Dzo kpo yi emenuwo dzi

Dzo kpo yi emenuawo dzi

Ðe Nèxɔe Se Be Yenɔ Agbe Kpɔ Hafi Va Dzɔa?

Ðe Nèxɔe Se Be Yenɔ Agbe Kpɔ Hafi Va Dzɔa?

“Gbugbɔgadzɔ nye nyateƒe matrɔmatrɔ, eye nyateƒee wònye be agbagbeawo dzɔ tso kukuawo me, eye be ame kukuwo ƒe luʋɔwo li.”—PLATO, HELA XEXEMENUNYALA, ƑE ALAFA 5 LIA DO ŊGƆ NA MÍA ŊƆLI, “SOCRATES” ƑE NYAWOE WÒGBLƆ.

“Esi luʋɔ menɔa anyi ŋutilã manɔmee o, eye luʋɔ la menye ŋutilã o ta la, anɔ eme be ne edo tso ŋutilã aɖe me la, eyia bubu me.”—GIORDANO BRUNO, ITALY XEXEMENUNYALA, ƑE ALAFA 16 LIA MÍA ŊƆLI.

“Naneke mekuna o: ɖeko amewo dzena abe ɖe woku ene . . . eye wonɔa nu siwo le edzi yim la kpɔm abe ɖe wole ekpɔm to fesre nu ene, elabena wole ŋutilã bubu me.”—RALPH WALDO EMERSON, AMERIKA HAKPANYAŊLƆLA, ƑE ALAFA 19 LIA MÍA ŊƆLI.

ÈBU ame si tututu nènye ŋu kpɔa? Ðe wòwɔ na wò kpɔ be yenɔ agbe kpɔ hafi gava dzɔa? Ne nenemae la, ke menye wò ɖekae o. Ɣedzeƒe kple Ɣetoɖoƒe dukɔwo me tɔwo bu biabia mawo ŋu tso blema ke. Ame siwo le agbagba dzem be yewoakpɔ ta na biabia siawo la dometɔ aɖewo trɔ ɖe gbugbɔgadzɔ ƒe dzixɔsea ŋu. Le dzixɔse sia nu la ne ame ku la, “luʋɔ” makpɔmakpɔ aɖe doa go tsoa eƒe ŋutilã me gagbugbɔdzɔna ɖe ŋutilã bubu me, etea ŋu nyea amegbetɔ bubu, lã, alo nu miemie gɔ̃ hã, zi ɖeka alo zi gbɔ zi geɖe.

 Togbɔ be ame aɖewo lɔ̃ ɖe dzixɔse sia dzi hã la, aleke míawɔ aka ɖe edzi nenye be enye nyateƒe? Nu kae Mawu ƒe Nya, Biblia, gblɔ tso nya sia ŋu? Gake gbã la, ele be míabia be, Afi kae dzixɔse sia dzɔ tso?

Afi Kae Gbugbɔgadzɔ Ƒe Dzixɔsea Dzɔ Tso?

Ŋutinyaŋlɔlawo kple agbalẽnyalawo gblɔ be Babilon, si nye blema dugã aɖe si wotso ƒe akpe eve kple edzivɔwo Do Ŋgɔ Na Mía Ŋɔli la me tɔwoe to luʋɔmakumaku ƒe dzixɔsea vɛ. Aƒetɔ Morris Jastrow, Jr., gblɔ le eƒe agbalẽ aɖe (The Religion of Babylonia and Assyria) me be, makumakunyenye ƒe dzixɔsea “nɔ vevie na Babilontɔwo ƒe nunɔlawo ŋutɔ.” Egblɔ kpee be: Babilontɔwo xɔe se be “ku nye tɔtrɔ tso agbe ƒomevi aɖe me yi bubu me.” Egagblɔ hã be: “Ðikeke mele eme o be, esi wòsesẽ na wo be woaxɔe ase be kukuawo nu yi tegbee tae woto nufiafia si nye be amegbetɔwo yia edzi nɔa agbe le nɔnɔme aɖe me tegbee la vɛ ɖo.”

To vovo na Babilontɔwo la, nufiafia si nye be luʋɔ la dona tsoa ŋutilã aɖe me yia bubu me la va nɔ mo dom ɖa le blema dukɔ bubuwo hã me. India xexemenunyalawo to nufiafia legbee aɖe si ku ɖe gbugbɔgadzɔ si nu metsona o ŋu, si wotu ɖe Karma ƒe se, si fia be nane gbɔe nu sia nu tsona la dzi. Hela xexemenunyala xɔŋkɔwo hã va lɔ̃ ɖe nufiafia sia dzi, si wɔe be ame geɖewo va xɔ edzi se.

Egbea hãa, Ɣetoɖoƒe dukɔwo me tɔ geɖe va xɔ gbugbɔgadzɔ ƒe nufiafiaa dzi se. Ame xɔŋkɔwo kple sɔhɛwo va le dzidzɔ kpɔm ɖe Ɣedzeƒe-subɔsubɔhawo ƒe nufiafiawo kple kɔnuwo ŋu. Agbalẽ kple Internet dzi nyatakakadzraɖoƒe gbogbo aɖewo ƒoa nu tsoa vevienyenye si le agbe si wobe amewo nɔ kpɔ hafi gava dzɔ la ŋu. Amewo va le dzidzɔ kpɔm ɖe nu si woyɔ be tsãgbenɔnɔ ŋuti dɔdamɔnu ŋu le dukɔ geɖe me. Enye dɔdamɔnu si me wowɔa goloɖoɖo ŋu dɔ le, si me wogblɔna le be yewole agbe si amewo nɔ kpɔ la ŋuti nyawo zãm tsɔ le agbagba dzem be yewoase woƒe lãmesẽkuxiwo kple nɔnɔmewo gɔme.

Ðe Gbugbɔgadzɔ Ƒe Dzixɔsea Nye Nyateƒea?

Togbɔ be gbugbɔgadzɔ ƒe dzixɔsea li tso blema ke hã la, egahiã kokoko be míakpɔ ŋuɖoɖo na biabia vevitɔ si nye, Nyateƒeea? Azɔ hã, Kristotɔwo adi be yewoanya nenye be dzixɔse sia wɔ ɖeka kple Biblia ƒe nufiafia. (Yohanes 17:17) Esi mía Wɔla, Yehowa Mawu, ye nye Agbedzɔƒe kple “Ame si ɖea nya ɣaɣlawo ɖe go” ta la, eyae ɖea agbe kple ku ŋuti nya siwo amegbetɔwo menya o la fiana. Eya ta míate ŋu aka ɖe ŋuɖoɖo siwo le eƒe Nya, Biblia, me la dzi.—Daniel 2:28; Dɔwɔwɔwo 17:28.

Ne míedzro Biblia me nyuie la, míakpɔ ŋuɖoɖo siwo tso Mawu gbɔ la bɔbɔe. Le kpɔɖeŋu me, 1 Mose 3:19 na míenya nya si Mawu gblɔ na Adam esi wo kple Xawa wogbe toɖoɖo Mawu. Egblɔ be: “Fifia ate wò, hafi nàkpɔ abolo aɖu, va se ɖe esime nàgatrɔ azu anyi, elabena eya mee woɖe wò tsoe. Anyi nènye, eye anyi ke nàgatrɔ azu!” Anyie wotsɔ wɔ Adam. Esi wòku la, egatrɔ zu anyi. Nya sia si me kɔ lae Mawu gblɔ. Eya ta ne ame ku la, megbugbɔdzɔna ame bubui o, ke boŋ enu yina. * Abe ale si ko dzoxɔxɔ nye fafa ƒe anyimanɔmanɔ, kuɖiɖi nye tsi ƒe anyimanɔmanɔ, eye kekeli nye viviti ƒe anyimanɔmanɔ ene la, ku hã nye agbemanɔmanɔ. Ne ame ku ko la, eku! Ðe nya sia gɔme sese mele bɔbɔe oa?

Esia fia be susu bubu aɖewo tae amewo ɖoa ŋku nu si wosusu be enye agbe si yewonɔ kpɔ ŋuti nyawo dzi. Amegbetɔ ƒe ahɔhɔ̃ ƒe dɔwɔnawo le ŋutenɔɣiwo kple ŋutemanɔɣiwo siaa kpakple dɔ si atikewo alo afɔkuwo wɔna ɖe edzi la mele nyanya gobii ale o. Drɔ̃ewo kple tamesusu siwo nɔ te ɖe nyatakaka gbogbo siwo le ahɔhɔ̃a me dzi la tea ŋu dzena nu ŋutɔŋutɔ, si wɔnɛ be amewo susuna be ɖe wodzɔ vavã. Ɣeaɖewoɣi la, gbɔgbɔ vɔ̃wo toa vivimemɔnuwo dzi nana nu siwo medzɔ o la dzena abe ɖe wodzɔ ene.—1 Samuel 28:7-19.

 Le dzɔdzɔme nu la, amegbetɔwo dina be yewoanɔ agbe ahanya etsɔme. Ke afi kae didi sia tso? Eɖe dzesi be Biblia gblɔ tso Wɔlaa ŋu be: “[Ede] mavɔmavɔ dzi me na wo.” (Nyagblɔla 3:11) Eya ta enye amegbetɔwo ƒe dzimedidi be yewoanɔ agbe tegbee.

Ne mía Wɔla, Yehowa Mawu, de agbe tegbee nɔnɔ ƒe didi amegbetɔwo ƒe dziwo me la, ke esɔ be míakpɔ mɔ be afia ale si míawɔ akpɔ agbe mavɔ la mí. Biblia ɖe tameɖoɖo nyui si le Wɔlaa si be wòatsɔ agbe tegbee nɔnɔ le paradisonyigba dzi ayra amegbetɔ toɖolawo la fia. Mawu ƒe gbɔgbɔ ʋã hakpala Fia David wògblɔ be: “Ame dzɔdzɔewo anyi anyigba la dome, eye woanɔ edzi tegbee.” (Psalmo 37:29) Ame kukuwo ƒe tsitretsitsia nye Mawu ƒe tameɖoɖo mavɔa ƒe akpa vevi aɖe, eye wònye Biblia ƒe nufiafia veviwo dometɔ ɖeka.—Dɔwɔwɔwo 24:15; 1 Korintotɔwo 15:16-19.

Tsitretsitsia​—Mɔkpɔkpɔ Vavã Si Li Na Kukuawo

Ame siwo wofɔ ɖe tsitre wogava nɔ agbe le anyigba dzi la ŋuti nya enyi siwo teƒe amewo kpɔ la le Biblia me. * Menye ɖe ame siawo ƒe luʋɔwo gbugbɔgadzɔ ɖe ŋutilã bubuwo me o, ke boŋ ɖe wofɔ wo ɖe tsitre. Woƒe ƒometɔwo kple xɔlɔ̃wo kpɔ wo dze sii enumake. Medzɔ kpɔ gbeɖe be ƒometɔwo va nɔ ŋku lém ɖe vidzĩ siwo le kpuiƒe kple adzɔge la ŋu kpɔ be yewoƒe ame vevi si ku la ƒe luʋɔe gbugbɔgadzɔ ɖe wo dometɔ aɖe me hã o.—Yohanes 11:43-45.

Efaa akɔ na mí be Mawu ƒe Nyaa ɖee fia be woafɔ ame siwo ku la dometɔ akpa gãtɔ ɖe tsitre le ame kukuwo ƒe tsitretsitsia me le Mawu ƒe xexe yeye, si ava xɔ ɖe xexe vɔ̃ɖi sia teƒe kpuie la me. (2 Petro 3:13, 14) Fifia la, ame biliɔn geɖe ƒe nu le Yehowa Mawu, ame si seɖoƒe mele eƒe ŋkuɖoɖonudzi ƒe ŋutete ŋu o, eye wòɖoa ŋku ɣletiviwo katã ƒe ŋkɔ gɔ̃ hã dzi la, ƒe susu me! (Psalmo 147:4; Nyaɖeɖefia 20:13) Ne eva fɔ ame siawo ƒe tɔgbuitɔgbuiwo ɖe tsitre le eƒe xexe yeyea me la, woava nya dzidzime si me wodzɔ tso, eye woadze si wo tɔgbuiwo. Etsɔme nyui dodzidzɔname ka gbegbee nye esi le ŋgɔ!

^ mm. 13 Ne èdi be yeaxlẽ nu geɖe tso nya sia ŋu la, kpɔ agbalẽ si nye Nuka Tututue Nye Biblia ƒe Nufiafia? ƒe ta 6 lia, “Afikae Ame Kukuwo Le?” Yehowa Ðasefowoe tae.

^ mm. 18 Tsitretsitsi enyi siwo ŋuti nya woŋlɔ ɖi la dze le 1 Fiawo 17:17-24; 2 Fiawo 4:32-37; 13:20, 21; Luka 7:11-17; 8:40-56; Yohanes 11:38-44; Dɔwɔwɔwo 9:36-42; 20:7-12. Ne èle tsitretsitsi ŋuti nya siawo xlẽm la, de dzesi ale si ɖasefo geɖe kpɔ wo teƒee. Tsitretsitsi asiekelia ku ɖe Yesu Kristo ƒe fɔfɔ ŋu.—Yohanes 20:1-18.