Yesu ƒe tsitretsitsia de dzo eƒe nusrɔ̃lawo me eye wòna dzi ɖo wo ƒo. Enɔ alea, vevietɔ le apostolo Paulo gome. Ekaka nya nyuia le Asia Sue kple Mediterranea ƒe nutoa me, enɔ hamewo ɖom henɔ ŋusẽ dom Kristotɔwo be woanɔ tsitre sesĩe le agbe gbegblẽ nɔnɔ ƒe tetekpɔwo kpakple yometiti sesẽwo me. Togbɔ be kuxi mawo nɔ anyi hã la, ame geɖe va zu Kristotɔwo.

Wova lé Paulo ŋutɔ hã de gaxɔ me emegbe. Togbɔ be enɔ gaxɔ me hã la, eŋlɔ agbalẽ geɖe tsɔ do ŋusẽ Kristo hameawo. Exlɔ̃ nu wo tso kuxi bubu aɖe si ganye ŋkubiãnya wu la ŋu: eyae nye xɔsegbegbe. Mawu ƒe gbɔgbɔ kɔkɔe la ʋã Paulo wòkpɔe do ŋgɔ be “amegãxi nyanyrawo,” siwo gblɔa “nya totrowo” la age ɖe wo dome, eye “woahe nusrɔ̃lawo ɖe wo ɖokuiwo ŋu.”Dɔwɔwɔwo 20:29, 30.

Kaka ƒe alafa gbãtɔ ƒe nuwuwu naɖo la, xɔsegbegbe sia dze egɔme. Ɣeyiɣi ma lɔƒo mee Yesu si wofɔ ɖe tsitre la tsɔ Nyaɖeɖefia me gbedeasi si nɔ dzesiwo me eye wòku ɖe nu siwo ava dzɔ le etsɔme ŋu la na Yohanes. Abe ale si Yohanes ŋlɔe ɖi ɣemaɣi ene la, tsitretsiɖeŋulawo loo alo alakpanufialawo mate ŋu axe mɔ na Mawu be wòagana tame si wòɖo le gɔmedzedzea me ɖe ameƒomea kple anyigba ŋu la nava eme o. “Dukɔ sia dukɔ kple to sia to kple gbegbɔgblɔ sia gbegbɔgblɔ kpakple ame ɖe sia ɖe ƒomevi” ase Mawu Fiaɖuƒe ŋuti nya nyui la. (Nyaɖeɖefia 14:6) Woagbugbɔ aɖo Paradiso anyi ɖe anyigba dzi, eye ame sia ame si lɔ̃ be yeawɔ Mawu ƒe lɔlɔ̃nu la anɔ eme!

Ðe màlɔ̃ ɖe edzi be esia nye “nya nyui” oa? Ne nenemae la, ekema srɔ̃ nu geɖe tso Mawu ƒe gbedeasi si le Biblia me na ameƒomea kpakple ale si wòate ŋu aɖe vi na wò fifia kple etsɔme siaa la ŋu.

Àte ŋu axlẽ Biblia le Internet dzi le www.jw.org. Àkpɔ agbalẽ gbadza si nye Nya Nyui Si Tso Mawu Gbɔ! kple agbalẽ si nye Nuka Tututue Nye Biblia ƒe Nufiafia? kpakple bubu geɖewo hã axlẽ le mia degbe me. Agbalẽ siawo dzro nu si tae míate ŋu aka ɖe Biblia dzi kple ale si míate ŋu awɔ eƒe aɖaŋuɖoɖowo dzi le míawo ŋutɔwo ƒe agbenɔnɔ kpakple míaƒe ƒomea me la me. Alo àte ŋu abia numeɖeɖe bubuwo Yehowa Ðasefowo dometɔ ɖe sia ɖe.

Numeɖeɖe siawo tso Dɔwɔwɔwo, Efesotɔwo, Filipitɔwo, Kolosetɔwo, Filemon, 1 Yohanes, Nyaɖeɖefia.