Aleke wodzɔa nu le gbedoxɔa me le Yesu ƒe ɣeyiɣia me?

Gbedoxɔa ƒe akpa si nye Nyɔnuwo ƒe Xɔxɔnu lae nudzɔɖakawo nɔna. Agbalẽ aɖe si ƒo nu tso gbedoxɔ me subɔsubɔdɔwɔwɔ ŋu la gblɔ be: “Nudzɔɖaka, alo ‘kpẽ’ wuietɔ̃, siwo me wodzɔa ga ɖo la nɔa xɔxɔnua le akpata la me, le gliawo ŋu keŋ.”—The Temple—Its Ministry and Services.

Woyɔa nudzɔɖakawo be kpẽwo, elabena woƒe nugbɔ le biie eye wokeke le agɔmegbɔ. Nudzɔɖaka ɖe sia ɖe kple nu si woazã ga si wodzɔ ɖe eme la na, eye wode dzesi nudzɔɖakaawo nenema wotɔwotɔwoe. Nyɔnuwo ƒe Xɔxɔnu lae Yesu nɔ esime wòkpɔ ame geɖewo wonɔ nu dzɔm eye ahosi dahe aɖe hã va dzɔ nu.—Luka 21:1, 2.

Woɖo nudzɔɖaka eve ɖi na adzɔ si woxena ɖe gbedoxɔa ta—ɖeka nye ƒe si va yi tɔ eye evelia nye ƒe si me wole tɔ. Wozãa ga si wodana ɖe nudzɔɖaka 3 lia me la na akpakpawo, 4 lia na ahɔnɛwo, 5 lia na nake, 6 lia na lifi, eye 7 lia na sikagbawo. Ne ame si le vɔa sa ge la dzra ga ɖo wòsɔ gbɔ wu ga home si woɖo ɖi na vɔsanu mawo la, ekema atsɔ ga si kpɔtɔ la ade nudzɔɖaka susɔeawo dometɔ ɖeka me. Wodaa ga si tsiaa anyi tso nuvɔ̃vɔsawo ƒe gazazãwo me la ɖe nudzɔɖaka 8 lia me. Wotsɔa ga siwo tsiaa anyi tso fɔɖivɔsawo, xewo ƒe vɔsawo, vɔ siwo Nasiretɔwo sana kple vɔ siwo anyidzelawo sana me la dea nudzɔɖaka 9 lia, 10 lia, 11 lia kple 12 lia me le ɖoɖo ma nu. Lɔlɔ̃nu faa nudzɔdzɔwoe wodana ɖe nudzɔɖaka 13 lia me.

Ðe Biblia ŋlɔla Luka nye ŋutinyaŋlɔla si ƒe nuŋlɔɖiwo de pɛpɛpɛa?

Luka ye ŋlɔ Nyanyuigbalẽ si ŋu eƒe ŋkɔ le la kpakple Apostolowo Ƒe Dɔwɔwɔwo siaa. Luka gblɔ be “[yeku] nuwo katã me tsitotsito tso gɔmedzedzea me.” Gake agbalẽnyala aɖewo tsɔ nya ɖe eƒe nuŋlɔɖiawo ŋu. (Luka 1:3) Ke biabia lae nye be, ɖe eƒe nuŋlɔɖiawo de pɛpɛpɛ vavã?

Nya siwo Luka ŋlɔ la sɔ ɖe ŋutinya nu eye woate ŋu aɖo kpe wo dzi. Le kpɔɖeŋu me, le gbe si me wòŋlɔ eƒe agbalẽawo ɖo me la, ezã dzesideŋkɔ vovovo siwo woyɔna na Roma dziɖuɖumegãwo wosɔ ɖe ale si Romatɔwo yɔa woe nu pɛpɛpɛ, evɔ ŋkɔ mawo mebɔ o. Egbea, woyɔa ame mawo be dumegãwo, le Tesalonika; woyɔa wo be azãwo kple hoʋiʋliwo dzi kpɔlawo, le Efeso, kple bubuawo. (Dɔwɔwɔwo 16:20; 17:6; 19:31) Luka yɔ Herodes Antipa be nutodziɖula, eye wòyɔ Sergio Paulo be Kipro ƒe nutogãdziɖula.—Dɔwɔwɔwo 13:1, 7; 28:7.

Ale si Luka zã dzesideŋkɔ siawo ɖe eteƒe la ɖe dzesi, elabena ne nuto aɖe si le Roma dziɖuɖua te la ƒe ɖoƒe trɔ la, edziɖula hã ƒe dzesideŋkɔ trɔna. Ke hã Biblia ŋuti nunyala Bruce Metzger gblɔ be, “ŋkɔ siwo woyɔna na wo le Dɔwɔwɔwo ƒe agbalẽa me la sɔna ɖe ale si woyɔa nuto mawo dzi ɖulawo le ɣeyiɣi mawo me la nu pɛpɛpɛ.” Agbalẽnyala William Ramsay ɖɔ Luka be enye “ŋutinyaŋlɔla si de ŋgɔ ŋutɔ.”