Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  April 2014

Edzɔa Dzi Na Wò Be Yehowa Ƒe Ŋku Le Ŋuwòa?

Edzɔa Dzi Na Wò Be Yehowa Ƒe Ŋku Le Ŋuwòa?

“Yehowa ƒe ŋku le vɔ̃ kple nyui ŋu le afiawo katã.”LOD. 15:3.

1, 2. Vovototo kae le ale si Yehowa ƒe ŋku le mía ŋu kple ale si wotsɔa videoɖemɔ̃wo léa ŋku ɖe nuwo ŋu dome?

LE DUKƆ geɖe me la, woda videoɖemɔ̃wo ɖe teƒeteƒewo tsɔ léa ŋku ɖe ʋuwo kple ʋufɔkuwo ŋu le mɔdodowo dzi. Kpovitɔwo tea ŋu zãa video mawo tsɔ léa ʋukula siwo tsɔ ʋu ƒo ame alo lɔ ʋu bubuwo hesi dzo la bɔbɔe. Le nyateƒe me la, esi videoɖemɔ̃ siawo le teƒeteƒewo ta la, ele sesẽm na amewo be woasi le woƒe nuwɔna gbegblẽwo me tsonuwo nu.

2 Kpɔɖeŋu sia ate ŋu ana míaƒe susu nayi mía Fofo lɔ̃ame Yehowa dzi. Biblia gblɔ be eƒe ŋku le “afiawo katã.” (Lod. 15:3) Gake ɖe esia fia be enɔa ŋku lém ɖe nu sia nu si wɔm míele ŋu tsitotsito ɣeawokatãɣia? Ðe Mawu nɔa mía ɖiam be ne míewɔ vodada aɖe ko la, yeahe to na mía? (Yer. 16:17; Heb. 4:13) Gbeɖe! Susu si koŋ tae Yehowa ƒe ŋkuwo le mía ŋue nye be, elɔ̃ mía dometɔ ɖe sia ɖe, eye wòdi be eme nanyo na mí.1 Pet. 3:12.

3. Nu atɔ̃ kawoe ɖo kpe edzi be esi Mawu lɔ̃ mí tae eƒe ŋkuwo le mía ŋu?

3 Nu kae akpe ɖe mía ŋu míase egɔme be esi Mawu lɔ̃ mí tae eƒe ŋkuwo le mía ŋu ɖo? Mina míadzro nu atɔ̃ siwo ɖo kpe esia dzi me. (1) Exlɔ̃a nu mí ne míele afɔ baɖa aɖe ɖeɖe ŋu bum le dzi me. (2) Eɖɔa mí ɖo ne míeɖe afɔ gbegblẽ.  (3) Etsɔa Biblia ƒe gɔmeɖosewo fiaa mɔ mí. (4) Ekpena ɖe mía ŋu ne míedo go dodokpɔ vovovowo. (5) Eɖoa eteƒe na mí ne ekpɔ be míewɔ nu si sɔ.

MAWU LƆ̃AME LA XLƆ̃A NU MÍ

4. Susu ka tae Yehowa xlɔ̃ nu Kain be “nu vɔ̃ de xa ɖe ʋɔtru nu” nɛ?

4 Gbã la, míadzro ale si Mawu xlɔ̃a nu mí ne míele afɔ baɖa aɖe ɖeɖe ŋu bum le dzi me la me. (1 Kron. 28:9) Le kpɔɖeŋu me, bu ale si Mawu wɔ nui esi Kain “bi dzi ŋutɔ” le esi Mawu mekpɔ ŋudzedze ɖe eŋu o ta la ŋu kpɔ. (Mixlẽ 1 Mose 4:3-7.) Yehowa ɖo aɖaŋu na Kain be netrɔ, ‘ne wòawɔ nyui.’ Yehowa xlɔ̃ nui be ne metrɔ o la, “ekema nu vɔ̃ de xa ɖe ʋɔtru nu” nɛ. Eyome Mawu gblɔ nɛ be: “Ke wò la, ɖu edzi!” Edi be Kain nawɔ ɖe nuxlɔ̃amea dzi ne ‘eƒe ŋkume nakɔ,’ alo woakpɔ ŋudzedze ɖe eŋu. Ne Mawu kpɔ ŋudzedze ɖe eŋu la, ekema ƒomedodo nyui ayi edzi anɔ eya kplii dome.

5. Mɔ kawo nue Yehowa xlɔ̃a nu mí ku ɖe dzodzro vɔ̃wo ŋu le?

5 Nenemae wòle le míawo hã gome egbea. Yehowa kpɔa keke míaƒe dzi me ke; míate ŋu aɣla míaƒe tameɖoɖowo kple dzimedidiwo ɖee o. Mía Fofo lɔ̃amea di be míato dzɔdzɔenyenyemɔ dzi, ke hã mezia mía dzi be míatrɔ míaƒe afɔɖeɖewo o. Etoa eƒe Nya Biblia dzi xlɔ̃a nu mí ne míeɖo ta mɔ gbegblẽ dzi. Le mɔ ka nu? Ne míele Biblia xlẽm gbe sia gbe la, míekena ɖe mawunyakpukpui siwo kpena ɖe mía ŋu míeɖua dzodzro vɔ̃wo dzi ŋu zi geɖe. Hekpe ɖe eŋu la, míaƒe agbalẽwo hã kloa nu le dzodzro aɖe si míanya nɔ avu wɔm kplii la dzi eye wofiaa ale si míawɔ aɖu edzii la mí. Eye mí katã míexɔa aɖaŋuɖoɖo siwo sɔ ɖe ɣeyiɣia dzi le hame ƒe kpekpewo me!

6, 7. (a) Nu ka tae míate ŋu agblɔ be nyati siwo wotana na ame miliɔn geɖe nye kpeɖodzi be Mawu lɔ̃ wò? (b) Nu kae nàwɔ be Yehowa ƒe beléname naɖe vi na wò?

6 Nuxlɔ̃ame siawo katã nye kpeɖodzi be Yehowa ƒe ŋku le mía ŋu eye wòlɔ̃ mía dometɔ ɖe sia ɖe. Enye nyateƒe be ƒe alafa geɖee nye esia si woŋlɔ Biblia me nyawo, ame miliɔn geɖewoe Mawu ƒe habɔbɔa taa míaƒe agbalẽwo na, eye hame bliboae nuxlɔ̃ame siwo wonaa mí le kpekpeawo me la yina na. Ke hã, Yehowa le mɔ siawo katã dzi tom be yeahe susu ayi yeƒe Nya la dzi ale be nàte ŋu aɖɔ wò tamesusu ɖo. Eya ta míate ŋu agblɔ be esia ɖo kpe edzi be Yehowa lɔ̃ wò heléa be na wò.

Míaƒe dzitsinya si míetsɔ Biblia na hehee la kpena ɖe mía ŋu míeƒoa asa na nuwɔna gbegblẽwo (Kpɔ memama 6, 7)

7 Hafi Mawu ƒe nuxlɔ̃amewo naɖe vi na mí la, gbã la, ele be míaka ɖe edzi be etsɔa ɖe le eme na mí vavã. Eyome ele be míawɔ ɖe Mawu ƒe Nya la dzi ahadze agbagba aɖe asi le tamesusu ɖe sia ɖe si medzea eŋu o la ŋu. (Mixlẽ Yesaya 55:6, 7.) Ne míewɔna ɖe nuxlɔ̃amewo dzi la, míaƒo asa na dzigbagbã geɖe. Gake ne edzɔ be míaƒe nudzodzrowo he mí de nu gbegblẽ aɖe wɔwɔ me la, kpekpeɖeŋu kae mía Fofo lɔ̃amea nana mí?

MÍA FOFO LƆ̃AMEA ÐƆA MÍ ÐO

8, 9. Aleke ale si Yehowa toa mía nɔviwo dzi ɖɔa mí ɖo la ɖenɛ fiana be etsɔa ɖe le eme na mí? Gblɔ eƒe kpɔɖeŋu.

8 Ale si Yehowa ɖɔa mí ɖo hã nye kpeɖodzi be etsɔa ɖe le eme na mí. (Mixlẽ Hebritɔwo 12:5, 6.) Enye nyateƒe be míebua ɖɔɖɔɖo alo tohehe aɖeke dzidzɔe o. (Heb. 12:11) Ke hã ele be míase nu si tae nɔvi aɖe le mía ɖɔm ɖo la gɔme. Menye ɖe amea di be yeagblɔ nya wòate ɖe mía dzi o, ke boŋ esi wòkpɔe be míaƒe nuwɔnaa ate ŋu agblẽ ƒomedodo si le mía kple Yehowa Mawu dome tae. Mía nɔvia lɔ̃ faa be yeadi ɣeyiɣi ahatsɔ nanewo asa vɔe ale be yeazã Biblia  atsɔ akpe ɖe mía ŋu be míatrɔ ahawɔ nu si adze Mawu ŋu. Eya ta ele be míaxɔ ɖɔɖɔɖoa, eye míagaŋlɔ be gbeɖe o be Yehowa gbɔe wòtso.

9 Mina míadzro kpɔɖeŋu aɖe si ɖe esia fia me. Nɔviŋutsu aɖe dze agbagba ɖe asi le amamaɖeɖenuwɔnawo kpɔkpɔ si zu numame nɛ la ŋu hafi va xɔ nyateƒea. Gake numame xoxoa gakpɔtɔ nɔ bibim le eme abe dzo ene. Esi wòƒle asitelefon yeye aɖe la, nu nyɔŋu mawo kpɔkpɔ ƒe dzodzroa ganyɔ ɖe eme. (Yak. 1:14, 15) Enɔa Internet dzi amamaɖefotowo kpɔm le eƒe fon la dzi. Gbe ɖeka esi eya kple hamemetsitsi aɖe wonɔ ɖase ɖim le telefon dzi la, etsɔ eƒe fon la na hamemetsitsia be wòakpɔ nutoa me tɔ aɖewo ƒe adrɛs le edzi. Esi hamemetsitsia nɔ fon la zãm la, amamaɖeɖenuwɔnawo ɖeƒe aɖe koe dze le edzi zi ɖeka. Hamemetsitsia xlɔ̃ nu nɔviŋutsua enumake, eye esia ɖee tso gbɔgbɔmefɔku me. Ðɔɖɔɖo sia si sɔ ɖe ɣeyiɣi dzi la kpe ɖe nɔviŋutsua ŋu wòɖu numame gbegblẽ ma dzi mlɔeba. Aleke gbegbe míedaa akpe na mía Fofo si le dziƒoe nye esi be ekpɔa míaƒe nu vɔ̃ ɣaɣlawo heɖɔa mí ɖo hafi wòava tsi megbe akpa!

ETSƆA BIBLIA ƑE GƆMEÐOSEWO FIAA MƆ MÍ

10, 11. (a) Aleke míana Mawu nafia mɔ mí? (b) Gblɔ ale si ƒome aɖe wɔ ɖe Yehowa ƒe mɔfiamewo dzi wòɖe vi na wo ƒe kpɔɖeŋu.

10 Hakpalaa gblɔ le ha aɖe si wòdzi na Yehowa me be: “Àkplɔm le wò aɖaŋudede la nu.” (Ps. 73:24) Ɣesiaɣi si míehiã mɔfiame la, anyo be ‘míalé ŋku ɖe Yehowa ŋu.’ Míate ŋu awɔ esia ne míedia eƒe aɖaŋuɖoɖowo le eƒe Nya la me. Biblia ƒe gɔmeɖosewo dzi wɔwɔ ana míayi edzi anɔ ƒomedodo nyui me kple Yehowa, eye esia akpe ɖe mía ŋu míakpɔ míaƒe ŋutilãmenuhiahiãwo hã gbɔ.Lod. 3:6.

11 Le kpɔɖeŋu me, nɔviŋutsu aɖe si le Philippines ƒe tonuto aɖe me kple eƒe ƒome gã la haya anyigba nɔ agble dem le edzi. Nɔviŋutsua kple srɔ̃a siaa nye gbesiagbe mɔɖelawo. Gbe ɖeka la, ewɔ moya na wo ŋutɔ esi anyigbatɔa na agbalẽ wo be yele wo nyam le anyigbaa dzi. Nu ka tae? Amewo da alakpa ɖe wo si be womele anukware ɖim o. Togbɔ be nɔviŋutsua tsi dzi eye menya afi si eya kple eƒe ƒomea aʋu aɖanɔ o hã la, egblɔ be: “Yehowa magblẽ mí ɖi o. Ekpɔa míaƒe nuhiahiãwo gbɔ na mí le nɔnɔme ɖe sia ɖe me.” Nɔviŋutsua ƒe ŋuɖoɖo ɖe  Yehowa ŋu mezu dzodzro o. Le ŋkeke aɖewo megbe la, ƒome sia ƒe dzi dze eme esi wose be megahiã be yewoaʋu o. Nu kae dzɔ? Anyigbatɔa kpɔe be esi Biblia ƒe gɔmeɖosewoe fiaa mɔ Ðasefowo ƒe ƒome sia ta la, wokpɔtɔ lé wo ɖokui kpoo hedea bubu ame ŋu. Woƒe nɔnɔme nyui sia wɔ dɔ ɖe anyigbatɔa dzi ale gbegbe be eɖe mɔ na wo be woayi edzi anɔ anyigbaa dzi, eye wògaka anyigba bubu kpee na wo. (Mixlẽ 1 Petro 2:12.) Nyateƒee, Yehowa toa eƒe Nya la dzi fiaa mɔ mí eye wòkpena ɖe mía ŋu le nɔnɔme sesẽwo me.

MÍA XƆLƆ̃ LA KPENA ÐE MÍA ŊU MÍEDOA DZI LE DODOKPƆWO ME

12, 13. Nɔnɔme kawo mee wòate ŋu awɔ na ame aɖe le be Mawu mele yeƒe fukpekpewo kpɔm o?

12 Gake ɣeaɖewoɣi la, nɔnɔme sesẽ siwo me Yehowa subɔlawo tona la nɔa anyi ɣeyiɣi didi. Ðewohĩ míele avu wɔm kple dɔmavɔleameŋu, ƒometɔ kekeakewo ƒe tsitretsiɖeŋu, alo yometiti si nu gbea tsotso. Eye dodokpɔ sesẽ bubu aɖe hãe nye masɔmasɔ si tea ŋu ɖoa mía kple hamea me tɔ aɖe dome ɣeaɖewoɣi le esi nɔnɔme siwo le mía si to vovo ta.

13 Le kpɔɖeŋu me, ɖewohĩ ale si nɔvi aɖe ƒo nu na wò la ve dɔme na wò vevie. Ðewohĩ àgblɔ na ɖokuiwò be: ‘Mele be wòanɔ alea le Mawu ƒe habɔbɔa me o!’ Evɔa nɔvi si wɔ nu ma gale subɔsubɔmɔnukpɔkpɔ bubuwo xɔm le hamea me eye wòdze abe amewo dea bubu eŋu ŋutɔ ene. Àbia ɖokuiwò be: ‘Nu ka tae nuwo nayi alea? Ðe Yehowa mele ekpɔm oa? Mawɔ naneke tso eŋu oa?’Ps. 13:2, 3; Hab. 1:2, 3.

14. Anye susu ka tae Mawu mede nu mía kple nɔvi aɖe dome nya aɖe me o?

14 Anye susu nyui aɖewo tae Yehowa mede nu nyaa me o. Le kpɔɖeŋu me, togbɔ be ànɔ sesem le ɖokuiwò me be ame kemɛa gbɔe vodadaa tso hã la, anɔ eme be Mawu ya mekpɔe nenema o. Ðewohĩ Mawu ya le ekpɔm be gbɔwòe vodadaa ƒe akpa gãtɔ tso. Anɔ eme be nya si nɔvia gblɔ wòve dɔme na wò vevie la nye nuxlɔ̃ame si sɔ, si dzi wòle be nàwɔ ɖo. Nɔviŋutsu Karl Klein, si nye Dɔdzikpɔhaa me tɔ tsã la, gblɔ le eƒe agbemeŋutinya me be gbe ɖeka la, Nɔviŋutsu J. F. Rutherford ka mo na ye vevie. Emegbe Nɔviŋutsu Rutherford do gbe na Nɔviŋutsu Klein vividoɖeameŋutɔe be, “Karl, èfɔ nyuiea?” Gake dzi kpɔtɔ nɔ Nɔviŋutsu Klein kum le mokanamea ta, eya ta ɖeko wòɖo eŋu ɖewoɖewoe. Esi Nɔviŋutsu Rutherford kpɔ be Nɔviŋutsu Klein kpɔtɔ lé dziku ɖe dɔme la, exlɔ̃ nui be nekpɔ nyuie be Abosam ƒe asi nagasu edzi o. Nɔviŋutsu Klein ŋlɔ emegbe be: “Ne míelé nɔvi aɖe ɖe dɔme, vevietɔ le esi wògblɔ nya aɖe si wòle be wòagblɔ ta la, ke míele mía ɖokui dem Abosam ƒe mɔ̃ me.” *

15. Nu ka nyanyae akpe ɖe ŋuwò be màtsi dzimaɖeɖi ne èle Yehowa sinu kpɔm be wòakpɔ nɔnɔme aɖe gbɔ o?

15 Ke hã míate ŋu atsi dzimaɖeɖi ne kuxi aɖe nu mele tsotsom o. Aleke míawɔ ado dzi? Tsɔe be èle ʋu kum le mɔ gã dzi eye ʋuwo va tɔ ka ɖi kpaŋkpaŋ. Mènya ɣeyiɣi didi si nàlala ase ɖo o. Ne èdo dziku hetrɔ to mɔ bubu la, àte ŋu abu. Ate ŋu axɔ ɣeyiɣi didi hafi nàɖo afi si yim nèle, eye ɖewohĩ manɔ alea nenye ɖe nègbɔ dzi ɖi vie o. Nenema kee ne èlé ɖe mɔfiame siwo le Mawu ƒe Nya la me ŋu la, àɖo wò taɖodzinuwo gbɔ.

16. Susu ka hã tae Yehowa ate ŋu atiae be yemade asi nya aɖe me o?

16 Yehowa ate ŋu atiae be yemade asi  nya aɖe me o le esi wòdi be míaxɔ hehe vevi aɖe ta. (Mixlẽ 1 Petro 5:6-10.) Menye Mawue tea mí kpɔna o. (Yak. 1:13) ‘Míaƒe adikãtɔ, Abosam’ ye hea tetekpɔ akpa gãtɔ vaa mía dzi. Gake Mawu ate ŋu awɔ nɔnɔme sesẽ aɖe ŋu dɔ atsɔ akpe ɖe mía ŋu míatsi le xɔse me. Ekpɔa míaƒe fukpekpewo, eye esi ‘wòléa be na mí’ ta la, akpɔ egbɔ be “ɣeyiɣi vi aɖe” koe fukpekpeawo anɔ anyi. Ne èle dodokpɔwo me tom la, ɖe wòdzɔa dzi na wò be Yehowa ƒe ŋku le ŋuwò, eye nèka ɖe edzi bliboe be ana mɔ si dzi nàto ado le eme la wòa?2 Kor. 4:7-9.

MAWU ÐOA ETEƑE NA MÍ

17. Nu ka tae Yehowa léa ŋku ɖe amewo katã ŋu?

17 Mlɔeba la, Mawu léa ŋku ɖe amewo katã ŋu le susu nyui aɖe ta. Eto nukpɔla Xanani dzi gblɔ na Fia Asa be: “Yehowa ƒe ŋku kpɔa anyigba blibo la dzi, eye wòdoa ŋusẽ ame siwo ku ɖe eŋu kple woƒe dzi blibo.” (2 Kron. 16:9) Togbɔ be Mawu kpɔe be Asa ƒe dzi meku ɖe ye ŋu bliboe o hã la, ‘ado ŋusẽ wò’ ya ne ekpɔe be èyi edzi le nu dzɔdzɔe wɔm.

18. Nu ka tae míate ŋu aka ɖe edzi be Yehowa aɖo nu nyui siwo míewɔna teƒe na mí? (Kpɔ nɔnɔmetata si le nyati sia ƒe gɔmedzedze.)

18 Mawu di be ‘míadi nyui,’ ‘míalɔ̃ nyui,’ eye ‘míawɔ nu nyui’ ale be ye hã ‘yeave mía nu.’ (Amos 5:14, 15; 1 Pet. 3:11, 12) Yehowa ƒe ŋkuwo le ame dzɔdzɔewo ŋu, eye wòɖoa woƒe nyuiwɔwɔ teƒe na wo. (Ps. 34:16) Le kpɔɖeŋu me, bu Hebritɔwo ƒe vixela siwo nye Sifra kple Pua ŋu kpɔ. Esi Israel viwo nye kluviwo le Egipte la, nyɔnu eve siawo vɔ̃ Mawu wu Farao, ame si de se be woawu ŋutsuvi siwo katã Hebri-nyɔnuwo dzi. Ðikeke mele eme o be mawusosroɖa ye ʋã vixela siawo wokpɔ vidzĩawo ta. Mawu na vi geɖe Sifra kple Pua tsɔ ɖo eteƒe na wo. (2 Mose 1:15-17, 20, 21) Nyui si wowɔ la meto Yehowa ƒe ŋku ŋu o. Togbɔ be ate ŋu awɔ na mí ɣeaɖewoɣi be ame aɖeke medea asixɔxɔ nu nyui siwo wɔm míele ŋu o hã la, ele be míaɖo ŋku edzi be Yehowa dea asixɔxɔ wo ŋu. Eƒe ŋku le nu nyui siwo katã míewɔna ŋu, eye aɖo eteƒe na mí godoo.Mat. 6:4, 6; 1 Tim. 5:25; Heb. 6:10.

19. Aleke nɔvinyɔnu aɖe va kpɔe dze sii be Yehowa ƒe ŋku le yeƒe dɔ nyui wɔwɔwo ŋu?

19 Nɔvinyɔnu aɖe si le Austria va kpɔe dze sii be Mawu ƒe ŋku le agbagba ɖe sia ɖe si dzem yele ŋu. Esi nɔvinyɔnu sia tso Hungary ta la, wotsɔ nyɔnu aɖe si doa Hungarygbe ƒe adrɛs nɛ be wòadii asrɔ̃ nu kplii. Nɔvinyɔnua yi enumake, gake mekpɔ ame aɖeke le aƒea me o. Etrɔ yi, gatrɔ yi, zi gbɔ zi geɖe. Ɣeaɖewoɣi ewɔna nɛ be ame aɖe le aƒea me, gake ame aɖeke meʋua ʋɔtrua o. Egblẽa míaƒe agbalẽwo, lɛta si wòŋlɔ na aƒemenɔlaa, eƒe telefon xexlẽdzesi kple nu bubuwo ɖe ʋɔtrua te. Le ƒe ɖeka kple afã sɔŋ megbe la, aƒemenɔlaa ʋu ʋɔa mlɔeba! Nyɔnua do wòezɔ nɛ vividoɖeameŋutɔe hegblɔ be: “Meɖe kuku ge ɖe eme. Mexlẽ agbalẽ siwo katã nègblẽ ɖi nam, eye mele mɔ kpɔm na wò vevie.” Esi wònye be woda nyɔnu sia ɖe kansatike dzi le ɣeyiɣi mawo me ta la, medi be yeaxɔ amedzro aɖeke o. Nɔvinyɔnua dze Biblia sɔsrɔ̃ gɔme kplii enumake. Mawu ɖo nɔvinyɔnu sia ƒe kutrikuku teƒe nɛ vavã!

20. Aleke nèse le ɖokuiwò me esi nèva kpɔe be Yehowa ƒe ŋku le ŋuwò?

20 Yehowa le agbagba siwo katã dzem nèle la kpɔm eye aɖo eteƒe na wò godoo. Esi nèva de dzesii be Mawu ƒe ŋku le ŋuwò la, megawɔ na wò abe ɖe woda videoɖemɔ̃ ɖe dziwò tsɔ le wò ɖiam ene o. Ke boŋ neva eme be nàse le ɖokuiwò me be yele tetem ɖe Mawu lɔ̃ame si tsɔa ɖe le eme na wò vavã la ŋu kplikplikpli!

^ mm. 14 Nɔviŋutsu Klein ƒe agbemeŋutinyaa dze le Eŋlisigbe me Gbetakpɔxɔ, October 1, 1984 (Fransegbe me tɔ, May 1, 1985) me.