Ðe David ƒe nya si wògblɔ le Psalmo 37:25 kple Yesu ƒe nya si le Mateo 6:33 la fia be Yehowa maɖe mɔ gbeɖe be dɔ nawu Kristotɔ oa?

David ŋlɔ bena yemekpɔ be “wogblẽ ame dzɔdzɔe ɖi, eye viawo ɖo abologbe kpɔ o.” Esia fia be nu si teƒe eya ŋutɔ kpɔ le agbe me dzie wònɔ te ɖo gblɔ nya sia. Enya nyuie be Mawu megblẽa etɔwo ɖi o. (Ps. 37:25) Gake David ƒe nyawo mefia be hiã metu mawusubɔla aɖeke kpɔ alo be mate ŋu adzɔ gbeɖe o.

David ŋutɔ hã to nɔnɔme sesẽwo me ɣeaɖewoɣi. Esia ƒe kpɔɖeŋue nye esime wònɔ sisim le Saul nu. Nuɖuɖu vɔ le David kple eƒe amewo si, eye wòyi ɖabia be woana abolo yewo. (1 Sam. 21:2-7) Eya ta le gaƒoƒo ma me la, ‘abolo hiã’ David. Gake le ɣeyiɣi sesẽ ma me la, enyae be Yehowa megblẽ ye ɖi o. Nyateƒeae nye be, Biblia megblɔ le afi aɖeke be eva hiã be David nanɔ nu biam hafi akpɔ nuɖuɖu si nu wòanɔ agbe ɖo o.

Le Mateo 6:33 la, Yesu ka ɖe edzi na mí be Mawu akpɔ esubɔla wɔnuteƒewo ƒe nuhiahiãwo gbɔ na wo ne wotsɔ Fiaɖuƒea ƒe nuwo ɖo nɔƒe gbãtɔ le agbe me. Yesu gblɔ be: “Miyi edzi mianɔ fiaɖuƒe la kple Mawu ƒe dzɔdzɔenyenye dim gbã, eye woatsɔ nu bubu siawo katã [abe nuɖuɖu, nunono kple nudodo ene] akpe ɖe eŋuti na mi.” Gake Yesu na míenya hã be le yometiti ta la, dɔ awu ye ‘nɔviwo.’ (Mat. 25:35, 37, 40) Esia dzɔ ɖe apostolo Paulo dzi. Ɣeaɖewoɣi la, dɔ wui eye tsikɔ hã wui.—2 Kor. 11:27.

Yehowa na míenya be yometiti ƒomevi vovovowo ava mía dzi. Ate ŋu aɖe mɔ míato nɔnɔme sesẽwo me ale be míana woakpɔ ŋuɖoɖo na nya siwo Abosam fɔ ɖe te. (Hiob 2:3-5) Le kpɔɖeŋu me, mía nɔvi Kristotɔwo, abe esiwo wode Nazitɔwo ƒe fuwɔamesaɖawo me ene la ƒe agbe ɖo afɔku me le yometiti ta. Wona dɔ wu Ðasefoawo, eye esia nye ayemɔ vɔ̃ɖi aɖe si dzi woto be yewoana woadzudzɔ nuteƒewɔwɔ. Ðasefo siwo wɔ nuteƒe la yi edzi ɖo to Yehowa, eye eya hã megblẽ wo ɖi o. Eɖe mɔ dodokpɔ sia va wo dzi, abe ale si ko wòɖea mɔ Kristotɔwo katã toa dodokpɔ ƒomevi vovovowo me ene. Ke hã ɖikeke mele eme o be Yehowa kpena ɖe ame siwo katã kpea fu le eƒe ŋkɔa ta la ŋu. (1 Kor. 10:13) Anyo be Filipitɔwo 1:29 me nyawo nanɔ susu me na mí, afi si gblɔ be: “Miawoe wona mɔnukpɔkpɔe le Kristo ta, menye be miaxɔ edzi ase ko o, ke be miakpe fu ɖe eta hã.”

Yehowa do ŋugbe be yemagblẽ ye subɔlawo ɖi o. Le kpɔɖeŋu me, Yesaya 54:17 gblɔ be: “Lãnu sia lãnu, si wotu ɖe ŋuwò la, madze edzi o.” Ŋugbedodo sia kple bubu siwo ɖii la ka ɖe edzi na mí be Mawu akpɔ eƒe amewo ta abe ƒuƒoƒo ene. Gake ate ŋu adzɔ be Kristotɔ ɖekaɖekawo nado go dodokpɔ siwo me woabu woƒe agbe le la gɔ̃ hã..