Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  July 2013

 TE ÐE MAWU ŊU

Etsɔ Nu Nyuiwo ‘Yɔ Míaƒe Dziwo Me Fũu’

Etsɔ Nu Nyuiwo ‘Yɔ Míaƒe Dziwo Me Fũu’

Ðe Yehowa tsɔa ɖe le eme na mí ŋutɔŋutɔa, alo metsɔa ɖeke le amegbetɔwo ƒe fukpekpewo me o? Ale si Biblia ɖo nya sia ŋui la dea dzi ƒo na mí. Mawu tsɔ ɖe le eme na amegbetɔwo vavã, eye wòdi be míakpɔ dzidzɔ le agbe me. Gbe sia gbe la, enana eƒe nyuiwɔwɔ ɖea vi na amegbetɔwo katã le mɔ geɖe nu, ame siwo mesubɔnɛ o gɔ̃ hã. De ŋugble tso nya si apostolo Paulo gblɔ ŋu kpɔ.—Xlẽ Dɔwɔwɔwo 14:16, 17.

Esi Paulo nɔ gbeƒã ɖem na Listratɔ siwo mesubɔa Mawu o la, egblɔ be: “Le dzidzime siwo va yi me la, [Mawu ɖe] mɔ na dukɔwo katã be woazɔ woawo ŋutɔwo ƒe mɔwo dzi, togbɔ be le nyateƒe me la, medzudzɔ ɖaseɖiɖi le eya ŋutɔ ɖokui ŋu hafi o, esi wòwɔa nyui, eye wònana tsidzadza mi tso dziƒo, kple ɣeyiɣi siwo me nuɖuɖu dona, eye wòtsɔa nuɖuɖu kple dzidzɔ yɔa miaƒe dziwo me fũu.” Aleke ame siwo nɔ to ɖom Paulo la se nya mawo gɔmee?

Mesesẽ na Listratɔ mawo be woase Paulo ƒe nyawo gɔme o. Agbledelawoe wonye, eye wole nuto si me tsi dzana le nyuie eye anyigbaa hã wɔa nuku nyuie la me. Gake Paulo na wose egɔme be Mawu gbɔe tsidzadza kpakple nuƒãɣiwo kple nuŋeɣiwo tsona. Eya ta ɣesiaɣi si woxa nuku nyuiwo eye wòɖu nu viviwo la, ekema Mawu ƒe nyuiwɔwɔe ma le vi ɖem na wo.

Paulo ƒe nya siwo wògblɔ na Listratɔwo la fia nu vevi aɖewo mí tso Yehowa Mawu ŋu.

Yehowa na tiatiawɔblɔɖe mí. De dzesii be Yehowa ɖe mɔ na Dukɔwo me tɔ siwo mesubɔnɛ o be “woazɔ woawo ŋutɔwo ƒe mɔwo dzi.” Biblia gɔmeɖegbalẽ aɖe gblɔ tso nya siawo ŋu be ate ŋu afia be “woawɔ nu si dze wo ŋu” alo “woawɔ nu si dzro wo.” Yehowa mezia ame aɖeke dzi be wòasubɔ ye o. Ena tiatiawɔblɔɖe mí—si nye ŋutete si le mía si be míatia nu si míedi be míatsɔ míaƒe agbe awɔe.—5 Mose 30:19.

Yehowa di be míadze si ye. Paulo gblɔ be: “Medzudzɔ ɖaseɖiɖi le eya ŋutɔ ɖokui ŋu . . . o.” Biblia gɔmeɖegbalẽ si míeyɔ va yi gblɔ be woate ŋu agaɖe nya sia gɔme be: “Mawu na dukɔwo nya ame si tututu wònye.” Mawu ƒe nuwɔwɔwo ɖia ɖase tso eƒe “nɔnɔme makpɔmakpɔawo” ŋu, siwo dometɔ aɖewoe nye nyuiwɔwɔ, nunya, ŋusẽ kple lɔlɔ̃. (Romatɔwo 1:20) Yehowa ɖe nu geɖe fia mí tso eɖokui ŋu le Biblia me. (2 Timoteo 3:16, 17) Esia na eme kɔ na mí ƒãa be edi be míadze si ye.

Gbe sia gbe la, Mawu nana eƒe nyuiwɔwɔ ɖea vi na amegbetɔwo katã le mɔ geɖe nu, ame siwo mesubɔnɛ o gɔ̃ hã

Yehowa di be míakpɔ dzidzɔ. Paulo gblɔ be Mawu tsɔa ‘nuɖuɖu kple dzidzɔ yɔa míaƒe dziwo me fũu.’ Nu vɔ̃ wɔla siwo mesubɔa Yehowa o gɔ̃ hã ate ŋu aɖu nu viviwo ahakpɔ dzidzɔ aɖe sinu le agbe me. Gake Mawu di be míakpɔ dzidzɔ vavãtɔ si anɔ anyi ɖaa. Ne míesrɔ̃ eyama ŋuti nyateƒea henɔ agbe ɖe enu ko hafi esia ate ŋu ava eme na mí.—Psalmo 144:15; Mateo 5:3.

Yehowa ƒe nyuiwɔwɔ ɖea vi na mí gbe sia gbe. Ðe manyo be nàsrɔ̃ nu geɖe tso ale si nàwɔ aɖe ŋudzedzekpɔkpɔ afia Mawu si ‘tsɔa nuɖuɖu kple dzidzɔ yɔa wò dzi me fũu’ la ŋu oa?

Biblia ƒe akpa si míade dzi ƒo na wò be nàxlẽ le July me

Dɔwɔwɔwo 11-28