutakpea dzi, eye enumake mɔ̃a ŋutɔ gblɔa nya si wòdi be yeagblɔ la ame sia ame sena. Ɣesiaɣi si wòte ŋu de dzi ƒo na hamea me tɔwo le mɔ sia nu la, ekoa alɔgbɔnu gã aɖe. Jairo xɔlɔ̃ siwo nye sɔhɛwo dometɔ ɖeka si ŋkɔe nye Alex gblɔ be, “Ɣesiaɣi si Jairo ɖo nya ŋu ku ɖe Biblia me nyatia aɖe ŋu mese la, ewɔa dɔ ɖe dzinye ŋutɔ.”

Jairo le eƒe kɔmpiutaa zãm tsɔ le nya ŋu ɖom le nusrɔ̃ƒe

Jairo zãa eƒe ŋkuwo tsɔ gblɔa eƒe dzixɔsewo na ame bubuwo hã. Mɔ aɖe si dzi wòtona wɔa esia ye nye be eƒoa aɖaba ɖe nutata si nye abɔ dama si me lãwo kple ame ƒomevi vovovowo le le ŋutifafa me. Ne eƒo aɖaba alea ko la, eƒe kɔmpiutaa ŋutɔ gblɔna be, “Mɔkpɔkpɔ si ŋu Biblia ƒo nu tsoe nye be anyigba ava zu paradiso, afi si dɔléle kple ku maganɔ azɔ o, Nyaɖeɖefia 21:4.” Ne nyaa do dzidzɔ na ame si wòle gbeƒã ɖem na la, egaƒoa aɖaba ɖe nutata bubu eye eƒe kɔmpiutaa gblɔna be, “Àdi be masrɔ̃ Biblia kpli yea”? Nukutɔe la, mía tɔgbui lɔ̃ be wòasrɔ̃ Biblia kpli ye. Ewɔa dɔ ɖe ame dzi ŋutɔ be wòakpɔ ale si Jairo srɔ̃a nu kple tɔgbui blewuu esime hati Ðasefo aɖe le kpekpem ɖe eŋu la teƒe! Dzidzɔtɔe la, Tɔgbui xɔ nyɔnyrɔ le nutome gã takpekpe si wowɔ le Madrid, le August 2014 me la me.

Jairo ƒe sukunufialawo gɔ̃ hã de dzesi ale si gbegbe wòlɔ̃ Mawui. Aƒenɔ Rosario, si nye eƒe nuƒoƒoŋutete ŋuti aɖaŋuɖola gblɔ gbe ɖeka be: “Ne ahiã be maɖo subɔsubɔha aɖe me le etsɔme la, ke Yehowa Ðasefo koe mazu. Mekpɔ ale si gbegbe Jairo ƒe xɔse na taɖodzinu vavã va le eƒe agbe ŋui, togbɔ be eƒe nɔnɔmea sesẽ ŋutɔ hã.”

Ɣesiaɣi si woxlẽ ŋugbedodo si le Biblia me, si gblɔ be, “Xɔdrɔ̃wo ati kpo abe zi ene, eye aɖetututɔwo ƒe aɖe atso aseye” la, dzi dzɔa Jairo ale gbegbe, eye esia dzena le mo nɛ. (Yesaya 35:6) Togbɔ be dzi ɖena le eƒo ɣeaɖewoɣi hã la, dzidzɔmee wònye. Nu si tae wòle aleae nye be, eƒe agbenɔnɔ bliboa ku ɖe eƒe Mawu kple exɔlɔ̃ Kristotɔwo ŋu. Eƒe dzidzɔ kple eƒe xɔse sesẽ la nye kpeɖodzi be Yehowa subɔsubɔ nana agbea vivina, togbɔ be woanɔ kuxi sesẽwo me tom hã.

^ mm. 5 Cerebral palsy (CP) koŋ ye nye ŋkɔ si woyɔna na ahɔhɔ̃medɔ si nana ame megatea ŋu ʋãa eƒe ŋutinuwo le dzɔdzɔme nu o. Ate ŋu ana amea nadze ti, alo ana nuɖuɖu kple nuƒoƒo nasesẽ nɛ. Dɔléle sia ƒe sesẽtɔ ye woyɔna be spastic quadriplegia; dɔ sia ate ŋu awɔe be ame ƒe abɔwo kple afɔwo siaa nadze ti eye eƒe kɔ natu gblɔdɔɔ.