Dzo kpo yi emenuwo dzi

Dzo kpo yi emenuawo dzi

 NYATI SI LE AKPAA DZI | ÐE MAWU TSƆA ÐE LE EME NA WÒA?

Mawu Le Yɔwòm

Mawu Le Yɔwòm

“Ame aɖeke mate ŋu ava gbɔnye o, negbe ɖe Fofo la, ame si dɔm ɖa la, hee vae.”YOHANES 6:44.

NU SI TAE AME AÐEWO KEA ÐI: Togbɔ be ame aɖewo xɔ Mawu dzi se hã la, wosena le wo ɖokui me be ele adzɔge ʋĩi tso yewo gbɔ. Christina si tso Ireland la gblɔ be: “Ðeko mebua Mawu be eyae wɔ nu sia nu. Gake nyemenyae o. Nyemese le ɖokuinye me kpɔ be mía kplii dome le kplikplikpli o.”

NYA SI MAWU ƑE NYA LA GBLƆ: Ne míese le mía ɖokui me be míetra mɔ la, Yehowa ya megblẽa mí ɖi o. Yesu wɔ ale si Mawu tsɔa ɖe le eme na mí la ƒe kpɔɖeŋu ale: “Ne alẽ alafa ɖeka le ame aɖe si, eye wo dometɔ ɖeka bu mɔ la, ɖe magblẽ blaasieke vɔ asieke la ɖe towo dzi, eye wòayi aɖadi ɖeka si le mɔ bum la oa?” Nufiame kae le eme na mí? Yesu gblɔ be: “Nenema kee menye Fofonye si le dziƒo la ƒe dzidzɔ be ɖevi sue siawo dometɔ ɖeka pɛ hã natsrɔ̃ o.”Mateo 18:12-14.

“Ðevi sue siawo dometɔ” ɖe sia ɖe le vevie na Mawu. Aleke Mawu dia ‘wo dometɔ ɖeka si bu la’? Mawunyakpukpui si dze le nyati sia ƒe gɔmedzedze la fia be, Yehowa hea amewo ɖe eɖokui ŋu.

Ame kawoe yia amewo ƒeme egbea alo tena ɖe wo ŋu le ablɔdzi be yewoagblɔ Mawu ŋuti nyateƒe si le Biblia me la na wo?

Bu afɔ siwo Mawu ɖe tsɔ he dzianukwaretɔwo ɖe eɖokui ŋu la ŋu kpɔ. Le ƒe alafa gbãtɔ Mía Ŋɔli me la, Mawu dɔ Kristotɔ Filipo ɖa be wòadze Etiopiatɔwo ƒe amegã aɖe si le tasiaɖam me yina la yome eye wòaɖe Biblia me nyagblɔɖi aɖe si xlẽm amegãa nɔ la me nɛ. (Dɔwɔwɔwo 8:26-39) Ɣebubuɣi la, Mawu bia tso Petro si be wòayi Roma-srafomegã si ŋkɔe nye Kornelio, la ƒeme; enye ame si doa gbe ɖa hedzea agbagba be yeawɔ Mawu ƒe lɔlɔ̃nu. (Dɔwɔwɔwo 10:1-48) Mawu dɔ apostolo Paulo kple eƒe zɔhɛwo hã ɖe tɔsisi aɖe to le Filipi dugãa godo. Esi woyi la, wodo go nyɔnu aɖe si nye “mawusubɔla” si ŋkɔe nye Lidia la le afi ma, eye “Yehowa ʋu eƒe dzi gbadzaa be wòalé to ɖe nya . . . la ŋu.”Dɔwɔwɔwo 16:9-15.

Le go siawo dometɔ ɖe sia ɖe me la, Yehowa na mɔnukpɔkpɔ su ame siwo le edim la si woke ɖe eŋu. Ame kawoe yia amewo ƒeme egbea alo tena ɖe wo ŋu le ablɔdzi be yewoagblɔ Mawu ŋuti nyateƒe si le Biblia me la na wo? Ame geɖe aɖo eŋu be, “Yehowa Ðasefowoe.” Azɔ bia ɖokuiwò be, ‘Ðe wòanye be Mawue le wo dɔm ɖe gbɔnyea?’ Míele dzi dem ƒo na wò be nàdo gbe ɖa na Mawu be wòakpe ɖe ŋuwò nàkpɔ agbagba si dzem wòle be yeahe wò ɖe ye ɖokui ŋu la adze sii. *

^ mm. 8 Ne èdi numeɖeɖe bubuwo la, kpɔ video si nye Nu Ka Tae Wònyo Be Nàsrɔ̃ Biblia? le www.jw.org/ee.