Sylvia, si wɔa dɔ le lãmesẽdɔwɔƒe aɖe la gblɔ be: “Ame geɖe siwo mía kpli wo míede kɔledzi la gblɔna be mawusubɔlawoe yewonye. Gake wofia dodokpɔ eye wozãa atike vɔ̃ɖiwo. Mawusubɔsubɔ mekpɔ ŋusẽ aɖeke ɖe woƒe agbenɔnɔ dzi o.”

Ŋutsu aɖe si ŋkɔe nye Lionel gblɔ be: “Nye dɔwɔhatiwo daa alakpa gblɔna be yewodze dɔ evɔ le nyateƒe mea, womedze dɔ hafi o. Ðeko wotɔ ŋkɔ be yewonye mawusubɔlawo, womenɔa agbe abe mawusubɔlawo ene o.”

Mawusubɔsubɔ mekpɔ ŋusẽ boo aɖeke ɖe ame geɖe ƒe agbenɔnɔ dzi o. “Ðokuitsɔtsɔ na Mawu ƒe nɔnɔme” koe le ame geɖe si egbea, gake “womenɔa agbe ɖe eƒe ŋusẽ nu o.” (2 Timoteo 3:5) Subɔsubɔhakplɔlawo meɖoa kpɔɖeŋu nyui o, eye womefiaa nu hameviawo tso Biblia ƒe agbe nyui nɔnɔ dzidzenuwo ŋu ale si dze o. Eya ta mewɔ nuku o be ame geɖe susuna be Mawu metsɔ ɖeke le agbe si ƒomevi yewonɔna me o.

NU KAE BIBLIA FIA TSO NYA SIA ŊU?

Biblia ɖee fia be seselelãme le Mawu si eye be míaƒe nuwɔna ate ŋu ado dziku nɛ loo alo ado dzidzɔ nɛ. Esi blema Israel viwo dze aglã ɖe Mawu ŋu la, esia ‘do dziku nɛ.’ (Psalmo 78:40) Gake ne nu vɔ̃ wɔla aɖe trɔ dzi me la, enyea “dzidzɔ geɖe le dziƒo.” (Luka 15:7) Ne ame aɖe nya mía Fofo si le dziƒo la ƒe nɔnɔme lédzinamewo nyuie la, eƒe lɔlɔ̃ na eyama ade to ɖe edzi, eye esia aʋãe wòalɔ̃ nu siwo Mawu lɔ̃na ahalé fu nu siwo wòléa fui.Amos 5:15.

ALEKE YEHOWA ÐASEFOWO WƆA NU LE GO SIA ME?

Nyadzɔdzɔgbalẽ aɖe gblɔ tso Yehowa Ðasefowo ŋu be wofiaa nu woƒe hameviwo “be woalɔ̃ woƒe ƒomewo, anye dɔwɔla nyuiwo kple dukɔmevi siwo ɖia anukware.” Egblɔ kpee be: “Hameviawo nɔa agbe ɖe dzidzenu kɔkɔwo nu. Woxɔe se be atamanono, aha tsu nono, atike vɔ̃ɖiwo zazã, tsatsadada, gbɔdɔdɔ ƒe agbe gbegblẽ nɔnɔ, kple ŋutsu kple ŋutsu alo nyɔnu kple nyɔnu ƒe gbɔdɔdɔ nye nu vɔ̃ gã siwo gblẽa ame kple Mawu dome ƒomedodo me.”—The Deseret News of Salt Lake City, Utah, U.S.A.

Ðe subɔsubɔhakplɔlawo te ŋu kpe ɖe woƒe hameviwo ŋu be woanɔ agbe ɖe Mawu ƒe agbe nyui nɔnɔ dzidzenuwo nua?

Aleke nusɔsrɔ̃ tso Mawu ƒe nɔnɔme nyuiwo ŋu kpena ɖe Ðasefowo ŋui? Sylvia, si ŋu míeƒo nu tsoe va yi, gblɔ be: “Nu fitifiti wɔwɔ bɔ le lãmesẽdɔwɔƒewo. Ele bɔbɔe be wò hã nàƒo ɖokuiwò ɖe eme. Gake ale si Yehowa * ase le eɖokui me tso nye nuwɔnaa ŋu gɔmesese nyuie kpe ɖe ŋunye mewɔ nu si sɔ. Esia na mele dzidzɔ kpɔm eye nye dzitsinya mebua fɔm o.” Sylvia ka ɖe edzi be agbenɔnɔ ɖe yeƒe subɔsubɔdzixɔsewo nu na yeƒe agbenɔnɔ nyo ɖe edzi.

^ mm. 9 Biblia na míenya be Mawu ƒe ŋkɔe nye Yehowa.