Dzo kpo yi emenuwo dzi

Dzo kpo yi emenuawo dzi

Ƒomea Nawɔ Ðeka

Ƒomea Nawɔ Ðeka

“Kpɔ ɖa, aleke mehenyo, eye wòvivinae, ne nɔviwo le afi ɖeka!”—PSALMO 133:1.

Susu si tae ame aɖewo ɖua Kristmas.

Esi wònye Israel viwo katã nye Yakob, si wogayɔna be Israel, ƒe dzidzimeviwo ta la, wonye “nɔviwo” alo ƒome ɖeka me tɔwo. Ne wokpe ta hena ŋkekenyuiwo ɖuɖu le Yerusalem la, aleke “mehenyo, eye wòvivinae” enye esi! Egbea hã, ƒome geɖewo kpɔa mɔ be yewoaƒo ƒu ɖekae ‘ahase vivi’ le Kristmas ɖuɣia.

Nu ka tae taɖodzinua gbɔ menya ɖona o?

Numekugbalẽ aɖe (Encyclopedia of Christmas and New Year’s Celebrations) gblɔ be: “Zi geɖe la, ƒomekuxi siwo gbɔ womekpɔ le ƒea me o la va zua nya gãwo ne ƒometɔwo va ƒo ƒu ɖekae le azãɖuɣiwo.”

Biblia me nya kawoe ate ŋu aɖe vi?

“Woayi edzi aɖo eteƒe na wo dzilawo kple wo tɔgbuiwo kpakple mamawo.” (1 Timoteo 5:4) Zi ale si wòanya wɔ ko la, nɔ wò ƒometɔwo srãm kpɔ edziedzi. Ne wò ƒometɔwo le didiƒe gɔ̃ hã la, miate ŋu anɔ kadodo me kple mia nɔewo edziedzi. Ðe manyo be nàŋlɔ agbalẽ na wo, aƒo ka, aɖo e-mail ɖe wo, alo aɖo dze kpli wo to Internet dzi oa? Kadodo edziedzi awɔe be masɔmasɔwo manɔ mo dom ɖa kabakaba o.

“Miexaxa le mia ŋutɔwo miaƒe lɔlɔ̃ɖeɖefia me. . . . Miawo hã mikeke mia ɖokui.” (2 Korintotɔwo 6:12, 13) Ne ƒe ɖeka zi ɖeka koe ame aɖe kpɔa eƒe ƒometɔwo la, ƒometɔwo va nɔna nɛ ko abe amedzrowo ene, vevietɔ le ɖeviwo gome. Ðevi aɖewo sena le wo ɖokui me be ƒomedodo gobi aɖeke mele yewo kple yewo tɔgbuiwo kple yewo mamawo alo ƒometɔ bubuwo dome o. Eya ta minɔ ƒometɔ tsitsiwo hã srãm kpɔ be miatsɔ ade dzi ƒo na mia viwo be ‘woakeke wo ɖokui’ le woƒe lɔlɔ̃ɖeɖefia me. * Ðevi siwo dea ha kple ame tsitsiwo edziedzi la sea veve ɖe ame tsitsiwo nu wu, eye wodea asixɔxɔ wo ŋu hã.

“Aleke nya, si wogblɔ ɖe egblɔɣi la, mehevivinae oa?” (Lododowo 15:23) Nu kae nàwɔ be masɔmasɔwo nagahe kuxiwo ava ƒomea me o? Mɔ ɖekae nye be mialé nya veviwo kpɔ le ‘wo gblɔɣi.’ Ne kadodo nɔa mia kple ƒometɔwo dome edziedzi la, anɔ bɔbɔe be nàte ɖe wo ŋu be miadzra mia nɔewo dome ɖo ne masɔmasɔwo do mo ɖa. Esia awɔe be ne mieva ƒo ƒu la, mianɔ anyi ‘nyuie ahase vivi’ le hadede kple mia nɔewo me.

^ mm. 9 Kpɔ nyati siwo nye “Nukata Wòle Be Manya Tɔgbuinye Kple Mamanye Nyuie?” kple “Aleke Mawɔ Mía Kple Tɔgbuinye Kple Mamanye Dome Nanɔ Kplikplikpli?” siwo dze le May 8 kple June 8, 2001 ƒe Nyɔ! me. Yehowa Ðasefowoe tae.