Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  June 2015

Elɔ̃ Amewo Vevie

Elɔ̃ Amewo Vevie

“Nyemelɔ̃a nu le amegbetɔviwo gbɔ kura o.”—LODODOWO 8:31.

1, 2. Aleke Yesu ɖe lɔlɔ̃ deto si le esi na amegbetɔwo fiae?

MAWU ƒe Ŋgɔgbevi lae ɖe Yehowa ƒe nunya si ɖeke mesɔ kplii o la fia nyuie wu. Enye “dɔwɔla bibi” nɔ Fofoa gbɔ. Bu ale si dzi anya dzɔ Yesu eye eƒe dzi adze emee esime Fofoa ‘dzra dziƒowo ɖo’ eye “wòɖo anyigba la gɔme anyi” ŋu kpɔ. Gake le nu siwo katã Fofoa wɔ dome la, ‘amegbetɔviwo gbɔe’ Yesu ‘melɔ̃a nu le kura o.’ (Lododowo 8:22-31) Ɛ̃, elɔ̃ amegbetɔwo vevie tso gɔmedzedzea me ke.

2 Emegbe Yesu ɖe nuteƒewɔwɔ kple lɔlɔ̃ na Fofoa kpakple lɔlɔ̃ deto si le esi na amegbetɔwo katã fia esime wòlɔ̃ faa gblẽ eƒe nɔƒe ɖi le dziƒo va zu amegbetɔ le anyigba dzi. Yesu wɔ esia lɔlɔ̃tɔe ale be wòate ŋu atsɔ eƒe agbe ana “wòanye tafe na ame geɖewo.” (Mateo 20:28; Filipitɔwo 2:5-8) Esime Yesu nɔ anyigba dzi la, Mawu na ŋusẽe wòwɔ nukunuwo. Nukunu siawo ɖe ale si gbegbe Yesu lɔ̃ amegbetɔwo kple nu nyui siwo wòava wɔ na wo kpuie la fia.

3. Nu ka mee míadzro le nyati sia me?

3 Esi Yesu va anyigba dzi la, eɖe gbeƒã “Mawu Fiaɖuƒe ŋuti nya nyui la.” (Luka 4:43) Enyae be Fiaɖuƒe sia akɔ ye  Fofo ƒe ŋkɔ ŋuti eye wòakpɔ amegbetɔwo ƒe kuxiwo katã gbɔ tegbee. Yesu wɔ nukunu geɖe esi wònɔ gbeƒã ɖem. Nukunu siawo ɖe ale si gbegbe wòtsi dzi ɖe amewo ŋui la fia. Nu ka tae esia le vevie na mí? Elabena nu siwo wòwɔ la na mɔkpɔkpɔ mí hena míeka ɖe edzi be nuwo ava nyo le etsɔme. Eya ta na míadzro Yesu ƒe nukunu ene me kpɔ.

“YEHOWA NA ŊUSẼE BE WÒADA DƆ”

4. Nu kae dzɔ esi Yesu kpɔ ŋutsu aɖe si le kpodɔ lém?

4 Le Yesu ƒe subɔsubɔdɔa wɔɣi la, eyi Galilea nutowo me. Le duawo dometɔ ɖeka me la, ekpɔ ŋutsu aɖe si ŋu dɔléle vɔ̃ɖi si nye anyidɔ, alo kpodɔ, le. (Marko 1:39, 40) Dɔa te ɖe ŋutsua dzi ale gbegbe be Luka si nye ɖɔkta la gblɔ be ‘anyidɔa xɔ eŋuti katã.’ (Luka 5:12) Biblia gblɔ be esi dɔnɔa kpɔ Yesu la, “etsyɔ mo anyi ɖe eŋkume heɖe kuku nɛ be: ‘Aƒetɔ, ne èlɔ̃ ko la, àte ŋu ana ŋutinye nakɔ.’” Ŋutsua nya be ŋusẽ le Yesu si be wòada dɔ na ye, gake edi be yeanya ne Yesu lɔ̃ vavã be yeada dɔ na ye. Nu ka tae? Elabena ŋutsua nya ale si Farisitɔwo mebua kpodɔlélawo ɖe nemi me o la nyuie. Gake nu kae nɔ susu me na Yesu ya? Aleke wòawɔ nu ɖe ŋutsu sia si ŋu dɔlélea gblẽ nu le keŋkeŋ la ŋu? Ne wòe ɖe, anye ne nu kae nàwɔ?

5. Nu ka tae Yesu lɔ̃ be yeada dɔ na kpodɔléla la?

5 Edze ƒãa be kpodɔlélaa menɔ ɣli dom be, “Ŋunye mekɔ o hee, ŋunye mekɔ o hee!” abe ale si Mose ƒe Sea bia ene o. (3 Mose 13:43-46) Gake Yesu medo dziku ɖe ŋutsua ŋu o. Ke boŋ etsi dzi ɖe eŋu eye wòdi be yeakpe ɖe eŋuti. Míenya nu si tututu nɔ susu me na Yesu o, gake míenya ale si wòse le eɖokui me. Ese veve ɖe ŋutsua nu ale gbegbe be wòwɔ nukunu aɖe. Eka asi ŋutsua ŋu—esia nye nu si ame bubu aɖeke mawɔ o. Nublanuikpɔkpɔ ʋã Yesu wògblɔ kple kakaɖedzi be: “Melɔ̃! Ŋutiwò nekɔ.” Eye “enumake anyidɔ la vɔ nɛ.” (Luka 5:13) Eme kɔ ƒãa be Yehowa ye na ŋusẽ Yesu wòwɔ nukunu gã sia tsɔ ɖe ale si gbegbe wòlɔ̃ amegbetɔwoe fia.—Luka 5:17.

6. Nu kae ɖe dzesi le nukunu siwo Yesu wɔ ŋu, eye nu kae esia ɖe fia?

6 Yesu wɔ nukunu gã geɖe le Mawu ƒe ŋusẽ me. Menye kpodɔlélawo koe wòda dɔ na o. Ke boŋ Yesu da gbe le dɔ ƒomevi vovovo lélawo ŋu. Biblia gblɔ be, esi amewo “kpɔ be aɖetututɔwo le nu ƒom, bunɔwo le zɔzɔm, eye ŋkuagbãtɔwo le nu kpɔm la, woƒe mo wɔ yaa.” (Mateo 15:31) Mehiãna be Yesu naɖe ame bubu si le lãmesẽ me ƒe ŋutinu aɖe hafi atsɔ ada dɔ na amewo abe ale si egbegbe ɖɔktawo wɔna ene o. Kura o, ŋusẽ le Yesu si be wòaɖɔ ŋutinu ɖe sia ɖe si ŋu nu gblẽ le ɖo. Eye eyɔ dɔ amewo enumake, ame siwo le didiƒe tso egbɔ gɔ̃ hã. (Yohanes 4:46-54) Nu kae nukunu siawo ɖe fia? Woɖee fia be ŋusẽ le míaƒe Fia Yesu Kristo si be wòaɖe dɔléle ɖe sia ɖe ɖa tegbee, eye wòdi vevie be yeaɖee ɖa hã. Ne míesrɔ̃ nu tso ale si Yesu wɔ nu ɖe amewo ŋui ŋu la, enana míekana ɖe edzi be le xexe yeyea me la, “ase veve ɖe ame tsɛ kple ame dahe nu.” (Psalmo 72:13) Yesu ada gbe le ame siwo katã le fu kpem le mɔ vovovowo  nu la ŋu, elabena edi ŋutɔŋutɔ be yeawɔe.

“TSO! TSƆ WÒ ABA, EYE NÀZƆ”

7, 8. Gblɔ nu siwo dzɔ do ŋgɔ hafi Yesu yi Betzata heva do go ŋutsu aɖe si nɔ dɔ lém.

7 Esi Yesu da dɔ na kpodɔlélaa ɣleti ʋɛ aɖewo megbe la, Yesu zɔ mɔ tso Galilea yi Yudea eye wòyi edzi ɖe gbeƒã Mawu Fiaɖuƒe ŋuti nya nyuia le afi ma. Anɔ eme be ame akpe geɖe se Yesu ƒe nyawo, eye lɔlɔ̃ si le esi na wo la wɔ dɔ ɖe wo dzi. Yesu di vevie be yeafa akɔ na ame dahewo kple ame siwo ƒe dzi gbã, eye yeana mɔkpɔkpɔ nasu wo si.—Yesaya 61:1, 2; Luka 4:18-21.

8 Le ɣleti si nye Nisan me la, Yesu zɔ mɔ yi Yerusalem hena Ŋutitotoŋkekenyuia ɖuɖu. Ame gbogbo siwo tso teƒeteƒewo va azãɖuƒea la na dua me yɔ tititi. Le gbedoxɔa ƒe dzigbe gome la, tsita aɖe li si woyɔna be Betzata. Esi Yesu yi afi ma la, ekpɔ ŋutsu aɖe si metea ŋu zɔna o.

9, 10. (a) Nu ka tae amewo yia Betzata-ta la to? (b) Nu kae Yesu wɔ le ta la to, eye nu kae míesrɔ̃ tso esia me? (Kpɔ nɔnɔmetata si le nyati sia ƒe gɔmedzedze.)

9 Dɔnɔ gbogbo aɖewo yia Betzata. Nu ka tae? Elabena wosusu be ne dɔnɔ aɖe te ŋu ge ɖe ta la me esime woblu tsia la, eƒe lãme asẽ nukutɔe. Kpɔ ale si gbegbe ʋunyaʋunya anɔ teƒea esi ame geɖe siwo tsi dzimaɖi, wotsi dzodzodzoe eye mɔkpɔkpɔ bu ɖe wo la le agbagba dzem be yewoakpɔ dɔyɔyɔ la ɖa le susu me. Esi Yesu ya de blibo eye mehiã dɔyɔyɔ o la, ke nu ka tae wòyi afi ma ɖo? Lɔlɔ̃ si le esi na amewo tae wòyi ɖo. Eye afi siae wòkpɔ ŋutsu aɖe si le dɔ lém ƒe geɖe le—ƒe siwo dɔléle sia ɖe fu nɛ la sɔ gbɔ wu ƒe siwo Yesu nɔ agbe le anyigba dzi.—Xlẽ Yohanes 5:5-9.

Yesu di ame siwo hiã kpekpeɖeŋu la yome mɔ

10 Yesu bia ŋutsua nenye be edi be yeagazɔ azɔli. Ŋutsua gblɔ na Yesu be yedi be yeƒe lãme nasẽ, gake ame aɖeke mele ye si akɔ ye ada ɖe tsia me o. Bu ale si esia ate ɖe ŋutsua dzi la ŋu kpɔ. Yesu gblɔ na ŋutsua be wòawɔ nu si mesusu be yeate ŋu awɔ gbeɖe o la. Egblɔ nɛ be wòatsɔ eƒe aba ne wòazɔ azɔli. Ale ŋutsua tsɔ eƒe aba hede asi zɔzɔ me! Nukunu sia nye nu siwo Yesu ava wɔ le xexe yeyea me la ƒe kpɔɖeŋu wɔdɔɖeamedzi aɖe. Eɖee fia hã be Yesu lɔ̃ amegbetɔwo vevie. Edi ame siwo hiã kpekpeɖeŋu la yome mɔ. Ele be Yesu ƒe kpɔɖeŋua naʋã mí be míayi edzi adi ame siwo le nu xam vevie le ŋɔdzinu siwo le dzɔdzɔm le xexea me ta.

“AME KAE KA ASI NYE AWUDZIWUIWO ŊU?”

11. Aleke Marko 5:25-34 ɖee fia be Yesu lɔ̃ ame siwo le dɔ lém?

11 Xlẽ Marko 5:25-34. Nyɔnu aɖe nɔ dɔ aɖe si kpea ŋu na ame ŋutɔ la lém ƒe 12 sɔŋ. Dɔlélea gblẽ nu le eƒe agbe ƒe akpa sia akpa ŋu, eƒe mawusubɔsubɔ ke hã. Ede ɖɔkta geɖewo gbɔ eye wòzã eƒe ga katã be yeƒe lãme nasẽ, gake ɖeko wòganyra ɖe edzi. Gbe ɖeka la, nyɔnua ɖoe be yeawɔ nu bubu aɖe si ana yeakpɔ dɔyɔyɔ. Ezɔ to  ameha la dome dzadzadza yi ɖaka asi Yesu ƒe awuwo ŋu. (3 Mose 15:19, 25) Yesu de dzesii be ŋusẽ do le ye me eye wòbia be ame kae ka asi ye ŋu mahã. “Vɔvɔ̃ ɖo nyɔnu la, eye wòle dzodzom nyanyanya,” eye “wòva dze klo ɖe Yesu ŋkume hegblɔ nyateƒea katã nɛ.” Yesu nyae be Yehowa da dɔ na nyɔnua, eya ta egblɔ nɛ tufafatɔe be: “Vinyenyɔnu, wò xɔse na nèhaya. Heyi le ŋutifafa me, eye nàhaya tso wò dɔléle vɔ̃ɖi la si me.”

Yesu ƒe nukunuwo ɖee fia be etsia dzi ɖe míawo ŋutɔ kple míaƒe kuxiwo ŋu vavã (Kpɔ memama 11, 12)

12. (a) Le nu siwo me míedzro va se ɖe fifia nu la, ame ka tɔgbie nàgblɔ be Yesu nye? (b) Kpɔɖeŋu kae Yesu ɖo ɖi na mí?

12 Ne míekpɔ ale si gbegbe Yesu lɔ̃ amewoe, vevietɔ dɔnɔwo la, enana míaƒe dzi dzea eme. Eƒe nuwɔna to vovo kura tso Satana tɔ gbɔ, ame si dina be míaxɔe ase be asixɔxɔ mele mía ŋu o eye be ame aɖeke melɔ̃ mí o. Hekpe ɖe eŋu la, Yesu ƒe nukunuwo ɖee fia be etsia dzi ɖe míawo ŋutɔ kple míaƒe kuxiwo ŋu vavã. Míedaa akpe ŋutɔ be Fia kple Nunɔlagã lɔ̃ame sia le mía si! (Hebritɔwo 4:15) Ate ŋu asesẽ be míase ame si dze dɔ ɣeyiɣi didi aɖe ƒe seselelãmewo gɔme, vevietɔ ne míawo míele dɔ lém o. Gake bu Yesu ŋu kpɔ. Togbɔ be eya medze dɔ kpɔ o hã la, esea veve ɖe dɔlélawo nu. Mina míawɔ míaƒe ŋutete ɖe sia ɖe asrɔ̃ lɔlɔ̃ ƒe kpɔɖeŋu si wòɖo ɖi la.—1 Petro 3:8.

“YESU FA AVI”

13. Nu kae Lazaro fɔfɔ ɖe tsitre ɖe fia le Yesu ŋu?

13 Veve si sem amewo le te ɖe Yesu dzi vevie. Le kpɔɖeŋu me, esi Yesu xɔlɔ̃ Lazaro ku la, “eɖe hũ le eɖokui me, eye wòxa nu vevie” esi wòkpɔ ale si Lazaro ƒe ƒometɔwo kple xɔlɔ̃wo le konyi famee. (Xlẽ Yohanes 11:33-36.) Togbɔ be Yesu nya be yele Lazaro fɔ ge hã la, efa avi. Mekpe ŋu nɛ be yeaɖe yeƒe seselelãme afia amewo nakpɔ o. Ɛ̃, lɔlɔ̃ si le Yesu si na Lazaro kple eƒe ƒometɔwo ʋãe wòzã ŋusẽ si Mawu nɛ la tsɔ gbɔ agbe Lazaro!—Yohanes 11:43, 44.

14, 15. (a) Nu kae ɖee fia be Yehowa di be yeaɖe amegbetɔƒomea tso fukpekpe me? (b) Nu kae nyagbɔgblɔ “ŋkuɖodziyɔdowo” fia mí?

 14 Biblia gblɔ tso Yesu ŋu be Fofoa, Yehowa, ƒe nɔnɔme pɛpɛpɛ ye le esi. (Hebritɔwo 1:3) Eya ta nukunu siwo Yesu wɔ la ɖee fia be Yehowa di vevie be yeaɖe dɔléle, vevesese kple ku ɖa. Eteƒe madidi o, Yehowa kple Yesu agbɔ agbe ame bubu geɖewo. Yesu gblɔ be “gaƒoƒo la gbɔna, esime ame siwo katã le ŋkuɖodziyɔdowo me” la afɔ ɖe tsitre.—Yohanes 5:28, 29.

15 Yesu zã nyagbɔgblɔ “ŋkuɖodziyɔdowo,” si fia be, eku ɖe ŋutete si le Mawu si be wòaɖo ŋku nu dzi ŋu. Mawu Ŋusẽkatãtɔ, xexea me katã Wɔla la, ate ŋu aɖo ŋku nu sia nu si ku ɖe míaƒe ame lɔlɔ̃a siwo ku ŋu la dzi, woƒe amenyenye hã le eme. (Yesaya 40:26) Menye ɖeko Yehowa ate ŋu aɖo ŋku wo dzi o, ke edi vevie be yeaɖo ŋku wo dzi hã. Tsitretsitsi siwo ŋu woƒo nu tsoe le Biblia me la nye nu siwo adzɔ le xexe yeyea me la ƒe kpɔɖeŋu wɔnukuwo.

NU SI YESU ƑE NUKUNUWO FIA MÍ

16. Mɔnukpɔkpɔ kae asu Mawu subɔla geɖewo si?

16 Ne míeyi edzi wɔ nuteƒe la, mɔnukpɔkpɔ asu mía si míakpɔ nukunu gã aɖe teƒe, si nye be míatsi agbe le xaxa gã la me! Le Armagedon megbe kpuie la, míakpɔ nukunu geɖe wu teƒe. Ɣemaɣi la, ame sia ame anɔ lãmesẽ blibo me. (Yesaya 33:24; 35:5, 6; Nyaɖeɖefia 21:4) Kpɔe ɖa le susu me be amewoe nye ema tsɔ woƒe gaŋkuiwo, atizɔtiwo alo kpowo, bunɔwo ƒe atitɔɖeŋuwo, bunɔkekewo kple nusemɔ̃wo le gbe ƒum. Yehowa nya be ele be ame siwo katã atsi agbe le Armagedon me la nanɔ lãmesẽ me eye ŋusẽ nanɔ wo ŋu, elabena dɔ geɖe li woawɔ. Woawoe atrɔ míaƒe anyigba nyui blibo la wòazu paradiso.—Psalmo 115:16.

17, 18. (a) Nu ka tae Yesu wɔ nukunuwo ɖo? (b) Nu ka tae wòle be nàwɔ nu sia nu si hiã be nàge ɖe Mawu ƒe xexe yeyea me?

17 Egbea, ne “ameha gã” la me tɔwo xlẽ nu tso ale si Yesu da dɔ na dɔnɔwo ŋu la, dzi ɖoa wo ƒo. (Nyaɖeɖefia 7:9) Nukunu mawo nana be mɔkpɔkpɔ si le mía si be woava yɔ dɔ mí keŋkeŋ le etsɔme la me gasẽna ɖe edzi. Wogaɖe ale si gbegbe Mawu ƒe Ŋgɔgbevi la lɔ̃ amegbetɔwoe fia. (Yohanes 10:11; 15:12, 13) Ale si Yesu ƒe dɔme trɔ ɖe amewo ŋu vevie la nye lɔlɔ̃ deto si le Yehowa si na eƒe subɔla ɖe sia ɖe la ɖeɖe fia.—Yohanes 5:19.

18 Egbexexea me yɔ fũu kple vevesese, fukpekpe kple ku. (Romatɔwo 8:22) Esia tae míehiã Mawu ƒe xexe yeyea ɖo. Lãmesẽ deblibo si ŋugbe Mawu do la asu amewo katã si le xexe ma me. Malaki 4:2 na mɔkpɔkpɔ mí be míado “anɔ kpo tim abe nyivi damiwo ene,” míanɔ dzidzɔ kpɔm anɔ aseye tsom elabena woyɔ dɔ mí heɖe mí le blibomademade me. Mina ŋudzedzekpɔkpɔ ɖe Yehowa ŋu kple eƒe ŋugbedodowo dzi xɔxɔ se naʋã mí míawɔ nu sia nu si hiã be míage ɖe xexe yeyea me. Dzidzɔ ka gbegbee nye esi wònye be míeva nyae be nukunu siwo Yesu wɔ nye gbɔdzɔe mavɔ si asu amegbetɔwo si kpuie le eƒe dziɖuɖua me la ƒe kpɔɖeŋuwo!