ÐE VIÐE nɔ Yesu ƒe agbe ŋu vavã? Edze ƒãa be ƒome dahe mee wodzii ɖo, eye nunɔamesi ʋɛ aɖewo koe su esi le agbe me. Le nyateƒe me la, mekpɔ ‘afi si wòatsɔ ta aziɔ ɖo’ gɔ̃ hã o. (Luka 9:57, 58) Tsɔ kpe ɖe eŋu la, amewo lé fui, woda alakpa ɖe esi, eye mlɔeba eƒe futɔwo wui.

Ðewohĩ àgblɔ be, ‘Menye aleae mebua agbe si ŋu viɖe le o!’ Gake nya bubuwo gali ku ɖe Yesu ŋu siwo me dzodzro aɖe vi na mí. Na míadzro esiawo dometɔ ene me kpɔ.

1. TAÐODZINU NƆ YESU SI—EYAE NYE BE YEAWƆ MAWU ƑE LƆLƆ̃NU.

“Nye nuɖuɖu ye nye be mawɔ ame si dɔm ɖa la ƒe lɔlɔ̃nu.”—Yohanes 4:34.

Yesu to eƒe nyagbɔgblɔ kple nuwɔnawo dzi ɖee fia be yedi be yeawɔ Yehowa, * ye Fofo si le dziƒo la, ƒe lɔlɔ̃nu. Mawu ƒe lɔlɔ̃nu wɔwɔ dzɔa dzi na Yesu ŋutɔ. Le nyateƒe me la, etsɔe sɔ kple nuɖuɖu, abe ale si wòdze le mawunyakpukpui si le etame la me ene. Bu nɔnɔme si me wògblɔ nya ma le ŋu kpɔ.

Ga wuieve me lɔƒoe Yesu gblɔ nya ma. (Yohanes 4:6) Tso ŋdi me kee wònɔ mɔ zɔm to Samaria ƒe tonutoa me, eya ta dɔ anya nɔ ewum godoo. Le esia ta, eƒe nusrɔ̃lawo ƒoe ɖe enu be: “Rabi, ɖu nu!” (Yohanes 4:31) Ale si Yesu ɖo eŋu na wo la ɖee fia be Mawu ƒe dɔa wɔwɔ ɖi ƒo nɛ eye wòdo ŋusẽe. Ðe nya mawo meɖee fia be eƒe dzi dze eme oa?

2. YESU LƆ̃ FOFOA VEVIE.

“Melɔ̃ Fofo la.”—Yohanes 14:31.

Ƒomedodo kplikplikpli nɔ Yesu kple Fofoa si le dziƒo la dome. Lɔlɔ̃ gã si nɔ Yesu si na Mawu la ʋãe wòɖe gbeƒã Eƒe ŋkɔ, tameɖoɖowo kple nɔnɔme nyuiwo. Yesu ɖe Fofoa ƒe amenyenye fia bliboe le eƒe nyagbɔgblɔ, nuwɔna kple nɔnɔme si wòɖe fia me ale gbegbe be Fofoa ƒe amenyenye dzena kɔtɛ le Yesu ƒe nuwɔna me. Esia tae esime Filipo bia Yesu be, “Fia Fofo la mí” la, Yesu ɖo eŋu be: “Ame si kpɔm la, ekpɔ Fofo la hã.”—Yohanes 14:8, 9.

Yesu lɔ̃ Fofoa ale gbegbe be elɔ̃ faa ɖo toe yi ɖase ku me gɔ̃ hã. (Filipitɔwo 2:7, 8; 1 Yohanes 5:3) Lɔlɔ̃ gã ma si nɔ Yesu si na Mawu la na wòse le eɖokui me be viɖe le yeƒe agbe ŋu.

 3. YESU LƆ̃ AMEWO.

“Lɔlɔ̃ gã wu esia megale ame aɖeke si o: be ame aɖe natsɔ eƒe luʋɔ aɖo anyi ɖe exɔlɔ̃awo ta.”—Yohanes 15:13.

Esi amegbetɔwo nyi nu vɔ̃ dome ta la, etsɔme nyui aɖeke meli na wo o. Biblia gblɔ be: “To ame ɖeka [Adam] dzi nu vɔ̃ ge ɖe xexea me, eye to nu vɔ̃ me ku la va, eye ale ku la kaka ɖe amewo katã dome, esi wo katã wɔ nu vɔ̃ ŋuti la.” (Romatɔwo 5:12) Míate ŋu avo tso nu vɔ̃ me tsonu si nye ku si me le míawo ŋutɔwo ƒe ŋusẽ me o.—Romatɔwo 6:23.

Dzidzɔtɔe la, lɔlɔ̃ ʋã Yehowa wòwɔ ɖoɖo aɖe si dzi wòato aɖe amegbetɔƒomea tso nɔnɔme sia me. Eɖe mɔ Via deblibo, si ŋu nu vɔ̃ mele o, si va tɔ ŋkɔ Yesu, la kpe fu heku ale be eƒe kua nanye tafe si dzi wòato aɖe ameƒomea tso nu vɔ̃ kple ku si me. Le lɔlɔ̃ si le Yesu si na Fofoa kple amegbetɔwo ta la, elɔ̃ faa tsɔ eƒe amegbetɔ ƒe agbe deblibo la na ɖe mía ta. (Romatɔwo 5:6-8) Ale si wòlɔ̃ amegbetɔwo eye medi eɖokui tɔ o la na viɖe nɔ eƒe agbe ŋu. *

4. YESU NYAE BE YE FOFO LƆ̃ YE HEKPƆA ŊUDZEDZE ÐE YE ŊU.

“Ame siae nye Vinye, si gbɔ nyemelɔ̃a nu le o, si ŋu mekpɔ ŋudzedze ɖo.”—Mateo 3:17.

Esime wonyrɔ Yesu ɖe tsi me lae Yehowa gblɔ nya mawo tso dziƒo. Yehowa to nya siawo dzi ɖee fia le amewo ŋkume be yelɔ̃ ye Vi, Yesu, hekpɔ ŋudzedze ɖe eŋu. Eya ta mewɔ nuku o be, Yesu gblɔ kakaɖedzitɔe be: “Fofo la lɔ̃am”! (Yohanes 10:17) Esi Yesu nyae be ye Fofo lɔ̃ ye hekpɔ ŋudzedze ɖe ye ŋu ta la, dzi nɔ eƒo wòdo dzi, togbɔ be woti eyome heƒo nu tsi tre ɖe eŋu hã. Lɔlɔ̃ kple ŋudzedzekpɔkpɔɖeameŋu sia kpe ɖe eŋu wòdo dzi ɖase ɖe ku me gɔ̃ hã. (Yohanes 10:18) Esi Yesu nyae be ye Fofo lɔ̃ ye hekpɔ ŋudzedze ɖe ye ŋu ta la, ɖikeke mele eme o be esia gana viɖe nɔ eƒe agbe ŋu geɖe wu.

Ðikekemanɔmee la, viɖe nɔ Yesu ƒe agbe ŋu. Eme kɔ ƒãa be míate ŋu asrɔ̃ nu geɖe tso egbɔ ku ɖe ale si míana viɖe vavã nanɔ míaƒe agbe ŋui la ŋu. Nyati si kplɔe ɖo la adzro aɖaŋu nyui siwo Yesu ɖo na eyomedzelawo ku ɖe ale si woanɔ agbee ŋu la dometɔ aɖewo me.

^ mm. 6 Biblia na míenya be Mawu ƒe ŋkɔe nye Yehowa.

^ mm. 15 Ne èdi be yeasrɔ̃ nu geɖe wu tso ale si Yesu ƒe kua ate ŋu alé avu ɖe míaƒe nu vɔ̃wo tae ŋu la, xlẽ agbalẽ si nye Nuka Tututue Nye Biblia ƒe Nufiafia? ƒe ta 5 lia. Yehowa Ðasefowoe tae.