Dzo kpo yi emenuwo dzi

Dzo kpo yi emenuawo dzi

 NU VEVI SIWO NANA ƑOMEWO KPƆA DZIDZƆ

Ale Si Nàƒo Nu Kple Viwòa Evɔ Màhe Nya Ðe Eŋu O

Ale Si Nàƒo Nu Kple Viwòa Evɔ Màhe Nya Ðe Eŋu O

“Esime vinyenyɔnuvia xɔ ƒe 14 la, edze glãkahehe kplim. Ne megblɔ nɛ be, ‘Zã le dodom, va ɖu nu’ la, eɖoa eŋu nam be, ‘Ne edzrom be maɖu nu ko maɖui.’ Ne mebiae be ewɔ eƒe aƒemedɔwo vɔ hã la, eɖoa eŋu nam be, ‘Mègaɖe fu nam o!’ Míedoa ɣli ɖe mía nɔewo ta zi geɖe.”MAKI, JAPAN. *

Ne viwò nye ƒewuivi la, mia kplii dome nyahehewo ate ŋu anye kuxi sesẽ siwo nàdo goe la dometɔ ɖeka, eye esia abia dzigbɔɖi geɖe tso asiwò. Maria, si le Brazil, si vinyɔnuvi xɔ ƒe 14 la gblɔ be: “Ne vinyea le nya hem kplim la, nye dzi hona. Dzi kua mí ame evea ale gbegbe be míedoa ɣli ɖe mía nɔewo ta.” Aleae wòle le Carmela, si le Italy la hã gome. Egblɔ be: “Zi geɖe la, mía kple vinyeŋutsuvia míehea nya kple mía nɔewo vevie va se ɖe esime wògena ɖe xɔ me hedoa ʋɔ ɖe eɖokui nu.”

Nu ka tae ƒewuivi aɖewo lɔ̃a nyahehe nenema? Wo hatiwoe le wo gblẽma? Ate ŋu anɔ eme nenema. Biblia gblɔ be hadede ate ŋu akpɔ ŋusẽ nyui alo ŋusẽ gbegblẽ ɖe ame dzi. (Lododowo 13:20; 1 Korintotɔwo 15:33) Azɔ hã, fefe siwo nana wòdzena abe naneke megblẽ le aglãdzedze ŋu o ene la bɔ ɖe nu siwo ƒewuiviwo tsɔ ɖea modzakae egbea la me.

Gake nu bubu aɖewo hã li siwo ŋu wòle be nàbu, eye ne èse ale si nu siawo kpɔa ŋusẽ ɖe viwò ƒewuivia dzii gɔme la, kuxia gbɔ kpɔkpɔ masesẽ na wò akpã o. Bu eƒe kpɔɖeŋu aɖewo ŋu kpɔ.

VIWÒA LE ‘TAMEBUBUŊUTETE’ TUM ÐO

Apostolo Paulo ŋlɔ bena: “Esime menye vidzĩ la, meƒoa nu abe vidzĩ ene, mebua tame abe vidzĩ ene, mesea nu gɔme abe vidzĩ ene; gake fifia si mezu ame tsitsi la, meɖe asi le vidzĩ me nuwɔnawo ŋu.” (1 Korintotɔwo 13:11) Edze ƒãa le Paulo ƒe nyawo me be ɖeviwo ƒe nuŋububu to vovo na ame tsitsiwo tɔ. Le mɔ ka nu?

 Ðeviwo mebua nu ŋu yia ŋgɔe o, wo tɔ koe nye ɛ̃, ao, alo enyo alo menyo o. Gake zi geɖe la, ame tsitsiwo ya bua nuwo ŋu yia ŋgɔe eye wobua nu geɖe ŋu hafi ƒoa nya ta alo tsoa nya me. Le kpɔɖeŋu me, ame tsitsiwo bua nu si wɔ ge woala la ŋu be esɔ loo alo mesɔ o hã, eye wobua ŋusẽ si wòakpɔ ɖe ame bubuwo dzi hã ŋu. Nuŋububu alea zua numame na wo. Gake fifia hafi sɔhɛwo ya le esrɔ̃m.

Biblia de dzi ƒo na sɔhɛwo be “woabu tame.” (Lododowo 1:4) Le nyateƒe me la, Biblia xlɔ̃ nu Kristotɔwo katã be woawɔ woƒe ‘tamebubuŋutete’ ŋu dɔ. (Romatɔwo 12:1, 2; Hebritɔwo 5:14) Gake esi viwòa le eƒe tamebubuŋutete ŋu dɔ wɔwɔ srɔ̃m ta la, ate ŋu ava nɔ glãka hem kpli wò ɣeaɖewoɣi le nya maɖinyawo gɔ̃ hã ŋu. Alo ate ŋu agblɔ eƒe nukpɔsusu eye wòadze ƒãa be mebu nuwo ŋu nyuie o. (Lododowo 14:12) Aleke nàte ŋu aɖe susu kplii le nɔnɔme siawo me nyahehemanɔmee?

TE MƆNU SIA KPƆ: Tsɔe be agbagba ko dzem viwòa le be yeawɔ tamebubuŋutete si srɔ̃m wòle la ŋu dɔ, eye menye ɖe wòlé nukpɔsusu si wòɖe gblɔ la me ɖe asi goŋgoŋ hafi o. Eya ta be nàdoe kpɔ la, gbã la, kafui ɖe eƒe susuŋudɔwɔwɔ ta. (“Edzɔ dzi nam be èbu nuwo ŋu alea, gake menye nya siwo katã nègblɔ la dzie meda asi ɖo o.”) Eyome kpe ɖe eŋu wòabu nuwo ŋu ayi ŋgɔe. (“Èsusu be nya si nègblɔ la ate ŋu asɔ le go sia go mea?”) Ðewohĩ ale si viwòa agbugbɔ alé ŋku ɖe eƒe susua ŋu ahatrɔ asi le eŋui la awɔ nuku na wò.

Nya vevi aɖee nye esi: Ne mia kple viwòa miele nya lém kpɔ la, mègaƒo nu wòadze abe tɔwòe dzɔ ene o. Eye ne edze abe melɔ̃ ɖe nya si gblɔm nèle dzi o hã la, anɔ eme be wò nyawo de dzi gbɔ nɛ wu ale si nèsusui, togbɔ be maɖee afia o gɔ̃ hã. Ate ŋu adzɔ be viwò nava trɔ eƒe nukpɔsusu le ŋkeke ʋɛ aɖewo megbe, alo kura gɔ̃ hã agblɔ be nenemae ye ŋutɔ hã yesusui; esia megawɔ nuku na wò o.

“Ɣeaɖewoɣi la, mía kple vinyeŋutsua míehea nya le nya maɖinyawo ŋu, abe nudomegbegblẽ loo alo fewuɖuɖu le nɔvianyɔnua ŋu ene. Gake zi geɖe la, ewɔ abe ɖe wòdina be mabia ye nu si susum yele eye maɖee afia be mese eƒe susua gɔme le mɔ aɖe nu ene, ahagblɔ be, ‘Oo, alea boŋue nyaa lea?’ alo ‘Oo, nu ma susum nèlea?’ Fifia mekpɔe be ne ɖe megblɔ nya mawo tɔgbi la, anye ne mía kplii míeƒo asa na nyahehe geɖe.”—Kenji, Japan.

VIWÒA LE EƑE AMENYENYE TUM ÐO

Dzila dzeaɖaŋuwo nana wònɔa bɔbɔe na wo vi ƒewuiwo be woagblɔ woƒe susuwo faa

Nu si ƒewuiwo hehe bia ƒe akpa vevi aɖee nye be woakpe ɖe wo ŋu woasu te ava nɔ wo ɖokui si abe ame tsitsi ɖɔʋuwo ene. (1 Mose 2:24) Esia bia be woatu amenyenye ƒomevi aɖe ɖo—si fia be woalé nɔnɔme, dzixɔse kple agbenɔnɔ ƒe dzidzenu siwo aɖe ame si ƒomevi wonye fia la me ɖe asi. Ne nu gbegblẽ wɔwɔ ƒe tetekpɔ dze ŋgɔ ƒewuivi si nya ame si ƒomevi wòdi be yeanye la, abu nuwo ŋu ayi ŋgɔe wu nu siwo ado tso eƒe nuwɔnawo me la ko. Abia eɖokui hã be: ‘Ame ka ƒomevie medi be manye? Agbenɔnɔ ƒe dzidzenu kawoe le vevie nam? Nu kae ame si si dzidzenu siawo le la awɔ le nɔnɔme sia me?’2 Petro 3:11.

Biblia ƒo nu tso Yosef, ɖekakpui si lé agbenɔnɔ ƒe dzidzenu nyuiwo me ɖe asi goŋgoŋ la ŋu. Le kpɔɖeŋu me, esi Potifar srɔ̃ ƒoe ɖe enu be wòadɔ kpli ye la, Yosef ɖo eŋu nɛ be: “Aleke gɔ̃ mawɔ vɔ̃ gã sia, eye mada vo ɖe Mawu ŋuti mahã?” (1 Mose 39:9) Ɣemaɣi la, togbɔ be Mawu mede se ɖe ahasiwɔwɔ ŋu na Israel viwo haɖe o hã la, Yosef te ŋu de dzesi nu si nye Mawu ƒe susu le nyaa ŋu. Gawu la, eƒe nya si nye “aleke gɔ̃ mawɔ” la ɖee fia be ewɔ Mawu ƒe nukpɔsusua etɔe, alo ena wòzu eƒe amenyenye ƒe akpa aɖe.Efesotɔwo 5:1.

Viwòa hã le agbagba dzem be amenyenye tɔxɛ aɖe nasu ye si. Esia nyo, elabena nu siwo ŋu wòkpɔ kakaɖedzi le be wonyo la akpe ɖe eŋu wòakpe akɔ kple hatiwo ƒe nyaƒoɖeamenuwo eye wòaʋli eƒe dzidzenuwo ta. (Lododowo 1:10-15) Ke hã eƒe amenyenye ma si tum wòle ɖo la kee ana wòadi be yeahe glãka kpli wò. Ne edzɔ alea la, nu kae nàte ŋu awɔ?

TE MƆNU SIA KPƆ: Le esi nàhe nya kplii teƒe la, gbugbɔ gblɔ nya si wògblɔ la kpuie. (“Ne mese wò nyaa gɔme nyuie la, èle gbɔgblɔm be . . . ”) Eyome bia nyawoe. (“Nu kae na nèse le ɖokuiwò me alea?” alo “Nu ka tae nèƒo nya ta nenema?”) Na viwòa nagblɔ nya si le dzi me nɛ. Na wòagblɔ nu si dzi wòka ɖo. Ne miaƒe susuwo koe mewɔ ɖeka o evɔ nya si gblɔm wòle hã medze vɔ̃ o la, na wòakpɔe be ède bubu eƒe susua ŋu, nenye be mèda asi ɖe eƒe nyaa dzi bliboe o hã.

 Menye ɖeko amenyenye si wòatu ɖo kple eƒe kaka ɖe nu si wònya be enyo dzi nye nu nyui o, ke eɖea vi hã. Nya lae nye be, Biblia gblɔ be Kristotɔwo meganɔ abe ɖevi siwo “nufiafia ƒe ya sia ya ƒona yina gaƒona gbɔna” la ene o. (Efesotɔwo 4:14) Eya ta ɖe mɔ na viwòa eye nàde dzi ƒo nɛ gɔ̃ hã be wòatu eƒe amenyenyea ɖo eye wòaka ɖe nu si wònya be ele eteƒe la dzi.

“Ne mena vinyenyɔnuawo nya be mele klalo ase woƒe nyawo la, woawo hã wolɔ̃na faa be yewoaɖo tom, ne nye nyawo mewɔ ɖeka kple woƒe susuwo o gɔ̃ hã. Meɖɔa ŋu ɖo be magazi nye susuwo ɖe wo dzi o, ke boŋ mekpena ɖe wo ŋu be woawo ŋutɔwo nakpɔ nu si le eteƒe la adze sii.”—Ivana, Czech Republic.

TƆ AFƆ TO, GAKE SE NU GƆME HÃ

Sɔhɛ aɖewo tsɔa nya ɖeka nɔa fu ɖem na ame enuenu abe ɖevi suewo ene kple susu be wo dzilawo ava na ta mlɔeba. Ne esia dzɔna le wò ƒomea me edziedzi la, ke ehiã be nàɖɔ ŋu ɖo. Togbɔ be wɔwɔ ɖe woƒe didia dzi ana wò tome nafa vie hã la, esia wɔwɔ ana woakpɔe be yewoate ŋu akpɔ nu si dim yewole to glãkahehe me. Aleke nàkpɔ kuxi sia gbɔe? Wɔ Yesu ƒe aɖaŋuɖoɖo sia dzi: “Mina miaƒe Ɛ̃ nanye Ɛ̃ ko, eye miaƒe Ao nanye Ao ko.” (Mateo 5:37) Viwò ƒewuiviawo madi be yewoahe nya kpli wò o ne wonyae be mèle ta na ge gbeɖe o.

Gake se nu gɔme le afi si wòhiã le hã. Le kpɔɖeŋu me, ne viwòa va bia mɔ le gbɔwò be yemagbɔ va aƒe me kaba o la, ɖe mɔ nɛ wòaɖe nu si tae la me. Le go sia me la, mefia be ɖe nèna ta le eƒe nyaƒoɖeamenu ta o, ke boŋ ɖeko nèle wɔwɔm ɖe Biblia ƒe mɔfiame si nye, “Mina amewo katã nanyae be nugɔmeselawo mienye” la dzi.Filipitɔwo 4:5.

TE MƆNU SIA KPƆ: Ƒomea nedzro game si ɖeviawo nagbɔ va aƒe me kple aƒea me ƒe se bubuwo me. Na woakpɔe be èle klalo be yease woƒe nyawo eye yealé ŋku ɖe nɔnɔmeawo katã ŋu hafi atso nya me. Roberto, si nye vifofo le Brazil la gblɔ be: “Ele be ƒewuiviwo nakpɔe be yewo dzilawo alɔ̃ ɖe yewoƒe biabia dzi ne menya tsi tsitre ɖe Biblia ƒe aɖaŋuɖoɖowo ŋu o ko.”

Gake dzila aɖeke mede blibo o. Biblia gblɔ be: “Mí katã míewɔa vodada zi geɖe.” (Yakobo 3:2) Ne èkpɔe be nyahehe si do mo ɖa la ƒe akpa aɖe tso ye gbɔ la, na viwòa nanya kaba be ye tɔ medzɔ o. Ne èlɔ̃na ɖe wò vodadawo dzi la, ekema èle ɖokuibɔbɔ ƒe kpɔɖeŋu ɖom ɖi na viwòa eye esia ade dzi ƒo na eya hã be wòalɔ̃ ɖe eƒe vodadawo dzi.

“Gbe ɖeka esi mía kple vinyeŋutsua míehe nya eye nye dziku nu fa vɔ la, meɖe kuku nɛ be netsɔe kem be medo ɣli ɖe eta kple dziku nenema. Esia na eya hã ƒe dzi dze eme eye wònɔ bɔbɔe nɛ wòlɔ̃ faa ɖo tom azɔ.”—Kenji, Japan.

^ mm. 3 Míetrɔ ŋkɔ siwo le nyati sia me.

BIA ÐOKUIWÒ BE . . . 

  • Nu kawoe nye hã mewɔna si anya wɔnɛ be mía kple vinye míehea nya?

  • Aleke mate ŋu awɔ nyati sia me nyawo ŋu dɔ ale be mate ŋu ase nu gɔme na vinye ƒewuivia nyuie wu?

  • Nu kae mate ŋu awɔ be mía kple vinyea míanɔ nya hem o, ke boŋ míalé nyawo kpɔ le ŋutifafa me?