Dzo kpo yi emenuwo dzi

Dzo kpo yi emenuawo dzi

Na Nyateƒea Naɖo Wò Ƒometɔwo Ƒe Dzi Gbɔ

Na Nyateƒea Naɖo Wò Ƒometɔwo Ƒe Dzi Gbɔ

YESU KRISTO gblɔ na ŋutsu aɖe si di be yeadze eyome la be: “Yi aƒe me le wò ƒometɔwo gbɔ, eye nàgblɔ nu siwo katã Yehowa wɔ na wò, kple ale si wòkpɔ nublanui na wòe la na wo.” Ɣemaɣi la, ɖewohĩ Yesu nɔ Gadara, si le Galilea-ƒua ƒe anyieheɣedzeƒe gome. Yesu ƒe nya siawo ɖee fia be ese amegbetɔwo ƒe nɔnɔme vevi aɖe gɔme—si nye didi be woagblɔ nya veviwo kple dzidzɔnyawo na ƒometɔwo.Marko 5:19.

Nɔnɔme ma kpɔtɔ le mía me egbea togbɔ be eɖea dzesi le nuto aɖewo me tɔwo ŋu wu bubuwo hã. Le esia ta ne míeva zu Mawu vavã Yehowa subɔlawo la, zi geɖe la, míedina be míagblɔ nu yeye siwo míesrɔ̃ la na míaƒe ƒometɔwo. Gake aleke míawɔ esiae? Aleke míawɔ nyateƒea naɖo ƒometɔ siwo le xɔseha bubuwo me alo esiwo mele ɖeke me kura o la ƒe dzi gbɔ? Biblia na mɔfiame nyui siwo wɔa dɔ la mí.

“MÍEKPƆ MESIA LA”

Le ƒe alafa gbãtɔ me la, Andrea nye ame gbãtɔ siwo kpɔ Yesu dze sii be eyae nye Mesia la dometɔ ɖeka. Eye ame kae wògblɔ nu si wòkpɔ ŋu nya na enumake? Andrea “kpɔ ye ŋutɔ nɔvia Simon gbã, eye wògblɔ nɛ be: ‘Míekpɔ Mesia la’ (si gɔmee nye Kristo).” Andrea kplɔ Petro yi Yesu gbɔe eye wòto esia dzi na mɔnukpɔkpɔ su Petro si wòva zu Yesu ƒe nusrɔ̃la.Yoh. 1:35-42.

Anɔ abe ƒe ade megbe esi Petro nɔ Yopa la, wogblɔ nɛ be wòazɔ mɔ ayi Kaisarea le dziehe ɖe Kornelio si nye asrafomegã aɖe ƒeme. Ame kawoe Petro kpɔ woƒo ƒu ɖe aƒea me? “Kornelio . . . nɔ mɔ kpɔm na [Petro kple eƒe mɔzɔhɛwo], eye wòyɔ eƒe ƒometɔwo kple xɔlɔ̃ veviwo ƒo ƒu.” Kornelio to esia dzi ʋu mɔnukpɔkpɔ ɖi na eƒe ƒometɔwo be woaɖo  to Petro eye woanɔ te ɖe nya siwo wose dzi awɔ nyametsotso.Dɔw. 10:22-33.

Nu kae míate ŋu asrɔ̃ tso ale si Andrea kple Kornelio wɔ nu ɖe woƒe ƒometɔwo ŋu me?

Andrea kple Kornelio memia nu ɖe nyaa dzi kple susu be ƒometɔawo ava see gbe ɖeka o. Andrea ŋutɔe ɖe Petro fia Yesu, eye Kornelio hã wɔ ɖoɖo na eƒe ƒometɔwo be woase nya si nɔ Petro si. Gake Andrea kple Kornelio meƒo nya ɖe woƒe ƒometɔawo nu alo to ayemɔ dzi be woava zu Kristo yomedzelawo o. Èkpɔ nusɔsrɔ̃ si le eme na mía? Anyo ŋutɔ ne míewɔ nu nenema. Míate ŋu aka nu siwo míesrɔ̃ la ta na míaƒe ƒometɔwo, eye míawɔ ɖoɖo na wo be woasrɔ̃ Biblia me nyateƒea ahadze si nɔviwo aɖewo. Ke hã ele be míade bubu tiatiawɔblɔɖe si le wo si la ŋu eye míaƒo asa na nyaƒoƒo ɖe wo nu madzemadzee. Be míakpɔ ale si míate ŋu akpe ɖe míaƒe ƒometɔwo ŋu la, mina míadzro Jürgen kple Petra, siwo nye atsu kple asi le Germany, ƒe kpɔɖeŋu me kpɔ.

Yehowa Ðasefowo srɔ̃ Biblia kple Petra eye wòxɔ nyɔnyrɔ le ɣeyiɣi aɖe megbe. Srɔ̃a ŋutsu Jürgen nye asrafomegã. Gbã la, medzɔ dzi na Jürgen be ye srɔ̃ zu Ðasefo o. Gake le ɣeyiɣi aɖe megbe la, eva kpɔe dze sii be Ðasefowoe fiaa Biblia me nyateƒea. Eya hã tsɔ eƒe agbe ɖe adzɔgbe na Yehowa, eye wònye hamemetsitsi egbea. Aɖaŋu kae wòɖo ku ɖe ale si míawɔ ana nyateƒea naɖo ƒometɔ siwo le xɔseha bubuwo me ƒe dzi gbɔ ŋu?

Jürgen gblɔ be: “Mele be míazi nyaa ɖe míaƒe ƒometɔwo dzi alo alɔ subɔsubɔnyawo akɔ ɖe wo dzi o. Ðeko ema wɔwɔ ana woaɖe to ɖa kura. Ðe wòle be míanɔ fe kam nyawo vivivi ŋuɖɔɖotɔe boŋ. Eɖea vi hã ŋutɔ ne míena nɔvi siwo kple míaƒe ƒometɔawo nye hatiwo eye nu ɖeka tɔgbi wɔwɔ dzɔa dzi na wo la dze xɔ̃. Esia wɔwɔ ate wo ɖe mía ŋu.”

“Mele be míazi nyaa ɖe míaƒe ƒometɔwo dzi alo alɔ subɔsubɔnyawo akɔ ɖe wo dzi o.”—Jürgen

Apostolo Petro kple Kornelio ƒe ƒometɔwo xɔ Biblia me gbedeasia kaba. Gake le ƒe alafa gbãtɔ me tɔ bubu geɖe siwo se Biblia me gbedeasia gome la, exɔ ɣeyiɣi geɖe hafi wowɔ nyametsotso.

KE YESU NƆVIWO YA ÐE?

Esime Yesu nɔ gbeƒã ɖem le dutoƒo la, eƒe ƒometɔ geɖe xɔ edzi se. Le kpɔɖeŋu me, anɔ eme be apostolo Yakobo kple Yohanes kpakple Yesu wonye nɔgãnɔɖiviwo, eye apostolo eve mawo dada Salome nye Yesu dada nɔvinyɔnu. Eye anye be Salome hã nɔ “nyɔnu bubu geɖewo, siwo tsɔ woƒe nunɔamesiwo nɔ [Yesu kple eƒe apostoloawo] subɔm” la dome.Luka 8:1-3.

Gake Yesu ƒe ƒometɔ bubuwo mexɔ edzi se enumake o. Le kpɔɖeŋu me, abe ƒe ɖeka kple edzivɔ ene le Yesu ƒe nyɔnyrɔxɔxɔ megbe la, amehawo ƒo ƒu ɖe aƒe aɖe me nɔ eƒe nyawo sem. “Ke esi eƒe ƒometɔwo see la, wodo go yi elé ge, elabena wonɔ gbɔgblɔm be: ‘Eƒe tagbɔ le gbegblẽm.’” Ɣeyiɣi aɖe megbe esi Yesu nɔviwo bia nyae tso eƒe mɔzɔɖoɖowo ŋu la, meɖo eŋu na wo tẽe o. Nu ka tae? Elabena “le nyateƒe me la, nɔviawo menɔ eɖem nɔ fiafiam be yewoxɔ edzi se o.”Marko 3:21; Yoh. 7:5.

Nu kae míate ŋu asrɔ̃ tso ale si Yesu wɔ nu ɖe eƒe ƒometɔwo ŋu me? Medo dziku esi wo dometɔ aɖewo gblɔ be eƒe tagbɔ le gbegblẽm o. Esi Yesu ku eye wofɔe ɖe tsitre megbe gɔ̃ hã la, ede dzi ƒo na eƒe ƒometɔawo esi wòɖe eɖokui fia dadavia  Yakobo. Edze abe emae kpe ɖe Yakobo sia kple Yesu dadavi bubuwo ŋu be wova xɔe se be eyae nye Mesia la ene. Eya ta wonɔ apostoloawo kple ame bubu siwo kpe ta le dziƒoxɔa dzi le Yerusalem la dome, eye kakaɖedzitɔe la, wokɔ gbɔgbɔ kɔkɔe la ɖe woawo hã dzi. Emegbe mɔnukpɔkpɔ wɔnukuwo su Yakobo kple Yuda, si hã nye Yesu dadavi bubu, si.Dɔw. 1:12-14; 2:1-4; 1 Kor. 15:7.

AME AÐEWO HIÃ ƔEYIƔI GEÐE

“Nu nyui geɖewo ado tso eme ne míegbɔ dzi ɖi blewu, gagbɔ dzi ɖi hegagbɔ dzi ɖi ake.”—Roswitha

Abe ale si wònɔ le ƒe alafa gbãtɔ me ene la, egbea ehiã be míana ɣeyiɣi geɖe míaƒe ƒometɔ aɖewo be woava agbemɔa dzi. Le kpɔɖeŋu me, bu Roswitha si nye Roma Katolikotɔ dovevienu aɖe esime srɔ̃a ŋutsu xɔ nyɔnyrɔ zu Yehowa Ðasefo le ƒe 1978 me ŋu kpɔ. Esi Roswitha ka ɖe nu siwo wòxɔ se dzi ta la, etsi tre ɖe srɔ̃a ŋu vevie gbã. Gake le ƒe aɖewo megbe la, eƒe nɔnɔme va trɔ esi wòkpɔe dze sii be nu siwo fiam Ðasefoawo le lae nye nyateƒea. Exɔ nyɔnyrɔ le ƒe 2003 me. Nu kae na wòtrɔ eƒe nɔnɔme? Le esi Roswitha srɔ̃ nado dziku ɖe eŋu esime wònɔ tsitre tsim ɖe eŋu teƒe la, egbɔ dzi ɖi nɛ be wòatrɔ susu. Aɖaŋu kae Roswitha ɖo? “Nu nyui geɖewo ado tso eme ne míegbɔ dzi ɖi blewu, gagbɔ dzi ɖi hegagbɔ dzi ɖi ake.”

Monika xɔ nyɔnyrɔ le ƒe 1974 me, eye anɔ ƒe ewo megbe la, via ŋutsu eveawo hã zu Ðasefowo. Gake togbɔ be srɔ̃a Hans metsi tre ɖe wo ŋu o hã la, ƒe 2006 me hafi wòva xɔ nyɔnyrɔ. Aɖaŋu kae ƒome sia ɖo le nuteƒekpɔkpɔ sia megbe? Wogblɔ be: “Ku ɖe Yehowa ŋu nuteƒewɔwɔtɔe, eye nàlé wò dzixɔsewo me ɖe asi sesĩe tamanamanae.” Ke hã enɔ vevie be woaka ɖe edzi na Hans ɣesiaɣi be yewogalɔ̃e kokoko. Eye womebu mɔkpɔkpɔ hesusui be mate ŋu axɔ nyateƒea gbeɖe o.

NA NYATEƑEA ƑE TSI NAFA DZI NA WO

Gbe ɖeka la, Yesu gblɔ be nyateƒea ƒe gbedeasia le abe tsi si naa agbe mavɔ ame ene. (Yoh. 4:13, 14) Míedi be nyateƒea ƒe tsi fafɛ si me dza la nono nafa dzi na míaƒe ƒometɔwo. Míadi gbeɖe be tsia naklẽ li wo le esi míele wo dzi zim be woano gbogbo aɖe enumake ta o. Ale si míeɖea míaƒe dzixɔsewo me na woe ana wòafa dzi na wo loo alo aklẽ li wo. Biblia gblɔ be, “ame dzɔdzɔe ƒe dzi bua tame, ne wòaɖo nya ŋu,” eye be “nugɔmesela ƒe dzi nana eƒe nù dzea nunya, eye eƒe nuyiwo dzia nufiame ɖe dzi.” Aleke míawɔ ɖe aɖaŋuɖoɖo siawo dzi?Lod. 15:28; 16:23.

Srɔ̃nyɔnu adi be yeaɖe yeƒe dzixɔsewo me na ye srɔ̃. Ne ‘ebua tame hafi ɖoa nya ŋu’ la, aƒo nu ŋuɖɔɖotɔe eye mana nyawo nanɔ dodom le enu gbẽgbẽgbẽ o. Mawɔ eɖokui ame dzɔdzɔe akpa alo abui be yenyo wu ye srɔ̃ o. Nya siwo ŋu wòabu nyuie hafi agblɔ la ana gbɔɖeme srɔ̃a ahana ŋutifafa nanɔ aƒea me. Ɣekaɣie srɔ̃a ɖea dzi ɖi eye wotea ŋu tena ɖe eŋu bɔbɔe? Nu kawo ŋue wòlɔ̃a dzeɖoɖo tsoe, eye nyati kawo xexlẽe doa dzidzɔ nɛ? Ðe wòtsɔa ɖe le dzɔdzɔmeŋutinunya, dunyahehe alo kamedefefe mea? Aleke wòanyɔ eƒe ɖetsɔleme ɖe Biblia ŋu evɔ le ɣeyiɣi ma ke me la wòade bubu eƒe seselelãmewo kple susuwo ŋu? Nyabiase siawo ŋu bubu akpe ɖe srɔ̃nyɔnua ŋu wòaƒo nu ahawɔ nu le nunya me.

Menye míaƒe dzixɔsewo me ɖeɖe vivivi na ƒometɔ siwo menye Ðasefowo haɖe o ɖeɖe koe nana nyateƒea ɖoa woƒe dzi gbɔ o. Ele be agbenɔnɔ nyui nakpe ɖe nya siwo míegblɔna ŋu.

NƆ AGBE NYUI

Jürgen si míeyɔ le gɔmedzedzea gblɔ be: “Wɔ ɖe Biblia ƒe mɔfiamewo dzi gbe sia gbe. Esia nye mɔ nyui si dzi nàto ana wò ƒometɔa nabu tame togbɔ be malɔ̃ ɖe wò nyawo dzi tututu o hã.” Hans si xɔ nyɔnyrɔ anɔ ƒe 30 kloe le srɔ̃a nyɔnu ƒe nyɔnyrɔxɔxɔ megbe la lɔ̃ ɖe esia dzi. Egblɔ be: “Kristotɔwo ƒe agbenɔnɔ nyui le vevie, ale be ƒometɔa nakpɔ ŋusẽ nyui si nyateƒea le kpɔkpɔm ɖe míaƒe agbe dzi.” Ele be míaƒe ƒometɔwo nate ŋu akpɔe be míaƒe dzixɔsewo na míeto vovo tso ame bubuwo gbɔ le mɔ nyuitɔ nu, ke menye le mɔ gbegblẽ nu o.

“Kristotɔwo ƒe agbenɔnɔ nyui le vevie, ale be ƒometɔa nakpɔ ŋusẽ nyui si nyateƒea le kpɔkpɔm ɖe míaƒe agbe dzi”—Hans

Apostolo Petro ɖo aɖaŋu vevi aɖe na srɔ̃nyɔnu siwo srɔ̃wo nye dzimaxɔsetɔwo la be: “Mibɔbɔ mia ɖokui na mia ŋutɔwo mia srɔ̃wo, ale be ne wo dometɔ aɖewo meɖoa to nya la o la, wo srɔ̃wo ƒe agbenɔnɔ nya aɖeke magblɔmagblɔe naɖe wo, esi wokpɔa miaƒe agbenɔnɔ dzadzɛ kple bubu deto la ta. Eye migana miaƒe atsyɔ̃ɖoɖo nanye  gotagome tɔ, to ɖaƒoƒo kple sikanuwo alo awudziwuiwo dodo me o, ke boŋ mina wòanye dzi me ƒe ame ɣaɣla le gbɔgbɔ fatu si nɔa anyi kpoo le atsyɔ̃ɖoɖo si megblẽna o me, si ŋu asixɔxɔ gã le le Mawu ŋkume.”1 Pet. 3:1-4.

Petro gblɔ be srɔ̃nyɔnu ƒe agbenɔnɔ nyui ate ŋu akpɔ ŋusẽ ɖe srɔ̃a dzi. Esi Ŋɔŋlɔawo me mɔfiame ma le susu me na nɔvinyɔnu Christa ta la, tso esime wòxɔ nyɔnyrɔ le ƒe 1972 me kee wòle agbagba dzem be yeƒe agbenɔnɔ nyui naʋã ye srɔ̃ ƒe dzi. Togbɔ be Ðasefowo srɔ̃ nu kple srɔ̃a kpɔ hã la, mexɔ nyateƒea haɖe o. Edea Kristotɔwo ƒe kpekpe aɖewo eye eya kple hamea me tɔwo dome le nyuie. Nɔviawo hã dea bubu tiatiawɔblɔɖe si le esi ŋu. Aleke Christa le agbagba dzem be nyateƒea naɖo eƒe dzi gbɔ?

Christa gblɔ be: “Meɖoe kplikpaa be malé Yehowa ƒe mɔwo me ɖe asi goŋgoŋ. Le ɣeyiɣi ma ke me la, mele agbagba dzem be mato nye agbenɔnɔ nyui dzi aɖe srɔ̃nye ‘nya aɖeke magblɔmagblɔe.’ Medzea agbagba ɖe sia ɖe be mawɔ ɖe eƒe didiwo dzi ne metsi tre ɖe Biblia ƒe mɔfiamewo ŋu o ko. Menya be eya ŋutɔe awɔ eƒe nyametsotso, eya ta megblẽ nya sia nya ɖe Yehowa si me.”

Christa ƒe kpɔɖeŋua na míekpɔ nu si tae wòle vevie be míada asɔ. Eléa fɔ ɖe mawusubɔsubɔ ŋu vevie, si fia be edea kpekpeawo edziedzi eye wòkpɔa gome le gbeƒãɖeɖedɔa me ale si wòate ŋui. Ke hã edana sɔna, esi wònyae be ye srɔ̃a hiã yeƒe lɔlɔ̃, ɣeyiɣi kple beléle ta. Ne míele nu wɔm kple míaƒe ƒometɔ siwo nye dzimaxɔsetɔwo la, anyo ŋutɔ be míada asɔ ahase nu gɔme na wo. Biblia gblɔ be: “Ɣeyiɣi li na nu sia nu.” Esia lɔ ɣeyiɣi si míazã ɖe ƒometɔwo ŋu, vevietɔ mía srɔ̃ siwo menye míaƒe haxɔsetɔwo o, la hã ɖe eme. Vovokpɔkpɔ ɖe mia nɔewo ŋu ʋua dzeɖoɖo ƒe mɔnuwo ɖi. Nuteƒekpɔkpɔwo ɖee fia be dzeɖoɖo nyuiwo ɖea akogotsitsi, amegbegblẽɖi alo ŋuʋaʋã ƒe seselelãmewo dzi kpɔtɔna.Nyagb. 3:1.

MÈGABU MƆKPƆKPƆ GBEÐE O

Esi Holger kple eƒe ƒometɔ bubuwo xɔ nyɔnyrɔ la, ƒe 20 sɔŋ va yi hafi fofoa va xɔ nyɔnyrɔ. Holger gblɔ be: “Ele vevie be míana ƒometɔ ma nanya be míelɔ̃e eye míedoa gbe ɖa ɖe eta.” Christa hã gblɔ be ‘yemabu mɔkpɔkpɔ gbeɖe be ye srɔ̃ ava lɔ̃ Yehowa ahaxɔ nyateƒea o.’ Ele be míabu susu nyui ɖe míaƒe ƒometɔ siwo mele Yehowa subɔm kpli mí haɖe o ŋu ɣesiaɣi, eye míagana mɔkpɔkpɔ nabu ɖe mí o.

Míaƒe taɖodzinue nye be ƒomedodo nyui nanɔ mía kple míaƒe ƒometɔwo dome, ale be woakpɔ nyateƒea adze sii eye Biblia me gbedeasia naɖo woƒe dzi gbɔ. Eye míawɔ nu le “tufafa kple bubu deto” me le nu sia nu me.1 Pet. 3:15.