Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  March 2014

 NYATI SI LE AKPAA DZI

Nu Tɔxɛ Si Mawu Wɔ Na Wò

Nu Tɔxɛ Si Mawu Wɔ Na Wò

“Ale gbegbe Mawu lɔ̃a xexeame bena, wòtsɔ ye ŋutɔ ƒe Tenuvi hena, bena ame sia ame, si xɔa edzi sena la, mele tsɔtsrɔ̃ ge o, ke boŋ wòakpɔ agbe mavɔ.”—Yohanes 3:16, Eʋegbe Biblia.

Mawunyakpukpui siwo amewo nya wu le Biblia bliboa me la dometɔ ɖekae nye esia. Wogblɔ be, le Biblia me la, mawunyakpukpui sia ye “ɖe ƒomedodo si le Mawu kple ameƒomea dome kpakple woƒe ɖeɖekpɔkpɔ me kpuie eme kɔ nyuie wu.” Esia ta le dukɔ aɖewo me la, woŋlɔa mawunyakpukpui si nye “Yohanes 3:16” alo emenyawo klãna ɖe ʋuwo ŋu, ɖe gliwo ŋu le ablɔwo me, kple teƒe bubuwo.

Edze ƒãa be ame siwo ŋlɔa mawunyakpukpui sia me nyawo ɖi la xɔe se be Mawu ƒe lɔlɔ̃ nye kpeɖodzi be yewoakpɔ agbe mavɔ. Ke wò ya ɖe? Aleke nèse le ɖokuiwò me tso ale si Mawu lɔ̃ wòe ŋu? Eye nu kae nèsusu be Mawu wɔ tsɔ ɖee fia be yelɔ̃ wò?

“ALE GBEGBE MAWU LƆ̃A XEXEAME”

Ame geɖe lɔ̃na ɖe edzi be Mawue wɔ dziƒo, anyigba, dzɔdzɔmenu ɖe sia ɖe, kple amegbetɔwo siaa. Nu gbagbewo ƒe wɔwɔme wɔ nuku eye wole ɖoɖo nu ale gbegbe be woka ɖe edzi be Mawu si ƒe nunya de ŋgɔ ŋutɔ lae wɔ wo. Ame gbogbo aɖewo daa akpe na Mawu gbe sia gbe ɖe agbe si wòna wo ta. Wolɔ̃ ɖe edzi hã be Mawue wɔ nu siwo katã léa yewoƒe agbe ɖe te—abe ya, tsi, nuɖuɖu kpakple dzɔdzɔmeɖoɖo siwo le anyigba dzi, abe tsidzadza ene—ale be yewoate ŋu ase vivi na agbea.

Enyo be míada akpe na Mawu ɖe nu siawo katã ta, elabena eyae nye mía Wɔla, eye eya kee léa míaƒe agbe ɖe te. (Psalmo 104:10-28; 145:15, 16; Dɔwɔwɔwo 4:24) Ne míebu nu siwo katã Mawu wɔna na mí be míate ŋu anɔ agbe ŋu la, míakpɔe be elɔ̃ mí vavã. Apostolo Paulo gblɔ be: “[Mawue]  naa agbe kple agbegbɔgbɔ kpakple nuwo katã ame sia ame. Elabena eya dzie míeto le agbe, eye míeʋãna, eye míeli.”Dɔwɔwɔwo 17:25, 28.

Gake menye míaƒe ŋutilãmenuwo gbɔ kpɔkpɔ dzi koe Mawu tona ɖenɛ fiana be yelɔ̃ mí o. Ewɔ mí míede ŋgɔ wu lãwo eye wòna ŋutete mí be míate ŋu ate ɖe ye ŋu ahanɔ ƒomedodo kplikplikpli me kpli ye. (Mateo 5:3) Le esia ta la, mɔnukpɔkpɔ ʋu ɖi na amegbetɔ toɖolawo be woava nye Mawu ƒe ƒomea me tɔwo, alo ‘viawo.’Romatɔwo 8:19-21.

Yohanes 3:16 lia yi edzi gblɔ be, Mawu ɖee fia be yelɔ̃ mí esi wòdɔ Via, Yesu, ɖe anyigba dzi be wòafia nu mí tso eƒe Mawu si nye Fofoa ŋu, eye be wòava ku ɖe mía ta. Gake ame geɖe gblɔna be yewomese nu si tae wòhiã be Yesu naku ɖe ameƒomea ta kpakple ale si Yesu ƒe kua fia be Mawu lɔ̃ mí la gɔme o. Na míakpɔ ale si Biblia ɖe susu si tae Yesu va ku kple asixɔxɔ si le eƒe kua ŋui me la ɖa.

MAWU TSƆ “YE ŊUTƆ ƑE TENUVI HENA”

Amegbetɔ ɖe sia ɖe dzea dɔ, kua amegã heva kuna mlɔeba. Gake menye nenemae Yehowa Mawu ɖoe le gɔmedzedzea me o. Ena mɔnukpɔkpɔ atsu kple asi gbãtɔa be woanɔ agbe tegbee le paradiso me le anyigba dzi. Gake ebia nu ɖeka tso wo si: Eyae nye be woaɖo to ye. Mawu gblɔ be ne wogbe be yewomaɖo to ye o la, woaku. (1 Mose 2:17) Ame gbãtɔ la ɖoe koŋ gbe toɖoɖo Mawu ƒe gbe, eye esia he ku vɛ na eya ŋutɔ kple eƒe dzidzimeviwo siaa. Apostolo Paulo ɖe eme be: “To ame ɖeka dzi nu vɔ̃ ge ɖe xexea me, eye to nu vɔ̃ me ku la va, eye ale ku la kaka ɖe amewo katã dome, esi wo katã wɔ nu vɔ̃ ŋuti la.”Romatɔwo 5:12.

Ke hã, Mawu ‘lɔ̃a dzɔdzɔenyenye.’ (Psalmo 37:28) Togbɔ be Mawu meŋe aɖaba ƒu nu vɔ̃ si ame gbãtɔ la ɖo koŋ wɔ dzi o hã la, Mawu meɖe asi le ameƒomea ŋu be woanɔ fu kpem ahanɔ kukum ɖaa le ame ɖeka ƒe tomaɖomaɖo ta o. Megblẽ mí ɖi o, ke boŋ eɖe afɔ si sɔ le dzɔdzɔenyenye nu, esi wòwɔ ɖe se ƒe nudidi si nye be ‘woatsɔ agbe aɖo agbe teƒe’ la dzi, eye wòto esia me gaʋu agbe tegbee nɔnɔ ƒe mɔnukpɔkpɔ ɖi na amegbetɔ toɖolawo. (2 Mose 21:23) Ke biabia lae nye be, Aleke woate ŋu aɖo agbe deblibo si Adam bu la teƒe? Ŋuɖoɖoae nye be: Ele be ame aɖe natsɔ agbe si sɔ pɛpɛpɛ kple Adam ƒe agbe deblibo la asa vɔe ɖe mía ta.

Yesu lɔ̃ faa va anyigba dzi hetsɔ eƒe agbe sa vɔe be woaɖe ameƒomea tso nu vɔ̃ kple ku si me

Eme kɔ ƒãa be Adam ƒe dzidzimevi madebliboawo dometɔ aɖeke medze axe fe ma ɖe mía ta o, gake Yesu ya dze. (Psalmo 49:7-10) Esi wodzi Yesu la, nu vɔ̃ mele eŋu o, ede blibo abe ale si Adam hã de blibo le gɔmedzedzea me ene. Eya ta esi Yesu tsɔ eƒe agbe sa vɔe la, eto esia dzi xe fe ɖe ameƒomea ta heɖe wo tso nu vɔ̃ si me. Eto esia me na mɔnukpɔkpɔ su atsu kple asi gbãtɔa ƒe dzidzimeviwo si be agbe deblibo si nɔ Adam kple Xawa si tsã la nava su woawo hã si. (Romatɔwo 3: 23, 24; 6:23) Ðe nane li wòle be míawɔ be Mawu ƒe lɔlɔ̃ kple amenuveve gã ma naɖe vi na mía?

“AME SIA AME, SI XƆA EDZI SENA”

Ne míegalé ŋku ɖe Yohanes 3:16 me nyawo ŋu ake la, míade dzesii be egblɔ be “ame sia ame, si xɔa [Yesu] dzi sena la, mele tsɔtsrɔ̃ ge o, ke boŋ [akpɔ] agbe mavɔ.” Esia fia be ele be míaɖe afɔ aɖe hafi agbe mavɔ ƒe nunanaa nasu mía si. Eya ta ne míedi be ‘míakpɔ agbe mavɔ’ la, ele be míaxɔ Yesu dzi ase eye míaɖo toe.

Ðewohĩ àbia be: ‘Nu ka tae toɖoɖo gahiã? Ðe Yesu ŋutɔ megblɔ be “ame sia ame, si xɔa [ye dzi] sena” la akpɔ agbe mavɔ oa?’ Ɛ̃, xɔse le vevie. Ke hã, ele be míaɖo ŋku edzi be, le Biblia me la, xɔse de ŋgɔ wu kaka ɖe nane dzi be enye nyateƒe dzro ko. Nyagɔmeɖegbalẽ aɖe gblɔ be Helagbe me nya si Yohanes zã la fia “dziɖoɖo ɖe nu ŋu bliboe, ke menye kaka ɖe nu dzi dzro ko o.” (Vine’s Expository Dictionary of Old and New Testament Words) Hafi Mawu nakpɔ ŋudzedze ɖe ame aɖe ŋu la, menye ɖeko amea alɔ̃ ɖe edzi be Yesue nye Ðela la ko evɔ o. Ele be wòaku kutri vevie anɔ agbe ɖe Yesu ƒe nufiafiawo nu. Ne dɔwɔwɔ aɖeke mekpe ɖe xɔse ŋu o la, ekema xɔse la nye xɔse gbɔlo. Biblia gblɔ be: “Xɔse dɔwɔwɔ manɔŋui . . . nye nu kuku.” (Yakobo 2:26) Ne míagblɔe bubui la, nu si wobia tso xɔsetɔ la sie nye be wòaxɔ Yesu dzi se, si fia be wòanɔ agbe ɖe xɔse ma si le esi la nu.

Paulo ɖe nya sia me ale: “Lɔlɔ̃ si le Kristo la si ƒonɛ ɖe mía nu, elabena aleae míekpɔe enye esi: be ame ɖeka [Yesu] ku ɖe wo katã ta . . . Eye wòku ɖe wo katã ta, bene ame siwo le agbe la naganɔ agbe na wo ɖokuiwo azɔ o, ke na ame si ku ɖe wo ta, eye wofɔe ɖe tsitre la boŋ.” (2 Korintotɔwo 5:14, 15) Ne míekpɔ ŋudzedze ɖe Yesu ƒe vɔsaa ŋu nyateƒe la, ele be esia naʋã mí míawɔ tɔtrɔ siwo hiã le míaƒe agbenɔnɔ me—míaganɔ agbe abe ale si míawo ŋutɔwo míedii ene o, ke boŋ míanɔ agbe na Yesu, ame si ku ɖe mía ta la. Ema fia be, ele be agbenɔnɔ ɖe Yesu ƒe nufiafiawo nu nanye nu vevitɔ na mí le agbe me. Eye ele be tɔtrɔ sia nakpɔ ŋusẽ ɖe nu siwo míebua nu veviwoe, míaƒe nyametsotsowo, kple nu sia nu si míewɔna dzi. Teƒeɖoɖo kae asu ame siwo xɔ Yesu dzi se eye wonɔa agbe ɖe eƒe nufiafiawo nu la si?

“MELE TSƆTSRƆ̃ GE O, KE BOŊ WÒAKPƆ AGBE MAVƆ”

Yohanes 3:16 ƒe akpa mamlɛtɔ ƒo nu tso nu si Mawu do ŋugbe be yeawɔ na ame siwo xɔ tafea dzi se eye wowɔa yeƒe sewo dzi la ŋu. Mawu ɖoe be nuteƒewɔla mawo “mele tsɔtsrɔ̃ ge o, ke boŋ [woakpɔ] agbe mavɔ.” Ke hã teƒeɖoɖo vovovowoe asu ame siwo Mawu ƒe lɔlɔ̃a aɖe vi na la si.

Yesu do ŋugbe na hatsotso ɖeka be woakpɔ agbe mavɔ le dziƒo. Egblɔ na eƒe nusrɔ̃la wɔnuteƒewo eme kɔ nyuie be yeyina teƒe aɖe dzra ge ɖo ɖi na wo le dziƒo ale be woava ɖu fia kpli ye le ŋutikɔkɔe me. (Yohanes 14:2, 3; Filipitɔwo 3:20, 21) Ame siwo woafɔ ɖe tsitre ayi dziƒo la “[anye] Mawu kple Kristo la ƒe nunɔlawo, eye woaɖu fia kplii hena ƒe akpe ɖeka.”Nyaɖeɖefia 20:6.

Kristo yomedzela ʋɛ aɖewo si koe mɔnukpɔkpɔ ma asu. Le nyateƒe me la, Yesu gblɔ be: “Alẽha sue, mègavɔ̃ o, elabena edze mia Fofo la ŋu be yeatsɔ fiaɖuƒe la ana mi.” (Luka 12:32) Ame nenie “alẽha sue” la me tɔwo anye? Nyaɖeɖefia 14:1, 4 gblɔ be: “Eye mekpɔ, eye kpɔ ɖa! Alẽvi la [Yesu Kristo si wofɔ ɖe tsitre la] le tsitre ɖe [dziƒo] Zion To la dzi, eye ame akpe alafa ɖeka blaene vɔ ene, siwo ƒe ŋgonu woŋlɔ eƒe ŋkɔ kple Fofoa ƒe ŋkɔ ɖo la, le eŋu. . . . Woƒle ame siawo tso amegbetɔwo dome, be woanye kutsetse gbãtɔ na Mawu kple Alẽvi la.” Ne wotsɔ “alẽha sue” la me tɔwo sɔ kple ame akpe teƒe akpe geɖe siwo nɔ agbe le anyigba dzi kpɔ la, ame 144,000 la le sue vavã. Wogblɔ be ame siawo nye fiawo, eya ta ame kawo dzie woaɖu fia ɖo?

Yesu ƒo nu tso hatsotso evelia aɖe si me tɔwo anye nuteƒewɔla siwo Dziƒofiaɖuƒea ƒe yayrawo aɖe vi na la ŋu. Le Yohanes 10:16 ƒe nya nu la, Yesu gblɔ be: “Alẽ bubuwo le asinye, siwo metso kpo sia me o; ele nam be makplɔ woawo hã avae, eye woase nye gbe, eye woazu alẽha ɖeka,  alẽkplɔla ɖeka.” “Alẽ” siawo kpɔa mɔ be yewoanɔ agbe tegbee le anyigba dzi—emae nye mɔnukpɔkpɔ si wotsɔ ɖo Adam kple Xawa ŋkume le gɔmedzedzea me. Aleke míewɔ nya be anyigba dzie hatsotso evelia me tɔwo anɔ?

Woƒo nu tso ale si anyigba la ava zu Paradiso la ŋu le Biblia me zi geɖe. Ne èdi be yeakpɔ esia ƒe kpeɖodzi la, àte ŋu aʋu wò Biblia axlẽ mawunyakpukpui siawo: Psalmo 37:9-11; 46:9, 10; 72:7, 8, 16; Yesaya 35:5, 6; 65:21-23; Mateo 5:5; Yohanes 5:28, 29; Nyaɖeɖefia 21:4. Mawunyakpukpui mawo gblɔe ɖi be aʋawɔwɔ, dɔwuame kple ku nu ayi. Woƒo nu tso ɣeyiɣi si me ame nyuiwo atu woawo ŋutɔwo ƒe xɔwo, woade woawo ŋutɔwo ƒe agblewo, eye woanyi wo viwo le xexe si me ŋutifafa axɔ aƒe ɖo me la ŋu. * Ðe yayra siawo medzro wò oa? Susu nyuiwo li siwo tae míexɔe se be ŋugbedodo mawo ava eme kpuie ɖo.

MAWU WƆ NU GEÐE NA MÍ XOXO

Ne ètɔ sẽe hebu nu siwo katã Mawu wɔ na wò kpakple ameƒomea katã ŋu la, àkpɔe kɔtɛ be ewɔ nu geɖe ŋutɔ na mí xoxo. Ena agbe, nunya, lãmesẽ aɖe si nu kpakple nu siwo léa agbea ɖe te la mí. Gawu la, tafe ƒe nunana si ƒe ɖoɖo Mawu wɔ na mí to Yesu, ame si ku ɖe mía ta dzi la, ate ŋu ahe yayra siwo lolo wu la vɛ na mí, abe ale si míekpɔe le Yohanes 3:16 ene.

Agbe tegbee nɔnɔ le xexe si me ŋutifafa kple dzidzɔ axɔ aƒe ɖo me, si me dɔléle, aʋawɔwɔ, dɔwuame alo ku manɔ o la, aʋu mɔnukpɔkpɔ ɖi na mí be yayra mavɔwo nasu mía si eye míakpɔ dzidzɔ tegbee. Ekpo ɖe gbɔwò azɔ be nàwɔ nu siwo ana yayra mawo nasu asiwò. Nyabiase vevi si fɔ ɖe te lae nye be, Nu ka wɔm nèle na Mawu?

^ mm. 24 Àte ŋu axlẽ nu geɖe tso nya sia ŋu le agbalẽ sia, si nye Nuka Tututue Nye Biblia ƒe Nufiafia? ƒe ta 3 lia me. Yehowa Ðasefowoe tae.