Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  December 2014

 EXLẼLAWO BIA BE . . .

Nu Kae Wòle Be Míanya Ku Ðe Kristmasɖuɖu Ŋu?

Nu Kae Wòle Be Míanya Ku Ðe Kristmasɖuɖu Ŋu?

Le xexea me godoo la, ame miliɔn geɖewo ɖua Kristmas le susu vovovowo ta. Ame aɖewo dina be yewoakpɔ dzidzɔ kple yewoƒe ƒometɔwo kpakple xɔlɔ̃wo le azãɖuɣiwo. Ame bubuwo hã dea ŋugble tso Mawu ŋu alo zãna woƒe ɣeyiɣiwo tsɔ kpena ɖe hiãtɔwo kple ame dahewo ŋu. Le woƒe susu nu la, nu vevi siawo hiã godoo. Ke hã, womenya naneke tso kɔnu siwo dzi wotu azã siawo ɖuɖu ɖo ŋu o.

Gbã la, azãɖulawo susunɛ be ne yewole Kristmas ɖum la, ke yewole Yesu ƒe dzigbezã ɖum. Ke hã, blemaŋutinyaŋlɔlawo lɔ̃ ɖe edzi be ame aɖeke menya gbe si gbe wodzi Yesu o. Agbalẽ aɖe (The Christian Book of Why) gblɔ be: “Kristotɔ gbãtɔwo gbe be yewomaɖo ŋkeke aɖe koŋ ɖi be wòanye Yesu ƒe dzigbezã o,” le esi “woɖe wo ɖokuiwo ɖa le trɔ̃subɔlawo ƒe nuwɔnawo me” ta. Biblia hã megblɔ be Yesu ɖu eya ŋutɔ ƒe dzigbezã kpɔ loo alo kpɔ gome le ame bubu tɔ me o. Ke hã, ede se na eƒe nusrɔ̃lawo be woaɖo ŋku yeƒe ku dzi.Luka 22:19.

Evelia, agbalẽnyala geɖe lɔ̃ ɖe edzi be Kristmasɖuɖu dzɔ tso ame siwo menye Kristotɔwo o kpakple trɔ̃subɔlawo ƒe kɔnuwo me. Kɔnu siawo dometɔ aɖewoe nye Papa Kristmas, logblatiwo kple Kristmastiwo zazã, nunana ame nɔewo, bosomikaɖiwo sisi, Kristmas-kpetsikewo mama, seƒoƒotsihewo titi ɖe nuwo ŋu kple Kristmas-hawo dzidzi. Agbalẽ aɖe (The Externals of the Catholic Church) gblɔ tso kɔnu siawo ŋu be: “Ne míeɖu Kristmas na amewo alo woɖui na mí, eye míeti seƒoƒotsihe damawo ɖe míaƒe aƒewo alo sɔlemexɔwo me la, mía dometɔ nenie nyana be trɔ̃subɔlawo ƒe kɔnuwoe ma wɔm míele?”

“Ne míeɖu Kristmas na amewo alo woɖui na mí, eye míeti seƒoƒotsihe damawo ɖe míaƒe aƒewo alo sɔlemexɔwo me la, mía dometɔ nenie nyana be trɔ̃subɔlawo ƒe kɔnuwoe ma wɔm míele?”—The Externals of the Catholic Church

Gake ɖewohĩ agblɔ be ɖe wònye nya gã nenema gbegbe ne wokpɔ gome le kɔnu suesue mawo siwo ƒe dzɔtsoƒe ŋu míenya nu boo aɖeke le o mea? Kpɔ nya sia ƒe ŋuɖoɖo le numeɖeɖe etɔ̃lia sia me. Mawu melɔ̃ be woatsɔ trɔ̃subɔsubɔ ƒe kɔnuwo atsaka kple subɔsubɔ vavãtɔ o. Yehowa to nyagblɔɖila Amos dzi gblɔ na blema Israel-vi siwo tra ɖa tso eƒe subɔsubɔ gbɔ be: ‘Melé fu miaƒe ŋkekenyuiwo. . . .  Mite míaƒe hawo ƒe ɖiɖi ɖe megbe tso gbɔnye!’Amos 5:21, 23.

Nu ka tae nyagbename siawo nu sẽ alea? Bu nu si wɔm blematɔ siwo nɔ dziehe fiaɖuƒea me la le la ŋu kpɔ. Woƒe fia gbãtɔ si nye Yerobeam wɔ sikanyivi da ɖe Dan kple Betel duawo me eye wòƒoe ɖe amewo ŋu be woasubɔe le esi teƒe be woasubɔ Mawu nyuie le Yerusalem ƒe gbedoxɔa me. Fia sia ɖo ŋkekenyuiwo eye wòɖo nunɔlawo siwo axɔ ŋgɔ na wo le azãɖuɖua me.1 Fiawo 12:26-33.

Nu si wɔm Israel-vi mawo nɔ la dze abe nu nyui aɖe ene. Wosusui be Mawu ko subɔm yewonɔ hele nu si adze eŋu la wɔm. Nyagbename sesẽ si Mawu to Amos kple nyagblɔɖila bubuwo dzi gblɔ na wo la ɖe ale si Mawu bua nuwɔna siawoe la fia. Mawu to nyagblɔɖila Mixa dzi gblɔ be: “Nye Yehowa nyemetrɔ o.” (Maleaxi 3:6) Ðe esia mena míenya ale si Mawu bua Kristmas-kɔnu gbogbo siwo amewo wɔna egbea la oa?

Nya siawo ŋu bubu na ame miliɔn geɖewo va tso nya me be yewomagaɖu Kristmas azɔ o. Ke boŋ wozãa woƒe ɣeyiɣiwo ɖe wo xɔlɔ̃wo kple woƒe ƒometɔwo ŋu eye wona kpekpeɖeŋu ame dahewo kple hiãtɔwo ɣesiaɣi si wolɔ̃ le ƒea ƒe ɣeyiɣi ɖe sia ɖe me. Eye esia nana wokpɔa dzidzɔ kple dzidzeme vavãtɔ.