Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  August 2014

 NYATI SI LE AKPAA DZI | ÐE MAWU TSƆA ÐE LE EME NA WÒA?

Mawu Ate Ŋu Afa Akɔ Na Wò

Mawu Ate Ŋu Afa Akɔ Na Wò

“Mawu, ame si faa akɔ na ame siwo ŋu nu te la, . . . fa akɔ na mí.”—2 KORINTOTƆWO 7:6.

“Mawu ƒe Vi . . . lɔ̃m, eye wòtsɔ eɖokui na ɖe tanye.”—GALATIATƆWO 2:20

NU SI TAE AME AÐEWO KEA ÐI: Ne ame aɖewo le nɔnɔme sesẽwo me tom eye wodi vevie be woafa akɔ na yewo gɔ̃ hã la, wosena le wo ɖokuiwo me be ne yewobia Mawu be wòakpe ɖe yewo ŋu yewodo dzi la, efia be yewole yewo ɖokuitɔ dim. Nyɔnu aɖe si ŋkɔe nye Raquel gblɔ be: “Ne mebu ame gbogbo siwo le kuxi sesẽwo me tom le xexea me ŋu la, mekpɔnɛ be tɔnyea meɖi naneke kura o, eya ta nyemegadina be mabia Mawu be wòakpe ɖe ŋunye o.”

NYA SI MAWU ƑE NYA LA GBLƆ: Mawu ɖe afɔ vevi aɖewo xoxo be yeakpe ɖe amegbetɔwo ŋu ahafa akɔ na wo. Amegbetɔwo katã nyi nu vɔ̃ ƒe dome, eye esia wɔe be míetea ŋu wɔa Mawu ƒe se debliboawo dzi pɛpɛpɛ o. Ke hã Mawu “lɔ̃ mí, eye wòdɔ Via [Yesu Kristo] be wòanye avulévɔsa ɖe míaƒe nu vɔ̃wo ta.” (1 Yohanes 4:10) Mawu to Yesu ƒe vɔsakua dzi na be wòanya wɔ fifia be woatsɔ míaƒe nu vɔ̃wo ake mí, dzitsinya nyui nasu mía si, eye mɔkpɔkpɔ hã nasu mía si be míava nɔ agbe tegbee le xexe si me ŋutifafa anɔ la me. * Gake ameƒome bliboa ta koe wosa vɔ sia ɖoa, alo ɖe esia fia be Mawu tsɔ ɖe le eme na wò abe ame ɖeka ene taea?

Bu apostolo Paulo ŋu kpɔ. Yesu ƒe vɔsaa wɔ dɔ ɖe edzi ale gbegbe be wògblɔ be: “Mele [agbe nɔm] to Mawu ƒe Vi si lɔ̃m, eye wòtsɔ eɖokui na ɖe tanye la, dzi xɔxɔ se me.” (Galatiatɔwo 2:20) Le nyateƒe me la, Yesu ku hafi Paulo va zu Kristotɔ gɔ̃ hã. Ke hã Paulo bua vɔsa ma be enye nunana si tso Mawu gbɔ na ye.

Yesu ƒe vɔsakua nye nunana si tso Mawu gbɔ na hã. Nunana ma ɖe ale si gbegbe Mawu dea asixɔxɔ ŋuwòe la fia. Ate ŋu ana “akɔfafa mavɔ kple mɔkpɔkpɔ nyui” wò, eye esia ana ‘nànɔ te sesĩe le dɔ nyui kple nya nyui ɖe sia ɖe me.’2 Tesalonikatɔwo 2:16, 17.

Ke hã ƒe 2,000 kloe ye nye esia Yesu tsɔ eƒe agbe sa vɔe. Nu kae ɖee fia be Mawu tsɔ ɖe le eme na wò vevie egbea?

^ mm. 5 Ne èdi be yeanya nu geɖe wu tso Yesu ƒe vɔsaa ŋu la, kpɔ agbalẽ si nye Nuka Tututue Nye Biblia ƒe Nufiafia? ƒe ta 5 lia. Yehowa Ðasefowoe tae.