Dzo kpo yi emenuwo dzi

Dzo kpo yi emenuawo dzi

Dzidzɔ Si Tsoa Nunana Me

Dzidzɔ Si Tsoa Nunana Me

“Dzidzɔ geɖe le nunana me wu nuxɔxɔ.”—DƆWƆWƆWO 20:35.

Susu si tae ame aɖewo ɖua Kristmas.

Abe ale si Yesu gblɔe ene la, ne wona nu ame la, enalaa kple exɔlaa siaa kpɔa dzidzɔ. Le esia taa, ame geɖe sena le wo ɖokui me be nunana amewo wɔa akpa vevi aɖe le Kristmas ɖuɖu me. Le kpɔɖeŋu me, numekuku si wowɔ le Ireland la ɖee fia be togbɔ be ganyawo sesẽ le ƒe si va yi me hã la, ƒome ɖe sia ɖe ɖoe be yewoazã ga home si wu euro 500 (Amerika dɔlar 660) ɖe Kristmas nunanawo ƒeƒle ŋu.

Nu ka tae taɖodzinua gbɔ menya ɖona o?

Ame geɖe kpɔe be nunana ame nɔewo le Kristmas ɖuɣi hea tukaɖa vanɛ wu dzidzɔkpɔkpɔ. Nu ka tae? Elabena wodzea agbagba be woaƒle nunana siwo nu woƒe ga mede o. Esi wònye be ame geɖe ƒlea nu le ɣemaɣi ta la, amewo nyèa zi ɖe fiasewo me heɖoa fli legbewo, si wɔnɛ be asiɖiɖi tea ɖeɖi ame geɖe ŋu.

Biblia me nya kawoe ate ŋu aɖe vi?

Yesu gblɔ be: “Minɔ nu nam amewo.” * (Luka 6:38) Le Yesu ƒe nya sia nu la, menye ɣeyiɣi aɖe koŋ le ƒea me koe wòle be woanɔ mɔ kpɔm be amewo nana nu o. Yesu de dzi ƒo na eyomedzelawo be woawo ŋutɔwo nalɔ̃ faa anɔ nu nam amewo.

“Ame sia ame newɔ abe ale si wòɖo le eƒe dzi me ene, menye kple veve alo dzizizi o, elabena ame si naa nu kple dzidzɔ lae Mawu lɔ̃na.” (2 Korintotɔwo 9:7) Biblia ŋuti numeɖegbalẽ aɖe gblɔ be Paulo ƒe nuxlɔ̃amea fia be “mele be ame nana nu ‘le dzizizi ta,’ alo le esi wòse le eɖokui me be woƒoe ɖe ye nu ta o.” Ne ame ‘ana nu kple dzidzɔ’ la, ke mele be wòase le eɖokui me be ele be yeatsɔ nunana aɖe koŋ ana ame aɖe koŋ le ɣeyiɣi aɖe koŋ me, abe ale si wònɔna le Kristmas ɖuɣiwo zi geɖe ene o.

“Ne didia nya li ko la, wokpɔa ŋudzedze ɖe eŋu le nu si le ame si la nu, menye le nu si mele ame si o la nu o.” (2 Korintotɔwo 8:12) Mawu medi tso Kristotɔwo si be woanyi fe ɖe nunana xɔasiwo ƒeƒle ta o. Ke boŋ, ne ame aɖe na nu ‘le nu si le esi nu’ la, menye ɖeko esia sɔ o, ke “wokpɔa ŋudzedze” ɖe eƒe nunanaa ŋu hã. Nya lédziname sia to vovo sãa na “ƒlee fifia eye nàxe fea emegbe” si boblodolawo lɔ̃a gbɔgblɔ le Kristmas ɖuɣiwo!

^ mm. 8 Biblia gɔmeɖeɖe aɖewo gblɔ ko be: “Mina.” Ke hã, dɔwɔnya si wozã le blema Helagbea me la fia nu si woayi edzi anɔ wɔwɔm. Eya ta Xexe Yeye Gɔmeɖeɖe la ɖe egɔme be “minɔ nu nam amewo,” ale be gɔmesese nyuitɔa nadze.