Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  October 2013

 NYATI SI LE AKPAA DZI | NU KA KOŊ ŊUE BIBLIA ƑO NU TSOE?

Aleke Míewɔ Va Dzɔ?

Aleke Míewɔ Va Dzɔ?

Biblia ƒe agbalẽ si nye Mose Ƒe Agbalẽ Gbãtɔ tsɔ nya siwo gɔme sese le bɔbɔe la ɖe ale si xexea wɔ va dzɔ la me kpuie ale: “Le gɔmedzedzea me Mawu wɔ dziƒo kple anyigba.” (1 Mose 1:1) Esi Mawu wɔ nu miemiewo kple lãwo vɔ la, ewɔ ame gbãtɔ siwo ŋkɔe nye Adam kple Xawa. Woto vovo na lãwo, elabena tiatiawɔwɔ ƒe ablɔɖe kpakple nɔnɔme bubu siwo le Mawu si la le amegbetɔwo hã si va se ɖe afi aɖe. Eya ta woate ŋu abia akɔnta tso wo si ɖe woƒe nuwɔnawo ta. Ne wowɔ nu si Mawu bia tso wo si la, ke woakpɔ gome le Mawu ƒe tameɖoɖo me vava me ahanye amegbetɔƒome deblibo si anɔ agbe le ŋutifafa me le anyigba dzi tegbee la dzilawo.

Ke hã esi mawudɔlawo dometɔ ɖeka kpɔ esia eye wòdi eya ŋutɔ ɖokui tɔ la, edze agbagba ble amegbetɔwo be yeana yeƒe didia nava eme. Esia na woyɔe be Satana, si gɔmee nye “Tsitretsiɖeŋula.” Satana ƒo nu na Xawa to da aɖe dzi hegblɔ nɛ be eme anyo nɛ wu ne eɖe kɔ ɖa le Mawu ƒe mɔfiame ŋu hewɔ nu si eya ŋutɔ di. Adam kple Xawa dze Satana yome, eye esia wɔe be woa kple wo Wɔla dome gblẽ. Le tiatia gbegblẽ si mía dzila gbãtɔawo wɔ ta la, wobu agbe mavɔ nɔnɔ ƒe mɔnukpɔkpɔa eye mí katã míenyi nu vɔ̃ kple blibomademade kpakple ku, si nu míate ŋu asi le o la ƒe dome tso wo gbɔ.

Enumake Mawu ɖe tame si wòɖo be yeaɖɔ nɔnɔme wɔnublanui sia ɖo kple nu si yeawɔ be Adam ƒe dzidzimeviwo nakpɔ agbe mavɔ la gblɔ. Mawu gblɔ nya ɖi be ‘dzidzimevi’ aɖe, si nye ame tɔxɛ aɖe la, ava tsrɔ̃ Satana ɖa mlɔeba eye wòana gbɔdzɔe mí tso fukpekpe siwo katã Satana, Adam kple Xawa ƒe nuwɔna he va mía dzi la me. (1 Mose 3:15) Ame kae ava nye ‘dzidzimevi’ ma? Woava nya ame si wònye la le ɣeyiɣi geɖe megbe.

Gake Satana gakpɔtɔ nɔ adeklo dzi be yeagblẽ Mawu ƒe tameɖoɖo nyui la me. Esia wɔe be nu vɔ̃ wɔwɔ kple vɔ̃ɖinyenye dzi ɖe edzi kabakaba. Eya ta Mawu tso nya me be yeana tsi naɖe ame vɔ̃ɖiwo woatsrɔ̃. Egblɔ na Noa, si nye ame dzɔdzɔe la be wòakpa aɖakaʋu gã nyadri aɖe si me woa kple eƒe ƒomea kpakple lã siwo wògblɔ nɛ be wòakplɔ ayi aɖakaʋua me la atsi agbe le.

Ƒe ɖeka le Tsiɖɔɖɔa megbe la, Noa kple eƒe ƒomea wodo go tso aɖakaʋua me va nɔ anyigba si ŋu wokɔ la dzi. Gake ‘dzidzimevia’ ƒe vavaɣi meɖo ɣemaɣi o.

Numeɖeɖe siawo tso 1 Mose, ta 1-11; Yuda 6, 14, 15; Nyaɖeɖefia 12:9.