Dzo kpo yi emenuwo dzi

Dzo kpo yi emenuawo dzi

Ðe Woate Ŋu Aɖi Anukware Le Xexe Gblẽku Sia Mea?

Ðe Woate Ŋu Aɖi Anukware Le Xexe Gblẽku Sia Mea?

“Míedina be míawɔ nu le anukwareɖiɖi me le nuwo katã me.”—HEBRITƆWO 13:18.

TOGBƆ be míaƒe nu vɔ̃ me nyenye, xexe si me míele kpakple Satana ate ŋu akpɔ ŋusẽ geɖe ɖe mía dzi hã la, míate ŋu aƒo asa na woƒe ŋusẽkpɔɖeamedzia! Aleke míawɔe? To tete ɖe Mawu ŋu kple gɔmeɖose siwo le eƒe Nya, Biblia, me siwo ɖea vi tso blema ke la ŋu dɔwɔwɔ me. Bu gɔmeɖose siawo dometɔ eve ŋu kpɔ.

BIBLIA ME GƆMEÐOSE: “Miganɔ agbe abe ale si xexe sia me tɔwo nɔnɛ la ene o.”—Romatɔwo 12:2, New Jerusalem Bible.

“Biblia na mekpɔ ale si anukwareɖiɖi ɖea vii.”​—GUILHERME

Agbemeŋutinya: Guilherme nye Braziltɔ si kpɔ dzidzedze le asitsatsa me. Elɔ̃ ɖe edzi be mele bɔbɔe be ame nanye anukwareɖila o. Egblɔ be: “Ele bɔbɔe be asitsala nava nye anukwaremaɖila, ɖewohĩ le esi dɔwɔƒea ƒe taɖodzinuwo le eƒom ɖe enu alo le esi wòle dagbadagbam be yeakpɔ yeƒe agbemenuhiahiãwo gbɔ le hoʋiʋli ƒe xexe sia me ta. Ame geɖe susuna be  naneke megblẽ le zãnunana kple zãnuxɔxɔ ŋu o. Ne ènye asitsala, eye nugblẽfe geɖewo li wòle be nàxe la, anukwareɖiɖi menɔa bɔbɔe o.”

Togbɔ be ele alea hã la, Guilherme te ŋu ƒo asa na anukwaremaɖimaɖi. Egblɔ be: “Togbɔ be ame geɖe mewɔa nuteƒe le asitsatsa me o hã la, anya wɔ be ame naɖi anukware. Ele be nàlé agbe nyui nɔnɔ ƒe gɔmeɖosewo me ɖe asi sesĩe. Biblia na mekpɔ ale si anukwareɖiɖi ɖea vii. Dzitsinya nyui, susu me ƒe akɔdzeanyi kple bubu nɔa ame si ɖia anukware la ŋu. Eƒe agbenɔnɔ hã tea ŋu kpɔa ŋusẽ nyui ɖe ame siwo dome wòle la dzi.”

BIBLIA ME GƆMEÐOSE: “Ame siwo ɖoe kplikpaa be yewoazu kesinɔtɔwo la, gena ɖe tetekpɔ kple mɔtetre kpakple movidzɔdzɔ ƒe nudzodzro geɖe, siwo wɔa nuvevi ame, siwo nyrɔa ame ɖe tsɔtsrɔ̃ kple gbegblẽ me, la me. Elabena nu vɔ̃ɖi ƒomeviwo katã ƒe ke ɖekae nye galɔlɔ̃.”—1 Timoteo 6:9, 10.

“Edzɔ dzi nam ŋutɔ be agbe nyui nɔnɔ ŋuti mɔfiame nyui siwo le Biblia me la dzi wɔwɔ na mexɔ ŋkɔ nyui.”​—ANDRÉ

Agbemeŋutinya: André nye ame si ɖo dɔwɔƒe aɖe si dzraa dedienɔnɔ ŋuti mɔɖaŋunuwo. Edzraa eƒe adzɔnuwo na bɔlƒoha gã aɖe hã. Gbe ɖeka esi woƒo bɔl vevi aɖe si teƒe ame geɖe va kpɔ vɔ megbe la, André yi ɖatsɔ agbalẽ si dzi wòbu dɔ si wòwɔ la ŋuti fewo ɖo la na bɔlƒohaa dzikpɔlawo. Woƒe gadzikpɔlawo gakpɔtɔ nɔ ga si woxɔ tso tiketdzralawo gbɔ teti koe nye ema la xlẽm kple ŋkubiã. Esi zã do xoxo ta la, dɔdzikpɔla la tsɔ dzitsitsi xe fe na nudzralaawo, siwo dome André hã le.

André gblɔ be: “Esi menɔ mɔ dzi yina aƒe me la, mede dzesii be dɔdzikpɔlaa xe fea nam wògbɔ edzi. Menyae be ɖewohĩ manya wɔ be wòanya ame si wòxe fea na wògbɔ edzi la o. Gake menyae hã be ava hiã be wòatsɔ eya ŋutɔ ƒe kotokumega axe fe ɖe ga si bu la teƒe! Meɖoe be matrɔ gaa ayi nɛ. Togbɔ be bɔlkpɔlawo mimi wo nɔewo ɖo hã la, medze agbagba to wo dome yi ɖatsɔ ga si tsi edzi la nɛ. Ewɔ mo yaa na dɔdzikpɔlaa ŋutɔ. Ame aɖeke megbugbɔ ga vɛ nɛ kpɔ o.”

André gblɔ kpee be: “Anukwareɖiɖi sia wɔe be dɔdzikpɔlaa va dea bubu ŋunye. Ƒe geɖe va yi, gake le nudzrala mawo katã dome la, nye koe ganye ame si wɔa dɔ kple bɔlƒoha sia. Edzɔ dzi nam ŋutɔ be agbe nyui nɔnɔ ŋuti mɔfiame nyui siwo le Biblia me la dzi wɔwɔ na mexɔ ŋkɔ nyui.”

Dzidzɔnyae wònye be míate ŋu aɖu ŋusẽkpɔɖeamedzi gbegblẽwo dzi le Mawu ƒe kpekpeɖeŋu me. Ke hã, ame ɖekaɖekawo ƒe agbagbadzedzewo mate ŋu ana nu fitifiti wɔwɔ nu nayi keŋkeŋ o. Nu siwo gbɔ wòtso la gbɔ amegbetɔ madeblibowo ƒe ŋutete ŋu be woakpɔ wo gbɔ le wo ɖokui si. Ke ɖe esia fia be nu fitifiti wɔwɔ nu mayi gbeɖe oa? Nyati siawo ƒe mamlɛtɔ he susu yi nya sia ƒe ŋuɖoɖo fakɔname si le Biblia me la dzi.