Dzo kpo yi emenuwo dzi

Dzo kpo yi emenu bubu dzi

Dzo kpo yi emenuawo dzi

Yehowa Ɖasefowo

Eʋegbe

Gbetakpɔxɔ—Tata Si Míesrɔ̃na  |  January 2014

Fiaɖuƒea Le Dzi Ðum Ƒe 100 Ye Nye Esia—Vi Ka Ðem Wòle Na Wò?

Fiaɖuƒea Le Dzi Ðum Ƒe 100 Ye Nye Esia—Vi Ka Ðem Wòle Na Wò?

“Yehowa Mawu, Ŋusẽkatãtɔ, [Fia mavɔmavɔtɔ,] wò dɔwɔwɔwo nye gã, eye wowɔ nuku.”NYAÐ. 15:3.

1, 2. Nu kae Mawu Fiaɖuƒea awɔ, eye nu ka tae míeka ɖe edzi be Fiaɖuƒea ava godoo?

LE ƑE 31 M.Ŋ. ƒe adame, le to aɖe si gogo Kapernaum dzi la, Yesu Kristo fia eyomedzelawo be woado gbe ɖa be: “Wò fiaɖuƒe nava.” (Mat. 6:10) Egbea ame geɖe megakana ɖe edzi tututu be Fiaɖuƒea ava o. Gake míawo ya míeka ɖe edzi bliboe be Mawu aɖo gbe si dom míele ɖa be eƒe Fiaɖuƒea nava la ŋu.

2 Yehowa azã Fiaɖuƒea atsɔ aƒo eƒe ƒome si le dziƒo kple anyigba dzi la nu ƒu. Mawu ƒe tameɖoɖo sia ava eme godoo. (Yes. 55:10, 11) Le nyateƒe me la, Yehowa zu Fia le míaƒe ŋkekea me xoxo! Nu dodzidzɔname siwo dzɔ le ƒe alafa ɖeka siwo va yi me la ɖo kpe esia dzi. Mawu le dɔ gã wɔnukuwo wɔm na etevi wɔnuteƒe miliɔn geɖewo. (Zak. 14:9; Nyaɖ. 15:3) Ke hã Yehowa ƒe Fia zuzu to vovo na Mawu Fiaɖuƒea ƒe vava si ŋu Yesu fia mí be míado gbe ɖa le. Vovototo kae le wo dome? Eye vi kawo ɖem wòle na mí?

FIA SI YEHOWA ÐO ZI DZI LA TSO ÐE DƆ ŊU

3. (a) Ɣekaɣie woɖo Yesu zi dzi abe Fia ene, eye le afi ka? (b) Aleke nàte ŋu aɖe eme be Fiaɖuƒea dze dziɖuɖu gɔme le ƒe 1914 me? (Kpɔ etenuŋɔŋlɔa.)

3 Ƒe ʋɛ aɖewo do ŋgɔ na ƒe 1900 la, nyagblɔɖi aɖe si Daniel ŋlɔ ɖi ƒe 2,500 ye nye esi va yi la me va nɔ kɔkɔm na Mawu ƒe amewo. Nyagblɔɖia gblɔ be: “Le fia mawo ŋɔli la dziƒo ƒe  Mawu la aɖo fiaɖuƒe aɖe anyi, si matsrɔ̃ gbeɖegbeɖe o.” (Dan. 2:44) Biblia Nusrɔ̃viwo nɔ gbeƒã ɖem ƒe geɖe be ƒe 1914 anye ƒe ɖedzesi aɖe. Le ƒe mawo me la, ame geɖe nɔ mɔ kpɔm na nu nyuiwo. Agbalẽŋlɔla aɖe gblɔ be: “Mɔkpɔkpɔ kple nu nyuiwo ƒe ŋugbedodo yɔ xexea me le ƒe 1914 me.” Gake esi Xexemeʋa I dze egɔme le ƒe ma ƒe nuwuwu lɔƒo la, Biblia ƒe nyagblɔɖiwo va eme. Dɔwuame, anyigbaʋuʋu kple dɔvɔ̃ siwo kplɔ esia ɖo kpakple Biblia me nyagblɔɖi bubuwo me vava ɖo kpe edzi be Yesu Kristo si nye Mawu Fiaɖuƒea ƒe Fia dze fiaɖuɖu gɔme le dziƒo le ƒe 1914 me. * Yehowa zu Fia le mɔ yeye nu esi wòɖo Via zi dzi wònye Mesia Fia!

4. Nu kae Fia si Mawu ɖo yeyee la wɔ gbã? Eyome ame kawo ŋue wòtrɔ susu ɖo?

4 Nu gbãtɔ si Fia si Mawu ɖo yeyee wɔe nye be eho aʋa ɖe Satana, si nye Fofoa ƒe Futɔ gãtɔ la ŋu. Yesu kple eƒe dɔlawo nya Abosam kple eƒe gbɔgbɔ vɔ̃wo ɖa le dziƒo. Esia na wokpɔ dzidzɔ gã le dziƒo, gake wònye xaxaɣi gã na anyigba dzi nɔlawo ya. (Mixlẽ Nyaɖeɖefia 12:7-9, 12.) Eyome Fia la trɔ susu ɖe etevi siwo le anyigba dzi la ŋu be yeakɔ wo ŋu, ana hehe wo ahawɔ ɖoɖo nyuiwo na wo hena Mawu ƒe lɔlɔ̃nu wɔwɔ. Mina míadzro ale si Fiaɖuƒea teviwo lɔ̃ faa wɔ ɖe mɔfiameawo dzi la me ahakpɔ nu si míasrɔ̃ tso eme ɖa.

MESIA FIA LA ETEVI WƆNUTEƑEWO ŊU

5. Nuwo ŋuti kɔkɔ kae yi edzi tso ƒe 1914 me va ɖo ƒe 1919 ƒe gɔmedzedze?

5 Esi Fia Yesu si woɖo zi dzi la kɔ dziƒo ŋu tso Satana kple eƒe gbɔgbɔ vɔ̃wo ƒe ŋusẽkpɔɖeamedzi gbegblẽa me vɔ la, Yehowa na wògbugbɔ ŋku lé ɖe eyomedzela siwo le anyigba dzi ƒe gbɔgbɔmenɔnɔme ŋu hekɔ wo ŋu. Nyagblɔɖila Maleaxi yɔ esia be nuwo ŋuti kɔkɔ. (Mal. 3:1-3) Ŋutinyawo ɖee fia be esia va eme tso ƒe 1914 me va ɖo ƒe 1919 ƒe gɔmedzedze. * Eya ta ele be míanɔ dzadzɛ, alo anɔ kɔkɔe, hafi míate ŋu anɔ Yehowa ƒe xexea me katã ƒe ƒomea me. (1 Pet. 1:15, 16) Mele be míaɖe mɔ alakpasubɔsubɔ alo xexe sia ƒe dunyahehe naƒo ɖi mí le mɔ aɖeke nu o.

6. Aleke gbɔgbɔmenuɖuɖu wɔna sua mía si? Eye nu ka tae nuɖuɖu sia le vevie ŋutɔ?

6 Yesu zã dziɖuŋusẽ si wonae la tsɔ ɖo ‘kluvi nuteƒewɔla kple aɖaŋudzela’ la. Kluvi sia ana gbɔgbɔmenuɖuɖu nyui ame siwo katã ƒo ƒu nye “alẽha ɖeka” le Yesu ƒe kpɔkplɔ te la edziedzi. (Mat. 24:45-47; Yoh. 10:16) Tso ƒe 1919 me la, nɔviŋutsu amesiaminawo ƒe ƒuƒoƒo sue aɖe tsɔ agbanɔamedzi gã si nye nuɖuɖunana “aƒemesubɔviwo” la nuteƒewɔwɔtɔe. Gbɔgbɔmenuɖuɖu gbogbo siwo kluvia nana mí kpena ɖe mía ŋu míetsina le xɔse me. Enana míeɖonɛ kplikpaa wu be míanɔ dzadzɛ le gbɔgbɔ me, le agbenɔnɔ me, le susu me kple ŋutilã me. Gbɔgbɔmenuɖuɖu sia nyia mí eye wònana míesua te be míakpɔ gome le dɔ vevitɔ si wɔm míele le anyigba dzi egbea la me bliboe. Ðe nèle gbɔgbɔmenuɖuɖu siawo ŋu dɔ wɔm bliboea?

FIA LA LE HEHE NAM ETEVIWO BE WOAÐE GBEƑÃ LE XEXEA ME GODOO

7. Dɔ vevi ka gɔmee Yesu dze esime wònɔ anyigba dzi, eye ɣekaɣie wòayi edzi ase ɖo?

7 Esi Yesu dze eƒe anyigbadzisubɔsubɔdɔa gɔme la, egblɔ be: “Ele be magblɔ Mawu fiaɖuƒe ŋuti nya nyui la na du bubuwo hã, elabena esia tae wodɔm ɖo.” (Luka 4:43) Yesu wɔ gbeƒãɖeɖedɔ sia kutrikukutɔe ƒe etɔ̃ kple afã, eye wòtsɔe ɖo nɔƒe vevitɔ le eƒe agbe me. Efia  eyomedzelawo be: ‘Ne miele yiyim la, miɖe gbeƒã be: “Dziƒofiaɖuƒe la gogo.”’ (Mat. 10:7) Esi wofɔ Yesu ɖe tsitre megbe la, egblɔe ɖi be ye yomedzelawo akaka nya la “va se ɖe anyigba ƒe seƒe ke.” (Dɔw. 1:8) Edo ŋugbe na wo be ye ŋutɔ yeanɔ megbe na dɔa va se ɖe nuɖoanyi sia ƒe nuwuɣi.Mat. 28:19, 20.

8. Aleke Fia la ʋã etevi siwo le anyigba dzi ɖe dɔ ŋu?

8 Kaka ƒe 1919 naɖo la, gɔmesese yeye va le “fiaɖuƒe ŋuti nya nyui” la ŋu. (Mat. 24:14) Fia la nɔ dzi ɖum le dziƒo, eye wòƒo etevi siwo ŋu wòkɔ le anyigba dzi la ƒe ƒuƒoƒo sue aɖe nu ƒu. Yesu tevi siawo wɔ ɖe se si wòde eme kɔ be, woaɖe gbeƒã Fiaɖuƒe si Mawu ɖo anyi ŋuti nya nyuia le anyigba katã dzi la dzi dzonɔamemetɔe! (Dɔw. 10:42) Le kpɔɖeŋu me, Fiaɖuƒea dzi dela siwo anɔ 20,000 kloe de dukɔwo dome takpekpe si wowɔ le Cedar Point, Ohio, U.S.A., le September 1922 me. Wò ya kpɔ ale si woanya kpɔ dzidzɔe le susu me ɖa esi Nɔviŋutsu Rutherford ƒo nuƒo si ƒe tanyae nye “Fiaɖuƒe La,” eye wògblɔ be: “Mikpɔ ɖa, Fia la le dzi ɖum! Miawoe nye eƒe nyakakalawo. Eya ta miɖe gbeƒã, miɖe gbeƒã, miɖe gbeƒã Fia la kple eƒe fiaɖuƒe la.” Le ŋufɔke la, takpekpea vala 2,000 kpɔ gome le “Subɔsubɔ Ŋkeke” tɔxɛ aɖe me esi woyi ɖaɖe gbeƒã le aƒewo me le keke teƒe siwo didi kilometa 72 tso takpekpewɔƒea gbɔ ke gɔ̃ hã. Esia ʋã nɔvinyɔnu aɖe wògblɔ be: “Nyemaŋlɔ yɔyɔ si nye be míaɖe gbeƒã Fiaɖuƒea, kple vavalawo ƒe dzonɔameme be o!” Menye eya ɖeka koe se le eɖokui me alea o.

9, 10. (a) Ðoɖo kawoe wowɔ be woatsɔ ana hehe Fiaɖuƒegbeƒãɖelawo? (b) Aleke hehe sia ɖe vi na wò ŋutɔe?

9 Kaka ƒe 1922 naɖo la, Fiaɖuƒegbeƒãɖela siwo wu 17,000 nɔ gbeƒã ɖem veviedodotɔe le dukɔ 58 me le xexea me godoo. Ke hã, wohiã hehe. Le ƒe alafa gbãtɔ me la, Fia si Mawu tia la na mɔfiame siwo me kɔ eƒe nusrɔ̃lawo le nya si woaɖe gbeƒãe, afi si woaɖe gbeƒã le kple ale si woaɖe gbeƒãe ŋu. (Mat. 10:5-7; Luka 9:1-6; 10:1-11) Nenema kee egbea hã Yesu kpɔ egbɔ be wole mɔfiame kple dɔwɔnu siwo hiã la nam ame siwo katã le gome kpɔm le Fiaɖuƒegbeƒãɖeɖedɔa me ale be woawɔ dɔa memie. (2 Tim. 3:17) Yesu to Kristo hamea dzi le hehe nam eteviwo hena ɖaseɖiɖidɔa wɔwɔ. Mɔ siwo dzi tom wòle la dometɔ ɖekae nye Teokrasi Subɔsubɔ Suku, si wɔm wole le hame siwo wu 111,000 me le xexea me godoo. Suku sia kpe ɖe gbeƒãɖela siwo wu miliɔn adre sɔŋ ŋu wosu te nyuie be woaɖe gbeƒã ahafia nu “ame ƒomeviwo katã” wòade dzi gbɔ na wo.Mixlẽ 1 Korintotɔwo 9:20-23.

10 Tsɔ kpe ɖe Teokrasi Subɔsubɔ Sukua ŋu la, woɖo Bibliasrɔ̃suku bubuwo be woana hehe hamemetsitsiwo, mɔɖelawo,  nɔviŋutsu trewo, Kristotɔ srɔ̃tɔwo, Alɔdzekɔmiti me tɔwo kple wo srɔ̃wo, dzikpɔla mɔzɔlawo kple wo srɔ̃wo kpakple dutanyanyuigblɔlawo. * Atsu kple asi aɖe siwo de Kristotɔ Srɔ̃tɔwo Ƒe Bibliasrɔ̃sukua la ɖe woƒe ŋudzedzekpɔkpɔ gblɔ ale: “Hehe tɔxɛ si míexɔ la na míaƒe lɔlɔ̃ na Yehowa gade to ɖe edzi, eye wòdzra mí ɖo nyuie be míakpe ɖe amewo ŋu.”

11. Nu ka tae Satana ƒe amedzidzedze mate ŋu agblẽ Fiaɖuƒegbeƒãɖelawo ƒe dɔa me o?

11 Míaƒe futɔ Satana hã le Fiaɖuƒegbeƒãɖeɖe kple nufiafiadɔ si le ta kekem ɖe edzi la katã teƒe kpɔm. Ele amedzidzedze tẽe kple esi menya kpɔna dzea sii bɔbɔe o la zãm be yeatsɔ agblẽ Fiaɖuƒegbedeasia dome ahana gbeƒãɖelawo natɔ te dɔa. Gake futɔ la do kpo nu. Yehowa ɖo Via ɖoƒe kɔkɔ “wòƒo dziɖuɖu ɖe sia ɖe kple amegãnyenye kple ŋusẽ kple aƒetɔnyenye . . . ta sãsãsã.” (Ef. 1:20-22) Yesu le ŋusẽ si wonae abe Fia ene la zãm tsɔ le eƒe nusrɔ̃lawo ta kpɔm hele mɔ fiam wo be woawɔ ye Fofo ƒe lɔlɔ̃nu ade goe. * Wole gbeƒã ɖem nya nyuia hele Yehowa ƒe mɔwo fiam dzianukwaretɔ miliɔn geɖewo. Mɔnukpɔkpɔ gã kae nye esi wònye na mí be míakpɔ gome le dɔ ɖedzesi sia me!

FIA LA WƆ ÐOÐO NYUIWO NA ETEVIWO HENA DƆ GEÐE WƆWƆ

12. Asitɔtrɔ kawoe wowɔ le hakplɔɖoɖowo ŋu tso esime woɖo Fiaɖuƒea anyi?

12 Tso keke esime woɖo Fiaɖuƒea anyi le ƒe 1914 me la, Fia la yi edzi le asi trɔm le Mawu subɔlawo ƒe hakplɔɖoɖo ŋu wòle nyonyom ɖe edzi be woate ŋu awɔ ye Fofo ƒe lɔlɔ̃nu. (Mixlẽ Yesaya 60:17.) Le ƒe 1919 me la, woɖo subɔsubɔdɔnunɔla le hame ɖe sia ɖe me be wòaxɔ ŋgɔ le gbeƒãɖeɖedɔa me. Le ƒe 1927 me la, wowɔ ɖoɖo ɖe tso aƒe me yi aƒe me dɔa wɔwɔ edziedzi le Kwasiɖagbewo ŋu. Wode dzo Fiaɖuƒea dzi delawo me hena dɔ geɖe wu wɔwɔ le ƒe 1931 me esi wotsɔ ŋkɔ si tso Ŋɔŋlɔawo me si nye Yehowa Ðasefowo. (Yes. 43:10-12) Tso ƒe 1938 me la, womegadaa akɔ tiaa nɔviŋutsu siwo axɔ ŋgɔ le hamea me o. Ke boŋ, wotiaa wo le teokrasimɔ nu, si fia be wokpɔa egbɔ be woɖo Ŋɔŋlɔawo ƒe nudidi kɔkɔwo gbɔ. Le ƒe 1972 me la, wotsɔ hamea dzi kpɔkpɔ de hamemetsitsiwo ƒe ha si, ke meganye hamesubɔla ɖeka o. Wode dzi ƒo na nɔviŋutsu siwo katã dze la be woaʋli sesĩe akpe asi ɖe ‘Mawu ƒe hame si le woƒe dzikpɔkpɔ te la kpɔkplɔ’ ŋu. (1 Pet. 5:2) Le ƒe 1976 me  la, woma Dɔdzikpɔha me tɔwo ɖe kɔmiti ade me be woakpɔ Fiaɖuƒedɔa dzi le xexea me katã. Tso ɣemaɣi ke la, Fia si Yehowa ɖo la yi edzi le ɖoɖo wɔm na Fiaɖuƒea teviwo vivivi be woawɔ nuwo abe ale si Mawu dii ene.

13. Vi kawoe Fiaɖuƒea ƒe dziɖuɖu ƒe alafa ɖeka gbãtɔa ɖe na wò?

13 Bu nu siwo Mesia Fia la wɔ le eƒe dziɖuɖu ƒe ƒe alafa ɖeka gbãtɔa me ŋu kpɔ. Ekɔ amewo ƒe ƒuƒoƒo aɖe ŋu hena Yehowa ƒe ŋkɔ la. Ele gbeƒãɖeɖe Fiaɖuƒe ŋuti nya nyui la dzi kpɔm le dukɔ 239 me eye wòle Yehowa ƒe mɔwo fiam ame miliɔn geɖewo. Ena etevi wɔnuteƒe siwo wu miliɔn adre, siwo dometɔ ɖe sia ɖe tsɔ eɖokui na faa be yeawɔ Fofo la ƒe lɔlɔ̃nu la wɔ ɖeka. (Ps. 110:3) Nyateƒee, dɔ siwo Yehowa wɔ to Mesia Fiaɖuƒea dzi la nye dɔ gã wɔnukuwo vavã. Nu geɖe siwo gawɔ nuku wu le ŋgɔ gbɔna!

YAYRA SIWO MESIA FIAÐUƑEA AHE VƐ LE ETSƆME

14. (a) Ne míedo gbe ɖa be, “Wò fiaɖuƒe nava” la, nu ka biam míele be Mawu nawɔ? (b) Ƒe 2014 ƒe mawunyakpukpuia ye nye ka, eye nu ka tae esia sɔ?

14 Togbɔ be Yehowa ɖo Via Yesu Kristo wòzu Mesia Fia le ƒe 1914 me hã la, esia menye gbe si míedona ɖa be, “wò fiaɖuƒe nava” la ŋu ɖoɖo keŋkeŋ o. (Mat. 6:10) Wogblɔe ɖi le Biblia me be Yesu ‘aɖu fia le eƒe futɔwo titina.’ (Ps. 110:2) Amegbetɔwo ƒe dziɖuɖu siwo le Satana ƒe ŋusẽ te gakpɔtɔ le tsitre tsim ɖe Fiaɖuƒea ŋu. Ne míedo gbe ɖa be Mawu Fiaɖuƒea nava la, efia be míele Mawu biam be Mesia Fia la kple eƒe hatidziɖulawo nava ɖe amegbetɔwo ƒe dziɖuɖuwo kple anyigbadzitɔ siwo tsia tre ɖe Fiaɖuƒea ŋu la ɖa. Esia anye Daniel 2:44 me nya siwo gblɔ be Mawu Fiaɖuƒea “agbã fiaɖuƒe mawo katã, eye wòagblẽ wo” la me vava. Atsrɔ̃ dziɖuɖu siawo siwo nye Fiaɖuƒea ƒe futɔwo la katã. (Nyaɖ. 6:1, 2; 13:1-18; 19:11-21) Esia adzɔ kpuie. Eya ta esɔ ŋutɔ be ƒe 2014, si nye ƒe alafa ɖeka tso esime woɖo Mawu Fiaɖuƒea anyi le dziƒo la, ƒe mawunyakpukpuia ye nye Mateo 6:10 si gblɔ be: “Wò fiaɖuƒe nava”!

Ƒe 2014 ƒe mawunyakpukpuiae nye: “Wò fiaɖuƒe nava.”Mateo 6:10

15, 16. (a) Nu dodzidzɔname kawoe adzɔ le Ƒe Akpe Ðeka Dziɖuɖua me? (b) Nu mamlɛtɔ kae Yesu awɔ abe Mesia Fia ene? Yehowa ƒe tameɖoɖo kae esia ana wòava eme mlɔeba?

15 Ne Mesia Fia la tsrɔ̃ Mawu ƒe futɔwo vɔ megbe la, atsɔ Satana kple eƒe gbɔgbɔ vɔ̃wo aƒu gbe ɖe aʋli me ƒe akpe ɖeka. (Nyaɖ. 20:1-3) Ne ŋusẽkpɔɖeamedzi gbegblẽ siawo megali o ko la, Fiaɖuƒea awɔ viɖe siwo le Yesu ƒe tafevɔsaa ŋu la ŋu dɔ ahaɖe Adam ƒe nu vɔ̃ me tsonuwo ɖa keŋkeŋ. Fia la afɔ ame miliɔn gbogbo siwo le tsiẽƒe la ɖe tsitre eye wòawɔ ɖoɖo woafia nu wo tso Yehowa ŋu le xexe bliboa me. (Nyaɖ. 20:12, 13) Anyigba bliboa azu paradiso abe ale si Eden-bɔa nɔ ene. Vivivi la, amegbetɔ wɔnuteƒewo katã ade blibo.

16 Kaka Kristo ƒe Ƒe Akpe Ðeka Dziɖuɖua nawu enu la, Mesia Fiaɖuƒea aɖo taɖodzinu si ta woɖoe anyi ɖo la gbɔ. Eyome Yesu atsɔ Fiaɖuƒea ade asi na Fofoa. (Mixlẽ 1 Korintotɔwo 15:24-28.) Magahiã be ame aɖeke nanye domenɔla le Yehowa kple via siwo le anyigba dzi la dome o. Mawu ƒe vi siwo le dziƒo kple esiwo le anyigba dzi katã awɔ ɖeka kple wo Fofo si le dziƒo ahanye xexea me katã ƒe ƒome ɖeka.

17. Nu kae nèɖo kplikpaa be yeawɔ?

17 Nu dodzidzɔname siwo dzɔ le ƒe alafa ɖeka siwo Fiaɖuƒea ɖu dzi me gana míeka ɖe edzi be Yehowa kpɔtɔ le dzi ɖum eye be tame si wòɖo ɖe anyigbaa ŋu ava eme godoo. Mina míayi edzi anye etevi wɔnuteƒewo eye míaɖe gbeƒã Fia la kple eƒe Fiaɖuƒea. Míawɔ esia kple kakaɖedzi blibo be eteƒe madidi o, Yehowa aɖo gbe si míedona ɖa vevie be, “Wò fiaɖuƒe nava” la ŋu!

^ mm. 10 Kpɔ September 15, 2012, ƒe Gbetakpɔxɔ, axa 13-17, nyati si nye “Teokrasi Sukuwo—Woɖenɛ Fiana Be Yehowa Lɔ̃ Mí.”

^ mm. 11 Àte ŋu axlẽ nu tso ʋɔnudrɔ̃nya siwo me míeɖu dzi le le dukɔ vovovowo me ƒe kpɔɖeŋu aɖewo ŋu le December 1, 1998, ƒe Gbetakpɔxɔ, axa 19-22.