“Minɔ esia wɔm hena ŋkuɖoɖo dzinye.”—LUKA 22:19.

Susu si tae ame aɖewo ɖua Kristmas.

Ame aɖewo gblɔna be Yesu koŋ tae yewoɖua Kristmas ɖo. Woɖua Kristmas be yewoatsɔ aɖo ŋku eƒe dzigbeŋkeke dzi.

Nu ka tae taɖodzinua gbɔ menya ɖona o?

Haƒoƒo kple wɔna siwo yia edzi le Kristmas ɖuɣi la ƒe akpa gãtɔ medo ƒome kple Yesu Kristo ƒe ŋutinya o. Ame miliɔn geɖe siwo ɖua azã sia mexɔ Yesu dzi se o; wo dometɔ aɖewo mexɔe se be enɔ anyi kpɔ gɔ̃ hã o. Le asitsalawo gome la, Kristmas ɖuɣia nye adzɔnuwo ƒe boblodoɣi, ke menye ɣeyiɣi si me woaɖo ŋku Yesu dzi o.

Biblia me nya kawoe ate ŋu aɖe vi?

‘Amegbetɔvi la va be yeatsɔ yeƒe luʋɔ ana wòanye tafe ɖe ame geɖewo ta.’ (Marko 10:45) Edze ƒãa be menye Yesu ƒe dzigbeŋkeke dzie wògblɔ nya siwo dze le nyati sia ƒe gɔmedzedze la o, ke boŋ le zã si do ŋgɔ na eƒe ku la dzie. Le zã ma me la, eɖo wɔna bɔbɔe aɖe anyi be woatsɔ anɔ ŋku ɖom yeƒe ku dzi. Gake nu ka tae Yesu di be woaɖo ŋku yeƒe ku dzi, ke menye yeƒe dzigbe o? Elabena Yesu ƒe vɔsakua ʋu mɔnukpɔkpɔ ɖi na nuteƒewɔlawo be woanɔ agbe tegbee. Biblia gblɔ be: ‘Nu vɔ̃ ƒe fetue nye ku, gake nunana si Mawu nana lae nye agbe mavɔ to Kristo Yesu mía Aƒetɔ la dzi.’ (Romatɔwo 6:23) Eya ta ƒe sia ƒe la, Yesu Kristo yomedzelawo ɖoa ŋku eƒe kua dzi le ŋkeke si dzi eƒe kua dze le ƒea me dzi, eye wobunɛ be enye “xexea ɖela,” ke menye vidzĩ kokoe o.—Yohanes 4:42.

“Kristo . . . kpe fu le mia ta, eye wògblẽ kpɔɖeŋu ɖi na mi, be miadze yeƒe afɔɖoƒewo yome pɛpɛpɛ.” (1 Petro 2:21) Be nàde bubu Yesu ŋu ahaɖo ŋku edzi la, ele be nàsrɔ̃ eyama, si nye nunyala si de blibo la ƒe kpɔɖeŋu. Azɔ hã, de ŋugble le Yesu ƒe dɔmetɔtrɔ, dzigbɔɖi kpakple ale si dzi nɔ eƒo ɖe nu nyui wɔwɔ ŋui la ŋu, eye nàdi mɔ siwo dzi nàto asrɔ̃ eƒe kpɔɖeŋua le wò gbe sia gbe gbenɔnɔ me.

“Xexea me fiaɖuƒe la trɔ zu mía Aƒetɔ kple eƒe Kristo ƒe fiaɖuƒe, eye aɖu fia tso mavɔ me yi mavɔ me.” (Nyaɖeɖefia 11:15) Ne èle ŋku ɖom Yesu Kristo dzi la, bu nu si wɔm wòle fifia la ŋu. Yesu nye Fia si le dzi ɖum le dziƒo. Mawu ƒe Nya la gblɔ nya ɖi tso Yesu ŋu be: “Adrɔ̃ ʋɔnu na ame dahewo le dzɔdzɔenyenye me, eye wòatso afia na anyigba dzi hiãtɔwo ɖe eteƒe.” (Yesaya 11:4) Dziɖula ŋusẽtɔ ye ate ŋu aɖe nɔnɔme nyui siawo afia, ke menye vidzĩ kokoe o.