Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ  |  October 2012

 Dzeɖoɖo Kple Aƒelika

Ðe Mawu Hea To Na Amewo Le Dzo Mavɔ Mea?

Ðe Mawu Hea To Na Amewo Le Dzo Mavɔ Mea?

YEHOWA ÐASEFOWO lɔ̃a Biblia me dzodzro kple woƒe aƒelikawo. Ðe Biblia me nya aɖe li, si ŋu nàdi be yeabia nya lea? Ðe nèdi be yeanya nu tso Yehowa Ðasefowo ƒe dzixɔsewo alo subɔsubɔ ŋu geɖe wua? Ne nenemae la, ekema ɣesiaɣi si nèkpɔ Yehowa Ðasefo aɖe la, àte ŋu abiae faa. Adzɔ dzi nɛ be yeadzro eme kpli wò.

Na míakpɔ ale si Yehowa Ðasefowo ɖoa dze kple amewoe la ƒe kpɔɖeŋu aɖe ɖa. Tsɔe be Ðasefo si ŋkɔe nye Agbenya va ŋutsu aɖe si ŋkɔe nye Amenyo gbɔ le eƒe me.

Ðe Mawu Ahe To Na Ame Vɔ̃ɖiwoa?

Agbenya: Aƒetɔ Amenyo, enyo be míegado go.

Amenyo: Edzɔ dzi na nye hã be mekpɔ wò.

Agbenya: Menɔ nya aɖe si nègblɔ esi míedo go nyitsɔ la ŋu bum.

Amenyo: Nyateƒeea?

Agbenya: Ɛ̃, ègblɔ be ewɔ nuku na ye be Yehowa Ðasefowo mexɔ dzo mavɔ ƒe nufiafia la dzi se o.

Amenyo: Ɛ̃, nya ma wɔ nuku nam. Le nyateƒe me la, nyemenya nu si tae miexɔ nufiafia ma dzi se o.

Agbenya: Edzɔ dzi nam be nèɖe nya sia gblɔ. Medina be mase nu si ame bubuwo susu. Esi wònye be susu vovovowoe le amewo si ku ɖe dzo mavɔ ƒe nufiafiaa ŋu ta la, madi be manya nu si nye wò hã wò dzixɔse ku ɖe eŋu.

Amenyo: Mexɔe se tso ɣeaɖeɣi ke be ne ame vɔ̃ɖiwo ku la, woyia dzo mavɔ me, afi si wowɔa funyafunya wo le tegbee.

Agbenya: Ame geɖe xɔ nya ma dzi se. Mabia wò se lo, nya vɔ̃ aɖe tu wò le agbe me kpɔa?

Amenyo: Ɛ̃. Wowu daanye ƒe atɔ̃e nye esi va yi.

Agbenya: Oo, baba na wò sea. Ànya nɔ esusum vevie.

Amenyo: Ɛ̃, meɖoa ŋku edzi gbe sia gbe.

Agbenya: Mede dzesii be dzo mavɔ ƒe nya sia nɔa vevie na ame aɖewo le esi ame vɔ̃ɖiwo ƒe nuwɔnawo gblẽ nu le wo ŋu ta. Le dzɔdzɔme nu la, ame siwo kpe fu madzemadzee la dina be woahe to na ame vɔ̃ɖiwo ɖe woƒe nuwɔnawo ta.

Amenyo: Nenema tututue! Medi be woahe to na ame si wu daanye la ɖe nu si wòwɔ ɖe míaƒe ƒomea ŋu ta.

Agbenya: Ele dzɔdzɔme nu be ame nase le eɖokui me alea. Biblia fia mí be etena ɖe Mawu hã dzi ne wowɔ nu madzɔmadzɔ ɖe ame maɖifɔwo ŋu—eye edo ŋugbe be yeava he to na ame vɔ̃ɖiwo. De dzesi nu si Yesaya 3:11 gblɔ. Afi ma  gblɔ be: “Baba na ame vɔ̃ɖi, etɔ me vɔ̃e nɛ, elabena nu si eƒe asi wɔ la, eya woatsɔ awɔe.” Eya ta míate ŋu aka ɖe edzi be Mawu ahe to na ame vɔ̃ɖiwo.

Amenyo: Gake aleke esia ate ŋu adzɔe ne womahe to na ame vɔ̃ɖiwo le dzo mavɔ me o, abe ale si nèle egblɔm ene?

Agbenya: Biabia nyui aɖee nye ema. Míaɖo nya ma ŋu kpuie ko be, tsɔtsrɔ̃ mavɔe Mawu atsɔ ahe toe na ame vɔ̃ɖiwo. De ŋugble le nu si Biblia gblɔ le 2 Tesalonikatɔwo 1:9 la ŋu kpɔ. Meɖe kuku, àdi be yeaxlẽ afi ma na mía?

Amenyo: Faa. Afi ma xlẽ be: “Ame siawo akpɔ tsɔtsrɔ̃ mavɔ ƒe tohehe, si atso Aƒetɔ la . . . gbɔ.”

Agbenya: Eya ta Aƒetɔ Amenyo, ède dzesiia? Mɔkpɔkpɔ aɖeke meli na ame siwo Mawu drɔ̃ ʋɔnui be wonye ame vɔ̃ɖiwo la o, elabena ana woaku tegbee. Mɔkpɔkpɔ aɖeke meli be woagava nɔ agbe le etsɔme o.

Amenyo: Mede dzesi nu si kpukpuia gblɔ, gake edze abe esia mesɔ o ene, elabena ame sia ame kuna. Ðe ame vɔ̃ɖiwo medze na tohehe si sẽ wu ema oa?

Nu Kae Dzɔdzɔenyenye Bia?

Agbenya: Mekpɔe be ènye ame si dina be woawɔ nu dzɔdzɔe.

Amenyo: Ɛ̃, nenemae.

Agbenya: Enyo ŋutɔ. Nya lae nye be, míetea ŋu dea vovototo nyui kple vɔ̃ dome le esi Mawu na ŋutete sia mí ta. Dzɔdzɔenyenye le vevie ŋutɔ na eya hã. Gake ne subɔsubɔhaŋgɔnɔlawo fia nu be Mawu hea to na amewo le dzo mavɔ me la, ke wole gbɔgblɔm be enye nu madzɔmadzɔ wɔla.

Amenyo: Nyemese wò nyaa gɔme tututu o.

Agbenya: Enyo, na mawɔ kpɔɖeŋu aɖe na wò. Ènya Biblia me ŋutinya si ku ɖe Adam kple Xawa ŋua?

Amenyo: Ɛ̃. Mawu gblɔ na wo be woagaɖu ati aɖe ƒe tsetse o, gake wosẽ to.

Agbenya: Tututu. Na míaxlẽ Biblia me nuŋlɔɖi ma ɖekae. Edze le 1 Mose 2:16, 17. Exlẽ be: “Yehowa Mawu de se na ame gblɔ bena: ‘Ðu abɔmetiawo katã ƒe tsetse faa; ke ati, si na wodzea si nyui kple vɔ̃ la, mègaɖu eya ƒe tsetse aɖeke o; gbe si gbe nàɖu eƒe ɖe, ku ke nàku.’” Eya ta nu kae Mawu gblɔ be adzɔ ɖe Adam dzi ne eɖu atikutsetse si ŋu wòde se ɖo la?

Amenyo: Egblɔ be Adam aku.

Agbenya: Ègblɔe nyuie. Wò ya bu eŋu kpɔ ko: Adam ƒe nu vɔ̃a tae wodzi ameƒomea katã ɖe nu vɔ̃ me ɖo. * Togbɔ be Adam wɔ nu sia gbegbe hã la, ɖe Mawu gblɔ nya aɖe si fia be ahe to nɛ le dzo mavɔ mea?

Amenyo: Kpao.

Agbenya: Gake ne ɖe Mawu ava wɔ funyafunya wo le dzo mavɔ me tegbee la, ke ɖe mele be wòaxlɔ̃ nu wo tso eŋu do ŋgɔ oa? Ðe menye esia wɔwɔe anye dzɔdzɔenyenye kple lɔlɔ̃ ɖeɖefia oa?

Amenyo: Ewɔ nam nenema.

Agbenya: Bu nu si Mawu gblɔ na Adam kple Xawa esi wowɔ nu vɔ̃ la hã ŋu kpɔ. Meɖe kuku àdi be yeaxlẽ 1 Mose 3:19 na mía?

Amenyo: Yoo. Afi ma xlẽ be: “Fifia ate wò, hafi nàkpɔ abolo aɖu, va se ɖe esime nàgatrɔ azu anyi, elabena eya mee woɖe wò tsoe. Anyi nènye, eye anyi ke nàgatrɔ azu!”

Agbenya: Akpe na wò. Le Mawu ƒe nyaa nu la, afi kae Adam ayi ne eku?

Amenyo: Egblɔ be Adam agbugbɔ ayi anyi si me woɖee tsoe.

Agbenya: Tututu. Enyo, ɖe màlɔ̃ ɖe edzi be hafi ame aɖe nagatrɔ ayi teƒe aɖe la, ke efia be enɔ afi ma kpɔ oa?

Amenyo: Nenemae.

Agbenya: Ke afi kae Adam nɔ hafi Mawu wɔe?

Amenyo: Menɔ afi aɖeke o.

Agbenya: Ègblɔe nyuie. Eye àde dzesii hã be Mawu megblɔ nya aɖeke tso dzo mavɔ ŋu esime wònɔ ʋɔnu drɔ̃m Adam o. Ne dzo mavɔ mee Adam ayi nyateƒe la, ɖe wòanye nu  dzɔdzɔe wɔwɔ be Mawu nagblɔ nɛ be atrɔ ayi anyi si me woɖee tsoea?

Amenyo: Ao, esia manye nu dzɔdzɔe wɔwɔ o.

Ðe Abosam Wɔa Mawu Ƒe Lɔlɔ̃nua?

Agbenya: Nu bubu aɖe hã li si ŋu wòle be míade ŋugble tsoe ku ɖe dzo mavɔ ƒe nufiafiaa ŋu.

Amenyo: Eyae nye nu ka?

Agbenya: Ame kae amewo gblɔna zi geɖe be eyae wotsɔ ɖo dzoa nu be wòanɔ fu wɔm ame siwo le dzo mavɔa me?

Amenyo: Abosam ye.

Agbenya: Evɔ wònye Abosam ye nye Mawu ƒe futɔ gãtɔ. Ne Mawu ɖoa amewo ɖe dzo mavɔ me be Abosam nawɔ funyafunya wo la, ɖe ema mafia be ɖekawɔwɔ aɖe le Mawu kple Abosam dome le mɔ aɖe nu oa?

Amenyo: Hmm. Nyemebu eŋu nenema kpɔ o.

Agbenya: Le kpɔɖeŋu me, vifofoe nènye ɖe, alo?

Amenyo: Ɛ̃, viŋutsuvi le asinye. Nyitsɔ laa koe wòxɔ ƒe 15.

Agbenya: Tsɔe be viwòa va dze aglã vevie. Ewɔa nu gbegblẽ geɖe siwo tena ɖe dziwò. Nu kae nàwɔ?

Amenyo: Madze agbagba be maɖɔe ɖo.

Agbenya: Meka ɖe edzi be ànɔ agbagba dzem enuenu be yeakpe ɖe eŋu wòaɖɔ eƒe mɔwo ɖo.

Amenyo: Nenemae.

Agbenya: Mítsɔe be le esiawo katã wɔwɔ vɔ megbe la, egbe tonu sese. Mlɔeba, àva kpɔe be to koe wòle be nàhe nɛ, alo?

Amenyo: Ɛ̃.

Agbenya: Ke ne èva de dzesii be ame vɔ̃ɖi aɖee nɔ nu gbegblẽ siwo katã wɔm wònɔ la fiamee ɖe?

Amenyo: Ame ma ƒe nu aku dzi nam.

Agbenya: Ègblɔe nyuie. Azɔ ne ènya be ame vɔ̃ɖi gblẽku mae na be viwòa dze aglã ɖe ŋuwò la, ɖe nàna ame ma nahe to na viwòa na wòa?

Amenyo: Gbeɖe. Esia masɔ kura o.

Agbenya: Ne nyaa le alea la, ke ɖe wòasɔ be Mawu nadi tso Satana Abosam, ame si blea ame vɔ̃ɖiwo dea nu vɔ̃ me la si be wòahe to na ame mawo kea?

Amenyo: Ao, nyemeka ɖe edzi o.

Agbenya: Azɔ hã, ne Mawu di be yeahe to na ame vɔ̃ɖiwo la, nu ka tae Abosam, si nye Mawu ƒe futɔ gãtɔ la, alɔ̃ awɔ ɖe Mawu ƒe didi dzi nɛ ahawɔ fu amewo?

Amenyo: Nyemebu eŋu alea kpɔ o!

Yehowa Ana Vɔ̃ɖinyenye Nu Nayi Keŋkeŋ

Agbenya: Gake medi be nàka ɖe edzi be Mawu atu nu kple ame vɔ̃ɖi siwo gbe dzimetɔtrɔ. Ðewohĩ mawunyakpukpui mamlɛtɔ si madi be míaxlẽ la ana nya ma me nakɔ na wò nyuie. Eyae nye Psalmo 37:9. Àdi be yeaxlẽ kpukpui sia na mía?

Amenyo: Ɛ̃. Afi ma xlẽ be: “Woatsrɔ̃ ame vlowo, ke ame siwo kpɔa mɔ na Yehowa la, woanyi anyigba la dome.”

Agbenya: Akpe na wò. Ède dzesi nu si Yehowa Mawu awɔ na ame vlowoa?

Amenyo: Kpukpui sia gblɔ be Mawu atsrɔ̃ wo.

Agbenya: Ègblɔe nyuie. Ne míagblɔe le mɔ bubu nu la, ana ame vlowo nu nayi tegbee. Gake ame nyuiwo, siwo nye “ame siwo kpɔa mɔ na Yehowa” la, anɔ agbe tegbee le anyigba sia dzi. Ðewohĩ esia ana biabia aɖewo nava susu me na wò. Le kpɔɖeŋu me, nu ka tae Mawu mexea mɔ ɖe amewo ƒe nu vlo wɔwɔ nu o? Ne eɖoe vavã be yeahe to na ame vɔ̃ɖiwo la, ke nu ka tae mewɔe kpɔ haɖe o?

Amenyo: Biabia nyui aɖewoe nye emawo.

Agbenya: Ðewohĩ ne míegado go ake la, mana nàkpɔ ale si Biblia ɖo nya mawo ŋui. *

Amenyo: Adzɔ dzi nam.

^ mm. 79 Ne èdi be yeaxlẽ nu geɖe tso nya sia ŋu la, kpɔ agbalẽ si nye Nuka Tututue Nye Biblia ƒe Nufiafia? ƒe ta 11 lia. Yehowa Ðasefowoe tae.