Esime menye ɖevi

Ƒe ewo pɛ koe mexɔ le ƒe 1985 me esime ɖevi siwo wokplɔ tso Cambodia la dometɔ aɖewo va míaƒe suku le Columbus, Ohio, U.S.A. Ðeviawo dometɔ ɖeka doa Eŋlisigbe ɖekaɖeka. Ezã nɔnɔmetatawo tsɔ gblɔ nu dziŋɔ siwo dzɔ le wo de, siwo me wowɔ funyafunya amewo hewu amewo le, kple ale si ame aɖewo te ŋu si le enu la nam. Mefaa avi le zã me ne meɖo ŋku ɖevi mawo dzi. Medi be magblɔ Paradiso kple tsitretsitsi ƒe mɔkpɔkpɔa ŋu nya na wo, gake womese Eŋlisigbea o. Togbɔ be ɖevi koe menye hã la, medi vevie be masrɔ̃ Cambodiagbe ale be mate ŋu afia nu nye sukuhatiwo tso Yehowa ŋu. Nyemenya be tiatia ma si mewɔ ɣemaɣi la ava kpɔ ŋusẽ gã aɖe ɖe dzinye le etsɔme o.

Cambodiagbe sɔsrɔ̃ mele bɔbɔe o. Zi eve sɔŋ meɖoe be mana ta. Gake Yehowa de dzi ƒo nam to dzinyelawo dzi. Le ƒe aɖewo megbe la, nye nufialawo kple nye sukuhatiwo nɔ nya ƒom ɖe nunye be mawɔ tiatia si ana makpɔ dɔ gã aɖe awɔ. Gake medi be mazu mɔɖela boŋ, eya ta le sekɛndrisuku la, metia sukunusɔsrɔ̃ si ana makpɔ dɔ si maxɔ ɣeyiɣi geɖe o ale be mate ŋu aɖo nye taɖodzinua gbɔ. Mewɔ ɖoɖo nye kple mɔɖela aɖewo míeyina ɖaɖea gbeƒã ne mekpã le suku. Azɔ hã mefiaa nu sukuvi siwo le Eŋlisigbe srɔ̃m la le aƒe me, eye esia nye tiatia si va ɖe vi nam ŋutɔ emegbe.

Esi mexɔ ƒe 16 la, mese be Cambodiagbedolawo ƒe ƒuƒoƒo aɖe le Long Beach, California, U.S.A. Meɖi tsa yi afi ma, eye mesrɔ̃ Cambodiagbe xexlẽ. Esi medo le suku teti ko la, medze mɔɖeɖedɔa gɔme, eye meyi edzi nɔ gbeƒã ɖem na Cambodiatɔ siwo le míaƒe nutoa me. Kaka maxɔ ƒe 18 la, menɔ ʋuʋu yi Cambodia ŋu bum. Cambodia gakpɔtɔ nye afɔkuteƒe ɣemaɣi ya, gake menyae be ame miliɔn ewo siwo le afi ma la dometɔ ʋɛ aɖewo koe se Fiaɖuƒeŋutinya nyuia kpɔ. Ɣemaɣi la, hame ɖeka si me gbeƒãɖela 13 le koe nɔ dukɔ bliboa me. Meɖi tsa yi Cambodia zi gbãtɔ esi mexɔ ƒe 19. Ƒe eve megbe la, metiae be maʋu aɖatsi afi ma. Mewɔa dɔ ŋkeke aɖewo abe gbegɔmeɖela kple Eŋlisigbefiala ene tsɔ kpɔa ɖokuinye dzi le gbeƒãɖeɖedɔa me. Esi ƒeawo va nɔ yiyim la, mekpɔ srɔ̃nyɔnu si ƒe taɖodzinuwo sɔ kple tɔnye. Míekpe ɖe Cambodiatɔ geɖe ŋu wotsɔ wo ɖokuiwo ɖe adzɔgbe na Mawu. Esia nana míekpɔa dzidzɔ geɖe.

Yehowa ‘na nu siwo nye dzi di lam.’ (Ps. 37:4) Nusrɔ̃lawɔwɔdɔae nye agbemedɔ si naa dzidzeme ame wu. Le ƒe 16 siwo metsɔ nɔ Cambodia-dukɔa me me la, Yehowa subɔla 13 siwo nɔ afi ma dzi ɖe edzi zu hame 12 kple ƒuƒoƒo 4 fifia!—Abe ale si Jason Blackwell gblɔe ene.