Dzo kpo yi emenuwo dzi

Dzo kpo yi emenuawo dzi

Mɔkpɔkpɔ Kae Li Na Tɔgbuinye Siwo Ku?

Mɔkpɔkpɔ Kae Li Na Tɔgbuinye Siwo Ku?

TANYA aɖe dze le Koreatɔwo ƒe nyadzɔdzɔgbalẽ si nye The Chosun Ilbo la me gbe ɖeka, si he ame geɖe ƒe susu. Ebia be: “Ðe ‘Míaƒe Shim Cheong Lɔlɔ̃a’ Yi Ðe Dzo Mavɔ Me Le Esi Menya Yesu O Ta?”

Tanya sia ɖe fu na ame geɖe, elabena Shim Cheong nye ɖetugbui nyui aɖe si ƒe ŋutinya wogblɔna le Koreatɔwo ƒe xotutu aɖe me be etsɔ eƒe agbe sa vɔe ɖe fofoa si nye ŋkuagbãtɔ la ta. Amewo kafunɛ ŋutɔ tso gbe aɖe gbe ke. Koreatɔwo bua Shim Cheong be enye vinyɔnu si ɖo kpɔɖeŋu nyui ɖi na ɖetugbuiwo.

Ame geɖe bunɛ be mesɔ kura be woahe to na ame sia tɔgbi le dzo mavɔ me le esi womenyrɔe wòzu Kristotɔ o ko ta o, eye nya sia doa dziku na ame aɖewo gɔ̃ hã. Le wo gbɔ la, ɖetugbuia ƒe ŋutinyaa dzɔ xoxo hafi Kristo ŋuti gbedeasia va ɖo woƒe kɔƒea me.

Wobia gbe subɔsubɔhaŋgɔnɔla aɖe tso nya sia ŋu ŋlɔ ɖe nyati ma ke me. Wobiae be ɖe woahe to na ame siwo katã si mɔnukpɔkpɔ mesu wonya Yesu hafi ku o la le dzo mavɔ me mahã. Aleke wòɖo eŋui? Egblɔ be: “Míenya o. Gake míagblɔ ko be Mawu ƒe Amenuveve li [na ame siawo tɔgbi].”

ELE VEVIE HENA ÐEÐEKPƆKPƆ

Katolikotɔwo ƒe numekugbalẽ aɖe gblɔ be: “Mawutsideta [nyɔnyrɔxɔxɔ] le vevie hafi ame nakpɔ ɖeɖe. Abe ale si Kristo ŋutɔ gblɔe ene la, ne womedzi ame tso tsi kple Gbɔgbɔ Kɔkɔe me o la, mate ŋu ayi ɖe Mawu Fiaɖuƒe la me o (Yh 3.5).” (The New Catholic Encyclopedia) Le esia ta, ame aɖewo xɔe se be ne womede mawutsi ta na ame, alo nyrɔe, hafi wòku o la, ayi dzo mavɔ me alo akpe fu le mɔ bubu aɖe nu le ku megbe.

Gake ame geɖe bua dzixɔse ma be susu mele eme o. Ame miliɔn geɖe menya Biblia hafi ku o. Ðe wòdze be woawɔ fu wo le dzo me tegbeea? Nya kae Biblia gblɔ tso nya sia ŋu?

MƆKPƆKPƆ SI ŊU BIBLIA ƑO NU TSO

Biblia ɖee fia eme kɔ nyuie be Mawu mebua ame siwo nɔ agbe kpɔ gake womenya eƒe nudidiwo hafi ku o la be evɔ na wo o. Dɔwɔwɔwo 17:30 ka ɖe edzi na mí be: “Mawu ŋe aɖaba ƒu numanyamanya ƒe ɣeyiɣi mawo dzi.” Ekema le Biblia ƒe nya nu la, mɔkpɔkpɔ kae li na ame siwo menya Mawu hafi ku o la?

Nu kae ŋugbe si Yesu do be, “Ànɔ Paradiso me kplim” la fia?

Ŋuɖoɖoa dze le nya si Yesu gblɔ na nu vlo wɔla siwo woklã ɖe ati ŋu le exa la dometɔ ɖeka la me. Ŋutsua gblɔ na Yesu be: “Ðo ŋku dzinye ne èɖo wò fiaɖuƒe la me.” Aleke Yesu ɖo eŋu nɛ? Egblɔ nɛ be: “Vavã mele egblɔm na wò egbea be: Ànɔ Paradiso me kplim.”Luka 23:39-43.

Ðe Yesu le ŋugbe dom na ŋutsua be ayi dziƒoa? Ao. Wometsɔ tsi kple gbɔgbɔ ‘gbugbɔ dzi’ ŋutsu la o; evɔ esia le vevie hafi ame nayi ɖe Dziƒofiaɖuƒe la me. (Yohanes 3:3-6) Menye ɖe Yesu nɔ gbɔgblɔm na nu vlo wɔlaa be ayi dziƒo o, ke boŋ ɖe wònɔ ŋugbe dom nɛ be agava nɔ agbe ake, le Paradiso me. Esi wònye be Yudatɔe ŋutsua nye ta la, anɔ eme be enya nu tso anyigba dzi Paradiso, alo Eden bɔ, si ŋu woƒo nu tsoe le Biblia ƒe agbalẽ gbãtɔ me la ŋu. (1 Mose 2:8) Ŋugbe si Yesu do na ŋutsua la na wòka ɖe edzi be woava fɔ ye ɖe tsitre le Paradiso si woagaɖo anyi le anyigba dzi la me.

Le nyateƒe me la, Biblia do ŋugbe be “tsitretsitsi li na ame dzɔdzɔewo kple ame madzɔmadzɔwo siaa.” (Dɔwɔwɔwo 24:15) ‘Ame madzɔmadzɔawoe’ nye ame siwo menɔ agbe ɖe Mawu ƒe se dzɔdzɔeawo nu o, le esi womenya Mawu ƒe lɔlɔ̃nu o ta. Yesu afɔ nu vlo wɔla ma, si nye ame madzɔmadzɔ si ƒo nu kplii le atia ŋu la, kpakple ame miliɔn alo biliɔn geɖe gɔ̃ hã, siwo menya Mawu hafi ku o la ɖe tsitre. Le anyigba dzi Paradisoa me la, woafia nu wo tso Mawu ƒe nudidiwo ŋu, eye mɔnukpɔkpɔ asu wo si be woawɔ Mawu ƒe sewo dzi atsɔ aɖee afia be yewolɔ̃e.

 NE WOFƆ AME MADZƆMADZƆWO ÐE TSITRE

Ne wofɔ ame madzɔmadzɔwo ɖe tsitre la, ɖe woadrɔ̃ ʋɔnu wo le agbe si wonɔ va yi hafi ku la ta? Ao. Romatɔwo 6:7 gblɔ be: “Ame si ku la, woɖee tso eƒe nu vɔ̃ me.” Esi ame madzɔmadzɔawo ku ko la, woƒe kua nye fexexe ɖe woƒe nu vɔ̃wo ta. Eya ta agbe si woanɔ le woƒe tsitretsitsi megbe lae woatsɔ adrɔ̃ ʋɔnu wo, ke menye nu siwo wowɔ le manyamanya me hafi ku lae woatsɔ adrɔ̃ ʋɔnu wo o. Aleke esia aɖe vi na woe?

Ne wofɔ ame madzɔmadzɔawo ɖe tsitre la, mɔnukpɔkpɔ asu wo si be woasrɔ̃ Mawu ƒe se siwo woaɖe ɖe go ɣemaɣi. Se mawo anɔ kpɔɖeŋugbalẽ xatsaxatsa siwo woaʋu la me. Ekema woadrɔ̃ ʋɔnu wo “ɖe woƒe dɔwɔwɔwo nu,” si fia be Mawu ƒe sewo dzi wɔwɔ alo wo dzi mawɔmawɔ dzie woanɔ te ɖo adrɔ̃ ʋɔnu wo. (Nyaɖeɖefia 20:12, 13) Le ame madzɔmadzɔ geɖewo gome la, esiae anye zi gbãtɔ si mɔnukpɔkpɔ asu wo si be woasrɔ̃ Mawu ƒe lɔlɔ̃nu ahawɔ edzi ale be woakpɔ agbe mavɔ le anyigba dzi.

Biblia ƒe nufiafia sia kpe ɖe ame geɖe ŋu wogava xɔ Mawu dzi se ake. Ame siawo dometɔ ɖekae nye Yeong Sug. Wodzii ɖe ƒome si doa vevie nu le Katolikohaa me la me. Eƒe ƒomea me tɔ aɖewo nye nunɔlawo. Esi wòdi be yeaɖu sista ta la, eyi ɖanɔ nyɔnuwo ƒe saɖeagaxɔ me. Gake ɣeyiɣi aɖe megbe la, nu siwo teƒe wòkpɔ le afi ma na dzi ɖe le eƒo eye wòdzo le saɖeagaxɔa me. Gawu la, mexɔ dzo mavɔ ƒe nufiafiaa dzi se o, elabena esusui be mesɔ be woawɔ fu amewo le dzo me o, eye ebui be menye lɔlɔ̃ɖeɖefia hã o.

Gbe ɖeka, Yehowa Ðasefo aɖe xlẽ Biblia me nya siawo na Yeong Sug bena: “Agbagbeawo nyae be, yewogbɔna kuku ge, ke kukuawo menya naneke o, fetu aɖeke megali na wo o.” (Nyagblɔla 9:5) Ðasefoa kpe ɖe eŋu wòkpɔe be womele fu wɔm tɔgbuia siwo ku la le dzo mavɔ me o. Ke boŋ wole alɔ̃ dɔm le ku me va se ɖe esime woafɔ wo ɖe tsitre.

Esi Yeong Sug kpɔe be ame geɖe mese Biblia me nyateƒea kpɔ o ta la, etsɔ dzi blibo le wɔwɔm ɖe nya si Yesu gblɔ le Mateo 24:14 la dzi be: “Woaɖe gbeƒã fiaɖuƒe ŋuti nya nyui sia le anyigba blibo la katã dzi, be wòanye ɖaseɖiɖi na dukɔwo katã, eye ekema nuwuwu la ava.” Ele gbeƒã ɖem nya nyuia fifia, eye wòle mɔkpɔkpɔ wɔnuku si ŋu Biblia ƒo nu tsoe la ŋu nya gblɔm na amewo.

“MAWU MEKPƆA AME ŊKUME O”

Biblia gblɔ na mí be: “Mawu mekpɔa ame ŋkume o, ke boŋ le dukɔ sia dukɔ me la, ame si vɔ̃nɛ, eye wòwɔa nu dzɔdzɔe la, eyae dzea eŋu.” (Dɔwɔwɔwo 10:34, 35) Esiae nye dzɔdzɔenyenye deblibo si mí katã míate ŋu akpɔ mɔ na tso Mawu, si ‘lɔ̃a dzɔdzɔenyenye kple nya dzɔdzɔe’ la gbɔ.Psalmo 33:5.