Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  February 2015

 SRƆ̃ WOƑE XƆSE | YOSEF

“Alo Drɔ̃e Gɔmeɖeɖe La Menye Mawu Tɔe Oa?”

“Alo Drɔ̃e Gɔmeɖeɖe La Menye Mawu Tɔe Oa?”

YOSEF le zɔzɔm le xɔdomemɔa dzi, ete fifia vlevlevle le dɔ sesẽ si wòwɔ le ŋdɔ si le vevem nagbonagboa te la ta. Ŋdɔ nɔ ʋuʋu sesĩe le Egipte ɣemaɣi ale gbegbe be gaxɔa me xɔ dzo abe kpodzo me ene. Ewɔ abe Yosef nya kpe siwo wotsɔ ɖo gaxɔa ƒe gliawo dometɔ ɖe sia ɖe kple woƒe dometsotsoawo siaa ɖekaɖeka ene. Afi mae zu enɔƒe fifia. Enye nyateƒe be wodea bubu eŋu vevie le afi sia ya, gake gamenɔla ko wògakpɔtɔ nye.

Kpɔ ale si wòanɔ ablɔɖe si me wònɔ le wo de Xebron, si nye tonuto me, afi si wòkplɔa fofoa ƒe alẽwo le la susumee ɖa! Axɔ abe ƒe 17 ene esime fofoa, Yakob, dɔe be wòazɔ kilometa geɖe ayi teƒe didi aɖe. Ekpɔe azɔ be drɔ̃eƒenya koe ablɔɖe ma si nɔ ye si tsã la nye na ye fifia. Yosef nɔviŋutsu ŋuʋãlawo lé fui vevie hetso ɖe eŋu kutɔkutɔe, eye wotsɔe dzra kluvii. Esia wɔe be wokplɔe yi keke Egipte ke; gbã la, esubɔ le Egiptetɔwo ƒe fiaŋume si ŋkɔe nye Potifar ƒe aƒe me. Yosef kpɔ eƒe aƒetɔ ƒe nuwo dzi nyuie va se ɖe esime woda alakpa ɖe esi be etee kpɔ be yeade asi Potifar srɔ̃ ŋu, eye esia tae wòle gaxɔ sia me ɖo. *—Mose ƒe Agbalẽ Gbãtɔ ta 37 kple 39.

Fifia Yosef xɔ ƒe 28; gake gbã la, ezu kluvi, eye emegbe wolée de gaxɔ me, si wɔe be ƒe ewoe nye esia wòle fu siawo katã kpem. Kpuie ko la, agbea meva nɔ nɛ abe ale si wòkpɔ mɔ nɛ ene o. Ðe woava ɖe asi le eŋu le gaxɔa me gbe ɖeka? Ðe wòagava kpɔ fofoa si ku amegã alo nɔviaŋutsu, Benyamin, si gbɔ melɔ̃a nu le o la akea? Ɣeyiɣi didi kae wòanɔ tomegaxɔ sia me ase ɖo?

Ðe nèse le ɖokuiwò me abe Yosef ene kpɔa? Ɣeaɖewoɣi la, nuwo meva yina abe ale si míekpɔ mɔ nɛ esime míenye sɔhɛwo la ene kura o. Ɛ̃, dzigbãnyawo tea ŋu tɔa ka ɖe nu va tua mí, eye ate ŋu asesẽ be míanya ale si míawɔ ado le eme alo ado dzi. Na míakpɔe ɖa be nu kae míate ŋu asrɔ̃ tso xɔse si nɔ Yosef si la me hã.

“YEHOWA NƆ KPLE YOSEF”

Yosef nyae be yeƒe Mawu, Yehowa, meŋlɔ ye be kpɔ gbeɖe o, eye esia nyanya anya kpe ɖe eŋu godoo be wòdo dzi. Esi wòle gaxɔ me le dzronyigba dzi gɔ̃ hã, Yehowa yi edzi nɔ eyram. Esia tae Biblia gblɔ be: “Yehowa nɔ kple Yosef, eye wòna gaxɔdzikpɔla ƒe dzime kɔ ɖe eŋu, eye wòve enu.” (1 Mose 39:21-23) Esi Yosef kpɔtɔ nɔ dɔ dzi sesĩe ta la, eyi edzi na mɔnukpɔkpɔ eƒe Mawu la be wòadudu yayra akɔ ɖe edzi. Aleke gbegbe wòafa akɔ nɛ enye esi be wòanyae be Yehowa megblẽ ye ɖi kpɔ gbeɖe o!

Ðe Yehowa di be Yosef nanɔ gaxɔ sia me ɖaa? Ne Yosef bu nya sia ŋu gɔ̃ hã, mate ŋu aɖo eŋu o, eye anɔ eme godoo be edo gbe ɖa tso eŋu na Mawu. Abe ale si wòdzɔna zi geɖe ene la, gbedodoɖa mawo ƒomevi ƒe ŋuɖoɖowo mevana abe ale si wokpɔa mɔ nɛ ene o. Gbe ɖeka, hoowɔwɔ nɔ edzi yim le gaxɔa me esime wokplɔ gamenɔla yeye eve aɖewo vɛ—wonye amegãwo le Farao ƒe dɔdzikpɔlawo dome. Ðeka nye fia la ƒe abolomelawo ƒe amegã; eye evelia nye eƒe ahakulawo ƒe amegã.—1 Mose 40:1-3.

 Dzɔlawo ƒe amegã tsɔ ame eve siwo nye bubumewo tsã la de asi na Yosef be wòakpɔ wo dzi. * Gbe ɖeka ƒe zã me la, wo ame evea siaa ku drɔ̃e ɖefuname aɖe wotɔwotɔwoe. Esi Yosef kpɔ wo ŋdi ma la, ede dzesii be dzi mele wo dzɔm o. Eya ta ebia wo be: “Nu ka wɔ mieɖo adã egbea ale?” (1 Mose 40:3-7) Ðewohĩ, eƒe ɖetsɔlemea na ŋutsuawo ka ɖe edzi be anyo be yewoaɖe yewoƒe kuxia dzi nɛ. Gake Yosef ya menya o, ke hã dzeɖoɖo ma awɔe be nuwo ava trɔ keŋkeŋ le eƒe agbe me. Gake ne ɖe Yosef metsɔ ɖe le eme na wo kura o la, ɖe wòava eme be woaɖo dze tso woƒe kuxiawo ŋu nɛa? Ale si wòwɔ nui la ate ŋu ana míabia mía ɖokui be, ‘Ðe metsɔa ɖe le eme na hanyevi amegbetɔwo heɖenɛ fiana be mexɔ Mawu dzi sea?’

Yosef nyo dɔme na ehati gamenɔlawo eye wòde bubu wo ŋu

Ŋutsu eveawo ɖe eme be drɔ̃e ɖefuname si yewoku la na yewotsi dzodzodzoe eye yewomese egɔme hã o—nu si gagblẽ nyaa ɖe edzie nye be ame aɖeke meli aɖe egɔme na yewo o. Egiptetɔwo dea asixɔxɔ gã aɖe drɔ̃ewo gɔme sese ŋu eye woɖoa ŋu ɖe ame siwo gblɔna be yewonye drɔ̃egɔmeɖelawo la ŋu vevie. Ŋutsu eveawo menya be Yosef ƒe Mawu, Yehowa, ye na yewoku drɔ̃eawo o. Gake Yosef ya nya. Eya ta ede dzi ƒo na wo be: “Alo drɔ̃e gɔmeɖeɖe la menye Mawu tɔe oa? Gake milĩi nam ko!” (1 Mose 40:8) Biblia nusrɔ̃viwo gakpɔtɔ dea asixɔxɔ gã aɖe Yosef ƒe nya mawo ŋu va de asi na egbea. Ne ɖe sɔlemedela ɖe sia ɖe abɔbɔ eɖokui alea ɖe! Ehiã be míalɔ̃ faa aɖe asi le ɖokuidodoɖedzi kple dada ŋu ahatrɔ ɖe Mawu ŋu be wòakpe ɖe mía ŋu míase eƒe nyaa gɔme nyuie.—1 Tesalonikatɔwo 2:13; Yakobo 4:6.

Ahakulawo ƒe amegã lĩ eƒe drɔ̃ea gbã. Elĩ drɔ̃e si wòku tso wainka si ɖe alɔ etɔ̃ si dzi wainkpowo tse ɖo la ŋu na Yosef. Waintsetseawo ɖi, eye ahakulaa fia wo me tsi ɖe kplu me na Farao. Dzidzɔtɔe la, Yehowa na Yosef se drɔ̃ea gɔme enumake. Egblɔ na ahakulaa be wainka ƒe alɔ etɔ̃awo nye ŋkeke etɔ̃; eya ta le ŋkeke etɔ̃agbe la, Farao agatsɔe aɖo eƒe dɔ nu wòanye eƒe ahakula abe tsã ene. Esi ahakulaa ƒe dzi dze eme eye wògbɔ fũu la, Yosef yi edzi gblɔ nɛ be: “Meɖe kuku, ve nunye, eye nàɖo ŋku dzinye na Farao.” Yosef ɖe eme nɛ be ɖe wolé ye le yewo de hedzra kluvii eye fifia wolé ye de gaxɔ me madzemadzee.—1 Mose 40:9-15.

Esi abolomelaa kpɔ bena Yosef gblɔ nya nyui na ahakulaa tso eƒe drɔ̃ea ŋu la, dzi ɖo eƒo wòbia Yosef be wòaɖe drɔ̃e si yeku, esi me yekpɔe be yetsɔ abolo kusi etɔ̃ ɖe ta eye xeviwo va le aboloawo ɖum le kusi etametɔa me la gɔme na ye. Mawu na Yosef se nya sakɔ sia hã gɔme. Gake menye nya nyui ye wònye na abolomelaa o. Yosef gblɔ nɛ be: “Drɔ̃e la gɔme enye si: Kusi etɔ̃awo nye ŋkeke etɔ̃. Le ŋkeke etɔ̃agbe la, Farao atso ta le nuwò, eye wòahe wò ɖe  ati ŋu, eye xeviwo ava ɖu wò ŋutilã.” (1 Mose 40:16-19) Yosef ɖe gbeƒã Mawu ƒe gbedeasi si nye nya nyui kple esi nye ʋɔnudɔdrɔ̃, siwo ava eme kpuie la dzinɔameƒotɔe abe ale si Mawu subɔla wɔnuteƒewo katã wɔnɛ ene.—Yesaya 61:2.

Ŋkeke etɔ̃agbe la, Yosef ƒe nyawo va eme pɛpɛpɛ. Farao ɖu eƒe dzigbezã—gake Mawu subɔla siwo nɔ anyi le Biblia-ŋlɔɣiwo ya meɖua azã sia o—eye wòdrɔ̃ ʋɔnu eƒe dɔla eveawo. Wotso kufia na abolomelaa abe ale si Yosef gblɔe ene, gake wogatsɔ ahakula ya ɖo eƒe dɔ nu abe tsã ene. Gake nublanuitɔe la, ŋutsu ɖekematsɔlemetɔ ma ŋlɔ Yosef be keŋkeŋ.—1 Mose 40:20-23.

“GBEÐE, MENYE NYEE O”

Ƒe eve sɔŋ va yi. (1 Mose 41:1) Wò ya kpɔ ale si wòate ɖe Yosef dzii ɖa! Ðewohĩ tso esime Yehowa na wòse ahakula kple abolomela ƒe drɔ̃e ɖefunameawo gɔme la, eva nɔ mɔ kpɔm vevie wu tsã. Tso ŋkeke ma dzi la, ne ŋu nya ke ko la, Yosef kpɔa mɔ vevie be ɖewohĩ esiae nye ŋkeke si dzi woaɖe asi le ye ŋu—gake gbeɖe; ɖeko wògayia eƒe dɔwo dzi le gaxɔa me abe ale si wòwɔna ɖaa ene. Naneke metrɔ o. Dzidodo le ƒe eve mawo mee anya sesẽ na Yosef wu ɖe sia ɖe. Ke hã mena ta o; eyi edzi ɖo ŋu ɖe eƒe Mawu, Yehowa, ŋu kokoko. Dzi meɖe le eƒo o, ke boŋ eɖoe kplikpaa be yeado dzi, eye ɖeko ŋusẽ yeye gaɖo eŋu le ɣeyiɣi sesẽ mawo me.—Yakobo 1:4.

Le ɣeyiɣi sesẽ siawo me la, mía dometɔ kae mehiã dzidodo o? Hafi míado dzi le agbemekuxi siwo nu gbea tsotso me la, míehiã dzigbɔɖi, tameɖoɖo kplikpaa, kple ŋutifafa si tsoa Mawu ɖeɖe ko gbɔ. Mawu ate ŋu akpe ɖe mía ŋu míaɖu dziɖeleameƒo dzi eye míalé mɔkpɔkpɔ me ɖe asi abe ale si wòwɔe na Yosef ene.—Romatɔwo 12:12; 15:13.

Ðewohĩ, ahakulaa ŋlɔ Yosef be, gake Yehowa ya meŋlɔe be kpɔ gbeɖe o. Gbe ɖeka, esi Farao le alɔ̃ dɔm le zã me la, eku drɔ̃e eve aɖewo siwo tsi susu me nɛ ɖikaa. Le drɔ̃e gbãtɔa me la, fia la kpɔ nyinɔ adre siwo nyo eye woda ami, siwo do tso Nil-tɔsisi la me, eye nyinɔ vloe adre siwo ɖiku nyatsã la hã do ɖe wo yome. Nyinɔ ɖikuawo lé nyinɔ damiawo mi. Esia megbe la, egaku drɔ̃e bubu; ekpɔ liŋɔ adre, siwo ʋã, eye wodo ku la, do ɖe luti ɖeka ŋu. Eyome liŋɔ adre, siwo pepi lé, eye wolé bu la do; eye liŋɔ, siwo lé bu la, mi liŋɔ adre, siwo ʋã, eye wodo ku la. Esi ŋu ke eye Farao fɔ la, etsi dzodzodzoe le drɔ̃e siwo wòku la ta, eya ta ena woyɔ eƒe afakalawo kple nunyalawo vɛ. Gake wo dometɔ aɖeke mete ŋu ɖe drɔ̃eawo gɔme nɛ o. (1 Mose 41:1-8) Ðe womekpɔ nya aɖeke gblɔ tso drɔ̃eawo ŋu o loo alo ɖe wo dometɔ ɖe sia ɖe ɖe drɔ̃eawo gɔme ale si wòsusui ale be wo gɔme ɖeɖe tsi tsitre ɖe wo nɔewo ŋu o, míenya o. Aleke kee nyaa ɖale o, womete ŋu kpe ɖe Farao ŋu le mɔ aɖeke nu o—gake edi vevie be yease drɔ̃e sesẽ mawo gɔme godoo.

Ahakulaa va ɖo ŋku Yosef dzi mlɔeba! Eƒe dzitsinya ɖe fu nɛ vevie, eye wòƒo nu tso ɖekakpui ɖedzesi si ɖe eya ŋutɔ kple abolomela ƒe drɔ̃ea me na wo la ŋu na Farao. Enumake, Farao de se be woayi aɖakplɔ Yosef vɛ.—1 Mose 41:9-13.

Kpɔ ale si Yosef ase le eɖokui me esime Farao ƒe dɔlawo tsɔ eƒe gbedeasia vɛ nɛ ɖa. Ewɔ kaba ɖɔli eƒe awuwo helũ eƒe ge keŋ—anɔ eme be elũ ta kokoe hã, elabena nenemae Egiptetɔwo wɔna. Ðikeke mele eme o be edo gbe ɖa na Yehowa vevie be wòanɔ kpli ye ne Farao le gbe biam ye! Ɣeyiɣi kpui aɖe megbe la, eyae nye ema le tsitre ɖe fiagã la ŋkume le fiasã gã nyadri la me. Ŋutinyaa gblɔ be: “Farao gblɔ na Yosef bena: ‘Meku drɔ̃e, eye ame aɖeke mete ŋu ɖe egɔme nam o. Ke mese le ŋuwò bena, ne èse drɔ̃e ko la, èɖea egɔme.’” Yosef gabɔbɔ eɖokui le afi sia hã eye wòɖo ŋu ɖe Mawu ŋu hegblɔ be: “Gbeɖe, menye nyee o; ke Mawu agblɔ nu si nyo la na Farao.”—1 Mose 41:14-16.

Yosef gblɔ na Farao ɖokuibɔbɔtɔe be: “Gbeɖe, menye nyee o.”

Yehowa lɔ̃a ɖokuibɔbɔlawo kple nuteƒewɔlawo, eya ta mewɔ nuku o be ena Yosef se drɔ̃e siawo siwo gɔme nunyalawo kple afakalawo mete ŋu se o la gɔme. Yosef ɖe eme be gɔmesese ɖekae le Farao ƒe drɔ̃e eveawo si. Esi Yehowa na Farao ku drɔ̃ea zi eve la, efia be Mawu “ɖoe kplikpaa,” eye Mawu le ewɔ ge kaba. Nyinɔ damiawo kple liŋɔ siwo ʋã, eye wodo ku la nye ƒe adre si me nuɖuɖu ado agbogbo ɖe Egipte-nyigba dzi le, gake nyinɔ ɖiku adre siwo vloe ŋutɔ kple liŋɔ siwo pepi lé, eye wolé bu la nye ƒe adre si me dɔ ato le, le ƒe siwo me nuɖuɖu ado agbogbo la yome. Dɔwuamea nu asẽ ale gbegbe be agblẽ nu le dukɔa ŋu.—1 Mose 41:25-32.

 Farao kpɔe be Yosef ɖe drɔ̃eawo gɔme nyuie. Gake nu kae woawɔ? Yosef gblɔ nu si woawɔ la na Farao. Ehiã be Farao nadi ame si “dze aɖaŋu, eye tagbɔ li nɛ” la atsɔ aɖo anyigba la nu be wòaƒo agblemenuku siwo awɔ le ƒe adre siwo me nuɖuɖu ado agbogbo ɖe anyigbaa dzi la nu ƒu ɖe avawo me eye wòamae na hiãtɔwo le ƒe siwo me dɔ ato le la me. (1 Mose 41:33-36) Dɔ siwo Yosef wɔ va yi kple ŋutete siwo le esi la na wòdze nyuie awɔ dɔ sia, gake mehe susu va eɖokui dzi o. Eƒe ɖokuibɔbɔ na be esia meva susu me nɛ gɔ̃ hã o; ekpɔe be mehiã kura o, le xɔse si le esi ta. Ne míexɔ Yehowa dzi se vavã la, mahiã be míado mía ɖokui ɖe dzi alo adi nɔƒe gã nɔnɔ o. Míate ŋu aɖe dzi ɖi ahagblẽ nu sia nu ɖe Mawu ŋusẽkatãtɔ la si me!

‘ÐE MÍATE ŊU AKPƆ AME AÐE ABE EYA ENE MAHÃ?’

Farao kple eƒe dɔlawo katã kpɔe be nunya le Yosef ƒe aɖaŋuɖoɖoa me. Fia la ŋutɔ hã lɔ̃ ɖe edzi be Yosef ƒe Mawu lae na nunya sia Yosef. Eya ta ebia eƒe dɔla siwo le fiasãa me be: “Ðe míate ŋu akpɔ ame aɖe, si me Mawu ƒe gbɔgbɔ la le abe eya ene mahã?” Etrɔ ɖe Yosef ŋu hegblɔ nɛ be: “Esi Mawu ɖe nu siawo katã fia wò la, ame aɖeke meli, si dze aɖaŋu, eye wònya nu abe wò ene o. Eya ta wòe anɔ nye aƒe nu, eye nye dukɔ la katã aɖo to wò nyawo; negbe fiazikpui la ko matsɔ awu wò.”—1 Mose 41:38-41.

Farao wɔ ɖe eƒe ŋugbedodoa dzi. Enumake, wodo aklala biɖibiɖi wu na Yosef. Farao tsɔ sikakɔsɔkɔsɔ de kɔ nɛ, eɖe eƒe ŋkɔsigɛ le asi tsɔ do nɛ, wotsɔ fia ƒe tasiaɖam ɖeka nɛ, eye fia la na ŋusẽe be wòatsa le anyigbaa katã dzi ahawɔ abe ale si wòɖo aɖaŋui ene. (1 Mose 41:42-44) Eya ta le ŋkeke ɖeka pɛ ko dzi la, woɖe Yosef le gaxɔ me eye wòva zu bubume le fiasã me. Efɔ ŋdi ma abe gamenɔla tsɛ aɖe ene, gake ezu dziɖula evelia kplɔ Farao ɖo hafi zã do. Eme kɔ ƒãa be Yehowa Mawu ɖo Yosef ƒe xɔse teƒe nɛ! Yehowa kpɔ nu madzɔmadzɔ siwo wowɔ ɖe esubɔlaa ŋu kple fu siwo katã wòkpe le ƒe mawo me. Eye wòkpɔ kuxi mawo katã gbɔ nyuie le ɣeyiɣi nyuitɔ dzi le mɔ nyuitɔ nu. Menye ɖeko Yehowa ɖoe be yeaɖɔ nu si wogblẽ le Yosef ŋu la ɖo ko evɔ o, ke boŋ eto esia dzi kpɔ Israel-vi siwo ava zu dukɔ blibo le etsɔme la hã ta. Míava dzro ale si wòwɔ esiae la me le nyati bubu si míava ta le esia yome la me.

Ne èle nɔnɔme sesẽwo me tom alo ɖewohĩ wole nu madzɔmadzɔ wɔm ɖe ŋuwò ƒe geɖe eye wòdze abe enu gbe tsotso ene la, dzi megaɖe le ƒowò o. Ðo ŋku Yosef dzi. Esi wònye be Yosef yi edzi nyoa dɔme, bɔbɔa eɖokui eye wòdo dzi helé eƒe xɔse me ɖe asi ta la, eto esia dzi na mɔnukpɔkpɔ Yehowa be wòva yrae mlɔeba.

^ mm. 4 Kpɔ “Srɔ̃ Woƒe Xɔse” ƒe nyati siwo dze le August 1 kple November 1, 2014, ƒe Gbetakpɔxɔ me.

^ mm. 10 Blema Egiptetɔwo ɖua abolo kple akpɔnɔvivi vovovo 90 sɔŋ. Eya ta ameŋkutae Farao ƒe abolomelawo ƒe amegãa nye. Eye eƒe ahakulawo ƒe amegã hã kpɔa dɔla geɖe siwo kpɔa egbɔ be Farao ƒe wain kple ɖewohĩ eƒe biya la nye adodoea la dzi, eye wokpɔa egbɔ hã be wole dedie ale be ame aɖeke nagade nu Egipte fiagã la ƒe aha me o. Elabena ɣemaɣi la, nugbeɖoɖo kple amewuwu nye nu si bɔ le fiaŋumewo dome. Eye ahakulawo ƒe amegã tea ŋu nyea fia la ƒe aɖaŋuɖolawo dometɔ ɖeka.