Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  January 2014

“Wò Fiaɖuƒe Nava”—Gake Ɣekaɣie?

“Wò Fiaɖuƒe Nava”—Gake Ɣekaɣie?

‘Ne miekpɔ nu siawo katã la, minyae be egogo, ɛ̃, ele ʋɔtruawo nu.MAT. 24:33.

1, 2. (a) Nu ka gbɔe nu si numekulawo yɔna be ŋkuagbã ƒomevi aɖe la tsona? (b) Nu kae míenya tso Mawu Fiaɖuƒea ŋu?

ÀNYA de dzesii be nu siwo dzi ame siwo kpɔ nudzɔdzɔ aɖe teƒe ɖoa ŋkui la toa vovo tso wo nɔewo gbɔ zi geɖe. Nenema kee wòtea ŋu sesẽna na ame be wòaɖo ŋku nya siwo tututu ɖɔkta gblɔ nɛ esi wòdoe kpɔ vɔ la dzi. Alo ɖewohĩ ame aɖe anɔ eƒe safui alo gaŋkui dim ʋuu do kpoe, evɔ ele ŋkukpɔƒe hafi. Kpɔɖeŋu siawo katã ɖo kpe nu si numekulawo yɔna be ŋkuagbã ƒomevi aɖe la dzi; esia dzɔna ne míedi be míawɔ nu vovovowo le ɣeyiɣi ɖeka me. Edze ƒãa be nu ɖeka ŋu koe míaƒe susua ate ŋu anɔ bliboe le ɣeyiɣi ɖeka me.

2 Le xexea me nudzɔdzɔwo gome la, ŋkuagbã ma tɔgbi le fu ɖem na ame geɖewo egbea. Ðewohĩ woalɔ̃ ɖe edzi be nuwo trɔ le xexea me ale gbegbe tso ƒe 1914 me, gake womele nu si nudzɔdzɔ siawo fia ŋutɔŋutɔ la kpɔm dze sii o. Mí Biblia nusrɔ̃viwo ya míenyae be Mawu Fiaɖuƒea va le ƒe 1914 me esime woɖo Yesu Fia le dziƒo. Gake míenyae hã be gbedodoɖa si nye, ‘Wò fiaɖuƒe nava. Wò lɔlɔ̃nu nava eme le anyigba dzi abe ale si wòle le dziƒo ene’ la ŋu ɖoɖo lɔ nu geɖe ɖe eme wu ema. (Mat. 6:10) Edze ƒãa be woaɖo gbedodoɖa ma ŋu bliboe ne woɖe nuɖoanyi vɔ̃ɖi sia ɖa. Ne esia dzɔ vɔ ko hafi woawɔ Mawu ƒe lɔlɔ̃nu le  anyigba dzi abe ale si wole ewɔm le dziƒo ene.

3. Aleke Mawu ƒe Nya la sɔsrɔ̃ kpena ɖe mía ŋui?

3 Esi míesrɔ̃a Mawu ƒe Nyaa edziedzi ta la, míekpɔe be nyagblɔɖiwo le eme vam fifia. Gake mele alea le ame geɖe gome o. Woƒo wo ɖokuiwo ɖe woƒe gbe sia gbe dɔwo kple nu bubuwo yome titi me ale gbegbe be womete ŋu le kpeɖodzi gbogbo siwo ɖee fia be Kristo le dzi ɖum tso keke ƒe 1914 me ke, eye be eteƒe madidi o ahe Mawu ƒe ʋɔnudɔdrɔ̃ avɛ la kpɔm kura o. Ne ƒe geɖee nye esia nèle Mawu subɔm la, bia ɖokuiwò be: ‘Ðe megaka ɖe edzi kokoko be xexe sia ƒe nuwuwu gogo eye be nu siwo le dzɔdzɔm le anyigba dzi ɖo kpe esia dzia?’ Ne nyitsɔ laa koe nèva zu Ðasefo gɔ̃ hã la, nu ka ŋue wò susu le? Aleke kee nèɖo nya siawo ŋui o, na míadzro susu vevi etɔ̃ siwo tae míate ŋu aka ɖe edzi bliboe be eteƒe madidi o, Fia si Mawu ɖo la ana woawɔ Mawu ƒe lɔlɔ̃nu le anyigba dzi bliboe la me.

SƆDOLAWO DO

4, 5. (a) Nu ka wɔm Yesu le tso ƒe 1914 me? (Kpɔ nɔnɔmetata si le nyati sia ƒe gɔmedzedze.) (b) Nu kae sɔdola etɔ̃awo nye kpɔɖeŋu na, eye aleke esia le eme vamee?

4 Susu gbãtɔe nye be, le ƒe 1914 me la, woɖo Yesu Kristo zi dzi le dziƒo. Eye wogblɔ tso eŋu le nyagblɔɖia me be ele sɔ ɣi dom. Enumake edo go yi be yeawu yeƒe aʋadziɖuɖua nu to Satana ƒe xexea tsɔtsrɔ̃ me. (Mixlẽ Nyaɖeɖefia 6:1, 2.) Nyagblɔɖi si le Nyaɖeɖefia ta 6 na míekpɔe be ne Mawu Fiaɖuƒea dze dziɖuɖu gɔme la, xexea me ƒe nɔnɔmewo agblẽ ɖe edzi kabakaba—aʋawɔwɔ, nuɖuɖu ƒe veve, dɔvɔ̃wo kple nu bubu siwo wua amewo adzi ɖe edzi wu tsã. Wotsɔ sɔdola etɔ̃ siwo kplɔ Yesu Kristo ɖo tututu la wɔ esiawo ƒe kpɔɖeŋui.Nyaɖ. 6:3-8.

5 Abe ale si wogblɔe ɖi ene la, ‘woɖe ŋutifafa ɖa le anyigba dzi.’ Esia dzɔ togbɔ be dukɔwo do ŋugbe be yewoawɔ dɔ asi-le-asi-me be ŋutifafa nava hã. Xexemeʋa I nye aʋa gã gblẽnuwo ƒe gɔmedzedze ko, abe ale si xexea me nudzɔdzɔwo ɖo kpe edzi ene. Eye togbɔ be xexea wɔ ŋgɔyiyi le ganyawo kple dzɔdzɔmeŋutinunya me tso ƒe 1914 me hã la, nuɖuɖu gale vevem le xexea me kokoko. Gakpe ɖe eŋu la, ame kae malɔ̃ ɖe edzi be ‘dɔvɔ̃’ ƒomevi vovovowo, dzɔdzɔmefɔkuwo kple afɔku bubuwo yi edzi le ame miliɔn geɖe ƒe agbe ɖem ɖa ƒe sia ƒe o? Ale si afɔku siawo nu sẽe, ale si wodzɔna edziedzi kple ale si wogblẽa nui la tɔgbi aɖeke medzɔ kpɔ le amegbetɔwo ƒe ŋutinya me o. Ðe nèkpɔ nu si esiawo fia dze siia?

Nɔnɔmeawo le gbegblẽm ɖe edzi le xexea me esi sɔdolaawo le du dzi (Kpɔ memama 4, 5)

6. Ame kawoe de dzesi Biblia me nyagblɔɖia me vava, eye nu kae esia ʋã wo wowɔ?

6 Xexemeʋa I kple dɔ vɔ̃ si nye Spaniatɔwo ƒe dzamezã he ame geɖe ƒe susu ɣemaɣi. Gake Kristotɔ amesiaminawo ya nɔ mɔ kpɔm vevie be Trɔ̃subɔlawo ƒe azã alo “dukɔwo ƒe ɣeyiɣi ɖoɖiawo” awu enu le ƒe 1914 me. (Luka 21:24) Womenya nu si tututu adzɔ ya o. Ke hã wonya be ƒe 1914 anye ƒe ɖedzesi aɖe le Mawu Fiaɖuƒea ƒe ŋutinya me. Esi wonya kpɔ ale si Biblia me nyagblɔɖia va eme ko la, woɖe gbeƒã dzonɔamemetɔe be Mawu ƒe Fiaɖuƒea dze dziɖuɖu gɔme. Esia na woti Fiaɖuƒegbeƒãɖela mawo dometɔ geɖe yome vevie. Ale si woti wo yome le dukɔ geɖe me la ŋutɔ hã nye nyagblɔɖiwo me vava. Le ƒe siwo kplɔe ɖo me la, Fiaɖuƒea ƒe futɔwo ɖonɛ koŋ “tsɔa hiãkame ɖoa anyi ɖe sea teƒe,” alo wozãa sea tsɔ wɔa fu amewo. Wosẽ ŋuta le mía nɔviwo ŋu, de wo gaxɔ me, eye wohe wo ɖe ati ŋu, woda tu wo, alo tso ta le wo nu gɔ̃ hã.Ps. 94:20; Nyaɖ. 12:15.

7. Nu ka tae ame akpa gãtɔ mese nu si xexea me nudzɔdzɔwo fia gɔme o?

 7 Esi kpeɖodzi gbogbowo li be woɖo Mawu Fiaɖuƒea anyi xoxo le dziƒo la, ke nu ka tae ame akpa gãtɔ mekpɔe dze sii o? Nu ka tae amewo mete ŋu le ekpɔm be xexea me nudzɔdzɔwo nye Biblia me nyagblɔɖiwo me vava abe ale si Mawu ƒe amewo le gbeƒã ɖemee ƒe geɖee nye esia ene o? Ðe wòanye be ame akpa gãtɔ ƒe susu katã le nu siwo wokpɔna la ko ŋua? (2 Kor. 5:7) Ðe wotsi dzi ɖe woƒe gbe sia gbe dɔwo ŋu ale gbegbe be womele nu siwo wɔm Mawu le la kpɔm oa? (Mat. 24:37-39) Nu siwo Satana ƒe xexea dona ɖe ŋgɔ lae xɔ wo dometɔ aɖewo ƒe susu mea? (2 Kor. 4:4) Míehiã xɔse kple xɔseŋkuwo hafi ate ŋu akpɔ nu siwo wɔm Mawu Fiaɖuƒea le la adze sii. Dzidzɔ ka gbegbe nye esi be nu siwo le dzɔdzɔm la meto ŋku gbagbã dzi na mí o!

AME VƆ̃ÐIWO LE VƆ̃ÐIVƆ̃ÐIM ÐE EDZI

8-10. (a) Aleke 2 Timoteo 3:1-5 le eme vam? (b) Nu ka tae míate ŋu agblɔ be ame vɔ̃ɖiwo le vɔ̃ɖivɔ̃ɖim ɖe edzi?

8 Susu evelia si ta míeka ɖe edzi be eteƒe madidi hafi Mawu Fiaɖuƒea nava ɖu anyigba la dzi o ye nye be: Ame vɔ̃ɖiwo le vɔ̃ɖivɔ̃ɖim ɖe edzi le egbe xexea me. Ƒe alafa ɖeka kloe ye nye esia si míele nɔnɔme siwo ŋu nya wogblɔ ɖi le 2 Timoteo 3:1-5 la teƒe kpɔm. Ne míagblɔe la, ɖeko nɔnɔme siawo le gbegblẽm hele ta kekem ɖe edzi. Wò hã èkpɔe nenema? Mina míadzro kpɔɖeŋu aɖewo siwo ɖe esia fia la me.Mixlẽ 2 Timoteo 3:1, 13.

9 Tsɔ nu siwo amewo abu nu tɔŋku le ƒe 1940 alo ƒe 1950-awo me sɔ kple nu siwo le edzi yim egbea le dɔwɔƒewo, modzakaɖeɖewo, kamedefefewo kple awudodo me ŋu kpɔ. Ŋutasẽnuwɔwɔ si gbɔ eme kple agbe ƒaƒã nɔnɔ xɔ aƒe ɖe afi sia afi. Amewo dzea agbagba be yewoana amewo nakpɔe be yewoe vɔ̃ɖi wu, yewoe wɔa ŋukpenanu wu, alo yewoƒe tagbɔe sẽ wu. Wobua television dzi wɔna siwo wobuna le ƒe 1950-awo me be womesɔ kura o la egbea be wosɔ be ƒomewo nakpɔ atsɔ aɖe modzakae. Eye ame geɖe nyae be ŋutsu siwo dɔna kple ŋutsuwo alo nyɔnu siwo dɔna kple nyɔnuwo le ŋusẽ gã kpɔm ɖe  filmwo kple awudodowo dzi, eye wole woƒe agbenɔnɔ ƒaƒãwo dom ɖe ŋgɔ. Aleke gbegbe míeda akpee nye esi be míenya ale si Mawu bua nu siawoe!Mixlẽ Yuda 14, 15.

10 Alo tsɔ sɔhɛwo ƒe nuwɔna siwo wobuna le ƒe 1950-awo me be enye amemabumabu kple aglãdzedze sɔ kple nu siwo le dzɔdzɔm le sukukpowo dzi egbea la kpɔ. Ɣemaɣiwo la, dzilawo tsia dzi ɖe wo viwo hekpɔa egbɔ be womele sigaret yɔm, le aha sesẽ nom alo le ɣe manyatalenuwo ɖum o. Gake egbea, nu dovoɖinamewo ŋuti nyatakaka siwo míesena la ƒe ɖewoe nye: Sukuvi ƒe-15-vi aɖe ɖe tu ɖe eƒe sukuxɔmehatiwo dzi, ewu ame 2 hede abi ame 13 ŋu. Ƒewuiviwo ƒe ha aɖe siwo mu aha la wu nyɔnuvi ƒe-asieke-vi aɖe tagbɔsesẽtɔe eye woƒo fofoa kple nɔvia kutɔkutɔe. Woka nya ta le Asia-dukɔ aɖe me be, hlɔ̃donu siwo wowɔ le ƒe ewo siwo va yi me la ƒe afã tso sɔhɛwo gbɔ. Ðe ame aɖe ate ŋu agblɔ wòasɔ be nuwo mele vovlom ɖe edzi fifia wu oa?

11. Nu ka tae ame geɖe mekpɔnɛ dzea sii be nuwo le gbegblẽm ɖe edzi o?

11 Apostolo Petro gblɔe wòsɔ be: “Le ŋkeke mamlɛawo me la, fewuɖulawo ava kple woƒe fewuɖuɖu, eye woawɔ nu le woawo ŋutɔwo ƒe nudzodzrowo nu, ahanɔ gbɔgblɔm be: ‘Afi ka eƒe anyinɔnɔ sia si ŋugbe wodo la le? Kpɔ ɖa, tso ŋkeke si dzi mía tɔgbuiwo dɔ alɔ̃ le ku me la, nuwo katã le edzi yim abe ale si tututu ko wonɔ tso nuwɔwɔ ƒe gɔmedzedze la ene.’” (2 Pet. 3:3, 4) Nu ka tae ame aɖewo wɔa nu alea? Edze abe zi ale si nane bɔe la, zi nenemae amewo megatsɔa ɖeke le eme o. Ate ŋu awɔ moya na mí ne mía xɔlɔ̃ vevi aɖe ƒe agbenɔnɔ trɔ zi ɖeka kpata, gake ɖewohĩ mímade dzesii ne amewo ƒe nɔnɔme kple agbenɔnɔ le gbegblẽm vivivi ɣeyiɣi didi aɖe o. Ke hã, agbe nyui nɔnɔ ƒe toyiyi vivivi nye afɔku gã.

12, 13. (a) Nu ka tae mele be mɔkpɔkpɔ nabu ɖe mí le xexea me nudzɔdzɔwo ta o? (b) Nu ka nyanyae akpe ɖe mía ŋu míanɔ te ɖe ‘nɔnɔme sesẽwo’ nu?

12 Apostolo Paulo xlɔ̃ nu mí be, “le ŋkeke mamlɛawo me la,” ‘nɔnɔmeawo asesẽ.’ (2 Tim. 3:1) Gake mefia be míate ŋu anɔ te ɖe wo nu o. Le Yehowa, eƒe gbɔgbɔa kple Kristo hamea ƒe kpekpeɖeŋu me la, míate ŋu aɖu vɔvɔ̃ dzi ahalé mɔkpɔkpɔ me ɖe asi. Míate ŋu ayi edzi awɔ nuteƒe. Mawu ana “ŋusẽ si gbɔ dzɔdzɔmetɔ ŋu” la mí.2 Kor. 4:7-10.

13 De dzesii be Paulo dze eƒe ŋkeke mamlɛawo ŋuti nyagblɔɖia gɔme be, “nya esia be.” Nya mawo ɖo kpe edzi be nyagblɔɖia ava eme godoo. Ðikeke mele eme o be ame mavɔ̃mawuwo ayi edzi anɔ vɔ̃ɖivɔ̃ɖim ɖe edzi va se ɖe esime Yehowa naɖe wo ɖa. Ŋutinyawo ɖee fia be, ɣesiaɣi si agbe nyui nɔnɔ yi to ʋĩi ko la, habɔbɔwo gbãna alo dukɔ blibowo tsrɔ̃na. Ale si gbegbe agbe nyui nɔnɔ yi to le xexea me egbea la tɔgbi medzɔ kpɔ le ŋutinya me o. Ame geɖe ŋea aɖaba ƒua nu si esia fia la dzi, gake ele be nu ɖedzesi siwo le dzɔdzɔm tso ƒe 1914 me la nana míaka ɖe edzi bliboe be Mawu ƒe Fiaɖuƒea ava ɖe vɔ̃ɖinyenye ɖe sia ɖe ɖa kpuie.

DZIDZIME SIA NU MELE YIYI GE O

14-16. Susu etɔ̃lia ka tae míate ŋu aka ɖe edzi be Mawu Fiaɖuƒea ‘ava’ kpuie?

14 Mawu ƒe amewo ƒe ŋutinya na míekpɔ susu etɔ̃lia si tae míaka ɖe edzi be nuwuwua gogo. Le kpɔɖeŋu me, do ŋgɔ na Mawu Fiaɖuƒe ɖoɖo anyi le dziƒo la, amesiaminawo ƒe ƒuƒoƒo wɔnuteƒe aɖe nɔ Mawu subɔm veviedodotɔe. Esi nu siwo wonɔ mɔ kpɔm na be adzɔ le ƒe 1914 me dometɔ aɖewo meva eme o la, nu kae wowɔ? Wo dometɔ geɖe wɔ nuteƒe le dodokpɔwo kple yometitiwo me eye woyi edzi subɔ Yehowa. Esi ƒeawo va nɔ yiyim la, wo dometɔ akpa gãtɔ, alo wo katã  kloe, subɔ nuteƒewɔwɔtɔe va se ɖe esime wowu woƒe anyigbadzigbenɔnɔ nu.

15 Le Yesu ƒe nyagblɔɖi si ku ɖe nuɖoanyi sia ƒe nuwuɣi ŋu me la, egblɔ be: “Dzidzime sia nu mele yiyi ge akpɔ o, va se ɖe esime nu siawo katã va eme.” (Mixlẽ Mateo 24:33-35.) Míese egɔme be “dzidzime sia” si ŋu Yesu ƒo nu tsoe la ku ɖe Kristotɔ amesiaminawo ƒe ƒuƒoƒo eve ŋu. Ƒuƒoƒo gbãtɔa nɔ anyi le ƒe 1914 me eye wokpɔ Kristo ƒe anyinɔnɔ ƒe dzesi la enumake. Menye ɖeko ame siwo le ƒuƒoƒo sia me la nɔ agbe le ƒe 1914 me ko o, ke wonye ame siwo wotsɔ gbɔgbɔ si ami na hã abe Mawu viwo ene le ƒe ma me alo do ŋgɔ na ƒe ma.Rom. 8:14-17.

16 “Dzidzime sia” ƒe ƒuƒoƒo eveliae nye Kristotɔ amesiamina siwo va tsò ƒuƒoƒo gbãtɔa me tɔwo ɖo. Menye ɖeko ƒuƒoƒo evelia me tɔwo le agbe le ƒuƒoƒo gbãtɔa me tɔwo ƒe agbenɔɣi ko o, ke wotsɔ gbɔgbɔ kɔkɔe si ami na wo esime ƒuƒoƒo gbãtɔa me tɔwo gakpɔtɔ nɔ anyigba dzi. Eya ta menye amesiamina siwo li egbea dometɔ ɖe sia ɖee le “dzidzime sia” si ŋu Yesu ƒo nu tsoe la me o. Egbea, ame siwo le ƒuƒoƒo evelia me la zu ame tsitsiwo. Ke hã Yesu ƒe nya siwo dze le Mateo 24:34 la na kakaɖedzi mí be, ne mede ɖeke o la “dzidzime sia” me tɔ aɖewo “nu mele yiyi ge akpɔ o” va se ɖe esime wokpɔ xaxa gã la ƒe gɔmedzedze teƒe. Ele be esia nana míaka ɖe edzi be ɣeyiɣi vi aɖe koe susɔ ne Mawu Fiaɖuƒea ƒe Fia la nava tsrɔ̃ ame vɔ̃ɖiwo eye wòahe xexe yeye si me dzɔdzɔenyenye anɔ la vɛ.2 Pet. 3:13.

KRISTO AWU EƑE AƲADZIÐUÐUA NU KPUIE

17. Aleke míate ŋu aƒo nya tae le susu vevi etɔ̃awo me dzodzro vɔ megbe?

17 Aleke míate ŋu aƒo nya tae le susu vevi etɔ̃ siawo me dzodzro vɔ megbe? Yesu gblɔ na mí be, míate ŋu anya ŋkeke alo gaƒoƒo si tututu dzi nuwuwua ava o—eye míenyae hã o. (Mat. 24:36; 25:13) Gake abe ale si Paulo gblɔe ene la, ‘gaƒoƒo la de xoxo be míanyɔ tso alɔ̃ me.’ (Mixlẽ Romatɔwo 13:11.) Elabena ŋkeke mamlɛawo mee míele fifia. Ne míelé ŋku ɖe Biblia me nyagblɔɖiwo kple nu siwo wɔm Yehowa Mawu kple Yesu Kristo le ŋu la, míakpɔ kpeɖodzi sẽŋu siwo ɖee fia be nuɖoanyi sia ƒe nuwuwu tu aƒe.

18. Nu kae adzɔ ɖe ame siwo gbe be yewomalɔ̃ ɖe Yesu Kristo ƒe dziɖuŋusẽ dzi o la dzi?

18 Eteƒe madidi o, nu siwo Yesu Kristo, aʋadziɖula si le sɔ ɣi dom, awɔ la azii ɖe ame siwo gbe be yewomalɔ̃ ɖe eƒe ŋusẽ gã wɔnukua dzi o la dzi be woakpɔe be yewoda ƒu. Womate ŋu asi le ʋɔnudɔdrɔ̃ si ava wo dzi la nu kura o. Ɣemaɣi la, dzidzi aƒo ame geɖe woado ɣli be: ‘Ame kae ate ŋu anɔ te ɖe enu?’ (Nyaɖ. 6:15-17) Nyaɖeɖefia ta 7 lia ɖo nya sia ŋu. Amesiaminawo kple ame siwo si anyigbadzinɔnɔ ƒe mɔkpɔkpɔ le lae ‘ate ŋu anɔ te ɖe enu,’ le esi Mawu kpɔ ŋudzedze ɖe wo ŋu ta. Ekema alẽ bubuawo ƒe “ameha gã” la atsi agbe le xaxa gã la me.Nyaɖ. 7:9, 13-15.

19. Esi nèka ɖe edzi be nuwuwua tu aƒe ta la, nu kae nèle mɔ kpɔm na?

19 Ne míeyi edzi lé ŋku ɖe Biblia me nyagblɔɖi siwo le eme vam le ɣeyiɣi vevi siawo me ŋu la, Satana ƒe xexea mahe míaƒe susu o. Eye magbã ŋku na mí hã be míagakpɔ nu si xexea me nudzɔdzɔwo fia ŋutɔŋutɔ la adze sii o. Kristo awu eƒe aʋadziɖuɖua nu kpuie nenye be etsrɔ̃ ame mavɔ̃mawuwo ƒe xexe sia le Harmagedon-ʋa si wòawɔ le dzɔdzɔenyenye me la me. (Nyaɖ. 19:11, 19-21) Wò ya bu dzidzɔ si gbegbe míakpɔ ɣemaɣi la ŋu kpɔ!Nyaɖ. 20:1-3, 6; 21:3, 4.