Dzɔlawo dometɔ ɖeka nɔ mía kom hegblɔ bena: “Ame aɖeke mele mia ta biam o. Miate ŋu atsi afi sia.” Aleke wòdzɔe be míaƒe ƒomea si nye Russiatɔ dovevienuwo, siwo nye ŋutifafamewo la va zu aboyomewo le North Korea le ƒe 1950 me, si nye ƒe atɔ̃ tso esime Xexemeʋa II ke?

LE NYE dzigbe ŋuti nuŋlɔɖiwo nu la, wodzim le ƒe 1924 me. Anɔ eme be kɔƒe si me wodzim lee nye Shmakovka, si te ɖe China ƒe dea ŋu le Russia ƒe Ɣedzeƒe Ʋĩ.

Kɔƒe si nye Shmakovka, le Primorskiy Kray, le Russia ƒe Ɣedzeƒe Ʋĩ, afi si wodzim le

Gbe ɖeka adzoblasuwo va kplɔ fofonye kple fonyewo dzoe, eye danye megakpɔ wo o. Nuɖuɖukpɔkpɔ na ɖevi gbogbo siwo susɔ ɖe aƒea me la va zu dɔ na danye. Míaƒe aƒelika aɖe do susua ɖa be yeakplɔ mí ɖeviawo ayi ɖe Russia Orthodɔks sɔlemea ƒe tsyɔ̃eviwodzikpɔƒe ahagblɔ be mía dadae gblẽ mí ɖi.

Danye lɔ̃ ɖe edzi, elabena ɖewohĩ ne ɖe mewɔe alea o la, anye ne dɔwuame kplɔ mí yi tsiẽƒe. Meva se nu si tae danye kplɔ mí yi ɖada ɖe tsyɔ̃eviwodzikpɔƒea ɖo la gɔme. Ðewohĩ esiae na míetsi agbe. Mexɔ ƒe 80 kple edzivɔwo fifia, ke hã danye ƒe nyametsotso ma gatena ɖe dzinye kokoko.

Mía kple Ivan ƒe srɔ̃ɖegbe le ƒe 1941 me

Le ƒe 1941 me la, meʋu yi Korea, afi si mía kple Russia ŋutsu dɔmenyotɔ aɖe si ŋkɔe nye Ivan, míeɖe mía nɔewo le. Míedzi mía vinyɔnu Olya le Korea ƒe dugã Seoul me le ƒe 1942 me. Míedzi mía viŋutsu Kolya hã le afi ma le ƒe 1945 me, kple eyometɔ Zhora le ƒe 1948 me. Srɔ̃nye nɔ fiase si nɔ mía si la dzi kpɔm, eye nye hã menye nutɔla. Esi wònye be Japantɔwo nɔ Seoul dzi ɖum ta la, mía viwo va srɔ̃ Japangbea, ke hã Russiagbee míedona le aƒe me. Do ŋgɔ na ƒe 1950 la, ŋutifafa nɔ Sovietɔwo, Amerikatɔwo, kple Koreatɔ siwo nɔ Seoul la dome. Wo katã wonye míaƒe asisiwo.

North Koreatɔwo Ðe Aboyo Mí

Nuwo va trɔ kpata le ƒe 1950 me. North Korea-srafowo va dze Seoul dzi hexɔ dua. Míete ŋu si o, eye wova lé mí kpe ɖe amedzrovi bubu siwo le dua me la ŋu. Le ƒe etɔ̃ kple afã me la, wokplɔ mí kpe ɖe Britain, Russia, Amerika kple Franse aboyome bubuwo ŋu, eye wonana mí ame hahoo la míetoa afɔ ɖatsia teƒe vovovowo le North Korea godoo. Afi sia afi si mlɔƒe le ko la, míetsia afi ma dɔna, eye míenɔa bebem le bɔmbdada si nɔ edzi yim ta.

Ɣeaɖewoɣi la, míenɔa aƒe siwo me dzoƒuƒe le le vuvɔŋɔliwo, eye wonaa nuɖuɖu mí wòsua mí. Gake zi geɖe la, ƒo koe míeɖuna hetsia aƒedowo me le vuvɔ la me. Mía dome ame geɖe ku le nunyuimakpɔɖu kple bemaléname ta. Etena ɖe dzinye ŋutɔ ne mekpɔ vinyewo wole fu kpem. Ɣemaɣi la, vuvɔŋɔli ɖo kaba le North Korea, eye meɖo ŋku edzi be menɔa ŋu zã bliboa henɔa kpewo dem dzo me be matsɔ ade vinyewo te ale be vuvɔ nagawɔ wo o.

Le dzomeŋɔli la, Koreatɔ siwo le kɔƒewo me la fia nu miemie siwo nyo na ɖuɖu la mí, eye míedia amagbewo, atikutsetsewo kple hlowo le gbe me ɖuna. Edze ƒãa be womelé fu mí o, ke boŋ míaƒe nu wɔ nublanui na wo. Le esi nuɖuɖua mesua mí o ta la, mesrɔ̃ ale si woléa akpɔkplɔ ɖana. Etena ɖe dzinye ŋutɔ ne vinyewo le kukuɖeɖe dzi nam atraɖii be yewoaɖu akpɔkplɔlã.

 Gbe ɖeka le October me la, woɖe gbe na mí be míaʋu ayi Manp’o. Wogblɔ na mí be wowɔ ɖoɖo be woakɔ ɖeviwo kple dɔnɔwo ɖe tasiaɖamwo me. Wotsɔ Olya kple fofoa kpe ɖe ame siwo to afɔ la ŋu. Mía kple Olya yometɔ eveawo míetsɔ dzitsitsi nɔ lalam ŋkeke geɖe be tasiaɖamawo nava. Mlɔeba tasiaɖamawo va ɖo.

Wolɔ dɔnɔawo kɔ ɖe wo nɔewo dzi abe nake ene. Nu sia teƒe kpɔkpɔ dzi ŋɔ nam ŋutɔ! Mekpa Zhora ɖe me hedze agbagba be matsɔ Kolya ada ɖe tasiaɖam aɖe ƒe dzogoe ɖeka, gake ede asi avifafa me sesĩe gblɔ be: “Dada, Dada, medi be mazɔ kpli wò! Meɖe kuku mègagblẽm ɖi o!”

Kolya tsɔ eƒe asi sue la lé nye awu sesĩe henɔ du ƒum le yonyeme tututu. Woda tu aboyome geɖe le mɔzɔzɔ ma si xɔ ŋkeke geɖe la me. Akpaviãwo nɔ mía yome henɔ dɔ tɔm ame siwo ku ɖe mɔa dzi. Mlɔeba la, míeva ke ɖe srɔ̃nye kple Olya ŋu. Míewɔ atuu na mía nɔewo kple aɖatsiwo. Menɔ ŋu zã ma me hede kpewo dzo me be matsɔ ade dzo lãme na vinyewo. Esi wònye be wo katã wotsi agbe ta la, nye dzi dze eme.

Esi míete ɖe liƒo si tsò North Korea kple South Korea dome ŋu le ƒe 1953 me la, nɔnɔmeawo va ka ɖe eme na mí vie wu. Wona awu yeyewo, afɔkpawo, abolo kple numeɖenuwo gɔ̃ hã mí. Emegbe kpuie ko la, woɖe asi le Britaintɔwo kple Franseawo ŋu. Ke míawo ya míeva nɔ abe ame siwo metso dukɔ aɖeke me o ene. Esi aboyome susɔeawo dzo la, míawo koe va tsi anyi. Míefa avi le dziɖeleameƒo ta, eye míedo kpo nuɖuɖu. Ɣeyiɣi sia mee dzɔla Koreatɔ la gblɔ dzivenya si dze le nyati sia ƒe gɔmedzedze la.

Míedze Agbe Yeye Gɔme Le United States

Nukutɔe la, esia megbe kpuie koe wokplɔ mí yi South Korea ƒe afi si aʋa menɔ edzi yim le o. Esi Amerika asrafomegãwo bia gbe mí vɔ la, woɖe mɔ na mí be míaʋu aɖatsi United States. Míeɖo meli  yi San Francisco si le California, eye kpekpeɖeŋunahabɔbɔ aɖe kpe ɖe mía ŋu. Emegbe míeʋu yi Virginia, afi si míaƒe ame nyanyɛ aɖewo kpe ɖe mía ŋu míekpɔ dɔ le. Mlɔeba la, míeʋu yi Maryland ɖatsi afi ma koŋ.

Mía kple srɔ̃nye kple mía vi eve le ƒe 1954 me

Nuwo abe mɔ̃ si wotsɔna kplɔa xɔ mee ene la gɔ̃ hã kpɔkpɔ wɔ nuku na mí. Esi míenye amedzrowo ta la, ele na mí be míanɔ dɔ wɔm sesĩe gaƒoƒo geɖe. Gake ne mekpɔ be amedzrovi siwo nu dze edzi na la le ame siwo va dukɔa me teti tafam la, etena ɖe dzinye. Esi míeva ɖo teti la, míedo go Russia Orthodɔks tɔwo ƒe nunɔla aɖe si gblɔ na mí be: “Dukɔ si woyra mee miele fifia. Ne miedi be nu nadze edzi na mi la, ke miƒo asa na mia detɔwo.” Eƒe nyawo wɔ mo yaa nam, eye metɔtɔ. Menye ɖe wòle be míakpe ɖe mía nɔewo ŋu boŋ oa?

Le ƒe 1970 me la, ŋutsu aɖe si ŋkɔe nye Bernie Battleman, si nye Yehowa Ðasefo la, va mía ƒe me be yeadzro Biblia me kpli mí. Ame sesẽe wònye, eye egblɔa nyawo kaŋkaŋ abe míawo ke ene. Míedzro Biblia me gaƒoƒo geɖe. Esi wònye be Orthodɔks tɔwo ƒe tsyɔ̃eviwodzikpɔƒe ye menɔ tso ɖevime ta la, menya woƒe hamenufiafiawo ɖe ta me. Gake meva tame nam kpɔ be Biblia nanɔ nye ŋutɔ asinye o! Bernie tsɔ Biblia aɖe vɛ na mí hegblɔ be: “Esi melɔ̃ mi tae mele Biblia sia tsɔm na mi ɖo.” Eɖe mí fia Ben, si nye Ðasefo Russiagbedola aɖe si tso Belarus.

Ben kple srɔ̃a gbɔ dzi ɖi ɖo Biblia me nya siwo mebia wo la ŋu nam. Ke hã, mexɔe se be Ðasefowo anya trɔ nuwo le ŋɔŋlɔ kɔkɔea me. Nu si ku dzi nam vevie ye nye be woƒe agbalẽwo gblɔ be Maria dzi vi bubuwo kpe ɖe Yesu ŋu, evɔ wofia mí le sɔlemea be vi bubuwo menɔ esi o.

Meƒo ka na xɔ̃nye aɖe si nye Polandtɔ, hegblɔ nɛ be wòakpɔ eƒe Polandgbe me Biblia me ɖa be nya kae le Mateo 13:55, 56 hã. Esi wòxlẽ mawunyakpukpuia nam la, ewɔ nuku nam ŋutɔ be nɔviwo nɔ Yesu si! Xɔ̃nyea hã yɔ eƒe ame nyanyɛ aɖe si wɔa dɔ le Washington, D.C. ƒe agbalẽdzraɖoƒe aɖe (Library of Congress) hegblɔ nɛ be wòadi mawunyakpukpui sia le Biblia gɔmeɖeɖe vovovoawo katã me. Exɔlɔ̃a gblɔ nɛ be nya ma ke koe dze le wo katã me be: Nɔviŋutsuwo kple nɔvinyɔnuwo nɔ Yesu si!

Biabia bubu geɖewo ganɔ asinye. Nu ka tae ɖeviwo kuna? Nu ka tae dukɔwo le aʋa wɔm? Nu ka tae gbe ɖeka dolawo gɔ̃ hã mesea nu  gɔme na wo nɔewo o? Ale si wotsɔ Biblia ɖo nya mawo ŋui nam la dzɔ dzi nam ŋutɔ. Meva srɔ̃e be menye Mawu ƒe lɔlɔ̃nue nye be amegbetɔwo nanɔ fu kpem o. Esi meva nya be magakpɔ nye ame vevi siwo ku le aʋa vovovowo me ake la, dzi dzɔm wu gbɔgblɔ. Vivivi la, Yehowa va nye Ame ŋutɔŋutɔ nam.

Gbe ɖeka mía kple vinyeŋutsu si gbɔ tso aʋagbedzi le Vietnam, si dzi nu te ɖo vevie la míetsi tsitre ɖe nɔnɔmetata siwo mezãna le tadeagu me la ŋkume henɔ koko ƒom na Mawu. Enumake mekpɔe dze sii be Yehowa, Mawu vavã lae wòle be mado gbe ɖa na, ke menye nɔnɔmetataawo o. Mevuvu nɔnɔmetataawo, eye mekpɔe be pepa si woɖo atsyɔ̃ na la koe wonye. Sɔlemea mee meƒle wo le, gake le zã ma me la, metsɔ wo ƒu gbe.

Menɔ bɔbɔe nam be mado le sɔleme si me menɔ tso nye ɖevime ke la me o. Gake meva de asixɔxɔ Biblia ƒe nufiafiawo ŋu wu nu bubu ɖe sia ɖe. Ƒe ɖeka megbe la, mía kple vinyenyɔnua kple srɔ̃nye míeyi ɖakpe kple Russia Orthodɔks nunɔlaa. Metsɔ agbalẽ aɖe si me meŋlɔ Biblia me biabia gbogbo aɖewo siwo te meŋlɔ mawunyakpukpuiwo ɖo la ɖe asi. Esi menɔ mawunyakpukpuiawo xlẽm na nunɔlaa la, eʋuʋu ta hegblɔ be, “Miebu.” Egblɔ na mí be míagava ye gbɔ azɔ o.

Nudzɔdzɔ sia wɔ dɔ ɖe vinyenyɔnu Olya, si ƒe mo sẽ, eye wòlɔ̃a nyagɔmekuku la dzi. Eya hã te Biblia sɔsrɔ̃ moveviɖoɖotɔe, eye wòva nɔ Ðasefowo ƒe kpekpewo dem kplim le ema megbe kpuie. Mexɔ nyɔnyrɔ le ƒe 1972 me, eye Olya hã xɔ nyɔnyrɔ le ƒe si kplɔe ɖo me.

Míaƒe Dzideƒonameɖokuinya

Mele abɔ me le mía ƒe me le Maryland, U.S.A. le ƒe 1990 lɔƒo

Míaƒe ƒomea ƒe dzideƒonameɖokuinyae nye, Lé fɔ ɖe nu si dze ŋgɔwò fifia ŋu, ɖe susu ɖa le tsãtɔ ŋu. Eya ta, míehena ɖe megbe le nu si dzi míeka ɖo be ele eteƒe la wɔwɔ ŋu o, ne enye nu yeye gɔ̃ hã. Esi mía kple vinyenyɔnua kpakple Mawu dome va nɔ kplikplikpli la, míeva di vevie be míayi amewo ƒe aƒewo me aɖagblɔ nu siwo srɔ̃m míenɔ la na wo. Gake le nyateƒe me la, ale si megblɔa nyawo kaŋkaŋ la nana wòva hiãna ɣeaɖewoɣi be ame bubuwo nagbugbɔ agblɔ nya siwo megblɔ la ameŋububutɔe. Ke hã, meva srɔ̃ ale si maƒo nu na ame ƒomevi vovovo siwo tso dukɔ vovovowo me siwo hã nɔ dzidzeme dim le agbe me, abe nye ke ene, la nyuie.

Le ƒe siwo kplɔ esia ɖo me la, mía kple vinyenyɔnua míegblɔ zi geɖe be, ne Kɔmiunisttɔwo ƒe ŋutasẽdziɖuɖua mu la, míatrɔ ayi Russia aɖakpe ɖe ame siwo le abe míawo ene la ŋu be woasrɔ̃ nu tso Mawu ŋu. Esi wòmu le ƒe 1990-awo ƒe gɔmedzedze la, Olya trɔ yi Russia ɖe mí ame evea nu. Esime wònɔ afi ma la, ewɔ ɣeyiɣiawo katã ƒe subɔsubɔdɔa ƒe 14. Esrɔ̃ Biblia kple ame geɖe, eye wòkpe asi ɖe Biblia srɔ̃gbalẽwo gɔme ɖeɖe ɖe Russiagbe me ŋu le Yehowa Ðasefowo ƒe alɔdzedɔwɔƒe si le Russia.

Metsi teƒe ɖeka fifia, eye vinyewo le woƒe ŋutete katã wɔm be agbea nanya nɔ nam. Meda akpe na Mawu be togbɔ be mekpe fu geɖe va yi hã la, meva kpɔ dzidzeme vavãtɔ mlɔeba. Mekpɔ Biblia me hakpanya si alẽkplɔla David ŋlɔ la ƒe nyateƒenyenye dze sii. Egblɔ be: “Gbɔɖemeƒe tɔwo nu [Mawu kplɔm] yii. Ena nye luʋɔ gbɔ ɖe eme, ekplɔm to toƒe dzɔdzɔewo le eƒe ŋkɔ la ta.”—Psalmo 23:2, 3. *

^ mm. 29 Maria Kilin dɔ alɔ̃ le ku me le March 1, 2010 dzi, esime míenɔ dɔ wɔm le ŋutinya sia si eya ŋutɔ gblɔ la ŋu hena tata.