Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  October 2015

“Na Míaƒe Xɔse Nadzi Ðe Edzi”

“Na Míaƒe Xɔse Nadzi Ðe Edzi”

“Kpe ɖe ŋunye le afi si mehiã xɔse le!”—MARKO 9:24.

HADZIDZI: 81, 135

1. Nu ka tae xɔse hiã vevie ɖo? (Kpɔ nɔnɔmetata si le nyati sia ƒe gɔmedzedze.)

ÈBIA ɖokuiwò kpɔ be, ‘Ðe Yehowa axɔm ɖe agbe le xaxa gã la mea?’ Apostolo Paulo gblɔ be nu vevi aɖe si míehiã hafi ate ŋu atsi agbe ye nye xɔse. Egblɔ be: “Ne xɔse mele ame si o la, mate ŋu adze Mawu ŋu nyuie o.” (Hebritɔwo 11:6) Ðewohĩ awɔ na wò be esia le bɔbɔe, gake nyateƒeae nye be, “menye amewo katã sie xɔse le o.” (2 Tesalonikatɔwo 3:2) Mawunyakpukpui eve siawo kpe ɖe mía ŋu míekpɔ nu si tae wòle vevie be míado ŋusẽ míaƒe xɔse.

2, 3. (a) Nu ka tae wòle vevie be míado ŋusẽ míaƒe xɔse? (b) Biabia kawo mee míadzro?

2 Apostolo Petro ƒo nu tso “xɔse si wodo kpɔ” ŋu. (Xlẽ 1 Petro 1:7.) Xaxa gã la te tu mí, eye míedi be míanye “ame siwo si xɔse le, si ana woaxɔ mí ɖe agbe.” (Hebritɔwo 10:39) Eya ta ele be míaku kutri ado ŋusẽ míaƒe xɔse fifia. Míedi be woaɖo eteƒe na míawo hã le míaƒe Fia Yesu Kristo ƒe ɖeɖefia la me. Eya ta abe ŋutsu si ƒo koko na Yesu be wòana xɔse geɖe ye ene la, mía dometɔ ɖe sia ɖe ate ŋu aɖe kuku be: “Kpe ɖe ŋunye le afi si mehiã xɔse le!” (Marko 9:24) Alo míate ŋu agblɔ abe apostoloawo ene be:  “Na míaƒe xɔse nadzi ɖe edzi.”—Luka 17:5.

3 Míadzro nyabiase siwo gbɔna me le nyati sia me: Nu kawoe atu míaƒe xɔse ɖo? Nu kae aɖee afia be xɔse sesẽ le mía si? Nu ka tae míate ŋu aka ɖe edzi be Mawu aɖo to mí ne míebiae be wòana míaƒe xɔse nadzi ɖe edzi?

EDZEA MAWU ŊU NE MÍETU MÍAƑE XƆSE ÐO

4. Ame kawo ƒe kpɔɖeŋue ate ŋu atu míaƒe xɔse ɖo?

4 Esi xɔse le vevie ŋutɔ ta la, Yehowa na woŋlɔ ame siwo ɖo xɔse ƒe kpɔɖeŋu ɖi la ƒe ŋutinya geɖe ɖe Biblia me. Eye “woŋlɔ wo ɖi be woatsɔ afia nu mí.” (Romatɔwo 15:4) Kpɔɖeŋu si Abraham, Sara, Isak, Yakob, Mose, Rahab, Gideon, Barak kple ame bubu geɖewo ɖo ɖi la ate ŋu ado ŋusẽ míaƒe xɔse. (Hebritɔwo 11:32-35) Tsɔ kpe ɖe blema kpɔɖeŋu siawo ŋu la, mía nɔvi geɖewo hã ɖo xɔse ƒe kpɔɖeŋu wɔdɔɖeamedziwo ɖi egbea. * (Kpɔ etenuŋɔŋlɔa.)

Mía nɔvi geɖewo ɖo xɔse ƒe kpɔɖeŋu wɔdɔɖeamedziwo ɖi egbea

5. Aleke Eliya ɖee fia be yexɔ Yehowa dzi se vevie ŋutɔ? Nya kae wòle be nàbia ɖokuiwò?

5 Biblia me kpɔɖeŋu ɖekae nye nyagblɔɖila Eliya. Esi nèle eƒe ŋutinyaa ŋu bum la, de dzesi nɔnɔme vovovo atɔ̃ siwo me wòɖee fia le be yexɔ Yehowa dzi se vevie. (1) Esi Eliya gblɔ na Fia Ahab be Yehowa ana ku naɖi le anyigbaa dzi la, egblɔe kakaɖedzitɔe be: “Zi ale si Yehowa, Israel ƒe Mawu, ame si mesubɔna le agbe la, zãmu alo tsi madza le ƒe siawo me o.” (1 Fiawo 17:1) (2) Eliya nyae nyuie be Yehowa akpɔ ye kple ame bubuwo ƒe nuhiahiãwo gbɔ le kuɖiɣia. (1 Fiawo 17:4, 5, 13, 14) (3) Eliya ka ɖe edzi be ŋusẽ le Yehowa si be wòagbɔ agbe ahosi la ƒe viŋutsuvia. (1 Fiawo 17:21) (4) Exɔe se bliboe be Yehowa ana dzo nafiã vɔsalã la le Karmel Toa dzi. (1 Fiawo 18:24, 37) (5) Hafi tsi nayi ɖoɖo ge gɔ̃ hã la, Eliya gblɔ na Ahab be: “Yi nàɖu nu ano nu, elabena mele tsidzadza gã aɖe ŋkɔ sem.” (1 Fiawo 18:41) Azɔ bia ɖokuiwò be, ‘Ðe nye xɔse sẽ abe Eliya tɔ enea?’

NU KAWO WƆWƆE ATU MÍAƑE XƆSE ÐO?

6. Nu kae míehiã tso Yehowa gbɔ be míatu míaƒe xɔse ɖo?

6 Esi manya wɔ be míatu xɔse ɖo le mía ɖokui si o ta la, ehiã be míabia Mawu be wòana gbɔgbɔ kɔkɔea mí. Nu ka tae? Elabena gbɔgbɔ kɔkɔea ƒe kutsetse la ƒe akpa aɖee xɔse nye. (Galatiatɔwo 5:22) Anyo ŋutɔ be míabia gbɔgbɔ kɔkɔea geɖe abe ale si Yesu ɖo aɖaŋu na mí ene. Yesu do ŋugbe be Yehowa ana “gbɔgbɔ kɔkɔe ame siwo bianɛ.”—Luka 11:13.

Anyo ŋutɔ be míabia gbɔgbɔ kɔkɔea geɖe abe ale si Yesu ɖo aɖaŋu na mí ene

7. Nu ka wɔwɔe atu míaƒe xɔse ɖo? Gblɔ eƒe kpɔɖeŋu.

 7 Ne míexɔ Mawu dzi se vevie ko la, ele be míalé eme ɖe asi goŋgoŋ. Míate ŋu atsɔ xɔse asɔ kple dzo. Ne míedo nakedzo teti la, enɔa bibim vlavlavla. Gake ne mímele nake dem dzoa me hele etum ɖo o la, anɔ tsitsim vivivi va se ɖe esime wòzu dzofi. Gake ne míele nake dem dzoa me la, ayi edzi anɔ bibim. Aleae míaƒe xɔse hã le. Ne míexlẽa Mawu ƒe Nya la gbe sia gbe hesrɔ̃nɛ la, anɔ lɔlɔ̃ si le mía si na Yehowa kple Biblia la tum ɖo. Esia ana míaƒe xɔse nu matsi o ke boŋ ŋusẽ aɖo eŋu.

8. Nu kae atu wò xɔse ɖo ahana wòasẽ ɖe edzi?

8 Mègana nu siwo nèsrɔ̃ do ŋgɔ na wò nyɔnyrɔxɔxɔ ɖeɖe nasu na wò o. (Hebritɔwo 6:1, 2) Le kpɔɖeŋu me, ne èsrɔ̃ nu tso Biblia me nyagblɔɖi siwo va eme xoxo ŋu la, atu wò xɔse ɖo ahana wòasẽ ɖe edzi. Àte ŋu azã Mawu ƒe Nya la hã atsɔ adzro ɖokuiwò me kpɔ nenye be wò xɔse sesẽ vavã.—Xlẽ Yakobo 1:25; 2:24, 26.

9, 10. Aleke (a) xɔlɔ̃ nyuiwo (b) hamea ƒe kpekpewo (d) gbeƒãɖeɖedɔa, tua míaƒe xɔse ɖo?

9 Apostolo Paulo gblɔ le Kristotɔwo ŋu be “ame sia ame ƒe xɔse nado ŋusẽ nɔvia tɔ.” (Romatɔwo 1:12) Nya ma gɔme ɖe? Efia be ne míedea ha kple mía nɔviwo la, míate ŋu ado ŋusẽ mía nɔewo ƒe xɔse, vevietɔ ne míedea ha kple nɔvi siwo ƒe xɔse “wodo kpɔ.” (Yakobo 1:3) Xɔlɔ̃ manyomanyowo gblẽa míaƒe xɔse dome, gake xɔlɔ̃ nyuiwo tua míaƒe xɔse ɖo. (1 Korintotɔwo 15:33) Ema tae woɖo aɖaŋu na mí be míade kpekpeawo edziedzi ɖo. Elabena afi mae “míanɔ dzi dem ƒo na mía nɔewo” le. (Xlẽ Hebritɔwo 10:24, 25.) Tsɔ kpe ɖe eŋu la, mɔfiame siwo míexɔna le kpekpeawo me nana míelia ke le xɔsea me. Biblia gblɔ be “nu si wose la mee xɔse tsona.” (Romatɔwo 10:17) Eya ta bia ɖokuiwò be, ‘Ðe medea Kristotɔwo ƒe kpekpewo edziedzia?’

10 Nu bubu si gatua míaƒe xɔse ɖoe nye be míanɔ gbeƒã ɖem ahanɔ nya nyui si le Biblia me fiam amewo. Abe Kristotɔ gbãtɔwo ene la, míeɖoa ŋu ɖe Yehowa ŋu eye míeƒoa nu vɔvɔ̃manɔmee le nɔnɔme ɖe sia ɖe me.—Dɔwɔwɔwo 4:17-20; 13:46.

11. Nu kae na xɔse sẽŋu nɔ Yosua kple Kaleb si, eye aleke míate ŋu asrɔ̃ woe?

11 Míegaxɔa Yehowa dzi sena geɖe wu ne míekpɔa ale si wòle kpekpem ɖe mía ŋu hele míaƒe gbedodoɖawo ŋu ɖom. Esia teƒee Yosua kple Kaleb kpɔ. Woxɔ Yehowa dzi se esi woyi ɖatsa ŋku le Ŋugbedodonyigbaa dzi. Emegbe ɣesiaɣi si wokpɔ ale si Yehowa kpe ɖe wo ŋui la, woƒe xɔse me gasẽna ɖe edzi. Esiae na Yosua gblɔ na Israel-viwo kple kakaɖedzi be: “Nya ɖeka pɛ hã medo kpo  emevava le ŋugbe nyui siwo katã Yehowa mia Mawu do na mi la me o.” Egblɔ emegbe be: “Eya ta mivɔ̃ Yehowa, eye misubɔe le fɔmaɖimaɖi kple nuteƒewɔwɔ me.” Eyome egblɔ kpee be: “Ke nye kple nye aƒe ya, míasubɔ Yehowa.” (Yosua 23:14; 24:14, 15) Ne míeɖoa ŋu ɖe Yehowa ŋu hedzea agbagba kpɔa nu siwo me wòle kpekpem ɖe míawo hã ŋu le la, míaƒe xɔse asẽ ɖe edzi.—Psalmo 34:8.

NU SI AÐEE AFIA BE XƆSE LE MÍA SI

12. Aleke míaɖee afia be xɔse sesẽ le mía si?

12 Nu kae aɖee afia be xɔse sesẽ le mía si? Nusrɔ̃la Yakobo gblɔ be: “Mafia nye xɔse la wò to nye dɔwɔwɔwo me.” (Yakobo 2:18) Míaƒe nuwɔnawoe ɖenɛ fiana be xɔse sesẽ le mía si. Na míakpɔe ɖa.

Ame siwo wɔa subɔsubɔdɔa kple woƒe ŋutete katã la ɖea xɔse sesẽ fiana (Kpɔ memama 13)

13. Aleke gbeƒãɖeɖedɔa ɖenɛ fiana be xɔse le mía si?

13 Gbeƒãɖeɖee nye mɔ nyuitɔ si dzi míetona ʋua míaƒe xɔse me. Nu ka tae? Elabena ne míele gbeƒã ɖem la, míeɖenɛ fiana be míexɔe se be nuwuwua tu aƒe eye be “mahe ɖe megbe o!” (Habakuk 2:3) Be míanya ne ŋusẽ le míaƒe xɔse ŋu vavã la, míate ŋu abia mía ɖokui be: ‘Aleke gbegbee gbeƒãɖeɖedɔa le vevie nam? Ðe mele nu sia nu si mate ŋui wɔm be mafia nu amewo tso Mawu ŋua? Ðe media mɔ siwo dzi mato ado vevie nu geɖe wu le Yehowa subɔsubɔ mea?’ (2 Korintotɔwo 13:5) Mina míayi edzi anɔ míaƒe xɔse me ʋum “le dutoƒo hena ɖeɖekpɔkpɔ,” si fia be míanɔ gbeƒã ɖem nya nyuia atsɔ aɖee afia be xɔse sesẽ le mía si.—Xlẽ Romatɔwo 10:10.

14, 15. (a) Aleke míaɖe xɔse afia le míaƒe agbenɔnɔ me gbe sia gbe? (b) Gblɔ ale si atsu kple asi aɖe ɖe xɔse fia le woƒe nuwɔna me.

14 Ne míedoa dzi le xaxawo me le xexe sia me la, esia hã ɖenɛ fiana be míexɔ Yehowa dzi se. Ne míedze dɔ, dzi ɖe le mía ƒo, míelé blanui, míeda ahe, alo míele fu kpem le mɔ bubuwo nu la, ele be míaka ɖe edzi be Yehowa kple Yesu akpe ɖe mía ŋu “le hiahiãgbe.” (Hebritɔwo 4:16) Ne míebiaa Yehowa be wòakpe ɖe mía ŋu la, efia be míexɔ edzi se. Yesu gblɔ be míate ŋu abia Yehowa be wòana “abolo si asu mía nu gbe sia gbe la mí.” (Luka 11:3) Ŋutinya siwo le Biblia me la ɖo kpe edzi be Yehowa ate ŋu akpɔ míaƒe hiahiã ɖe sia ɖe gbɔ na mí. Le kpɔɖeŋu me, esi kuɖiɖi gã la gblẽ nu le Israel-nyigba dzi la, Yehowa na nuɖuɖu kple tsi Eliya. Biblia gblɔ be, “akpaviãwo tsɔa abolo kple lã vana nɛ le ŋdi kple fiẽ, eye wònoa tɔʋu la me tsi.” (1 Fiawo 17:3-6) Míexɔe se bliboe be Yehowa ana nu siwo míehiã ŋutɔŋutɔ la míawo hã.

Ne míedoa dzi le xaxawo me la, eɖenɛ fiana be míexɔ Yehowa dzi se (Kpɔ memama 14)

15 Míeka ɖe edzi be ne míewɔ ɖe Biblia ƒe mɔfiafiawo dzi la, míate ŋu akpɔ míaƒe ƒomea dzi nyuie. Nɔvinyɔnu srɔ̃tɔ aɖe si le Asia si ŋkɔe nye Rebecca la gblɔ ale si eya kple eƒe ƒomea wɔ ɖe mɔfiame siwo le Mateo 6:33 kple Lododowo 10:4 dzi. Egblɔ be esi ye srɔ̃ kpɔe be dɔ si wɔm yele la le ƒomedodo si le yewo kple Yehowa dome me gblẽm ta la, eɖe  asi le dɔa ŋu. Gake vi ene ye le atsu kple asi sia si, eya ta woɖoe be yewoanɔ nu ɖam anɔ dzadzram. Esi wodo vevie hewɔ dɔ sia la, wokpɔa ga si hiã tsɔ kpɔa ƒomea dzi pɛpɛpɛ. Nɔvinyɔnua gblɔ be: “Míede dzesii be Yehowa megblẽ mí ɖi kpɔ o. Míekpɔa nu ɖuna zi etɔ̃ gbe ɖeka.” Ðe wò hã nèkpɔ nu sia tɔgbi teƒe kpɔ si do ŋusẽ wò xɔsea?

Míeka ɖe edzi be ne míewɔ ɖe Biblia ƒe mɔfiafiawo dzi la, míate ŋu akpɔ míaƒe ƒomea dzi nyuie

16. Ne míeɖoa ŋu ɖe Mawu ŋu la, nu kae ado tso eme na mí?

16 Mele be wòawɔ na mí gbeɖe be ne míewɔ Yehowa ƒe mɔfiamewo dzi la, ɖewohĩ makpe ɖe mía ŋu o. Paulo yɔ nya tso Habakuk ƒe agbalẽa me esime wògblɔ be: “Ame dzɔdzɔe la ƒe xɔsee ana wòanɔ agbe.” (Galatiatɔwo 3:11; Habakuk 2:4) Esia tae wòle be míaxɔ Ame si ate ŋu akpe ɖe mía ŋu ŋutɔŋutɔ la dzi ase vevie ɖo. Paulo ɖo ŋku edzi na mí be Mawu “ate ŋu awɔ nu siwo míebiana alo nu siwo vaa míaƒe susu me la na mí wòagbɔ eŋu sãsãsã le eƒe ŋusẽ si le dɔ wɔm le mía me nu.” (Efesotɔwo 3:20) Yehowa subɔlawo wɔa Mawu ƒe lɔlɔ̃nu kple woƒe ŋutete katã, gake wonyae hã be seɖoƒe li na nu si yewoate ŋu awɔ. Eya ta míedaa akpe be Mawu li kpli mí eye wòle yayram ɖe míaƒe agbagbadzedzewo dzi.

MAWU AÐO TO MÍ AHANA MÍAƑE XƆSE NADZI ÐE EDZI

17. (a) Aleke Yesu ɖo apostoloawo ƒe biabiaa ŋu na woe? (b) Nu ka tae míate ŋu aka ɖe edzi be Yehowa aɖo to mí ne míebia be wòana míaƒe xɔse nadzi ɖe edzi?

17 Nu siwo me míedzro va se ɖe fifia ate ŋu ana míase le mía ɖokui me abe apostoloawo ene esime wobia Yesu be: “Na míaƒe xɔse nadzi ɖe edzi.” (Luka 17:5) Yesu ɖo eƒe apostoloawo ƒe biabiaa ŋu na wo le mɔ tɔxɛ nu le ƒe 33 Kristotɔwo Ŋɔli, esime wòkɔ gbɔgbɔ kɔkɔea ɖe wo dzi si na be wova se Mawu ƒe tameɖoɖowo gɔme nyuie wu. Esia do ŋusẽ woƒe xɔse. Nu kae do tso eme? Wodze gbeƒãɖeɖedɔ gã aɖe gɔme. (Kolosetɔwo 1:23) Ke ɖe míawo hã míate ŋu aka ɖe edzi be Mawu aɖo to mí ne míebia be wòana míaƒe xɔse nadzi ɖe edzia? Ɛ̃, elabena Yehowa do ŋugbe be yeaɖo to mí ne nu si ‘míebia wɔ ɖeka kple yeƒe lɔlɔ̃nu.’—1 Yohanes 5:14.

18. Aleke Yehowa yraa ame siwo tua woƒe xɔse ɖo?

18 Ne míexɔ Yehowa dzi se bliboe la, míaƒe nu adze eŋu. Aɖo to mí ahana míaƒe xɔse nadzi ɖe edzi, ŋusẽ aɖo míaƒe xɔse ŋu, eye ‘wòabu mí be míedze na Mawu Fiaɖuƒe’ la.—2 Tesalonikatɔwo 1:3, 5.

^ mm. 4 Àte ŋu akpɔ wo dometɔ aɖewo abe Lillian Gobitas Klose (September 8, 1993 ƒe Nyɔ!), Feliks Borys (April 8, 1994 ƒe Nyɔ!), kple Josephine Elias (yevugbe me Nyɔ!, September 2009) ene ƒe agbemeŋutinyawo.