Dzo kpo yi emenuwo dzi

Dzo kpo yi emenuawo dzi

Ðe Wò Dzitsinya Fiaa Mɔ Wò Nyuiea?

Ðe Wò Dzitsinya Fiaa Mɔ Wò Nyuiea?

“Taɖodzinu si le mɔfiame sia ŋue nye be, lɔlɔ̃ si tso dzi dzadzɛ me kple dzitsinya nyui . . . nasu mía si.”—1 TIMOTEO 1:5.

HADZIDZI: 57, 48

1, 2. Ame kae na dzitsinya mí, eye nu ka tae wòle be míada akpe be dzitsinya le amegbetɔwo si?

YEHOWA MAWU wɔ mí amegbetɔwo eye wòna tiatiawɔwɔ ƒe ablɔɖe mí. Be míawɔ tiatia nyuiwo la, ede nane mía me si fiaa mɔ mí. Eyae nye dzitsinya, si nye ŋutete si le mía me be míade vovo nyui kple vɔ̃ dome. Ne míewɔa míaƒe dzitsinya ŋu dɔ nyuie la, akpe ɖe mía ŋu míawɔ nu nyui ahatsri nu vɔ̃ɖi. Dzitsinya si le mía si ɖee fia be Yehowa lɔ̃ mí eye wòdi be eme nanyo na mí.

2 Ame aɖewo wɔa nu nyui eye wotsria nu vɔ̃ɖi togbɔ be womenya Biblia ƒe mɔfiamewo o hã. (Xlẽ Romatɔwo 2:14, 15.) Nu ka tae? Dzitsinya si le wo si tae. Eyae xea mɔ na ame geɖe ale be womewɔa nu baɖawo o. Wò ya bu ale si gbegbe xexea me agblẽe ne ɖe dzitsinya mele ame aɖeke si o la ŋu kpɔ! Anye ne nu vlo wɔwɔ ado agbogbo ɖe xexea me kura wu ale si wòle fifia. Eya ta ele be míada akpe gã aɖe na Yehowa be ede dzitsinya amegbetɔwo me!

Aleke dzitsinya si míemla nyuie akpe ɖe mía ŋu ne ehiã be míatso nya me le nane ŋu?

3. Aleke míaƒe dzitsinya ate ŋu aɖe vi na mí le hamea me?

 3 Mevaa susu me na ame akpa gãtɔ be yewoana hehe yewoƒe dzitsinya o. Gake mí Yehowa ƒe amewo ya, míedi be míaƒe dzitsinya nawɔ dɔ nyuie, elabena ate ŋu akpe ɖe mía ŋu míado ɖekawɔwɔ ɖe ŋgɔ le hamea me. Míedi hã be míaƒe dzitsinya nakpe ɖe mía ŋu míaɖo ŋku nu si Biblia gblɔ be ele eteƒe alo mele eteƒe o, kple nu si nyo alo nu si menyo o dzi. Ke hã be míamla míaƒe dzitsinya ahazãe nyuie la, menye nu si Biblia gblɔ koe wòle be míanya o. Ele vevie hã be míalɔ̃ Mawu ƒe nudidiwo eye míaka ɖe edzi be wonyo na mí. Paulo gblɔ be: “Taɖodzinu si le mɔfiame sia ŋue nye be, lɔlɔ̃ si tso dzi dzadzɛ me kple dzitsinya nyui kpakple xɔse si me alakpa mele o la nasu mía si.” (1 Timoteo 1:5) Eya ta ne míenaa hehe míaƒe dzitsinya heɖoa toe la, ana míalɔ̃ Yehowa ahaxɔ eyama dzi ase geɖe wu. Ale si míezãa míaƒe dzitsinya la ɖenɛ fiana nenye be míetsi le gbɔgbɔ me hedina vevie be míawɔ nu si adze Yehowa ŋu. Míaƒe dzitsinya ɖea ame si tututu míenye hã fiana.

4. Aleke míate ŋu ana hehe míaƒe dzitsinya?

4 Gake aleke míate ŋu ana hehe míaƒe dzitsinya? Eyae nye be míasrɔ̃ Biblia edziedzi, ade ŋugble le nu si míexlẽ ŋu, eye míabia Yehowa be wòakpe ɖe mía ŋu míawɔ edzi. Esia bia be míawɔ nu wòayi ŋgɔ wu sewo kple mɔfiamewo sɔsrɔ̃ dzaa ko. Taɖodzinu si tae míesrɔ̃a Biblia ɖoe nye be míanya Yehowa nyuie wu. Eye be míanya Ame si tututu wònye, nu siwo wòlɔ̃ kple nu siwo melɔ̃ o. Ne míeyi edzi srɔ̃ nu tso Yehowa ŋu la, míaƒe dzitsinya ava nɔ dzesi dem nu siwo wòbuna be ele eteƒe alo mele eteƒe o la kaba. Eye ne míeyi edzi le dzitsinyaa mlam la, míava nɔ nuwo ŋu bum abe ale si Yehowa bua woe ene.

5. Biabia kawo mee míadzro le nyati sia me?

5 Míate ŋu abia be: Aleke dzitsinya si míemla nyuie akpe ɖe mía ŋu ne ehiã be míatso nya me le nane ŋu? Aleke míade bubu mía nɔvi Kristotɔwo ƒe dzitsinya ŋu? Aleke míaƒe dzitsinya ate ŋu aʋã mí míawɔ nu nyui? Azɔ mina míalé ŋku ɖe nuwɔna etɔ̃ siwo me míahiã dzitsinya si míena hehee nyuie le la ŋu. Woawoe nye: (1) lãmesẽnyawo, (2) modzakaɖeɖe kple (3) gbeƒãɖeɖedɔa.

DA SƆ LE LÃMESẼNYAWO ME

6. Nu kawo mee wòle be míatso nya me le le atikewɔnyawo me?

6 Biblia fia mí be míatsri nuwɔna siwo ate ŋu agblẽ nu le mía ŋu, eye míada asɔ le nuwo abe nuɖuɖu kple nunono ene me. (Lododowo 23:20; 2 Korintotɔwo 7:1) Ne míewɔna ɖe Biblia ƒe mɔfiamewo dzi la, ate ŋu akpɔ míaƒe lãmesẽ ta. Ke hã godoo la, míedzea dɔ eye míetsina kua amegã kple nyagã. Nu kawo mee wòle be míatso nya me le? Le dukɔ aɖewo me la, kɔdzitikewo kple ameyibɔtikewo kpakple dɔdamɔnu bubuwo li amewo ate ŋu  atia be yewoazã. Nɔvi geɖe ŋlɔa agbalẽ ɖona ɖe alɔdzedɔwɔƒewo le dɔdamɔnu siwo woatia ŋu. Wo dometɔ geɖe biana be, “Ðe wòasɔ be Yehowa subɔla nazã atike sia alo alɔ̃ woazã dɔdamɔnu sia nɛa?”

7. Nu kae akpe ɖe mía ŋu míatso nya me le ʋudonyawo ŋu?

7 Womena ŋusẽ alɔdzedɔwɔƒea alo hamemetsitsiwo be woatso nya me le atike alo dɔdamɔnu si Kristotɔ aɖe azã la ŋu nɛ o, nenye be ebia gɔ̃ hã. (Galatiatɔwo 6:5) Ke hã hamemetsitsiwo ate ŋu adzro Yehowa ƒe susu le nya ma ŋu me kple Kristotɔ la be esia nakpe ɖe eŋu wòatso nya me le nunya me. Le kpɔɖeŋu me, Mawu de se na mí be míatsri ʋu. (Dɔwɔwɔwo 15:29) Sedede sia na eme kɔ na Kristotɔ be mate ŋu alɔ̃ woazã dɔdamɔnu si me woado ʋu alo ʋumenu vevi eneawo dometɔ aɖeke nɛ o. Sidzedze ate ŋu akpɔ ŋusẽ ɖe Kristotɔ ƒe dzitsinya dzi ne ele nya me tsom nenye be alɔ̃ woazã ʋumenu suesuewo, siwo nye nunyiame siwo wogatea ŋu ɖena tso ʋumenu vevi eneawo me, nɛ loo alo malɔ̃ o. * (Kpɔ etenuŋɔŋlɔa.) Biblia ƒe aɖaŋuɖoɖo bubu kawo hãe ate ŋu akpe ɖe mía ŋu míatso nya me nyuie le atikewɔnyawo me?

8. Aleke Filipitɔwo 4:5 akpe ɖe mía ŋu míatso nya me nunyatɔe le lãmesẽnyawo me?

8 Lododowo 14:15 gblɔ be: “Ðekemanyala xɔa nya sia nya dzi sena, ke aɖaŋudzela léa ŋku ɖe eƒe afɔɖeɖewo katã ŋu.” Egbea dɔléle aɖewo li siwo womekpɔ atike na o. Eya ta ele be míakpɔ nyuie le atike alo dɔdamɔnu siwo amewo gblɔna be edaa dɔléle aɖe evɔ eŋu kpeɖodzi aɖeke meli o ŋu. Paulo gblɔ be: “Amewo katã nanyae be nugɔmeselawo mienye.” (Filipitɔwo 4:5) Nugɔmesese ana be míaƒe susu katã nanɔ Yehowa subɔsubɔ ŋu ke menye míaƒe lãmesẽnyawo ŋu o. Ne míaƒe lãmesẽnyawo nye nu vevitɔ na mí le agbe me la, ate ŋu awɔe be míava zu ɖokuitɔdilawo. (Filipitɔwo 2:4) Míenya be míate ŋu anɔ lãmesẽ deblibo me le xexe xoxo sia me o. Eya ta dze  agbagba be Yehowa subɔsubɔ nanye nu vevitɔ na wò le agbe me.—Xlẽ Filipitɔwo 1:10.

Ðe nèzia wò susu ɖe amewo dzia? (Kpɔ memama 9)

9. Aleke Romatɔwo 14:13, 19 akpɔ ŋusẽ ɖe ale si míatso nya me le lãmesẽnyawo ŋu dzi, eye nu kae ate ŋu agblẽ míaƒe ɖekawɔwɔ me?

9 Kristotɔ si sea nu gɔme mazi amewo dzi be woawɔ nu si wòsusu be eyae nye nyuitɔ o. Le dukɔ aɖe me la, atsu kple asi aɖe nɔ dzi dem ƒo na amewo be woazã nunyiametike aɖewo eye woaɖu nanewo koŋ. Woƒoe ɖe nɔvi aɖewo nu wowɔ esia, gake nɔvi bubu aɖewo melɔ̃ o. Esi nunyiametikeawo kple nuɖuɖu siwo ƒe aɖaŋu woɖo la mewɔ dɔ o la, ena nɔvi geɖewo kpɔ dziku. Atsu kple asi sia ŋutɔ ate ŋu atiae be yewoano nunyiametike siawo alo aɖu nu siwo ƒe aɖaŋu woɖo. Ke hã ɖe nunya anɔ eme be woade tɔtɔ hamea me le lãmesẽnyawo ta? Le blema Roma la, susu vovovo nɔ Kristotɔ aɖewo si ku ɖe nuɖuɖu kple azãɖuɖu aɖewo ŋu. Aɖaŋu kae Paulo ɖo na wo? Egblɔ na wo be: “Ame aɖe bua ŋkeke aɖe be ele vevie wu bubu; ame bubu bua ŋkekewo katã sɔsɔe; ame sia ame neka ɖe nu si ta wòbui nenema ɖo la dzi.” Mina míakpɔ nyuie be míagawɔ naneke si anye nuɖiaɖia na nɔvi aɖeke o.—Xlẽ Romatɔwo 14:5, 13, 15, 19, 20.

Dze agbagba be Yehowa subɔsubɔ nanye nu vevitɔ na wò le agbe me

10. Nu ka tae wòle be míade bubu amewo ƒe nyametsotsowo ŋu? (Kpɔ nɔnɔmetata si le nyati sia ƒe gɔmedzedze.)

10 Ɣeaɖewoɣi la, mímase nu si tae hamea me tɔ aɖe tso nya me le mɔ aɖe nu la gɔme o. Ne edzɔ alea la, nu kae míawɔ? Mele be míadrɔ̃ ʋɔnui kaba alo azi edzi be wòatrɔ susu o. Ðewohĩ ahiã be nɔvi sia nagamla eƒe dzitsinya nyuie wu, alo ate ŋu anye hã be eƒe dzitsinya ɖea fu nɛ kabakaba akpa. (1 Korintotɔwo 8:11, 12) Alo ɖewohĩ míawo boŋue wòhiã be míagbugbɔ amla míaƒe dzitsinya nyuie. Le lãmesẽnyawo kple nu bubu aɖewo gome la, agba le mía dometɔ ɖe sia ɖe dzi be eya ŋutɔ natso nya me eye wòanɔ te ɖe emetsonua nu.

SE VIVI NA MODZAKAÐEÐE

11, 12. Aleke Biblia kpena ɖe mía ŋu le modzakaɖeɖe si míatia me?

11 Yehowa wɔ mí be modzakaɖeɖe navivi mía nu eye wòaɖe vi na mí. Salomo gblɔ be, “nukoɣi li” eye “ɣeɖuɣi li.” (Nyagblɔla 3:4) Nyateƒee nya sia nye, gake menye modzakaɖeɖe ɖe sia ɖee ɖea vi na mí, nana míegbɔna ɖe eme, alo nana míaƒe dzi dzea eme o. Ele hã be míatsri ɣeyiɣi fũu zazã ɖe modzakaɖeɖe ŋu. Ke aleke míaƒe dzitsinya ate ŋu akpe ɖe mía ŋu be míase vivi na modzakaɖeɖe siwo dzea Yehowa ŋu eye wòaɖe vi na mí?

‘Ðe nye dzitsinya ɖea fu nam ne medi be mawɔ nu gbegblẽ aɖea?’

12 Biblia xlɔ̃ nu mí le “ŋutilã la ƒe dɔwɔwɔwo” ŋu. Esiawo ƒe ɖewoe nye “gbɔdɔdɔ manɔsenu, makɔmakɔnyenye, ŋukpenanuwɔwɔ dzimesesẽtɔe, trɔ̃subɔsubɔ, gbɔgbɔyɔyɔ, kewɔwɔ, dzrewɔwɔ, ŋuʋaʋã, dɔmedzoedodowo, nyahehewo, mamawo, kɔmamawo, ŋubiabiã, ahamumu, aglotutu siwo gbɔ eme kple nu siawo tɔgbi.” Paulo gblɔ be “ame siwo wɔa  nu siawo la, womanyi Mawu Fiaɖuƒe la dome o.” (Galatiatɔwo 5:19-21) Eya ta anyo be mía dometɔ ɖe sia ɖe nabia eɖokui be: ‘Ðe nye dzitsinya ʋãam be matsri kamedefefe siwo me akpasesẽnuwɔwɔ, hoʋiʋli, dukɔmevinyenye ƒe dada, alo ŋutasesẽ le mea? Ðe nye dzitsinya ɖea fu nam ne medi be makpɔ film siwo me amamaɖeɖenuwɔnawo le alo esiwo dea agbe gbegblẽ nɔnɔ, ahamumu kple kadodo kple gbɔgbɔ vɔ̃wo ƒe dzi ƒoa?’

13. Aleke aɖaŋuɖoɖo siwo le 1 Timoteo 4:8 kple Lododowo 13:20 akpe ɖe mía ŋu ne míele nya me tsom le modzakaɖeɖe ŋu?

13 Biblia ƒe mɔfiamewo ate ŋu akpe ɖe mía ŋu be míamla míaƒe dzitsinya ale be míatso nya me nyuie le modzaka si míaɖe ŋu. Biblia ɖo aɖaŋu be: “Ŋutilãmamla nyo na nu vi aɖe ko.” (1 Timoteo 4:8) Ame geɖe xɔe se be kamedede edziedzi ade agbe yeye yewo me eye yewoanɔ lãmesẽ me. Ke ne míedi be míanɔ nutoa me kamedeha aɖe me ade kame ya ɖe? Ðe ame siwo dome míanɔ ade kame la le veviea? Lododowo 13:20 gblɔ be: “Ame si zɔna kple nunyalawo la, adze nunya, ke ame si dea ha kple bometsilawo la, eme manyo nɛ o.” Eme kɔ keŋ be ehiã vevie be míazã míaƒe dzitsinya si míetsɔ Biblia na hehee la ne míele nya me tsom le modzakaɖeɖe ŋu.

14. Aleke ƒome aɖe wɔ mɔfiame si le Romatɔwo 14:2-4 la ŋu dɔe?

14 Sɔhɛ nyɔnuvi eve le Christian kple Daniela si. Christian gblɔ be: “Le Ƒometadedeagu fiẽsi aɖe me la, míesrɔ̃ nu tso modzakaɖeɖe ŋu. Míelɔ̃ ɖe edzi be dzidzɔdonamenu aɖewo nyo eye ɖewo hã menyo o. Ame kawoe wòanyo be míade ha kplii? Mía vinyɔnuvi ɖeka gblɔ be le suku ƒe gbɔɖemeɣiwo la, sɔhɛ Ðasefo aɖewo nɔa agbe aɖewo siwo yekpɔ be medze o. Eye esia ƒonɛ ɖe ye nu be ye hã yeawɔ nu abe woawo ke ene. Míedzro eme hekpɔe be dzitsinya le mía dometɔ ɖe sia ɖe si, eye ele be míana wòafia mɔ mí le nu siwo míewɔna kpakple ame siwo míewɔa wo kplii me.”—Xlẽ Romatɔwo 14:2-4.

Wò dzitsinya si nètsɔ Biblia mla la akpe ɖe ŋuwò nàƒo asa na afɔkuwo (Kpɔ memama 14)

15. Aleke míate ŋu awɔ ɖe Mateo 6:33 me nyawo dzi le modzakaɖeɖe me?

 15 Ɣeyiɣi agbɔsɔsɔme kae nèzãna ɖe modzakaɖeɖe ŋu? Ðe nèdaa kpekpeawo, subɔsubɔdɔa kple ɖokuisi Biblia sɔsrɔ̃ ɖe nɔƒe gbãtɔ le wò agbe mea, alo modzakaɖeɖee xɔa nɔƒe gbãtɔ na wò? Wò nu vevitɔe nye ka? Yesu gbɔ be: “Miyi edzi mianɔ Fiaɖuƒe la kple Mawu ƒe dzɔdzɔenyenye dim gbã, eye woatsɔ nu bubu siawo katã akpe ɖe eŋuti na mi.” (Mateo 6:33) Ne èle nya me tsom le ale si nàzã wò ɣeyiɣi ŋu la, ɖe wò dzitsinya ʋãa wò be nàwɔ ɖe Yesu ƒe aɖaŋuɖoɖo sia dzia?

WÒ DZITSINYA NEƲÃ WÒ NÀÐE GBEƑÃ

16. Dɔ nyui kae dzitsinya ʋãa mí míewɔna?

16 Menye ɖeko dzitsinya si míena hehee la nana míeƒoa asa na nu gbegblẽ wɔwɔ ko o, ke eʋãa mí hã be míewɔa dɔ nyuiwo. Esiawo dometɔ ɖekae nye gbeƒãɖeɖe tso aƒe me yi aƒe me alo vomeɖaseɖiɖi na amewo. Dɔ siae Paulo wɔ. Eya ta egblɔ be: “Agba wònye le dzinye. Ɛ̃, ne nyemegblɔ nya nyui la o la, baba nam!” (1 Korintotɔwo 9:16) Ne míesrɔ̃ Paulo la, dzitsinya nyui asu mía si esi míenyae be nu si le eteƒe wɔm míele ta. Eye ne míetsɔa dzo ɖe nya nyuia gbɔgblɔ na amewo ŋu la, esia akpɔ ŋusẽ ɖe woƒe dzitsinya dzi. Paulo gblɔ be: “Le Mawu ŋkume la, míehea nyateƒea ɖe go eye míekpɔa ŋusẽ nyui ɖe amewo katã ƒe dzitsinya dzi.”—2 Korintotɔwo 4:2.

17. Aleke nɔvinyɔnu sɔhɛ aɖe ɖo to eƒe dzitsinya si wòtsɔ Biblia na hehee lae?

17 Esime Jacqueline xɔ ƒe 16 la, edze nugbagbeŋutinunya sɔsrɔ̃ gɔme le suku. Gake sukuviawo va nɔ nu srɔ̃m tso amedzɔtsolãme ƒe nufiafiaa ŋu. Eya ta egblɔ be: “Nye dzitsinya megaɖea mɔ nam be makpɔ gome le numedzodzrowo me le sukuxɔ me abe ale si mewɔnɛ tsã ene o. Nyemate ŋu ado amedzɔtsolãme ƒe nufiafia la ɖe ŋgɔ o. Eya ta mete ɖe míaƒe nufialaa ŋu heɖe nye dzixɔse me nɛ. Nukutɔe la, ewɔ nu ɖe ŋunye nyuie eye wòɖe mɔ nam be maƒo nu le ale si wowɔ nuwoe ŋu na sukuviawo katã.” Jacqueline ƒe dzi dze eme le esi wòɖo to eƒe dzitsinya si wòtsɔ Biblia na hehee la ta. Ðe wò hã wò dzitsinya ʋãa wò be nàwɔ nu si le eteƒea?

18. Nu ka tae míedi be dzitsinya nyui nanɔ mía si?

18 Míaƒe taɖodzinue nye be míanɔ agbe ɖe Yehowa ƒe mɔfiamewo kple nudidiwo nu. Eye míaƒe dzitsinya ate ŋu akpe ɖe mía ŋu míaɖo taɖodzinu sia gbɔ. Míate ŋu amla míaƒe dzitsinya nyuie ne míesrɔ̃a Mawu ƒe Nya la edziedzi, dea ŋugble le eŋu hewɔna ɖe nu siwo míesrɔ̃na dzi. Ekema nunana adodoe sia afia mɔ mí Kristotɔwo nyuie le agbe me!

^ mm. 7 Kpɔ “Nyabiabia Siwo Tso Exlẽlawo Gbɔ” le June 15, 2004 ƒe Gbetakpɔxɔ, axa 29-31.