Dzo kpo yi emenuwo dzi

Dzo kpo yi emenuawo dzi

 NYATI SI LE AKPAA DZI: YESU ƑE TSITRETSITSI LA​—VI KAE WÒAÐE NA WÒ?

Yesu Ƒe Tsitretsitsi La—Ðe Wòdzɔ Nyateƒea?

Yesu Ƒe Tsitretsitsi La—Ðe Wòdzɔ Nyateƒea?

HERODOTUS, si nye Helatɔ ŋutinyaŋlɔla si nɔ anyi ƒe 2,500 ye nye esi va yi la ŋlɔ ŋutinya aɖe tso Egiptetɔ siwo nɔ anyi le eƒe ŋkekea me ŋu. Eŋlɔ bena: “Le kesinɔtɔwo ƒe aglotuƒewo la, ŋutsu aɖe tsɔa ati si wokpa ɖe ame kuku si le aɖaka me ƒe nɔnɔmewɔwɔe si wosi aŋɔ na me, si ƒe didime anɔ abe abɔklugui ɖeka alo eve ene, la ɖe asi nɔa tsatsam le fiẽnuɖuɖua megbe. Etsɔnɛ nɔa ame siwo le nuɖuƒea la fiam hegblɔna be, ‘Mino nu, eye mikpɔ dzidzɔ, elabena aleae miava nɔ ne mieku.’”

Menye Egiptetɔwo ko sie agbe kple ku ŋuti nukpɔsusu ma nɔ o. Egbea, nyagbɔgblɔ si nye, “Miɖu nu, mino nu, eye miakpɔ dzidzɔ” nɔa nu na ame geɖe. Ne kukuawo magafɔ o la, ke nu ka tae màɖu agbe fifia o? Nu ka tae wòle be nàtsi dzi ɖe nu dzɔdzɔe wɔwɔ ŋu? Ne mɔkpɔkpɔ aɖeke megale ku megbe o la, ekema esɔ be míaɖu agbe fifia. Apostolo Paulo hã he susu yi nya sia dzi. Egblɔ tso ale si ame siwo mexɔ tsitretsitsia dzi se o bua nuwo ŋui ŋu be: “Ne womafɔ ame kukuwo ɖe tsitre o la, ekema ‘mina míaɖu nu, eye míano nu, elabena etsɔ míele kuku ge.’”—1 Korintotɔwo 15:32.

Le nyateƒe me la, Paulo ŋutɔ ya mexɔe se be ne ame ku ko la, evɔ nɛ keŋkeŋ o. Eka ɖe edzi be kukuawo agbɔ agbe, eye mɔnukpɔkpɔ asu wo si be woanɔ agbe tegbee. Kristo Yesu ƒe tsitretsitsia, * si nye nudzɔdzɔ vevi aɖe, si Paulo xɔ se be enye nyateƒe matrɔmatrɔ lae na kakaɖedzi ma su esi. Le nyateƒe me la, tsitretsitsi mae nye nudzɔdzɔ vevitɔ si do ŋusẽ Kristotɔ gbãtɔwo ƒe xɔse.

Gake aleke Yesu ƒe tsitretsitsia aɖe vi na mí? Aleke míewɔ nya be wofɔe ɖe tsitre vavã? Na míakpɔ ale si Paulo ɖe nya siawo me le agbalẽ si wòŋlɔ na Kristotɔ siwo nɔ Korinto la me ɖa.

 KE NE WOMEFƆ KRISTO LA ÐE TSITRE O ÐE?

Kristotɔ siwo nɔ Korinto la dometɔ aɖewo tɔtɔ le tsitretsitsi ƒe nyaa ŋu, eye bubuwo mexɔe se be woate ŋu afɔ ame tso ku me ŋutɔŋutɔ o. Le agbalẽ gbãtɔ si apostoloa ŋlɔ na Kristotɔ siwo nɔ du ma me me la, egblɔ nu vovovo siwo wòagblẽ nenye be tsitretsitsia menye nu ŋutɔŋutɔ o. Eŋlɔ bena: “Ne vavãe wònye be ame kukuwo ƒe tsitretsitsi aɖeke meli o la, ekema womefɔ Kristo hã ɖe tsitre o. Eye ne womefɔ Kristo ɖe tsitre o la, ekema míaƒe gbeƒãɖeɖe la nye dzodzro nyateƒe, eye míaƒe xɔse hã nye dzodzro. Gawu la, woakpɔ mí be míenye Mawu ƒe aʋatsoɖasefowo . . . Ekema viɖe aɖeke mele miaƒe xɔse ŋu o; miegakpɔtɔ le miaƒe nu vɔ̃wo me. . . . Ekema ame siwo dɔ alɔ̃ le ku me le Kristo me hã nu yi tegbee.”—1 Korintotɔwo 15:13-18.

“Eɖe eɖokui fia nɔvi siwo wu alafa atɔ̃ zi ɖeka . . . Le ema megbe la, eɖe eɖokui fia Yakobo, eye le emegbe la, apostoloawo katã; gake mlɔeba la, eɖe eɖokui fia nye hã.”—1 Korintotɔwo 15:6-8

Paulo gblɔ nya aɖe si ŋu wòasesẽ ŋutɔ be amewo natsi tsitre ɖo la tsɔ dze eƒe nyaa gɔme be: Ne ame kukuwo ƒe tsitretsitsi aɖeke meli o la, ekema womefɔ Kristo hã ɖe tsitre o. Ne womefɔ Kristo ɖe tsitre o la, nu kae wòagblẽ? Gbeƒãɖeɖe nya nyuia anye dzodzro, eye anye alakpadada hã. Nya lae nye be, Kristo ƒe tsitretsitsia nye Kristotɔwo ƒe dzixɔse vevi aɖe; edo ƒome kplikplikpli kple Biblia me gɔmedzenufiafia siwo ku ɖe gome si le Mawu si be wòaɖu dzi, eƒe ŋkɔ, eƒe Fiaɖuƒea kple míaƒe ɖeɖekpɔkpɔ ŋu. Ne ɖe tsitretsitsia menye nu ŋutɔŋutɔ o la, ekema nya nyui si Paulo kple apostolo bubuawo ɖe gbeƒãe la anye nya gbɔlo siwo ŋu viɖe aɖeke manɔ o.

Tsɔ kpe ɖe eŋu la, ne womefɔ Kristo ɖe tsitre o la, Kristotɔwo ƒe xɔsea nye dzixɔse dzodzro si ŋu kpeɖodzi mele o, si wotu ɖe alakpanya dzi. Gawu la, afia be menye ɖeko nya si Paulo kple ame bubuwo gblɔ be wofɔ Yesu ɖe tsitre la nye alakpanya o, ke woda alakpa ɖe Yehowa Mawu, ame si wobe efɔe ɖe tsitre la hã si. Azɔ hã, nya si woɖe gbeƒãe be Kristo “ku ɖe míaƒe nu vɔ̃wo ta” la hã anye aʋatso—elabena ne womete ŋu ɖe Ðela la ŋutɔ tso ku si me o la, ekema mate ŋu aɖe ame bubuwo o. (1 Korintotɔwo 15:3) Ema afia hã be Kristotɔ siwo ku, siwo dometɔ aɖewo nye xɔsetakulawo la, ƒe ku nye dzodzro, elabena womagbɔ agbe wo abe ale si wonɔ mɔ kpɔm nɛ ene o.

Paulo ƒo nya ta be: “Ne agbe sia ɖeɖe me koe míekpɔa mɔ na Kristo le la, ekema míaƒe nue wɔ nublanui wu le amewo katã dome.” (1 Korintotɔwo 15:19) Nu geɖe dome gblẽ na Paulo kple Kristotɔ bubuwo siaa, woti wo yome, woto nɔnɔme sesẽwo me, eye woƒe agbe ɖo afɔku me le esi woxɔ tsitretsitsia kpakple viɖe siwo katã wòahe vɛ la dzi se ta. Ðe esiawo katã manye tofloko ne ɖe tsitretsitsi aɖeke meli oa?

NU SI TAE WÒLE BE NÀXƆ TSITRETSITSIA DZI SE

Paulo ka ɖe edzi be menye alakpanya dzie wotu Kristotɔwo ƒe dzixɔsewo ɖo o. Enyae be wofɔ Yesu ɖe tsitre tso ku me, eye wògblɔ eŋuti kpeɖodziwo na Korintotɔawo esi wògblɔ na wo be, “Kristo ku ɖe míaƒe nu vɔ̃wo ta le Ŋɔŋlɔawo nu; eye be woɖii, ɛ̃, be wofɔe ɖe tsitre le ŋkeke etɔ̃agbe le Ŋɔŋlɔawo nu; eye be eɖe eɖokui fia Kefas, emegbe la, ame wuieveawo.” * Eyome Paulo gblɔ kpee be: “Le ema megbe la, eɖe eɖokui fia nɔvi siwo wu alafa atɔ̃ zi ɖeka, ame siwo dometɔ akpa gãtɔ kpɔtɔ li va se ɖe fifia, gake wo dometɔ aɖewo dɔ alɔ̃ le ku me. Le ema megbe la, eɖe eɖokui fia Yakobo, eye le emegbe la, apostoloawo katã; gake mlɔeba la, eɖe eɖokui fia nye hã.”—1 Korintotɔwo 15:3-8.

Paulo gblɔ kakaɖedzitɔe le eƒe nyaa ƒe gɔmedzedze be Kristo ku ɖe míaƒe nu vɔ̃wo ta, woɖii, eye  wofɔe ɖe tsitre. Nu kae na Paulo ka ɖe edzi alea gbegbe ɖo? Eteƒekpɔla geɖeawo ƒe ɖaseɖiɖi nye susuawo dometɔ ɖeka. Yesu si wofɔ ɖe tsitre la ɖe eɖokui fia ame ɖekaɖekawo (siwo dome Paulo hã nɔ), egaɖe eɖokui fia ƒuƒoƒo suewo kple ameha siwo ade ame 500 gɔ̃ hã, eye ɖikeke mele eme o be wo dometɔ geɖe ke ɖi esi wosee zi gbãtɔ be wofɔ Yesu ɖe tsitre! (Luka 24:1-11) Eteƒekpɔlawo dometɔ geɖe ganɔ agbe le Paulo ŋɔli siwo ate ŋu aɖo kpe edzi be Yesu ɖe eɖokui fia yewo. (1 Korintotɔwo 15:6) Woate ŋu agbe ame ɖeka alo eve ƒe ɖaseɖiɖiwo bɔbɔe, gake menye nuteƒekpɔla 500 alo esi wu nenema ƒe ɖaseɖiɖi o.

De dzesii hã be Paulo gblɔ zi eve be Yesu ƒe ku, eɖiɖi kple eƒe tsitretsitsia va eme “le Ŋɔŋlɔawo nu.” Nudzɔdzɔ mawo ɖo kpe edzi be nyagblɔɖi siwo le Hebri Ŋɔŋlɔawo me ku ɖe Mesia la ŋu la va eme, eye wòɖo kpe edzi be Yesue nye Mesia si ŋugbe wodo la vavã.

Togbɔ be Ŋɔŋlɔawo kple ame siwo kpɔ Yesu le eƒe tsitretsitsi megbe la siaa ɖi ɖase tso eŋu hã la, ame aɖewo gake ɖi nya ma kokoko ɣemaɣi kple egbea siaa. Ame aɖewo gblɔ be eƒe nusrɔ̃lawoe fi eƒe kukua ɖaɣla hegblɔ be yewokpɔe wòfɔ ɖe tsitre. Ke hã ŋusẽ alo ŋutete menɔ nusrɔ̃lawo si be woakpe Roma srafo siwo nɔ yɔdoa nu dzɔm la dzi o. Ame bubuwo gblɔ be, menye ame ŋutɔŋutɔe Yesu si wofɔ ɖe tsitre si amewo kpɔ la nye o, ke boŋ nane si wokpɔ le susu me dzro koe wònye. Esia mate ŋu anye nyateƒe o, elabena ame vovovowoe kpɔe le ɣeyiɣi vovovowo me. Tsɔ kpe ɖe eŋu la, ne menye ame ŋutɔŋutɔe o la, ɖe susu le eme be woagblɔ be eme akpa le dzoka dzi hema na amewo woɖu, abe ale si Yesu si wofɔ ɖe tsitre la wɔe le Galilea enea? (Yohanes 21:9-14) Ne menye ame ŋutɔŋutɔe o la, ɖe wòate ŋu agblɔ na amewo be woava ka asi ye ŋu kpɔa?—Luka 24:36-39.

 Ke hã ame aɖewo gblɔna be Yesu ƒe tsitretsitsi ŋuti nya la nye nya aɖe si eƒe nusrɔ̃lawo kpa. Gake ɖe viɖe aɖe anɔ esia wɔwɔ me na woa? Ðaseɖiɖi tso tsitretsitsia ŋu ana woado vlo nusrɔ̃lawo, woawɔ fu wo, eye woawu wo gɔ̃ hã. Nu ka tae woakpe fu siawo gbegbe be yewoatsɔ aʋli alakpanya aɖe ta? Gakpe ɖe eŋu la, Yerusalem ye woɖi ɖase tso eŋu le gbã, evɔ afi ma tututue woƒe tsitretsiɖeŋula siwo adi be yewoawɔ mɔnukpɔkpɔ ɖe sia ɖe ŋu dɔ abu fɔ wo la nɔ.

Tsitretsitsi la koŋue nye nu si na dzi ɖo nusrɔ̃lawo ƒo be woaɖi ɖase tso woƒe Aƒetɔ la ŋu, togbɔ be esia wɔwɔ na woti wo yome kutɔkutɔe hã. Tsitretsitsia ŋuti nyateƒea va nye Kristotɔwo ƒe dzixɔse vevitɔwo dometɔ ɖeka. Menye ɖaseɖiɖi tso nufiala nyanu aɖe si wowu la tae Kristotɔ gbãtɔwo de woƒe agbe afɔku me ɖo o. Ke boŋ wode woƒe agbe afɔku me heɖe gbeƒã Yesu ƒe tsitretsitsia, le esi tsitretsitsia ɖo kpe edzi be eyae nye Kristo, Mawu ƒe Vi la, eye wònye ame triakɔ si le agbe, si nɔ alɔ dom wo henɔ mɔ fiam wo ta. Eƒe tsitretsitsia fia be woava fɔ woawo hã ɖe tsitre tso ku me. Le nyateƒe me la, ne ɖe womefɔ Yesu ɖe tsitre o la, anye ne Kristotɔwo hã manɔ anyi o, eye ɖewohĩ míase Yesu ŋu nya gɔ̃ hã o.

Gake vi kae Kristo ƒe tsitretsitsia aɖe na mí egbea?

^ mm. 5 Le Biblia me la, Helagbe me nya si gɔme woɖe be “tsitretsitsi” la fia be “woatso ɖe tsitrenu ake” le nyaa ŋutɔŋutɔ nu. Gɔmesese si nɔa esie nye be woagbɔ agbe ame aɖe, eye eƒe susu, nɔnɔme, kple amenyenye naganɔ abe ale si wònɔ hafi ku ene.

^ mm. 13 “Ame wuieveawo” nye “apostoloawo” yɔyɔ le mɔ bubu nu, togbɔ be wo ame 11 koe susɔ hena ɣeyiɣi aɖe le Yuda Iskariot ƒe ku megbe hã. Esi Yesu ɖe eɖokui fia wo ɣebubuɣi la, ne mede ɖeke o la, apostolo 10 koe nɔ ame 12-awo teƒe, elabena Toma menɔ wo dome o.—Yohanes 20:24.