Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  February 2013

 TE ÐE MAWU ŊU

‘Agbagbeawo Ƒe Mawue Wònye’

‘Agbagbeawo Ƒe Mawue Wònye’

Ðe ku sẽ ŋu wu Mawua? Gbeɖe! Aleke wòanya wɔe be ku alo “futɔ” bubu aɖe nasẽ ŋu wu “Mawu Ŋusẽkatãtɔ” la? (1 Korintotɔwo 15:26; 2 Mose 6:3) Ŋusẽ le Mawu si be wòakpe ku dzi to tsitretsitsia dzi, eye nu sia tututue wòdo ŋugbe be yeawɔ le eƒe xexe yeyea me. * Nu ka tae míate ŋu aka ɖe ŋugbedodo sia dzi? Mawu ŋutɔ ƒe Vi, Yesu, gblɔ nya siwo ate ŋu ana míakpɔ mɔ na emevava kple kakaɖedzi.—Xlẽ Mateo 22:31, 32.

Yesu gblɔ na Zadukitɔwo, siwo mexɔ tsitretsitsia dzi se o la be: “Ke le ame kukuwo ƒe tsitretsitsi ŋuti la, ɖe miexlẽ nya si Mawu gblɔ na mi be, ‘Nyee nye Abraham ƒe Mawu kple Isak ƒe Mawu kple Yakob ƒe Mawu’ la oa? Menye ame kukuwo ƒe Mawue wònye o, ke boŋ agbagbeawo tɔe.” Le afi sia la, nya si Mawu gblɔ na Mose le ŋuve si nɔ bibim la gbɔ le ƒe 1514 Do Ŋgɔ Na Mía Ŋɔli me la dzie Yesu nɔ susu hem yi. (2 Mose 3:1-6) Le Yesu ƒe nyaa nu la, nya si Yehowa gblɔ na Mose be “Nye enye Abraham ƒe Mawu, Isak ƒe Mawu kple Yakob ƒe Mawu” la fia be ŋugbe si wòdo ku ɖe tsitretsitsia ŋu la ava eme godoo. Le mɔ ka nu?

Bu nya bliboa ŋu kpɔ. Le ɣeyiɣi si me Yehowa ƒo nu na Mose la, blemafofo Abraham, Isak kple Yakob ku xoxoxo—Abraham ku ƒe 329 ye nye ema, Isak, ƒe 224, eye Yakob ku ƒe 197 ye nye ema. Ke hã, Yehowa gblɔ be “Nye enye” woƒe Mawu, si fia be Yehowa ƒo nu tso blemafofo etɔ̃ mawo, siwo megali o la ŋu abe ɖe wogale agbe ene. Nu ka tae?

Yesu ɖe eme be: “Menye ame kukuwo ƒe Mawue [Yehowa nye] o, ke boŋ agbagbeawo tɔe.” Tɔ sẽe nàbu nu si nya mawo fia ŋu kpɔ. Ne tsitretsitsi aɖeke meli o la, ke Abraham, Isak kple Yakob atsi ku si me tegbee. Ekema afia be Yehowa nye kukuawo ƒe Mawu. Eye wòagafia hã be Yehowa mete ŋu kpe ku dzi o, abe ɖe ŋutete mele eŋu be wòaxɔ esubɔla wɔnuteƒewo tso ku si me o ene.

Ke nya kae míate ŋu agblɔ tso Abraham, Isak, Yakob kple Yehowa subɔla wɔnuteƒe siwo katã ku la ŋu? Yesu gblɔ kakaɖedzitɔe be: “Wo katã wole agbe nɛ.” (Luka 20:38) Kakaɖedzi le tame si Yehowa ɖo be yeafɔ ame siwo wɔ nuteƒe nɛ la ɖe tsitre ŋu ale gbegbe be ebua wo abe ɖe wole agbe ene. (Romatɔwo 4:16, 17) Yehowa meŋlɔa nu be o, eye aɖo ŋku ame siawo katã dzi agbɔ agbe wo ne ɣeyiɣia de.

Ŋusẽ le Yehowa si be wòakpe ku dzi bliboe

Ðe wòle dzrowòm be nàgakpɔ wò ame vevi aɖe si ku la akea? Ne nenemae la, ke ɖo ŋku edzi be ŋusẽ le Yehowa si be wòakpe ku dzi bliboe. Naneke mate ŋu ana ŋugbe si wòdo be yeafɔ kukuawo ɖe tsitre la nado kpo emevava o. Ðe manyo be nàsrɔ̃ nu geɖe tso tsitretsitsi ƒe ŋugbedodoa kpakple Mawu si ana wòava eme la ŋu oa? Esia wɔwɔ ate wò ɖe Yehowa, ‘agbagbeawo ƒe Mawu’ la ŋu.

Biblia ƒe akpa si míade dzi ƒo na wò be nàxlẽ le February me

Mateo 22-28–Marko1-8

^ mm. 3 Ne èdi numekɔkɔ geɖe tso ŋugbe si Mawu do ku ɖe amewo fɔfɔ ɖe tsitre be woava nɔ agbe le dzɔdzɔnyenye ƒe xexe yeye aɖe me ŋu la, kpɔ agbalẽ si nye Nuka Tututue Nye Biblia ƒe Nufiafia? ƒe ta 7 lia. Yehowa Ðasefowoe tae.