Dzo kpo yi emenuwo dzi

Dzo kpo yi emenuawo dzi

“Mianye Nye Ðasefowo”

“Mianye Nye Ðasefowo”

“[Yesu gblɔ] na wo be: ‘. . . mianye nye ɖasefowo . . . va se ɖe anyigba ƒe seƒe ke.’”DƆW. 1:7, 8.

1, 2. (a) Ame kae nye Yehowa ƒe ɖasefo vevitɔ? (b) Yesu ƒe ŋkɔa gɔme ɖe? Eye aleke Mawu ƒe Vi la nɔ agbe wòsɔ ɖe eƒe ŋkɔa nu?

ESI Roma nutomefia Pontio Pilato si nɔ Yudea dzi ɖum la nɔ ʋɔnu drɔ̃m Yesu Kristo la, Yesu gblɔ nɛ dzinɔameƒotɔe be: “Nu si tae wodzim ɖo, si tae meva xexea me ɖo ye nye esi: be maɖi ɖase na nyateƒe la.” (Mixlẽ Yohanes 18:33-37.) Yesu ʋu eme do ŋgɔ be fiae yenye. Le ƒe aɖewo megbe la, apostolo Paulo he susu yi dzinɔameƒo ƒe kpɔɖeŋu sia si Yesu, “ame si ɖi ɖase nyuie le dutoƒo le Pontio Pilato gbɔ,” ɖo la dzi. (1 Tim. 6:13) Míele Satana ƒe xexe si me fuléle xɔ aƒe ɖo me. Eya ta ehiãna be dzi nanɔ mía ƒo abe Yesu, ame si nye ‘ɖasefo nuteƒewɔla kple nyateƒetɔ’ la ene hafi míate ŋu awɔ ɖaseɖiɖidɔa.Nyaɖ. 3:14.

2 Esi wònye Yuda dukɔa mee wodzi Yesu ɖo ta la, enye Yehowa ƒe ɖasefo tso keke edziɣi ke. (Yes. 43:10) Vavãe, eyae nye ɖasefo vevitɔ kekeake si ɖi ɖase tso Mawu ƒe ŋkɔ ŋu. Yesu nɔ agbe wòsɔ ɖe gɔmesese si le ŋkɔ si Mawu ŋutɔ nɛ ŋu la nu. Mawudɔla aɖe gblɔ na Yosef, si nye Yesu fofo si xɔe nyi la be, fu si Maria fɔ la, gbɔgbɔ kɔkɔe la mee wòtso, eye wògblɔ kpee be, Maria “adzi ŋutsuvi, eye nàyɔ eŋkɔ be Yesu, elabena aɖe eƒe dukɔ tso eƒe nu vɔ̃wo me.” (Mat. 1:20, 21) Biblia ŋuti nunyala akpa gãtɔ lɔ̃ ɖe edzi be ŋkɔ Yesu sɔ kple Hebrigbe me ŋkɔ Yesua alo Yosua, si gɔmee nye “Yehowa  Nye Xɔname,” eye Mawu ƒe ŋkɔ si wotso kpuie dze le eme. Yesu wɔ nu wòsɔ ɖe gɔmesese si le eƒe ŋkɔa ŋu nu esi wòkpe ɖe “Israel ƒe aƒe me alẽ siwo bu” la ŋu be woatrɔ dzi me tso woƒe nu vɔ̃wo me ale be woƒe nu nadze Yehowa ŋu. (Mat. 10:6; 15:24; Luka 19:10) Be Yesu naɖo taɖodzinu sia gbɔ la, eɖe gbeƒã Mawu Fiaɖuƒe la dzonɔamemetɔe. Nya Nyui ŋlɔla Marko gblɔ be: “Yesu yi Galilea henɔ gbeƒã ɖem Mawu ƒe nya nyui la, eye wònɔ gbɔgblɔm be: ‘Ɣeyiɣi ɖoɖi la de, eye Mawu fiaɖuƒe la gogo. Mitrɔ dzi me, eye mixɔ nya nyui la dzi se.’” (Marko 1:14, 15) Gakpe ɖe eŋu la, dzi nɔ Yesu ƒo wòbu fɔ Yuda subɔsubɔhakplɔlawo, eye esia hã nye susu siwo ta wowui ɖo la dometɔ ɖeka.Marko 11:17, 18; 15:1-15.

“MAWU ƑE NU DZƆTSUWO”

3. Esi Yesu ku la, nu kae dzɔ le ŋkeke etɔ̃agbe?

3 Gake nukutɔe la, Yehowa fɔ Yesu si wowu ŋutasesẽtɔe la ɖe tsitre le ŋkeke etɔ̃agbe. Megbɔ agbee le ŋutilã me o ke boŋ le gbɔgbɔ me, eye magaku akpɔ o. (1 Pet. 3:18) Aƒetɔ Yesu do amegbetɔŋutilã heɖe eɖokui fia be yeaɖo kpe edzi na amewo be wogbɔ agbe ye. Le ŋkeke gbãtɔ si dzi wofɔe ɖe tsitre la, eɖe eɖokui fia zi atɔ̃ ya teti eye nusrɔ̃la vovovowo kpɔe.Mat. 28:8-10; Luka 24:13-16, 30-36; Yoh. 20:11-18.

4. Kpekpe tɔxɛ kae Yesu wɔ le eƒe tsitretsitsi megbe, eye dɔ kae wògblɔ be yeƒe nusrɔ̃lawo awɔ?

4 Le zi atɔ̃lia si Yesu ɖe eɖokui fia gome la, eƒe apostolowo kple nusrɔ̃la bubuwoe ƒo ƒu. Le ɣeyiɣi ɖedzesi ma dzi la, “eʋu woƒe susu nyuie, bene woase Ŋɔŋlɔawo gɔme.” Esia na wova se egɔme be Ŋɔŋlɔawo gblɔ ale si Mawu ƒe futɔwo wu Yesu kple ale si wofɔe ɖe tsitre nukutɔe la ŋu nya ɖi. Le kpekpe tɔxɛ ma si Yesu wɔ le eƒe tsitretsitsia megbe me la, egblɔ dɔ si wòle be eƒe nusrɔ̃lawo nawɔ la na wo eme kɔ nyuie. Egblɔ na wo be, ‘le yeƒe ŋkɔ dzi la, woaɖe gbeƒã dzimetɔtrɔ hena nu vɔ̃wo ƒe tsɔtsɔke le dukɔwo katã me, woadze egɔme tso Yerusalem.’ Eye wògblɔ kpee be: ‘Mianye ɖaseɖilawo le nu siawo ŋuti.’Luka 24:44-48.

5, 6. (a) Nu ka tae Yesu gblɔ be, “Mianye nye ɖasefowo”? (b) Nu yeye ka ŋue Yesu ƒe nusrɔ̃lawo aɖi ɖase tsoe?

5 Eya ta le ŋkeke 40 megbe esi Yesu ɖe eɖokui fia zi mamlɛtɔ la, ɖikeke mele eme o be apostoloawo se eƒe sedede sia si me kɔ nyuie la gɔme, esi wògblɔ be: “Mianye nye ɖasefowo le Yerusalem kple Yudea blibo la katã kple Samaria, eye va se ɖe anyigba ƒe seƒe ke.” (Dɔw. 1:8) Nu ka tae Yesu gblɔ be, “Mianye nye ɖasefowo” ke menye Yehowa ƒe ɖasefowo o? Yesu ate ŋu agblɔe hafi, gake esi wònye be ame siwo wònɔ nu ƒom na la nye Israel viwo heganye Yehowa ƒe ɖasefowo xoxo ta la, nya ma megahiã o.

Mí Yesu ƒe nusrɔ̃lawo míenana amewo nyaa nu siwo ŋugbe Yehowa do (Kpɔ memama 5, 6)

6 Azɔ la, ele be Yesu ƒe nusrɔ̃lawo nana amewo nanya be Yesu dzie Yehowa ato aɖe amegbetɔƒomea. Esia nye ɖeɖedɔ si de ŋgɔ kura wu Israel viwo ɖeɖe tso kluvinyenye me le Egipte kple wo ɖeɖe tso aboyome le Babilon. Yesu Kristo ƒe ku kple tsitretsitsi ʋu mɔ na mí be míakpɔ ɖeɖe tso kluvinyenye vɔ̃ɖitɔ kekeake, si nye nu vɔ̃ kple ku ƒe kluvinyenye me. Le ƒe 33 M.Ŋ. ƒe Pentekoste dzi la, Yesu ƒe nusrɔ̃la siwo wotsɔ gbɔgbɔ si ami na gbe ma gbe la, ƒo nu tso “Mawu ƒe nu dzɔtsuwo” ŋu, eye ame siwo see la dometɔ geɖe trɔ dzi me hexɔ Yesu dzi se. Eya ta Yesu si le Fofoa ƒe ɖusime le dziƒo la nɔ ale si Yehowa le ame akpe geɖewo xɔm ɖe agbe to eyama dzi la teƒe kpɔm.Dɔw. 2:5, 11, 37-41.

 “TAFE ÐE AME GEÐEWO TA”

7. Nu ka dzie nu siwo dzɔ le ƒe 33 M.Ŋ. ƒe Pentekoste dzi la ɖo kpee?

7 Nu siwo dzɔ le ƒe 33 M.Ŋ. ƒe Pentekoste dzi la ɖo kpe edzi be Yehowa xɔ Yesu ƒe vɔsa deblibo la be wòanye avuléle si sɔ ɖe nu vɔ̃wo ta. (Heb. 9:11, 12, 24) Yesu ɖe eme be, menye ɖe yeva “be woasubɔ ye o, ke boŋ be yeasubɔ, eye yeatsɔ yeƒe luʋɔ [alo, agbe] ana wòanye tafe ɖe ame geɖewo ta.” (Mat. 20:28) ‘Ame geɖe’ siwo Yesu ƒe vɔsaa aɖe vi na la mese ɖe Yudatɔ siwo trɔ dzi me la ko dzi o. Ke boŋ Mawu ƒe lɔlɔ̃nue nye be “woaɖe ame ƒomeviwo katã,” elabena tafe la ɖea “xexea ƒe nu vɔ̃” ɖa.1 Tim. 2:4-6; Yoh. 1:29.

8. Afi kae Yesu ƒe nusrɔ̃lawo gblɔ nya nyuia se ɖo, eye nu kae na wote ŋu wɔ dɔ sia?

8 Ðe dzi nɔ Yesu ƒe nusrɔ̃la gbãtɔ mawo ƒo woyi edzi ɖi ɖase tso eŋua? Ɛ̃, gake womewɔe le woawo ŋutɔ ƒe ŋusẽ me o. Yehowa ƒe gbɔgbɔ kɔkɔe sẽŋua ye ʋã wo hedo ŋusẽ wo woyi ɖaseɖiɖidɔa dzi. (Mixlẽ Dɔwɔwɔwo 5:30-32.) Anɔ abe ƒe 27 ene le ƒe 33 M.Ŋ. ƒe Pentekoste megbe la, Yesu ƒe nusrɔ̃lawo gblɔ “nya nyui la ŋuti nyateƒea” na “nuwɔwɔ siwo katã le dziƒoa te,” ame siwo nye Yudatɔwo kple ame siwo menye Yudatɔwo o siaa.Kol. 1:5, 23.

9. Abe ale si wogblɔe ɖi ene la, nu kae va dzɔ ɖe Kristo hame gbãtɔa dzi?

9 Gake nublanuitɔe la, esi ɣeyiɣiawo va nɔ yiyim la, Kristotɔ aɖewo va nɔ alakpanuwo fiam, eye esia gblẽ nu le Kristo hame gbãtɔa ŋu. (Dɔw. 20:29, 30; 2 Pet. 2:2, 3; Yuda 3, 4) Abe ale si Yesu gblɔe ɖi ene la, xɔsegbegbe si Satana, si nye “vɔ̃ɖitɔ la,” le megbe na la adzi ɖe edzi ahatsyɔ Kristotɔnyenye vavãtɔ dzi va se ɖe “nuɖoanyia ƒe nuwuɣi.” (Mat. 13:37-43) Le nuwuɣia la, Yehowa aɖo Yesu amegbetɔƒomea ƒe Fia. Esia dzɔ le October 1914 me, eye Satana ƒe xexe vɔ̃ɖia ƒe “ŋkeke mamlɛawo” dze egɔme.2 Tim. 3:1.

10. (a) Ƒe ɖedzesi ka ŋue Kristotɔ amesiaminawo nɔ gbeƒã ɖem tsoe? (b) Nu kae dzɔ le October 1914 me, eye aleke míewɔ nya?

10 Ƒe geɖe do ŋgɔ na October 1914 la, Kristotɔ amesiamina siwo nɔ anyi la nɔ gbeƒã ɖem be Mawu Fiaɖuƒea adze dziɖuɖu gɔme tso ɣemaɣi. Daniel ƒe nyagblɔɖi si ku ɖe ati gã si wolã be “azã  adre” nava yi hafi wòagadzè la dzie wotu woƒe numeɖeɖea ɖo. (Dan. 4:13) Yesu yɔ ɣeyiɣi ƒe didime ma ke be “dukɔwo ƒe ɣeyiɣi ɖoɖiawo” le eƒe nyagblɔɖi si ku ɖe eƒe anyinɔɣi kple “nuɖoanyi sia ƒe nuwuɣi” ŋu la me. Tso ƒe ɖedzesi si nye ƒe 1914 me la, Kristo ƒe “anyinɔnɔ” abe anyigba ƒe Fia yeye ene “ƒe dzesi” la dze kɔtɛ na amewo katã. (Mat. 24:3, 7, 14; Luka 21:24) Tso ɣemaɣi la, ‘Mawu ƒe nu dzɔtsu’ siwo ŋu míele nu ƒom tsoe la ƒe akpa aɖe va nye be, Yehowa ɖo Yesu Fiae ɖe amegbetɔƒomea dzi.

11, 12. (a) Nu kae dzɔ tso ƒe 1919 me? (b) Nu kae va dze ƒãa tso ƒe 1935 me? (Kpɔ nɔnɔmetata si le nyati sia ƒe gɔmedzedze.)

11 Esi Yesu Kristo zu Fia le ƒe 1914 me la, edze eyomedzela amesiaminawo ɖeɖe tso “Babilon Gã” la ƒe kluvinyenye me gɔme. (Nyaɖ. 18:2, 4) Le Xexemeʋa I megbe teti le ƒe 1919 me la, ablɔɖe su amesiaminawo si geɖe wu be woaɖi ɖase tso ɖoɖo si Mawu wɔ na amegbetɔƒomea ƒe ɖeɖekpɔkpɔ kple Fiaɖuƒe si woɖo anyi la ŋuti nya nyuia ŋu. Wowɔ mɔnukpɔkpɔa ŋu dɔ tsɔ ɖi ɖase na amewo, eye esia na woƒo amesiamina akpe geɖe nu ƒu be woava zu Kristo ƒe hatidziɖulawo.

12 Tso ƒe 1935 me la, eva dze ƒãa be Kristo dze eƒe ‘alẽ bubu’ miliɔn geɖe siwo ava nye “ameha gã” si tso dukɔ sia dukɔ me la nu ƒoƒoƒu gɔme. Ameha gã sia wɔ ɖeka kple Kristotɔ amesiaminawo eye wole dzinɔameƒo ƒe kpɔɖeŋu si Yesu ɖo la srɔ̃m hele eme ʋum le dutoƒo be Mawu kple Kristo gbɔe yewoƒe xɔname tso. Ne wodo dzi le ɖaseɖiɖidɔa me heyi edzi xɔ Kristo ƒe tafevɔsaa dzi se la, mɔnukpɔkpɔ asu wo si be woatsi agbe le “xaxa gã” si ahe Satana ƒe xexea va nuwuwui la me.Yoh. 10:16; Nyaɖ. 7:9, 10, 14.

‘DZI NENƆ ƑOWÒ NÀGBLƆ MAWU ƑE NYA NYUI LA’

13. Nu kae wòle be mí Yehowa Ðasefowo míaɖoe kplikpaa awɔ, eye nu kae akpe ɖe mía ŋu míakpɔ dzidzedze?

13 Mɔnukpɔkpɔ gã aɖee wònye na mí be míenye “nu dzɔtsu” siwo Yehowa Mawu wɔ kple nu siwo ŋugbe wòdo be yeava wɔ le etsɔme la ŋuti ɖaseɖilawo. Nyateƒee wònye be ɖaseɖiɖidɔ sia wɔwɔ menɔa bɔbɔe ɣesiaɣi o. Mía nɔvi geɖe ɖea gbeƒã le anyigbamama siwo me wodoa go ɖekematsɔleme, fewuɖuɖu alo yometiti sesẽwo le. Míate ŋu asrɔ̃ kpɔɖeŋu si apostolo Paulo kple eƒe zɔhɛwo ɖo ɖi. Paulo gblɔ be: ‘Dzi ɖo mía ƒo to mía Mawu ƒe kpekpeɖeŋu me be míagblɔ Mawu ƒe nya nyui la na mi le tsitretsiɖeŋu geɖe me.’ (1 Tes. 2:2) Eya ta negadzɔ gbeɖe be míana ta o. Ke boŋ mina míaɖoe kplikpaa be míanɔ agbe ɖe míaƒe adzɔgbeɖeɖe na Mawu nu va se ɖe  esime Satana ƒe xexea tsrɔ̃ gbidigbidi. (Yes. 6:11) Gake míate ŋu awɔ esia le míawo ŋutɔ ƒe ŋusẽ me o. Eya ta abe Kristotɔ gbãtɔwo ene la, mina míado gbe ɖa abia Yehowa be wòana “ŋusẽ si gbɔ dzɔdzɔmetɔ ŋu” la mí to eƒe gbɔgbɔa dzi.Mixlẽ 2 Korintotɔwo 4:1, 7; Luka 11:13.

14, 15. (a) Aleke wowɔ nu ɖe Kristotɔwo ŋu le ƒe alafa gbãtɔ Mía Ŋɔli me, eye nya kae apostolo Petro gblɔ tsɔ de dzi ƒo na wo? (b) Aleke wòle be míase le mía ɖokui me ne wole mía yome tim le Yehowa ƒe Ðasefo nyenye ta?

14 Egbea ame miliɔn geɖe gblɔna be Kristotɔwoe yewonye, ‘gake wotoa woƒe nuwɔnawo dzi gbea nu le [Mawu] gbɔ, elabena wonye ame nyɔŋuwo kple tosẽlawo, eye womedze na dɔ nyui aɖeke wɔwɔ o.’ (Tito 1:16) Ele be míaɖo ŋku edzi be le ƒe alafa gbãtɔ me la, ame geɖe alo ame akpa gãtɔ lé fu Kristotɔ vavãwo. Ema tae apostolo Petro gblɔ be: “Ne wole vlo dom mi le Kristo ta la, miekpɔa dzidzɔ, elabena . . . Mawu ƒe gbɔgbɔ la, nɔa mia dzi.”1 Pet. 4:14.

15 Ðe amewo doa vlo Yehowa Ðasefowo hã egbea le Kristo ta? Ɛ̃, elabena menye Yehowa ŋu koe míeɖia ɖase le o, ke míeɖia ɖase tso Yesu hã ŋu heɖea gbeƒãe be eyae nye Mawu Fiaɖuƒea ƒe Fia. Woti Yesu hã yome le esi wònye Yehowa ƒe ɖasefo ta. Egblɔ na eƒe tsitretsiɖeŋulawo be: “Meva le Fofonye ƒe ŋkɔ me, gake miexɔm o.” (Yoh. 5:43) Eya ta ne amewo tsi tre ɖe ŋuwò le gbeƒãɖeɖedɔa me la, wò ya lé dzi ɖe ƒo. Tsitretsiɖeŋu mawo nye kpeɖodzi be Mawu kpɔa ŋudzedze ɖe ŋuwò eye be ‘eƒe gbɔgbɔa le dziwò.’

16, 17. (a) Nu ka teƒe kpɔm Yehowa ƒe amewo le le xexea ƒe akpa geɖewo? (b) Nu kae nèɖo kplikpaa be yeawɔ?

16 Gake ɖo ŋku edzi be Ðasefowo le dzidzim ɖe edzi le xexea ƒe akpa geɖewo. Le anyigbamama siwo me míewɔa dɔ le edziedzi gɔ̃ hã me la, míegakpɔa ame siwo lɔ̃ be yewoaɖo to mí, siwo míate ŋu agblɔ xɔxɔgbedeasi wɔnukua na. Eya ta mina míado vevie nu atrɔ ayi ɖetsɔlemetɔwo gbɔ eye ne wolɔ̃ la, míasrɔ̃ Biblia kpli wo ahakpe ɖe wo ŋu woayi ŋgɔ aɖe adzɔgbe axɔ nyɔnyrɔ. Ðewohĩ èsena le ɖokuiwò me abe nɔvinyɔnu aɖe si le South Africa si ŋkɔe nye Sarie, si le ɖaseɖiɖidɔa wɔm dzonɔamemetɔe ƒe 60 kple edzivɔe nye esia la ene. Egblɔ be: “Medaa akpe geɖe be to Yesu ƒe vɔsaa dzi la, ƒomedodo nyui va le nye kple Yehowa, xexea me katã ƒe Dziɖulagã la dome, eye edzɔa dzi nam be maɖe gbeƒã eƒe ŋkɔ kɔkɔe la.” Nɔvinyɔnu sia kple srɔ̃a Martinus wokpe ɖe ame geɖe, siwo dome wo vi etɔ̃awo hã le, ŋu be wova zu Yehowa subɔlawo. Sarie gblɔ kpee be: “Dɔ bubu aɖeke megali si nana nye dzi dzea eme alea gbegbe o, eye Yehowa toa eƒe gbɔgbɔ kɔkɔea dzi doa ŋusẽ mí katã be míayi agbeɖeɖedɔ vevi sia dzi.”

17 Míeɖanye Kristotɔ xɔnyɔnyrɔwo alo fifia hafi míele afɔɖeɖea wɔm o, ele be mí katã míada akpe ɖe mɔnukpɔkpɔ gã si su mía si be míele ha dem kple Yehowa Ðasefowo ƒe xexea me katã ƒe hamea ta. Eya ta yi edzi nàɖi ɖase tsitotsito esi nèle agbagba ɖe sia ɖe dzem be yeadzra ye ɖokui ɖo ɖimaƒomaƒoe tso Satana ƒe xexe makɔmakɔ sia me. Esia wɔwɔ ana nàhe ŋutikɔkɔe avɛ na mía Fofo lɔ̃ame si le dziƒo, ame si ƒe ŋkɔ kɔkɔea le mía ŋu.