Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  January 2014

Wɔ Tiatia Nyuiwo Le Wò Sɔhɛme

Wɔ Tiatia Nyuiwo Le Wò Sɔhɛme

‘Ðekakpuiwo kple ɖetugbuiwo siaa, . . . mikafu Yehowa ƒe ŋkɔ.’PS. 148:12, 13.

1. Mɔnukpɔkpɔ nyui kawoe su sɔhɛ Kristotɔ geɖe si?

MÍELE agbe le ɣeyiɣi ɖedzesi aɖe me. Ame miliɔn geɖe siwo tso dukɔ sia dukɔ me la va le Mawu vavã la subɔm fifia wu ɣeyiɣi bubu ɖe sia ɖe. (Nyaɖ. 7:9, 10) Sɔhɛ geɖewo le dzidzɔ kpɔm esi wole kpekpem ɖe amewo ŋu be woase Biblia me nyateƒe si naa agbe la gɔme. (Nyaɖ. 22:17) Sɔhɛ geɖe le Biblia srɔ̃m kple amewo hele kpekpem ɖe wo ŋu be woƒe agbenɔnɔ nanyo ɖe edzi. Bubuwo le nya nyuia kakam le dutanyigbawo dzi dzonɔamemetɔe. (Ps. 110:3; Yes. 52:7) Nu kae nàwɔ be nàkpɔ gome le dɔ dodzidzɔname sia si wɔm Yehowa ƒe amewo le la me geɖe wu?

2. Aleke Timoteo ƒe kpɔɖeŋua ɖee fia be Yehowa lɔ̃na faa dea dɔwo asi na sɔhɛwo? (Kpɔ nɔnɔmetata si le nyati sia tame.)

2 Sɔhɛwo, miate ŋu awɔ nyametsotso nyuiwo fifia siwo aʋu mɔnukpɔkpɔ ɖi na mi be miakpɔ dzidzɔ geɖe wu le Mawu subɔsubɔ me. Le kpɔɖeŋu me, Timoteo si tso Listra la wɔ nyametsotso nyui siwo me nunya le si wɔe be wòva zu dutanyanyuigblɔla esime wòxɔ abe ƒe 20 ene. (Dɔw. 16:1-3) Edze abe le ɣleti ʋɛ aɖewo megbe esi tsitretsiɖeŋu sesẽ aɖe na wòva hiã be apostolo Paulo nagblẽ Tesalonika hame yeyea ɖi adzo la, edɔ Timoteo be wòayi Tesalonika aɖado ŋusẽ nɔviawo. (Dɔw. 17:5-15; 1 Tes. 3:1, 2, 6) Àte ŋu akpɔ ale si dɔdeasi ma na Timoteo se le eɖokui me la le susu mea?

 TIATIA VEVITƆ SI NÀWƆ LE AGBE ME

3. Tiatia kae nye vevitɔ kekeake si nàwɔ le agbe me? Eye ɣekaɣie wòle be nàwɔ tiatia sia?

3 Sɔhɛmenɔɣi nye nyametsotso veviwo wɔɣi. Gake tiatia aɖe le vevie wu bubu ɖe sia ɖe—eyae nye nyametsotso si nàwɔ be yeasubɔ Yehowa. Ɣeyiɣi kae nye nyuitɔ si me nàwɔ esia? Yehowa gblɔ be: “Ðo ŋku wɔwòla dzi le wò ɖekakpuiŋkekewo me.” (Nyagb. 12:1) Mɔ si ko dzi nàto ‘aɖo ŋku’ Yehowa dzie nye be nàsubɔe tso dzi blibo me. (5 Mose 10:12) Esiae nye tiatia vevitɔ kekeake si nàwɔ le agbe me. Nyametsotso si nàwɔ be nàsubɔ Mawu akpɔ ŋusẽ ɖe dziwò le wò agbe me katã.Ps. 71:5.

4. Nyametsotso vevi bubu kawo hãe akpɔ ŋusẽ ɖe ale si nàsubɔ Mawui dzi?

4 Gake menye nyametsotso si nàwɔ be yeasubɔ Yehowa la ɖeɖe koe akpɔ ŋusẽ ɖe dziwò le etsɔme o. Le kpɔɖeŋu me, ɖewohĩ ele be nàtso nya me nenye be àɖe srɔ̃ loo alo màɖe srɔ̃ o, ame si nàɖe, kple dɔ si nàwɔ. Nyametsotso veviwoe esiawo nye, gake ahiã be nàtso nya me le Yehowa subɔsubɔ tso dzi blibo me ŋu gbã. (5 Mose 30:19, 20) Nu ka tae? Elabena nyametsotso siawo do ƒome kple wo nɔewo. Tiatia si nàwɔ le srɔ̃ɖeɖe kple dɔwɔɖui ŋu akpɔ ŋusẽ ɖe ale si nàsubɔ Mawui dzi. (Tsɔe sɔ kple Luka 14:16-20.) Nenema ke wò didi be nàsubɔ Mawu akpɔ ŋusẽ ɖe tiatia si nàwɔ le srɔ̃ɖeɖe kple dɔwɔɖui gome dzi. Eya ta tso nya me le nu siwo le vevie wu ŋu gbã.Flp. 1:10.

NU KAE NÀWƆ LE WÒ SƆHƐME?

5, 6. Gblɔ ale si nyametsotso nyuiwo wɔwɔ nana be mɔnukpɔkpɔ geɖewo sua ame si la ƒe kpɔɖeŋu. (Kpɔ nyati si nye “Tiatia Si Mewɔ Le Nye Ðevime” si dze le tata sia me hã.)

5 Ne ètso nya me be yeasubɔ Mawu ko la, ele be nàde ŋugble le nu si wòdi be nàwɔ ŋu, eye nàtia ale si nàdi be yeasubɔe. Nɔviŋutsu Japantɔ aɖe gblɔ be: “Esi mexɔ ƒe 14 la, mezɔ kple hamemetsitsi aɖe le gbeadzi. Ede dzesii be gbeƒãɖeɖedɔa menɔ nunye vivim o. Egblɔ nam tufafatɔe be: ‘Yuichiro, heyi aƒe me; nànɔ anyi ɖe wò kplɔ̃ ŋu eye nàbu tame nyuie le nu siwo Yehowa wɔ na wò la ŋu.’ Mewɔ abe ale si wògblɔ ene. Le nyateƒe me la, meyi edzi bu tame hedo gbe ɖa ŋkeke geɖe. Vivivi la, metrɔ nye nɔnɔme. Eteƒe medidi o, Yehowa subɔsubɔ va nɔ nunye vivim. Nuxexlẽ tso dutanyanyuigblɔlawo ŋu doa dzidzɔ nam, eye mete tamebubu le nu si mawɔ asubɔ Mawu tso dzi blibo me geɖe wu la ŋu.”

6 Yuichiro yi edzi be: “Mewɔ tiatia siwo ana mate ŋu asubɔ Yehowa le duta gbe ɖeka. Le kpɔɖeŋu me, medze Eŋlisigbe sɔsrɔ̃ gɔme le suku. Esi medo le suku la, metiae be mafia Eŋlisigbe gaƒoƒo aɖewo ko ale be mate ŋu awɔ mɔɖeɖedɔa. Esi mexɔ ƒe 20 la, medze Mongoliagbe sɔsrɔ̃ gɔme, eye mɔnukpɔkpɔ su asinye meyi ɖasrã gbeƒãɖelawo ƒe ƒuƒoƒo aɖe si doa Mongoliagbe kpɔ. Ƒe eve megbe, le ƒe 2007 me la, meɖi tsa yi Mongolia. Esi nye kple mɔɖela aɖewo míeyi gbeadzi la, mekpɔe be nyateƒea ƒe tsikɔ le afi ma tɔ geɖewo wum, eya ta meɖoe be maʋu ayi aɖakpe ɖe wo ŋu. Metrɔ yi Japan hewɔ ɖoɖo ɖe eŋu. Mele mɔɖeɖedɔa wɔm le Mongolia tso April 2008 me. Agbea mele bɔbɔe le afi sia o. Gake amewo le nya nyuia xɔm ŋutɔ, eye mele kpekpem ɖe wo ŋu wole tetem ɖe Yehowa ŋu. Mekpɔe be tiatia si mewɔ lae nye nyuitɔ kekeake.”

7. Nu kawo ŋue wòle be mi sɔhɛwo miatso nya me le? Kpɔɖeŋu kae Mose ɖo ɖi na mi?

7 Ele be ame sia ame natso nya me le ale si wòazã eƒe agbee le Yehowa subɔsubɔ me ŋu. (Yos. 24:15) Wò ŋutɔe atiae nenye be àɖe srɔ̃ loo alo màɖe srɔ̃ o, wò ŋutɔe atia ame si tututu nàɖe alo agbemedɔ si nàwɔ. Ðe nàtia dɔ aɖe si nàsrɔ̃ ɣeyiɣi kpui aɖe koa? Sɔhɛwo, mia dometɔ aɖewo le kɔƒe siwo me ganyawo mede  ame dzi le o me; bubuwo le dugã siwo me kesinɔnuwo bɔ ɖo me. Miaƒe nɔnɔme, ŋutete, nuteƒekpɔkpɔ, nu siwo dzɔa dzi na mi kple xɔse ƒe sesẽme le vovovo. Ðeko wòle abe ale si nɔnɔme si me Hebrivi siwo nɔ blema Egipte le la to vovo tso ɖekakpui Mose tɔ gbɔ ene. Mose nɔ fiasã me ta, evɔ Hebrivi bubuawo ya nye kluviwo. (2 Mose 1:13, 14; Dɔw. 7:21, 22) Wonɔ agbe le ɣeyiɣi ɖedzesiwo me abe miawo ke ene. (2 Mose 19:4-6) Ele be wo dometɔ ɖe sia ɖe natia nu si wòawɔ le agbe me. Mose wɔ tiatia nyuitɔ.Mixlẽ Hebritɔwo 11:24-27.

8. Sɔhɛwo, afi kae miakpɔ kpekpeɖeŋu le be miawɔ nyametsotso nyuiwo?

8 Yehowa ɖoa aɖaŋu siwo akpe ɖe mia ŋu miawɔ tiatia nyuiwo le miaƒe sɔhɛmenɔɣi la na mi. Efiaa gɔmeɖose siwo ŋu dɔ miate ŋu awɔ le nɔnɔme vovovo siwo me miele me. (Ps. 32:8) Tsɔ kpe ɖe eŋu la, mia dzila Kristotɔwo kple hamemetsitsiwo ate ŋu akpe ɖe mia ŋu miakpɔ ale si miawɔ gɔmeɖose siawo ŋu dɔe. (Lod. 1:8, 9) Mina míadzro Biblia me gɔmeɖose vevi etɔ̃ siwo akpe ɖe mia ŋu miawɔ nyametsotso nyuiwo fifia be wòaɖe vi na mi le etsɔme la me.

BIBLIA ME GƆMEÐOSE ETƆ̃ SIWO AKPE ÐE ŊUWÒ

9. (a) Nu ka tae míate ŋu agblɔ be Yehowa de bubu mía ŋu esi wòna tiatiawɔblɔɖe mí? (b) Mɔnukpɔkpɔ kawoe aʋu ɖi na mi sɔhɛwo ne ‘miedi Fiaɖuƒea gbã’?

9 Di Fiaɖuƒe la kple Mawu ƒe dzɔdzɔenyenye gbã. (Xlẽ Mateo 6:19-21, 24-26, 31-34.) Yehowa de bubu mía ŋu esi wòna tiatiawɔblɔɖe mí. Meɖo ɣeyiɣi agbɔsɔsɔ si nàtsɔ awɔ Fiaɖuƒegbeƒãɖeɖedɔa na wò o. Gake Yesu ɖo aɖaŋu na mí be míadi Fiaɖuƒea gbã. Ale si nàwɔ gɔmeɖose ma dzi aʋu mɔnukpɔkpɔ ɖi na wò be nàɖe lɔlɔ̃ si le asiwò na Mawu, ale si nètsɔ ɖe le eme na hawòviwo kple ale si nèkpɔ ŋudzedze ɖe agbe mavɔ ƒe mɔkpɔkpɔa ŋu la afia. Ne èle srɔ̃ɖeɖe kple dɔ si nàwɔ ŋu bum la, kpɔe ɖa be tiatia si nèɖo be yeawɔ la ana be nàva nɔ dzimaɖi tsim ɖe ŋutilãmenuwo ŋu loo alo ana nàdi Fiaɖuƒea kple Mawu ƒe dzɔdzɔenyenye gbãgbiagbã mahã.

10. Nu kae na Yesu kpɔ dzidzɔ, eye nyametsotso kawoe ana wò hã nàkpɔ dzidzɔ?

10 Kpɔ dzidzɔ le amewo subɔsubɔ me. (Xlẽ Dɔwɔwɔwo 20:20, 21, 24, 35.) Yesue fia gɔmeɖose vevi sia mí dɔmenyotɔe. Ekpɔ dzidzɔ geɖe le esi wòwɔ Fofoa ƒe lɔlɔ̃nu ke menye eya ŋutɔ tɔ o ta. Yesu kpɔ dzidzɔ esi ɖokuibɔbɔlawo xɔ nya nyuia kple dzi faa. (Luka 10:21; Yoh. 4:34) Ðewohĩ wò hã èkpɔ dzidzɔ ma tɔgbi esi nèkpe ɖe ame bubuwo ŋu. Na gɔmeɖose siwo Yesu fia mí la nafia mɔ wò le nyametsotso veviwo wɔwɔ me le agbe me. Esia wɔwɔ nàkpɔ dzidzɔ geɖe eye àdo dzidzɔ na Yehowa hã.Lod. 27:11.

11. Nu kae na Barux megava nɔ dzidzɔ kpɔm o, eye aɖaŋu kae Yehowa ɖo nɛ?

11 Yehowa subɔsubɔe hea dzidzɔ gãtɔ vanɛ na mí. (Lod. 16:20) Edze abe Yeremiya ƒe agbalẽŋlɔla Barux ŋlɔ nya sia be ene. Ɣeaɖeɣi la, Yehowa subɔsubɔ meganɔ enu vivim tututu o. Yehowa gblɔ nɛ be: ‘Wò ya èle nu gãwo dim na ɖokuiwò. Mègadi wo o; elabena . . . mahe dzɔgbevɔ̃e ava ŋutilãwo katã dzi; ke mana wò agbe nazu aboyonu na wò le teƒe siwo katã nàyi.’ (Yer. 45:3, 5) Nu kae nèsusu be eyae ana Barux nakpɔ dzidzɔ hafi? Nu gãwo didi ye loo alo ale si wòasubɔ Mawu nuteƒewɔwɔtɔe ahatsi agbe le Yerusalem ƒe tsɔtsrɔ̃ me yea?Yak. 1:12.

12. Tiatia kae Ramiro wɔ si na wòle dzidzɔ geɖe kpɔm?

12 Nɔviŋutsu Ramiro nye ame siwo kpɔ dzidzɔ le amewo subɔsubɔ me dometɔ ɖeka. Egblɔ be: “Ƒome dahe si le kɔƒe aɖe me le Andes Towo dzi la mee metso.  Eya ta mɔnukpɔkpɔ gã aɖee wònye esi fonye gblɔ be yeaxe sukufe nam ne made yunivɛsiti. Gake ɣemaɣi mexɔ nyɔnyrɔ zu Yehowa Ðasefo eteƒe medidi o, eye mɔɖela aɖe kpem be mado evelia na ye míayi aɖaɖe gbeƒã le du sue aɖe me. Metiae be mayi afi ma boŋ, mesrɔ̃ ɖakpakpa, eye meʋu ɖakpaƒe nɔa ɖa kpam na amewo tsɔ nɔ ɖokuinye dzi kpɔm. Ame geɖe lɔ̃ be míafia Ŋɔŋlɔawo yewo. Emegbe meʋu yi hame yeye aɖe si me wodoa nutoa me tɔwo degbe le la me. Mele ɣeyiɣiawo katã ƒe subɔsubɔdɔa wɔm ƒe ewoe nye esia. Dɔ bubu aɖeke meli si ana makpɔ dzidzɔ si gbegbe kpɔm mele fifia esi mele gbeƒã ɖem nya nyuia na amewo le wo degbe me o.”

Ramiro le dzidzɔ kpɔm le Yehowa subɔsubɔ me tso eƒe sɔhɛme ke (Kpɔ memama 12)

13. Nu ka tae sɔhɛmenɔɣie nye ɣeyiɣi nyuitɔ si me nàsubɔ Yehowa kple dzi blibo le?

13 Subɔ Yehowa bliboe le wò sɔhɛme. (Xlẽ Nyagblɔla 12:1.) Mègasusui be ele be nàkpɔ dɔ nyui aɖe gbã hafi awɔ mɔɖeɖedɔa o. Sɔhɛmenɔɣie nye ɣeyiɣi nyuitɔ si me nàsubɔ Yehowa kple dzi blibo le. Ƒomegbanɔamedzi boo mele mi sɔhɛ geɖewo dzi o, miele lãmesẽ me eye ŋusẽ hã le mia ŋu miate ŋu awɔ dɔ sesẽwo. Dɔ kae nàdi be yeawɔ na Yehowa le wò sɔhɛme? Àte ŋu aɖoe be yeawɔ mɔɖeɖedɔa, alo ayi aɖasubɔ le dutagbe hame aɖe me. Alo ɖewohĩ àdi mɔ siwo dzi nàto akeke wò subɔsubɔdɔa ɖe enu le hame si me nèle fifia me. Nu ka kee nèɖo be yeawɔ le Mawu subɔsubɔ me o, ahiã be nàwɔ dɔ akpɔ ɖokuiwò dzi. Bia ɖokuiwò be: ‘Dɔ kae mawɔ, eye ɣeyiɣi didi kae matsɔ asrɔ̃e?’

NA BIBLIA ME GƆMEÐOSEWO NAKPE ÐE ŊUWÒ NÀWƆ NYAMETSOTSO NYUIWO

14. Nu ka ŋue wòle be nàkpɔ nyuie le ne èle nya me tsom le dɔ si nàwɔ ŋu?

14 Biblia me gɔmeɖose etɔ̃ siwo me míedzro ate ŋu afia mɔ wò ne èle nya me tsom le dɔ vovovo siwo nàte ŋu awɔ ŋu.  Ðikeke mele eme o be sukuɖaŋuɖolawo nya dɔ siwo nàte ŋu akpɔ awɔ le miaƒe nutoa me. Alo dziɖuɖudɔwɔƒewo ate ŋu agblɔ dɔ siwo me wohiã amewo le le miaƒe nutoa me alo le afi si nèdi be yeaɖasubɔ le la na wò. Ame mawo ƒe nyatakakawo ate ŋu aɖe vi ya, gake ele be nàkpɔ nyuie. Ame siwo melɔ̃ Yehowa o la adze agbagba be yewoaƒã xexea lɔlɔ̃ ɖe wò dzi me. (1 Yoh. 2:15-17) Ne mènya ŋkuléle ɖe xexea me nuwo ŋu o la, woate ŋu able wò dzi bɔbɔe.Mixlẽ Lododowo 14:15; Yer. 17:9.

15, 16. Ame kawoe ate ŋu aɖo aɖaŋu nyuiwo na wò ku ɖe dɔ si nàwɔ ŋu?

15 Ne ènya dɔ vovovo siwo nàte ŋu akpɔ awɔ ko la, ele be nàxɔ aɖaŋuɖoɖo nyuiwo. (Lod. 1:5) Ame kawoe ate ŋu akpe ɖe ŋuwò be nàtsɔ Biblia me gɔmeɖosewo ada dɔwɔɖui vovovoawo akpɔ? Woawoe nye ame siwo lɔ̃a Yehowa, ame siwo lɔ̃ wò, eye wonya wò nyuie henya nɔnɔme si me nèle. Ðo to wo, elabena woakpe ɖe ŋuwò nàkpɔ dɔ siwo nàte ŋu awɔ le wò ŋutete nu be nàɖo wò taɖodzinuwo gbɔ. Ðewohĩ nya siwo woagblɔ akpe ɖe ŋuwò nàgbugbɔ ŋku alé ɖe wò taɖodzinuwo ŋu. Ne dziwòlawo lɔ̃ Yehowa la, ke enyo ŋutɔ, elabena woate ŋu akpe ɖe ŋuwò geɖe. Miaƒe hamemetsitsiwo hã nye ame siwo dze afia mɔ wò. Hekpe ɖe eŋu la, ɖo dze kple mɔɖelawo kple dzikpɔla mɔzɔlawo. Bia wo be, nu ka tae wotiae be yewoawɔ ɣeyiɣiawo katã ƒe subɔsubɔdɔa? Aleke wodze mɔɖeɖedɔa gɔme? Aleke wowɔna kpɔa wo ɖokuiwo dzi? Yayra kawo kpɔm wole?Lod. 15:22.

16 Ame siwo nya wò nyuie la ate ŋu aɖo aɖaŋu siwo me nunya le na wò. Le kpɔɖeŋu me, tsɔe be èdi be yeadzudzɔ sekɛndrisuku (lycée) ale be nàwɔ mɔɖeɖedɔa le esi nèsusu be sukudede sesẽ akpa ta. Ame si lɔ̃ wò ate ŋu akpɔ susu si koŋ tae nèdi be yeadzudzɔ sukua, eye wòakpe ɖe ŋuwò nàkpɔe be veviedodo le sukunusɔsrɔ̃ me ate ŋu akpe ɖe ŋuwò nàsrɔ̃ kutrikuku, si nye nɔnɔme vevi aɖe si hiã ne èdi be yeasubɔ Yehowa ɖaa tegbee.Ps. 141:5; Lod. 6:6-10.

17. Dɔwɔɖui kawo tɔgbie wòle be míaƒo asa na?

17 Yehowa subɔla ɖe sia ɖe ate ŋu ado go nɔnɔme sesẽ siwo ate ŋu agbɔdzɔ eƒe xɔse me ahatee ɖa tso Yehowa gbɔ. (1 Kor. 15:33; Kol. 2:8) Gake afɔku siwo ate ŋu agbɔdzɔ ame ƒe xɔse me la bɔ ɖe dɔ aɖewo me wu ɖewo. Ðe nɔvi aɖewo le miaƒe nutoa me siwo ƒe “xɔse dome gblẽ abe tɔdziʋu si gbã la ene” le dɔwɔɖui si wotia ta? (1 Tim. 1:19) Nunya anɔ eme be nàƒo asa na dɔwɔɖui ɖe sia ɖe si ate ŋu ava gblẽ ƒomedodo si le wò kple Mawu dome.Lod. 22:3.

SUBƆ YEHOWA LE WÒ SƆHƐME KPLE DZIDZƆ

18, 19. Nu kae nàwɔ ne didia mele mewò be nàwɔ geɖe le Yehowa subɔsubɔ me o?

18 Ne èdi ŋutɔŋutɔ be yeasubɔ Yehowa la, ekema wɔ mɔnukpɔkpɔ siwo ʋu ɖi na wò le mawusubɔsubɔ me le wò sɔhɛmenɔɣi ŋu dɔ bliboe. Wɔ tiatia nyui siwo ana nàsubɔ Yehowa kple dzidzɔ le ɣeyiɣi vevi siawo me.Ps. 148:12, 13.

19 Ke nu kae nàwɔ ne didia mele mewò be nàwɔ geɖe le Yehowa subɔsubɔ me o? Do ŋusẽ nu nàtu wò xɔse ɖo. Esi apostolo Paulo ɖe nu siwo wòwɔ be Mawu yrae me vɔ la, egblɔ be: “Ne susu bubu aɖe le mia si le nane ŋu la, Mawu aɖe nɔnɔme si ŋu meƒo nu le va yi la afia mi. Aleke kee wòɖale o, afi ka kee míewɔ ŋgɔyiyi se ɖo o, mina míayi ŋgɔ tẽe le ɖoɖo nu le mɔ ma ke nu.” (Flp. 3:15, 16) Yi edzi nànɔ ŋugble dem le Mawu ƒe lɔlɔ̃ kple eƒe aɖaŋuɖoɖo siwo me nunya le la ŋu. Yehowa ye dze nyuie wu akpe ɖe ŋuwò nàwɔ tiatia nyuitɔwo le wò sɔhɛme.