Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  June 2014

‘Lɔ̃ Hawòvi Abe Wò Ŋutɔ Ðokuiwò Ene’

‘Lɔ̃ Hawòvi Abe Wò Ŋutɔ Ðokuiwò Ene’

‘Se eveliae nye esi: “Ele be nàlɔ̃ hawòvi abe wò ŋutɔ ɖokuiwò ene.”’MAT. 22:39.

1, 2. (a) Nu kae Yesu gblɔ be eyae nye sedede gãtɔ evelia le Se la me? (b) Biabia kawo mee míadzro fifia?

ESI Farisitɔ aɖe di be yeado Yesu kpɔ gbe ɖeka la, ebiae be: “Nufiala, sedede kae nye gãtɔ le Se la me?” Abe ale si míekpɔe le nyati si do ŋgɔ me ene la, Yesu ɖo eŋu nɛ be “sedede gãtɔ kple gbãtɔ” lae nye: “Ele be nàlɔ̃ Yehowa wò Mawu kple wò dzi blibo kple wò luʋɔ blibo kple wò tamesusu blibo.” Yesu gblɔ kpee be: “Evelia, si ɖii, lae nye esi: ‘Ele be nàlɔ̃ hawòvi abe wò ŋutɔ ɖokuiwò ene.’”Mat. 22:34-39.

2 Yesu gblɔ be míalɔ̃ mía havi abe mía ɖokui ene. Eya ta anyo be míabia be: Ame ka tututue nye mía havi? Aleke míaɖe havilɔlɔ̃ afia?

AME KA TUTUTUE NYE MÍA HAVI?

3, 4. (a) Kpɔɖeŋu kae Yesu wɔ esi ŋutsu aɖe biae be, “Ame ka tututue nye hanyevi?” (b) Aleke Samariatɔ la kpe ɖe ŋutsu si dze adzodalawo si me ŋu? (Kpɔ nɔnɔmetata si le nyati sia tame.)

3 Ðewohĩ míagblɔ be mía havie nye aƒelika aɖe si nye mía xɔlɔ̃ si kpena ɖe mía ŋu. (Lod. 27:10) Gake bu nya si Yesu gblɔ esime ŋutsu aɖe si bua eɖokui ame dzɔdzɔe la biae be, “Ame ka tututue nye hanyevi?” la ŋu kpɔ. Yesu gblɔ  Samariatɔ havilɔ̃laa ƒe kpɔɖeŋua tsɔ ɖo eŋu nɛ. (Mixlẽ Luka 10:29-37.) Ðewohĩ míanɔ mɔ kpɔm be nunɔla kple Lewitɔ siwo nye Israel viwo la nanye havi nyui esi wova ke ɖe ŋutsu si dze adzodalawo si me, eye woƒoe hegblẽe ɖi wòku afã kple afã ŋu hafi. Gake wodze to eŋu eye womekpe ɖe eŋu o. Samariatɔ aɖe boŋue kpe ɖe ŋutsua ŋu, evɔ Yudatɔwo lé fu Samariatɔwo, togbɔ be Samariatɔwo dea bubu Mose ƒe Sea ŋu hã.Yoh. 4:9.

4 Samariatɔ havilɔ̃laa kɔ ami kple wain ɖe ŋutsua ƒe abiwo me be abiawo naku kaba. Eyome ekɔ ŋutsua ɖe eƒe tedzi dzi yi amedzrodzeƒe eye wògblẽ denario eve, si nye ŋkeke eve ƒe fetu, ɖi be woatsɔ akpɔ edzi. (Mat. 20:2) Eya ta ele bɔbɔe be míakpɔ ame si ɖee fia be yenye ŋutsu si woda adzoe la havi vavã. Kakaɖedzitɔe la, míesrɔ̃ ale si wòle be míase veve ɖe mía haviwo ti ahalɔ̃ wo la tso Yesu ƒe kpɔɖeŋu sia me.

Yehowa subɔlawo tsona kaba ɖea havilɔlɔ̃ fiana (Kpɔ memama 5)

5. Aleke Yehowa subɔlawo ɖe havilɔlɔ̃ fia le dzɔdzɔmefɔku aɖe si dzɔ nyitsɔ laa me?

5 Mele bɔbɔe be míakpɔ veveseɖeamenulawo abe Samariatɔ havilɔ̃laa ene o. Vevietɔ le ‘ŋkeke mamlɛ’ sesẽ siawo siwo me ame akpa gãtɔ melɔ̃a ame ƒe nya o, wonye ame wɔadãwo, eye womelɔ̃a nu nyui o la me. (2 Tim. 3:1-3) Le kpɔɖeŋu me, nuwo sesẽna ne dzɔdzɔmefɔku aɖe dzɔ. Bu nu si dzɔ esi ahom sesẽ si woyɔ be Sandy gblẽ nu le New York City le October 2012 ƒe nuwuwu la ŋu kpɔ. Le dugã la ƒe akpa aɖe si nuwo dome gblẽ le vevie eye elektrik-kaɖi kple nuhiahiã bubuwo ƒe anyimanɔmanɔ na amewo le fu kpem me la, ame aɖewo hã va nɔ fukpelawo ƒe nuwo fim. Gake le nuto ma ke me la, Yehowa Ðasefowo wɔ ɖoɖo henɔ kpekpem ɖe wo nɔviwo kple ame bubuwo siaa ŋu le esi Kristotɔ vavãwo lɔ̃a wo haviwo ta. Mɔ bubu kawo hã dzie míato aɖee afia be míelɔ̃ mía haviwo?

ALE SI MÍAÐE HAVILƆLƆ̃ AFIA

6. Aleke gbeƒãɖeɖedɔa do ƒome kple havilɔlɔ̃e?

6 Zã Biblia nàtsɔ akpe ɖe amewo ŋu. Míewɔa esia ne míekpe ɖe wo ŋu be “akɔfafa si míekpɔna le Ŋɔŋlɔawo me” la su wo si. (Rom. 15:4) Ðikeke mele eme o be Biblia me nyateƒea gbɔgblɔ na mía haviwo ɖenɛ fiana be míelɔ̃ wo. (Mat. 24:14) Mɔnukpɔkpɔ gã kae nye esi wònye be míagblɔ Fiaɖuƒegbedeasi si tso “Mawu si naa mɔkpɔkpɔ la” gbɔ na amewo!Rom. 15:13.

7. Nu kae nye Sikasedede la, eye aleke Mawu yraa mí ne míewɔ ɖe edzi?

7 Wɔ ɖe Sikasededea dzi. Yesu ye de se sia esi wògblɔ le eƒe Todzimawunya la me be: “Nu sia nu si miedina be amewo nawɔ na mi la, ele be miawo hã miawɔ nenema ke na wo; le nyateƒe me la, nu siae Se la kple Nyagblɔɖilawo ƒe nyawo fia.” (Mat. 7:12) Ne míewɔa nu ɖe amewo ŋu abe ale si Yesu xlɔ̃ nu mí ene la, ekema míele gɔmeɖose si le megbe na “Se la” (Mose Ƒe Agbalẽ Gbãtɔ va se ɖe Atɔ̃lia) kple “Nyagblɔɖilawo” (nyagblɔɖigbalẽ siwo le Hebri Ŋɔŋlɔawo me) la dzi wɔm. Nuŋlɔɖi mawo ɖee fia eme kɔ nyuie be Mawu yraa ame siwo lɔ̃a wo haviwo. Le kpɔɖeŋu me, Yehowa gblɔ to Yesaya dzi be: “Midzra ɖoɖo la ɖo, eye miwɔ nu dzɔdzɔe. . . . Woayra amegbetɔ, si wɔa alea.” (Yes. 56:1, 2) Ɛ̃, Mawu yraa mí le esi míelɔ̃ mía haviwo eye míewɔa nu madzɔmadzɔ ɖe wo ŋu o ta.

8. Nu ka tae wòle be míalɔ̃ míaƒe futɔwo, eye nu kae ate ŋu ado tso eme?

8 Lɔ̃ wò futɔwo. Yesu gblɔ be: “Miese be wogblɔ be, ‘Ele be nàlɔ̃ hawòvi, eye nàlé fu wò ketɔ.’ Ke nye ya mele egblɔm na mi be: Miyi edzi mialɔ̃ miaƒe futɔwo, eye mianɔ gbe dom ɖa ɖe ame siwo  tia mia yome la ta; bene miaɖee afia be mienye mia Fofo si le dziƒowo la ƒe viwo.” (Mat. 5:43-45) Apostolo Paulo hã ɖe susu sia ke gblɔ esi wòŋlɔ bena: ‘Ne dɔ le wò futɔ wum la, na nui wòaɖu; ne tsikɔ le ewum la, na tsii wòano.’ (Rom. 12:20; Lod. 25:21) Mose ƒe Sea gblɔ be, ne ame aɖe kpɔ be agba wu tsɔtsɔ na eƒe futɔ ƒe tedzi wòdze anyi la, ele be wòakpe ɖe eŋu woatu agbaa le tedzia dzi. (2 Mose 23:5) Ne ame siwo nye futɔwo tsã wɔ dɔ aduadu alea la, woate ŋu ava zu xɔlɔ̃ veviwo. Ne mí Kristotɔwo míeɖe lɔlɔ̃ fia ame siwo lé fu mí—ame siwo tia mía yome kutɔkutɔe gɔ̃ hã—la, wo dometɔ geɖe ƒe nɔnɔme ate ŋu atrɔ. Aleke gbegbe míakpɔ dzidzɔe nye esi ne ame siawo dometɔ aɖewo va xɔ nyateƒea!

9. Nya kae Yesu gblɔ ku ɖe ŋutifafawɔwɔ kple mía nɔviwo ŋu?

9 ‘Nɔ ŋutifafa me kple amewo katã.’ (Heb. 12:14) Le nyateƒe me la, mía nɔviwo hã le eme, elabena Yesu gblɔ be: “Ne ètsɔ wò nunana gbɔna vɔsamlekpuia gbɔ, eye nèɖo ŋku edzi le afi ma be nya aɖe le nɔviwò si ɖe ŋuwò la, ekema gblẽ wò nunana la ɖe afi ma le vɔsamlekpuia ŋgɔ, eye dzo nàyi; wɔ ŋutifafa kple nɔviwòa gbã, eye emegbe ne ètrɔ gbɔ la, nàtsɔ wò nunana la ana.” (Mat. 5:23, 24) Ne míelɔ̃a mía nɔviwo eye míedzraa mía kpli wo dome ɖo kaba la, Mawu ayra mí.

10. Nu ka tae mele be míanɔ vodada dim le amewo ŋu o?

10 Mèganɔ vodada dim le ame ŋu o. Yesu gblɔ be: “Midzudzɔ ʋɔnudɔdrɔ̃, ne woagadrɔ̃ ʋɔnu mi o; elabena ʋɔnu si drɔ̃m miele la kee woatsɔ adrɔ̃ ʋɔnu mi; eye dzidzenu si mietsɔ le nu dzidzem la kee woatsɔ adzidzee na mi. Ekema nu ka tae nèkpɔa ati fefee si le nɔviwò ƒe ŋku dzi, gake mèbua atikpo si le wò ŋutɔ wò ŋku dzi ya ŋu o? Alo aleke wɔ nàgblɔ na nɔviwò be, ‘Na maɖe ati fefee la ɖa le ŋku dzi na wò,’ evɔ kpɔ ɖa, atikpo le wò ŋutɔ wò ŋku dzi? Alakpanuwɔla! Ðe atikpo la ɖa le wò ŋutɔ wò ŋku dzi gbã, ekema àte ŋu akpɔ nu nyuie aɖe ati fefee si le nɔviwò ƒe ŋku dzi la.” (Mat. 7:1-5) Nufiame si le emee nye be, míaganɔ nya hem ɖe mía nɔviwo ŋu ɖe woƒe vodada suesuewo ta o, elabena míawo hã míewɔa vodada siwo lolo wu.

 MƆ NYUITƆ SI DZI MÍATO AÐE HAVILƆLƆ̃ AFIA

11, 12. Mɔ nyuitɔ ka dzie míetona ɖea havilɔlɔ̃ fiana?

11 Mɔ nyui geɖewo li siwo dzi míato aɖe lɔlɔ̃ afia mía haviwo. Gake abe Yesu ene la, mɔ nyuitɔ si dzi míato awɔ esiae nye be míaɖe gbeƒã Fiaɖuƒe ŋuti nya nyuia na wo. (Luka 8:1) Yesu de se na eyomedzelawo be woawɔ “dukɔwo katã me tɔwo woanye nusrɔ̃lawo.” (Mat. 28:19, 20) Ne míedoa vevie nu le dɔ sia me la, míakpe ɖe mía haviwo ŋu be woatrɔ le mɔ gbadza si kplɔa ame yia tsɔtsrɔ̃ me dzi ava mɔ xaxɛ si kplɔa ame yia agbe mavɔ me dzi. (Mat. 7:13, 14) Yehowa ayra ɖe míaƒe agbagbadzedzewo dzi godoo.

12 Abe Yesu ene la, míekpena ɖe amewo ŋu be woakpɔe be gbɔgbɔmenuwo hiã yewo. (Mat. 5:3) Míegblɔa “Mawu ƒe nya nyui” la na wo dometɔ siwo lɔ̃ be yewoaɖo to. (Rom. 1:1) Mawu dzraa eya kple ame siwo lɔ̃ xɔ Fiaɖuƒegbedeasia la dome ɖo to Yesu Kristo dzi. (2 Kor. 5:18, 19) Eya ta gbeƒãɖeɖe nya nyuia ye nye mɔ vevitɔ kekeake si dzi míetona ɖea havilɔlɔ̃ fiana.

13. Aleke nèsena le ɖokuiwò me ɖe mɔnukpɔkpɔ si su asiwò be nènye Fiaɖuƒegbeƒãɖela ŋu?

13 Ne míedzrana ɖo nyuie ɖe tɔtrɔyiwo kple aƒeme Biblia nusɔsrɔ̃wo ŋu la, míetea ŋu fiaa nu amewo nyuie be woawɔ ɖe Mawu ƒe nudidi dzɔdzɔewo dzi. Esia ate ŋu ana Biblia nusrɔ̃via nawɔ tɔtrɔ gãwo le eƒe agbenɔnɔ me. (1 Kor. 6:9-11) Edoa dzidzɔ na mí ŋutɔ be míakpɔ ale si Mawu kpena ɖe “ame siwo si dzi ƒe nɔnɔme nyui le hena agbe mavɔ kpɔkpɔ” ŋu be woawɔ tɔtrɔ siwo hiã be woava zu exɔlɔ̃wo. (Dɔw. 13:48) Le ame siawo dometɔ geɖe gome la, dzidzɔ va xɔna ɖe mɔkpɔkpɔbuɖeame teƒe, eye kaka ɖe mía Fofo si le dziƒo dzi va xɔna ɖe dzimaɖitsitsi teƒe. Ðe màlɔ̃ ɖe edzi be mɔnukpɔkpɔ gã aɖee wònye be míato Fiaɖuƒegbeƒãɖeɖedɔa dzi aɖe lɔlɔ̃ afia mía haviwo oa?

NYA SI GBƆGBƆ ƲÃ PAULO WÒGBLƆ TSO LƆLƆ̃ ŊU

14. Gblɔ nya si 1 Korintotɔwo 13:4-8 gblɔ tso lɔlɔ̃ ŋu le wò ŋutɔ wò nyagbewo me.

14 Ne míewɔna ɖe nya siwo Paulo gblɔ tso lɔlɔ̃ ŋu dzi le nuwɔwɔ kple mía haviwo me la, míaƒo asa na kuxi geɖewo, míakpɔ dzidzɔ, eye míaƒe nu adze Mawu ŋu. (Mixlẽ 1 Korintotɔwo 13:4-8.) Mina míadzro Paulo ƒe nya siawo me kpuie, ne míakpɔ ale si míate ŋu awɔ ɖe wo dzi le nuwɔwɔ kple mía haviwo me la ɖa.

15. (a) Nu ka tae wòle be míagbɔ dzi ɖi ahanyo dɔme? (b) Susu kawo tae wòle be míaƒo asa na ŋuʋaʋã kple adegbeƒoƒo?

15 “Lɔlɔ̃ gbɔa dzi blewu, eye wònyoa dɔme.” Ale si ko Mawu gbɔa dzi blewu eye wònyoa dɔme ne ele nu wɔm kple amegbetɔ madeblibowo la, nenema ke wòle be míawo hã míagbɔ dzi ɖi eye míanyo dɔme ne amewo dze agɔ le mía dzi, alo wɔ nu ɖe mía ŋu ameŋumabumabutɔe alo da gbe ɖe mía gbɔ gɔ̃ hã. “Lɔlɔ̃ meʋãa ŋu o,” eya ta ne lɔlɔ̃ vavã le mía si la, míabiã ŋu amewo ƒe nunɔamesiwo alo mɔnukpɔkpɔ siwo su wo si le hamea me o. Gawu la, ne míelɔ̃a ame la, míaƒo adegbe alo ado mía ɖokui ɖe dzi glodzoo o. Elabena “ame vɔ̃ɖiwo ƒe akaɖi enye nu vɔ̃, dadaŋkuwo kple dzi, si vu gblotoo.”Lod. 21:4.

16, 17. Aleke míate ŋu awɔ ɖe nya siwo le 1 Korintotɔwo 13:5, 6 dzi?

16 Lɔlɔ̃ aʋã mí míawɔ nu si sɔ ɖe mía havi ŋu. Míada alakpa nɛ, afii, alo awɔ nu bubu aɖeke si anye dada le Yehowa ƒe se kple gɔmeɖose dzɔdzɔewo dzi o. Lɔlɔ̃ awɔe hã be míagadi míawo ŋutɔwo míaƒe nyonyo ko o, ke míadi ame bubuwo hã ƒe nyonyo.Flp. 2:4.

17 Lɔlɔ̃ vavã mebia dzi kabakaba o, eye ‘meléa vɔ̃ siwo wowɔ ɖe eŋu la  ɖi o.’ Ne ame aɖe da vo ɖe mía ŋu la, mele be míalée ɖi abe ɖe míele vodadaawo ŋlɔm ɖe agbalẽ me ene o. (1 Tes. 5:15) Ne míelé dziku ɖe dɔme la, míaƒe nu madze Mawu ŋu o, eye anɔ abe ɖe míele dzo si ate ŋu agblẽ nu le mía kple ame bubuwo siaa ŋu la tum ɖo ene. (3 Mose 19:18) Lɔlɔ̃ nana míekpɔa dzidzɔ ɖe nyateƒea ŋu, ke menye “ɖe nu madzɔmadzɔ wɔwɔ ŋu o.” Mevivina na mí ne wowɔ nu madzɔmadzɔ ɖe ame si lé fu mí ŋu alo ne ele fu kpem o.Mixlẽ Lododowo 24:17, 18.

18. Nu kae míesrɔ̃ tso lɔlɔ̃ ŋu le 1 Korintotɔwo 13:7, 8?

18 Gakpe kpe ɖe eŋu la, Paulo gblɔ be lɔlɔ̃ ‘nɔa te ɖe nuwo katã nu.’ Ne ame aɖe dze agɔ le mía dzi eye wòbia tsɔtsɔke la, lɔlɔ̃ ʋãa mí míetsɔna kenɛ faa. Lɔlɔ̃ ‘xɔa nuwo katã’—nu siwo katã le Mawu ƒe Nya la me—‘dzi sena.’ Enana míedaa akpe ɖe nufiame siwo míexɔna tso Yehowa ƒe habɔbɔa gbɔ la ta. Lɔlɔ̃ ‘kpɔa mɔ na nuwo katã.’ Enana míekpɔa mɔ na nu siwo katã ŋugbe wodo le Biblia me, eye míegblɔa mɔkpɔkpɔ siawo ŋu nya na ame bubuwo hã. (1 Pet. 3:15) Ne míele nɔnɔme sesẽwo me tom la, míedoa gbe ɖa eye míekpɔa mɔ be nuwo ava nyo godoo. Lɔlɔ̃ ‘doa dzi le nuwo katã me,’ eɖanye nu vɔ̃ siwo amewo wɔ ɖe mía ŋu, yometitiwo, alo dodokpɔ bubuwo o. Gawu la, “lɔlɔ̃ nu metsina gbeɖe o.” Amegbetɔ toɖolawo ayi edzi anɔ lɔlɔ̃ ɖem fia yi ɖe mavɔmavɔ me.

YI EDZI NÀLƆ̃ HAWÒVI ABE WÒ ŊUTƆ ÐOKUIWÒ ENE

19, 20. Ŋɔŋlɔawo me ɖaŋuɖoɖo kae wòle be wòaʋã mí míayi edzi alɔ̃ mía havi?

19 Ne míewɔna ɖe Biblia ƒe aɖaŋuɖoɖowo dzi la, míate ŋu ayi edzi anɔ mía haviwo lɔ̃m. Menye mía detɔwo koe míalɔ̃ alea o, ke míalɔ̃ ame ƒomeviwo katã. Ele be míaɖo ŋku edzi be Yesu gblɔ be: ‘Lɔ̃ hawòvi abe wò ŋutɔ ɖokuiwò ene.’ (Mat. 22:39) Mawu kple Kristo siaa kpɔa mɔ be míawɔ esia. Ne nya aɖe do mo ɖa le mía kple mía havi aɖe dome eye míenya nu si míawɔ o la, mina míado gbe ɖa na Mawu abia eƒe gbɔgbɔ kɔkɔea ƒe mɔfiafia. Ewɔwɔ alea akpe ɖe mía ŋu míaɖe lɔlɔ̃ afia eye Yehowa ayra mí geɖe.Rom. 8:26, 27.

20 Woyɔ se si wode be míalɔ̃ mía havi abe mía ɖokui ene la be “fiasedede.” (Yak. 2:8) Esi Paulo he susu yi Mose ƒe Sea dometɔ aɖewo dzi vɔ la, egblɔ be: “Se bubu ɖe sia ɖe si li la, woƒo wo katã nu ƒu ɖe nya sia me be: ‘Ele be nàlɔ̃ hawòvi abe wò ŋutɔ ɖokuiwò ene.’ Lɔlɔ̃ la mewɔa vɔ̃ ɖe ame havi ŋu o; eya ta lɔlɔ̃e nye se la dzi wɔwɔ.” (Rom. 13:8-10) Nyateƒee, mele be ɖeɖi nate mía ŋu le mía haviwo lɔlɔ̃ me o.

21, 22. Susu kawo tae wòle be míalɔ̃ Mawu kple mía haviwo?

21 Esi míele ŋugble dem le nu si tae wòle be míalɔ̃ mía haviwo ŋu la, anyo be nya si Yesu gblɔ tso Fofoa ŋu be, “enana eƒe ɣe dzena na ame vɔ̃ɖiwo kple ame nyuiwo, eye wònana tsi dzana na ame dzɔdzɔewo kple ame madzɔmadzɔwo” la nanɔ susu me na mí. (Mat. 5:43-45) Ele be míaɖe lɔlɔ̃ afia mía havi, eɖanye ame dzɔdzɔe alo ame madzɔmadzɔ o. Abe ale si míede dzesii ene la, mɔ vevitɔ si dzi míato awɔ esia ye nye be míagblɔ Fiaɖuƒegbedeasia na amewo. Yayra kawo gbegbee nye esi mía haviwo akpɔ ne woxɔ nya nyui la kple dzi faa!

22 Susu geɖewo li siwo tae wòle be míalɔ̃ Yehowa bliboe, atsɔ mía ɖokui katã akee ɖo. Eye mɔ nyui geɖewo li siwo dzi míato aɖe lɔlɔ̃ afia mía haviwo. Ne míelɔ̃ Mawu kple mía haviwo la, ke míele wɔwɔm ɖe sedede gãtɔ eve siwo ŋu Yesu ƒo nu tsoe la dzi. Ƒo wo katã ta la, míaƒe nu adze Yehowa, mía Fofo lɔ̃ame si le dziƒo la ŋu.