Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  September 2014

Dzilawo—Mihe Mia Viwo

Dzilawo—Mihe Mia Viwo

“Wò alẽwo ƒe nɔnɔme nenɔ nyanya na wò.”—LOD. 27:23.

1, 2. (a) Le blema Israel la, nu kae alẽkplɔlawo ƒe dɔa bia? (b) Aleke dzilawo ƒe dɔa le abe alẽkpɔkplɔdɔ ene?

LE BLEMA Israel la, alẽkplɔlawo ƒe dɔa menɔ bɔbɔe kura o. Ne ŋdɔe le ʋuʋum alo tsie la dzadzam o, wonɔa gbe dzi nɔa woƒe alẽwo ta kpɔm tso lã wɔadãwo kple fiafiwo si me. Alẽkplɔlawo léa ŋku ɖe woƒe alẽwo dometɔ ɖe sia ɖe ŋu edziedzi be yewoakpɔ esiwo dze dɔ alo xɔ abi la gbɔ. Woléa be na alẽviawo etɔxɛe, elabena ŋusẽ mele wo ŋu abe alẽ tsitsiwo ene o.—1 Mose 33:13.

2 Ele be nɔnɔme si nɔ alẽkplɔla mawo si la nanɔ dzila Kristotɔwo hã si. Agba le dzilawo dzi be woahe wo viwo be woanɔ agbe ɖe Yehowa ƒe nudidiwo nu. (Ef. 6:4) Ðe esia nɔa bɔbɔe ɣesiaɣia? Kura o! Ðeviwo dzea ŋgɔ ameblenya siwo Satana dona ɖe ŋgɔ la gbe sia gbe. Tsɔ kpe ɖe eŋu la, gbɔdzɔgbɔdzɔwo le ɖevi ɖe sia ɖe ŋu. (2 Tim. 2:22; 1 Yoh. 2:16) Aleke nàwɔ akpe ɖe viwòwo ŋu? Na míadzro nu etɔ̃ siwo nàte ŋu awɔ atsɔ ahe viwòwo la me: (1) nya wo nyuie, (2) nyi wo, eye (3) fia mɔ wo.

NYA VIWÒWO NYUIE

3. Aleke dzilawo awɔ anya wo viwo nyuie?

3 Alẽkplɔla nyui léa ŋku ɖe eƒe alẽwo dometɔ ɖe sia ɖe ŋu nyuie, elabena edina be yeakpɔ egbɔ be wole lãmesẽ me. Biblia  gblɔ be: “Wò alẽwo ƒe nɔnɔme nenɔ nyanya na wò.” (Lod. 27:23) Ne ènye dzila la, ele be nànya “wò alẽwo,” alo viwòwo nyuie. Be nàte ŋu awɔ esia la, ele be nàlé ŋku ɖe viwòwo ƒe nuwɔnawo ŋu eye nànya woƒe susuwo kple ale si wosena le wo ɖokui me. Aleke nàte ŋu awɔ esiae? Ele be nànɔ dze ɖom kpli wo edziedzi.

4, 5. (a) Mɔfiame nyui kawo dzi wɔwɔe ate ŋu ana ɖeviwo nalɔ̃ faa aƒo nu tso woƒe susuwo kple seselelãmewo ŋu? (Kpɔ nɔnɔmetata si le nyati sia ƒe gɔmedzedze.) (b) Nu kae nèwɔ be wòanɔ bɔbɔe na viwòwo be woaɖo dze kpli wò?

4 Dzila aɖewo de dzesii be ne ɖeviwo ge ɖe woƒe ƒewuiwo me la, dzeɖoɖo kpli wo sesẽna wu. Ƒewuivi geɖe medina be yewoagblɔ yewoƒe susuwo alo aƒo nu tso yewoƒe seselelãmewo ŋu o. Ne nenemae viwòwo le la, nu kae nàte ŋu awɔ? Mehiã kokoko be nàdze agbagba be yeaɖo dze legbeewo kpli wo moveviɖoɖotɔe o. Ke boŋ ɖo dze kpli wo le ɣeyiɣi siwo me mieɖe dzi ɖi. (5 Mose 6:6, 7) Miwɔ nuwo ɖekae. Miɖi tsa, mife fefewo alo miawɔ aƒemedɔwo ɖekae. Ne ɖeviwo ɖe dzi ɖi la, enɔa bɔbɔe na wo be woagblɔ woƒe susuwo ahaƒo nu tso woƒe seselelãmewo ŋu.

5 Ke ne èwɔ esiawo gake viwòa medi be yeaɖo dze kpli wò o ya ɖe? Gate mɔnu bubu kpɔ. Le kpɔɖeŋu me, le esi teƒe be nàbia viwònyɔnuvi be alekee nye eƒe ŋkekea hã la, wò boŋ gblɔ ale si ŋkekea nɔ na wò. Ðewohĩ esia ana wòalɔ̃ faa aƒo nu tso ale si ŋkekea nɔ nɛ ŋu. Alo ne èdi be yeanya eƒe susu le nya aɖe ŋu la, wò biabiawo neku ɖe nya la ŋu, ke menye eya amea ŋutɔ ŋu o. Àte ŋu abiae be nu kae nye exɔlɔ̃wo ƒe susu le nyaa ŋu hã. Eyome nàbiae be aɖaŋu kae wòaɖo na wo.

6. Aleke nàwɔ be viwòwo nase le wo ɖokui me be èkpɔa vovo ɖe yewo ŋu eye yewoate ŋu agblɔ yewoƒe nyawo na wò faa?

6 Ne viwòwo kpɔe be èkpɔa vovo ɖe yewo ŋu eye nènye ame si ŋu yewoate ŋu ate ɖo bɔbɔe la, woalɔ̃ faa be yewoaɖo dze kpli wò. Ne ewɔna na wo be mèkpɔa vovo ɖe yewo ŋu o la, asesẽ na wo be woaɖe woƒe kuxiwo dzi na wò. Nu kae nàwɔ be wòanɔ bɔbɔe na viwòwo be woagblɔ woƒe nyawo na wò? Mègagblɔ ko be, “Àte ŋu ate ɖe ŋunye ɣesiaɣi agblɔ wò nyawo nam” o. Ele be viwò ƒewuiviwo nanyae be màwɔ nu wòagbɔ eme le nya si yewoagblɔ na wò ta o. Ele be woakpɔe hã be ètsi dzi ɖe yewoƒe kuxiwo gbɔ kpɔkpɔ ŋu. Kayla, si xɔ ƒe wuiasieke la gblɔ be: “Metea ŋu gblɔa nye nya ɖe sia ɖe na fofonye. Metsoa nya le nunye o, mebua fɔm o; ɖeko wòɖoa tom. Eyome eɖoa aɖaŋu nyuitɔ kekeake nam.”

7. (a) Aleke dzilawo ate ŋu ada asɔ ne wole nu ƒom tso nyawo abe gbeɖoɖoɖi ene ŋu? (b) Aleke wòate ŋu adzɔe be dzilawo ƒe nyawo nava ti wo viwo?

7 Eva hiãna ɣeaɖewoɣi be mia kple viwòwo miaƒo nu tso nyati siwo ŋu wòsesẽna be woaɖo dze tsoe, abe gbeɖoɖoɖi ene ŋu. Ne miele dze ɖom tso nya mawo tɔgbi ŋu la, kpɔ egbɔ be yefia nu nyuitɔ si wòle be woawɔ le nɔnɔme mawo me la wo. Le kpɔɖeŋu me, tsɔe be èyi nuɖuɖudzraƒe aɖe hekpɔe be woƒe agbalẽ si ku ɖe nuɖuɖu vovovo siwo dzram wole ŋu la me nyawo ku ɖe nuɖuɖu me dɔlékuiwo ɖeɖe sɔŋ ko ŋu. Ðewohĩ àdzo le afi ma ayi nuɖuɖudzraƒe bubu. Nu sia tɔgbi ate ŋu adzɔ le viwòwo gome. Ne aɖaŋu siwo nèɖona na wo la nyea nuxlɔ̃amenyawo sɔŋ ko la, ate ŋu ava ti wo si awɔe be woadzudzɔ gbɔwò vava hena aɖaŋuɖoɖo. (Mixlẽ Kolosetɔwo 3:21.) Dze agbagba nàda asɔ boŋ. Nɔvinyɔnu ɖetugbui aɖe si ŋkɔe nye Emily gblɔ be: “Ne dzinyelawo le nu ƒom nam tso gbeɖoɖoɖi ŋu la, womeƒoa nu tso eŋu abe nu gbegblẽe wònye ene o. Wotea gbe ɖe dzidzɔ si le gbeɖoɖoɖi me le esi wònana wodzea si ame nyuie hekpɔa kpeɖeŋutɔ ta la dzi. Esia wɔe be enɔa bɔbɔe nam be maɖo dze kpli wo tso nya ma ŋu. Le nyateƒe me la, ne ɣeyiɣia de medi be madze si ɖekakpui aɖe nyuie wu la, madi be  maƒo nu tso eŋu na wo faa, ke menye be maɣlae ɖe wo o.”

8, 9. (a) Ne dzilawo ɖoa to dzigbɔɖitɔe eye wometsoa nya le wo viwo nu o la, viɖe kae dona tsoa eme? (b) Nu nyui kae do tso eme esi nèlɔ̃ faa se viwò ƒe nyawo?

8 Gbɔ dzi ɖi nàɖo to viwòa tufafatɔe. Esia ana wòakpɔe be yeate ŋu ate ɖe ŋuwò bɔbɔe ahagblɔ yeƒe nyawo na wò. (Mixlẽ Yakobo 1:19.) Katia, si nye nɔvinyɔnu dzilaɖekɛ aɖe la gblɔ be: “Tsã la, nyemegbɔa dzi ɖi na vinyenyɔnuvia kura o. Nyemeɖea mɔ nɛ wòwua nya si gblɔm wòle nu o. Ɣeaɖewoɣi la, ɖeɖi tea ŋunye akpa be maɖo toe alo be nyemedi fuɖename aɖeke o. Fifia esi metrɔ nye nɔnɔme la, eya hã ƒe nɔnɔme va trɔ. Eva le nye gbe sem fifia wu tsã.”

Ðo to wo be nànya wo nyuie (Kpɔ memama 3-9)

9 Nu sia tɔgbi ye dzɔ le vifofo aɖe si ŋkɔe nye Ronald kple vianyɔnuvi si nye ƒewuivi la gome. Egblɔ be: “Esi wòva gblɔ nam be ɖekakpui aɖe si le yewoƒe sukua ƒe nu lé dzi na ye la, dzi kum vevie. Gake esi mede ŋugble le ale si Yehowa gbɔa dzi ɖi hesea nu gɔme na esubɔlawo ŋu la, mekpɔe be anyo wu be maɖe mɔ na vinyea wòagblɔ eƒe nyawo nam gbɔ hafi madze agbagba be maɖɔe ɖo. Edzɔ dzi nam ŋutɔ be mewɔe nenema! Esia wɔe be meva se ale si wònɔ sesem le eɖokui mee la gɔme. Esi wògblɔ eƒe nyawo nam vɔ la, enɔ bɔbɔe nam azɔ be maƒo nu nɛ lɔlɔ̃tɔe. Ewɔ nuku nam ŋutɔ be elɔ̃ faa xɔ nye aɖaŋuɖoɖoa. Eka ɖe edzi nam be yeatrɔ yeƒe nɔnɔme.” Dzeɖoɖo kple viwòwo edziedzi ana nànya ale si tututu wobua nuwo ŋui kple ale si wosena le wo ɖokui me. Esia awɔe be nàte ŋu akpe ɖe wo ŋu le woƒe nyametsotsowo wɔwɔ me. *

NYI VIWÒWO

10, 11. Aleke nàte ŋu akpe ɖe viwòwo ŋu be woanɔ nyateƒea me?

10 Alẽkplɔla nyui nyae be alẽwo ate ŋu abu. Alẽ aɖe ate ŋu anɔ gbe ɖum le teƒe si medidi tso alẽha la gbɔ o. Anɔ tetem ɖa le alẽha la ŋu vivivi va se ɖe esime wòaɖe ɖe aga kura tso wo gbɔ. Nu sia ate ŋu adzɔ ɖe ɖeviwo dzi. Woate ŋu ava nɔ tetem ɖa le nyateƒea ŋu vivivi. Nu si gbɔ wòate ŋu atsoe nye hadede vɔ̃wo alo modzakaɖeɖe maɖɔʋuwo. (Lod. 13:20) Nu kae nàte ŋu awɔ be esia nagadzɔ o?

11 Ne èle nu fiam viwòwo eye nèkpɔ nu siwo me wòhiã be woawɔ ɖɔɖɔɖo le la, mègahe ɖe megbe o, kpe ɖe wo ŋu  enumake. Azɔ hã kpe ɖe wo ŋu be woatu nɔnɔme nyui siwo le wo si la ɖo. (2 Pet. 1:5-8) Ƒometadedeagua nye mɔ nyui aɖe si dzi nàto awɔ esia. Wogblɔ le October 2008 ƒe Fiaɖuƒe Subɔsubɔdɔ gbalẽvia me be: ‘Wode dzi ƒo na ƒome ƒe tawo be woatsɔ woƒe ƒomegbanɔamedzi si Yehowa de asi na wo, eye woakpɔ egbɔ be yewowɔ ɖoɖo ɖe ƒome ƒe Biblia nusɔsrɔ̃ edziedzi ŋu.’ Ðe nèle ɣeyiɣi sia ŋu dɔ wɔm nyuie be nàtsɔ ahe viwòwoa? Ka ɖe edzi be viwòwo kpɔa ŋudzedze ɖe agbagba siwo nèdzena be yeakpe ɖe wo ŋu la ŋu.—Mat. 5:3; Flp. 1:10.

Nyi wo nyuie (Kpɔ memama 10-12)

12. (a) Aleke ƒometadedeagu si ƒomewo wɔna edziedzi la le vi ɖem na ɖeviwo? (Kpɔ aɖaka si nye  “Wokpɔa Ŋudzedze Ðe Eŋu” hã.) (b) Aleke ƒometadedeagua ɖe vi na wò ŋutɔe?

12 Ƒometadedeagu ƒe ɖoɖoa ɖe vi na ƒewuivi aɖe si ŋkɔe nye Carissa kple eƒe ƒomea. Egblɔ be: “Ne míenɔ anyi ɖekae le dze ɖom la, edzɔa dzi nam. Esia nana mía dome va nɔa kplikplikpli eye nu siwo míewɔna kple dzidzɔ ɖekae la tsia susu me na mí. Fofonye kpɔa egbɔ be Ƒometadedeagua medana ƒuna o. Ale si Ƒometadedeagua nɔa vevie nɛ la dea dzi ƒo na nye hã be mabui nu vevii. Esia wɔe be medea bubu eŋu geɖe wu le esi wònye fofonye eye wòxɔa ŋgɔ le ƒomea ƒe gbɔgbɔmenuhiahiãwo gbɔ kpɔkpɔ me ta.” Nɔvinyɔnu ɖetugbui aɖe si ŋkɔe nye Brittney gblɔ be: “Ƒometadedeagua na mía kple dzinyelawo dome le kplikplikpli. Enana mekpɔnɛ be wodi be yewoanya nye kuxiwo eye be wotsɔ ɖe le eme nam vevie. Ewɔnɛ be ƒomekadodoa me sẽna eye míewɔa ɖeka.” Dzilawo ƒe taɖodzinu vevitɔe nye be woakpe ɖe wo viwo ŋu be woava lɔ̃ Yehowa. Ƒometadedeagua nye mɔ nyui aɖe ŋutɔ si dzi woato awɔ esia. *

FIA MƆ VIWÒWO

13. Aleke woate ŋu akpe ɖe ɖeviwo ŋu be woasubɔ Yehowa?

13 Alẽkplɔla nyui zãa eƒe atikplɔ tsɔ fiaa mɔ eƒe alẽwo hekpɔa wo ta. Eƒe taɖodzinu vevitɔe nye be yeakplɔ yeƒe alẽwo ayi ‘gbeɖuƒe nyuiwo.’ (Eze. 34:13, 14) Ne dzilae nènye la, taɖodzinu ma tɔgbie le wò hã asiwò. Àdi be yeakpe ɖe viwòwo ŋu woasubɔ Yehowa. Wò didie nye be nàkpe ɖe wo ŋu woase le wo ɖokui me abe hakpalaa ene esi wògblɔ be: “Nye Mawu, wò lɔlɔ̃nu wɔwɔ enye nye dzidzɔ, eye wò se la le nye dzi me.” (Ps. 40:9) Ne viwòwo sena le wo ɖokui me alea vavã la, woadi be yewoaɖe adzɔgbe na Yehowa ahaxɔ nyɔnyrɔ. Hafi woate ŋu awɔ nyametsotso vevi sia la, ele be Mawu ŋuti sidzedze vavãtɔ nasu wo si eye wòanye woƒe didi be yewoasubɔ Yehowa.

14, 15. (a) Nu kae wòle be wòanye dzilawo ƒe taɖodzinu? (b) Nu kae ate ŋu ana ƒewuivi aɖe ƒe nuwɔna nadze abe ɖe meka ɖe edzi be nyateƒeae nye esia o?

14 Ate ŋu adze abe viwòwo mele ŋgɔyiyi wɔm le ƒomedodo si le wo kple Yehowa dome la tutu ɖo me o ene. Ðewohĩ woanɔ ɖi kem gɔ̃ hã nenye be Yehowa Ðasefowo ƒe nufiafiawoe nye nyateƒea. Nu kae nàwɔ? Dze agbagba nàɖe susu kple viwòwo eye nàfia wo be woalɔ̃ Yehowa tso dzi me. Kpe ɖe wo ŋu be woakpɔ ŋudzedze ɖe nu siwo katã Mawu wɔ na wo la ŋu. (Nyaɖ. 4:11) Esia awɔe be ne wova su te ko la, woawo ŋutɔwo woate ŋu atso nya me be yewoasubɔ Yehowa.

15 Ne viwòwo meka ɖe edzi be nyateƒeae nye esia o la, dze agbagba nàfia mɔ wo dzigbɔɖitɔe. Kpe ɖe wo ŋu woakpɔe be Yehowa subɔsubɔe nye mɔ nyuitɔ si nu woanɔ agbe ɖo eye viɖe mavɔwo dona tsoa eme. Azɔ hã dze agbagba nànya nu si tututu tae wole ɖi kem ɖo. Le kpɔɖeŋu me, ɖe viwòŋutsuvia melɔ̃ ɖe Biblia ƒe nufiafiawo dzi o loo alo ɖeko wòle vɔvɔ̃m  be yeaɖe gbeƒã na ɖevi bubuwo? Ðe viwònyɔnuvia meka ɖe edzi be Mawu ƒe sewo dzi wɔwɔe nye nu nyuitɔ wòawɔ o loo alo ɖeko wòle vɔvɔ̃m be ye xɔlɔ̃wo aka le ye ŋu yeatsi akogo?

Fia mɔ wo le agbe me (Kpɔ memama 13-18)

16, 17. Mɔ kawo dzie dzilawo ate ŋu ato akpe ɖe wo viwo ŋu be ƒomedodo nava nɔ woawo kple Yehowa dome?

16 Ne viwòwo meka ɖe edzi be nyateƒeae nye esia o la, aleke nàte ŋu akpe ɖe wo ŋu? Dzila geɖewo te ŋu kpe ɖe wo viwo ŋu to nyawo abe esiawo ene biabia wo me: “Ðe wòsesẽna na wò be nànɔ agbe abe Kristotɔ enea? Viɖe kawoe nèsusu be ame kpɔna ne enye Kristotɔ? Nu kawoe wòhiãna be ame natsɔ asa vɔe ɖe Yehowa subɔsubɔ ta? Aleke nèsusu tso viɖe siwo kpɔm míele fifia kple esiwo míava kpɔ le etsɔme ŋu? Ðe viɖeawo sɔ gbɔ wu nu siwo wòhiã be ame natsɔ asa vɔea?” Dze agbagba nàbia nya siawo le wò ŋutɔ wò nyagbewo me le mɔ si aɖee afia be èlɔ̃ wo, ètsɔ ɖe le eme na wo eye èdi vevie be yeakpe ɖe wo ŋu la nu. Mègana woase le wo ɖokui me be èle fɔ bum yewo o. Àte ŋu adzro Marko 10:29, 30 me nyawo me kpli wo. Ðevi aɖewo adi be yewoaŋlɔ viɖeawo ɖe agbalẽ kakɛ aɖe dzi ahaŋlɔ nu siwo wòhiã be ame natsɔ asa vɔe la hã ɖe agbalẽ bubu dzi. Esia ate ŋu akpe ɖe mia kple viwòwo ŋu miade dzesi woƒe kuxiawo ahanya ale si miawɔ akpɔ wo gbɔe. Ne ehiã be míasrɔ̃ Biblia ƒe Nufiafia gbalẽa kpakple “Mawu Ƒe Lɔlɔ̃” gbalẽa kple ɖetsɔlemetɔwo la, ke ɖe mía viwo tɔ ya mele vevie wu oa? Ðe nèle agbalẽ siawo srɔ̃m kpli woa?

17 Ne viwòwo le tsitsim la, ava hiã be woatiae nenye be yewoasubɔ Yehowa. Womatiae be yewoasubɔ Yehowa le esi wò hã nèle esubɔm ta ko o. Ele be ƒomedodo nanɔ woawo ŋutɔwo kple Yehowa dome. (Lod. 3:1, 2) Ke ne ele sesẽm na viwòa be wòate ɖe Mawu ŋu ya ɖe? De dzi ƒo nɛ be wòabia nyawo abe esiawo ene eɖokui atsɔ adzro nu siwo dzi wòxɔ se la me: ‘Aleke mewɔ nya be Mawu li? Aleke mewɔ nya be Yehowa Mawu tsɔ ɖe le eme nam vavã? Ðe meka ɖe edzi le nyateƒe me be Mawu ƒe sewo dzi wɔwɔ aɖe vi nama?’ Dzilawo, miwɔ nu abe alẽkplɔla nyuiwo ene eye miafia mɔ mia viwo dzigbɔɖitɔe. Mikpe ɖe wo ŋu woaka ɖe edzi be Yehowa subɔsubɔe nye mɔ nyuitɔ si nu woanɔ agbe ɖo. *Rom. 12:2.

18. Alekee dzilawo ate ŋu asrɔ̃ Yehowa, Alẽkplɔla Gãtɔ lae?

18 Enye Kristotɔ vavãwo katã ƒe didi be yewoasrɔ̃ Yehowa, si nye Alẽkplɔla Gãtɔ la. (Ef. 5:1; 1 Pet. 2:25) Abe ale si ko wòle be alẽkplɔla nanya eƒe alẽwo ene la, ele vevie ŋutɔ be dzilawo hã nanya wo vi malɔ̃nugbɔawo nyuie. Ele be dzilawo nafia mɔ wo viwo ale be woakpɔ yayra mavɔ siwo ŋugbe Mawu do la. Ɛ̃, dze agbagba ɖe sia ɖe be nàhe viwòwo be woava lɔ̃ Yehowa!

^ mm. 9 Kpɔ Gbetakpɔxɔ, August 1, 2008, axa 10-12, be nàkpɔ aɖaŋuɖoɖo bubuwo ku ɖe esia ŋu.

^ mm. 12 Ne èdi be yeaxlẽ nu geɖe tso nya sia ŋu la, kpɔ nyati si nye “Ƒometadedeagu—Ele Vevie Na Agbetsitsi!” si dze le Gbetakpɔxɔ, October 15, 2009, axa 29-31 la me.

^ mm. 17 Ne èdi be yeaxlẽ nu geɖe tso nya sia ŋu la, kpɔ Gbetakpɔxɔ, February 1, 2012, axa 18-21.