Dzo kpo yi emenuwo dzi

Dzo kpo yi emenuawo dzi

‘Migana Miaƒe Susu Natɔtɔ Kaba O’!

‘Migana Miaƒe Susu Natɔtɔ Kaba O’!

‘Nɔviwo, míele kuku ɖem na mi be miagana miaƒe susu natɔtɔ kaba o.’—2 TES. 2:1, 2.

1, 2. Nu ka tae amebeble bɔ egbea, eye mɔ vovovo kawo dzie amewo tona wɔa esia? (Kpɔ nɔnɔmetata si le nyati sia ƒe gɔmedzedze.)

AMEFUFLU, alakpanuwɔwɔ kple amebeble bɔ ɖe fifi nuɖoanyi sia me ŋutɔ. Mele be esia nawɔ nuku na mí o. Elabena Biblia gblɔe tẽe be ameblela bibi ye Satana Abosam nye, eye eyae le nuɖoanyi sia dzi ɖum. (1 Tim. 2:14; 1 Yoh. 5:19) Esi míele nuɖoanyi sia ƒe nuwuwu gogom la, Satana ƒe dziku le faflam ɖe edzi le esi “ɣeyiɣi vi aɖe koe” susɔ nɛ ta. (Nyaɖ. 12:12) Eya ta ele be míakpɔ mɔ be ame siwo dzi Abosam kpɔ ŋusẽ ɖo la dometɔ geɖe anye alakpatɔwo, vevietɔ woadi be yewoagblɔ alakpanyawo tso tadeagula vavãwo ŋu.

2 Ameflunya kple alakpanya siwo wogblɔna tso Yehowa subɔlawo kple woƒe dzixɔsewo ŋu dzena zi geɖe le nyadzɔdzɔgblɔmɔnuwo me. Wotoa nyadzɔdzɔgbalẽwo, television dzi wɔna aɖewo, kple Internet Nyatakakadzraɖoƒewo dzi kakaa alakpanyawo. Esia nana ame aɖewo tɔtɔna alo doa dziku, eye woxɔa alakpanya mawo dzi sena evɔ womeku eme hafi o.

3. Nu kae akpe ɖe mía ŋu be alakpanyawo nagaɖe dzi le mía ƒo o?

3 Míedaa akpe be Mawu na eƒe Nya si ‘nyo na ɖɔɖɔɖo’ la mí be wòakpe ɖe mía ŋu míaɖu míaƒe futɔ la ƒe ayemɔ ɖedzileameƒo sia dzi. (2 Tim. 3:16) Enye nu si ɖe dzesi be apostolo Paulo ƒe agbalẽwo na míenyae be woflu ƒe alafa gbãtɔ me Kristotɔ siwo nɔ Tesalonika la dometɔ aɖewo woxɔ alakpanyawo dzi se. Eya ta Paulo xlɔ̃ nu wo be ‘woagana woƒe susu natɔtɔ kaba o.’ (2 Tes. 2:1, 2) Nu kawoe míate ŋu asrɔ̃ tso nuxlɔ̃ame sia si lɔlɔ̃ ʋã Paulo wòna la me, eye aleke míawɔ nya siawo dzi egbeae?

NUXLƆ̃AME SIWO SƆ ÐE ƔEYIƔIA NU

4. Aleke woxlɔ̃ nu Kristotɔ siwo nɔ Tesalonika le “Yehowa ƒe ŋkeke” si gbɔna ŋu, eye aleke woxlɔ̃a nu míawo hãe?

4 Le agbalẽ gbãtɔ si Paulo ŋlɔ na hame si nɔ  Tesalonika me la, ehe susu yi “Yehowa ƒe ŋkeke” si gbɔna dzi. Medi be ye nɔviwo nanɔ viviti me eye ŋkekea naɖi ɖe wo o. Exlɔ̃ nu wo be esi wonye ‘kekeliviwo’ ta la, ele be ‘woanɔ ŋudzɔ, eye woanɔ mo xexi.’ (Mixlẽ 1 Tesalonikatɔwo 5:1-6.) Egbea, míele Babilon Gã si nye alakpasubɔsubɔ ƒe xexemefiaɖuƒe la ƒe tsɔtsrɔ̃ lalam. Emae anye Yehowa ƒe ŋkeke gã la ƒe gɔmedzedze. Dzidzɔtɔe la, míeva se ale si Yehowa ƒe tameɖoɖowo le eme vam gɔme ɖe edzi. Azɔ hã, míesea ŋkuɖodzinyawo le hamea me edziedzi siwo kpena ɖe mía ŋu míenɔa mo xexi. Ne míewɔ ɖe ŋkuɖodzinya siwo míesena ɖaa dzi la, akpe ɖe mía ŋu míalé tame si míeɖo kplikpaa be míatsɔ ‘subɔsubɔ kɔkɔe si me míazã míaƒe tamebubuŋutete le’ ana Mawu la me ɖe asi.—Rom. 12:1.

Nuxlɔ̃amenya siwo sɔ ɖe ɣeyiɣia nu le agbalẽ siwo Paulo ŋlɔ la me na Kristotɔwo (Kpɔ memama 4, 5)

5, 6. (a) Nu ka mee Paulo ɖe le eƒe agbalẽ evelia si wòŋlɔ ɖo ɖe Tesalonikatɔwo me? (b) Nu kae Mawu ato Yesu dzi awɔ kpuie, eye nya kawoe wòle be míabia mía ɖokuiwo?

5 Esi Paulo ŋlɔ eƒe agbalẽ gbãtɔ ɖo ɖe Kristotɔ siwo nɔ Tesalonika megbe kpuie la, egaɖo agbalẽ evelia ɖe wo. Le esia me la, eƒo nu tso xaxa si ava ne Aƒetɔ Yesu he Mawu ƒe ʋɔnudɔdrɔ̃ va “ame siwo menya Mawu o kple ame siwo meɖoa to . . . nya nyui la o” dzi ŋu. (2 Tes. 1:6-8) Nya siwo le agbalẽ sia ƒe ta 2 lia me ɖee fia be hamea me tɔ aɖewo ‘tɔtɔ’ le Yehowa ƒe ŋkekea ŋu ale gbegbe be woxɔe se ɣemaɣi be ŋkekea ɖo vɔ. (Mixlẽ 2 Tesalonikatɔwo 2:1, 2.) Ðeko Kristotɔ gbãtɔ mawo se Yehowa ƒe tameɖoɖowo me vava gɔme va se ɖe afi aɖe ko, abe ale si Paulo lɔ̃ ɖe edzi emegbe ene be: “Sidzedze afãafã ye le mía si, eye míegblɔa nya ɖi afã kple afã; gake ne nu si le blibo la va ɖo la, woaɖe nu si le afãafã la ɖa.” (1 Kor. 13:9, 10) Ke hã nya siwo gbɔgbɔ ʋã Paulo, apostolo Petro kple amesiamina wɔnuteƒe bubuwo woŋlɔ ɣemaɣi la kpe ɖe hamea me tɔwo ŋu be woalé woƒe xɔse me ɖe asi.

6 Be woaɖɔ woƒe susu ɖo la, gbɔgbɔ ʋã Paulo wòɖe eme be xɔsegbegbe gã la kple “sedzimawɔla” la ava gbã hafi Yehowa ƒe ŋkekea nava. * Ema megbe le  ɣeyiɣi ɖoɖia dzi la, Aƒetɔ Yesu atsrɔ̃ “sedzimawɔla” la kple ame siwo katã wòble la gbidii. Apostoloa gblɔ susu si ta ʋɔnudɔdrɔ̃ sia ava wo dzi ɖo—le esi “womexɔ nyateƒe la ƒe lɔlɔ̃ la . . . o” ta. (2 Tes. 2:3, 8-10) Anyo be míabia mía ɖokuiwo be: ‘Aleke gbegbe melɔ̃a nyateƒe lae? Ðe nyateƒea ƒe gɔmesese yeye siwo su mía si siwo wotana ɖe magazine sia kple Biblia-srɔ̃gbalẽ bubuwo me na Mawu ƒe amewo ƒe hamewo le xexea me godoo la su nye hã asinyea?’

TIA WÒ ZƆHƐWO LE NUNYA ME

7, 8. (a) Afɔku kawoe wòva hiã be Kristotɔ gbãtɔwo naƒo asa na? (b) Nu kae nye afɔku gã aɖe na Kristotɔ vavãwo egbea?

7 Míalɔ̃ ɖe edzi be menye xɔsegbelawo kple woƒe nufiafiawo koe nye afɔku na Kristotɔwo o. Paulo ŋlɔ na Timoteo be “nu vɔ̃ɖi ƒomeviwo katã ƒe ke ɖekae nye galɔlɔ̃.” Apostoloa gblɔ be, “esi ame aɖewo ti lɔlɔ̃ sia ƒomevi yome la, wotra mɔ tso xɔse la gbɔ, eye wotsɔ vevesese geɖe ŋɔ wo ɖokuiwo flofloflo.” (1 Tim. 6:10) “Ŋutilã ƒe dɔwɔwɔwo” hã nye afɔku bubu si gakpɔtɔ li.—Gal. 5:19-21.

8 Gake àte ŋu akpɔ susu si tae Paulo xlɔ̃ nu Tesalonikatɔwo vevie ku ɖe afɔku gã si ame siawo siwo wòyɔ le eƒe agbalẽ bubu me be “aʋatso apostolowo” nye ŋu. Tesalonikatɔwo dometɔ aɖewo gblɔa “nya totrowo, be woahe nusrɔ̃lawo ɖe wo ɖokuiwo ŋu.” (2 Kor. 11:4, 13; Dɔw. 20:30) Emegbe Yesu kafu Efeso hamea le esi womeɖe “mɔ ɖe ame vɔ̃ɖiwo ŋu o” ta. Efesotɔ mawo ‘do ame siwo gblɔna be apostolowo yewonye gake womenyee o,’ siwo le nyateƒe me la, wonye aʋatsokalawo “la kpɔ.” (Nyaɖ. 2:2) Le agbalẽ evelia si Paulo ŋlɔ na Tesalonikatɔwo me la, exlɔ̃ nu wo be: “Ke míele se dem na mi, nɔviwo, le Aƒetɔ Yesu Kristo ƒe ŋkɔ me, be miaɖe mia ɖokui ɖa tso nɔvi sia nɔvi si zɔna sakasaka . . . la ŋu.” Eyome eyɔ Kristotɔ siwo ‘medi be yewoawɔ dɔ o’ la kã. (2 Tes. 3:6, 10) Ne wobu nɔvi siwo gbe dɔwɔwɔ be wole zɔzɔm sakasaka la, ke ɖe womabu nɔvi siwo le tatram yina xɔsegbegbe ƒe mɔ dzi la nenema geɖe wu oa? Ɛ̃, hadede kple ame siawo tɔgbi nye afɔku gã si wòle be woaƒo asa na ɣemaɣi kple fifia hã.—Lod. 13:20.

9. Nu ka tae wòle vevie be míakpɔ nyuie ne ame aɖe gblɔa eya ŋutɔ ƒe susuwo ko alo kpɔa kpɔgblɔe le kluvi la ƒe numeɖeɖewo ŋu?

9 Esusɔ vie xaxa gã la nafe ati eye nuɖoanyi sia nawu enu, eya ta gɔmesese vevi aɖe le nuxlɔ̃ame siwo tso gbɔgbɔ me siwo wona le ƒe alafa gbãtɔ me ŋu na mí. Míadi gbeɖe be míaxɔ Yehowa ƒe amenuveve la, “evɔ ada taɖodzinu si le eŋu ya ƒu,” ale be agbe mavɔ nɔnɔ le dziƒo loo alo anyigba dzi si ŋugbe wodo la nato mía ŋu o. (2 Kor. 6:1) Ne eva dzɔ be ame aɖe si dea míaƒe kpekpewo va le dze ɖom kpli mí tso eya ŋutɔ ƒe susuwo ko ŋu alo kpɔa kpɔgblɔe le kluvi la ƒe numeɖeɖewo ŋu henɔa eŋuti dze ɖom na nɔvi bubuwo la, ele vevie be míakpɔ nyuie le nenem me ma ŋu.—2 Tes. 3:13-15.

“MILÉ NU SIWO MÍEFIA MI . . . LA ME ÐE ASI”

10. Nu kawo mee woxlɔ̃ nu Tesalonika Kristotɔwo be woalé ɖe asi?

10 Paulo xlɔ̃ nu Tesalonika nɔviwo be ‘woanɔ tsitre sesĩe’ eye woalé nu siwo wofia wo la me ɖe asi. (Mixlẽ 2 Tesalonikatɔwo 2:15.) ‘Nu kawoe wofia wo’? Kakaɖedzitɔe la, menye eyae nye nu siwo alakpasubɔsubɔhawo fiana heléa eme ɖe asi abe Ŋɔŋlɔawo me wotso ene la o. Ke boŋ Paulo nɔ nu ƒom tso nufiafia siwo eya ŋutɔ kple ame bubuwo xɔ tso Yesu gbɔ, kpakple nu siwo Mawu ʋã apostoloawo woŋlɔ, siwo va zu Ŋɔŋlɔ siwo tso  gbɔgbɔ me ƒe akpa aɖe la ŋu. Paulo kafu nɔvi siwo nɔ Korinto hamea me. Nu ka tae? Egblɔ be: “Mieɖoa ŋku dzinye le nuwo katã me, eye mielé ɖoɖoawo me ɖe asi goŋgoŋ, abe ale si metsɔ wo de mia sii ene.” (1 Kor. 11:2) Woate ŋu aka ɖe nufiafia mawo dzi elabena Yehowa kple Via gbɔe wotso.

11. Aleke wòdzɔnae be beble ƒe mɔ̃ ɖea ame aɖewoe?

11 Esi Paulo nɔ agbalẽ ŋlɔm na Hebritɔwo la, ehe susu yi nu eve siwo ate ŋu ana Kristotɔ ƒe xɔse nagbɔdzɔ eye wòadze anyi la dzi. (Mixlẽ Hebritɔwo 2:1; 3:12.) Eƒo nu tso ‘mɔtatra’ kple ‘teteɖa le Mawu ŋu’ ŋuti. Ne tɔdziʋu le tatram ɖa tso tɔ to la, zi geɖe esia menya kpɔna dzea sii kaba o. Ʋɛʋɛʋɛ la, wokpɔnɛ le adzɔge ɖaa. Le go bubu me la, ame aɖe ate ŋu aɖoe koŋ be yeatutu yeƒe tɔdziʋu ɖa le go ŋu. Kpɔɖeŋu eve siawo ɖɔ nu siwo ate ŋu adzɔ ne ame aɖe ɖe mɔ beble ƒe mɔ̃ ɖee alo ɖe mɔ ale si wòka ɖe nyateƒea dzii la me gbɔdzɔ.

12. Egbegbe nuwɔna kawoe ate ŋu agblẽ nu le míaƒe mawusubɔsubɔ ŋu?

12 Nu ma tɔgbie anya dzɔ ɖe Tesalonikatɔ aɖewo dzi. Ke egbea ya ɖe? Nu siwo gblẽa ɣeyiɣi na ame bɔ ŋutɔ. Wò ya bu gaƒoƒo gbogbo siwo amewo zãna ɖe Internet dzi hahoo kadodowo, nyatakaka siwo woɖo ɖa to asitelefon kple elektrɔnik-mɔ̃wo dzi xexlẽ kple wo ŋu ɖoɖo, modzakaɖeɖe atraɖii, alo kamedefefe ŋuti nyatakaka yeye ɖe sia ɖe sese ŋu la ŋu kpɔ. Nu siawo dometɔ ɖe sia ɖe ate ŋu ahe Kristotɔ ƒe susu ahana eƒe dzonɔameme dzi naɖe kpɔtɔ. Nu kae wòagblẽ? Esia ate ŋu awɔe be makpɔ ɣeyiɣi ɖe gbedodoɖa vevie, Mawu ƒe Nya la sɔsrɔ̃, kpekpeawo dede kple nya nyui gbeƒãɖeɖedɔa ŋu o. Ekema nu kae míate ŋu awɔ be míagana míaƒe susu natɔtɔ kaba o?

NU SIWO AKPƆ MÍA TA

13. Abe ale si wogblɔe ɖi ene la, nu kae nye ame geɖe ƒe nɔnɔme, eye nu kae akpe ɖe mía ŋu be míaƒe xɔse nagagbɔdzɔ o?

13 Nu siwo wòhiã be míawɔ dometɔ ɖekae nye be, míana afi si míeɖo na ɣeyiɣia kple nu si hadede kple ame siwo melɔ̃na ɖe edzi be míele “ŋkeke mamlɛawo” me o ate ŋu agblẽ le mía ŋu la nanɔ susu me na mí ɣesiaɣi. Apostolo Petro ŋlɔ tso míaƒe ŋkekeawo ŋu be: “Fewuɖulawo ava kple woƒe fewuɖuɖu, eye woawɔ nu le woawo ŋutɔwo ƒe nudzodzrowo nu, ahanɔ gbɔgblɔm be: ‘Afi ka eƒe anyinɔnɔ sia si ŋugbe wodo la le? Kpɔ ɖa, tso ŋkeke si dzi mía tɔgbuiwo dɔ alɔ̃ le ku me la, nuwo katã le edzi yim abe ale si tututu ko wonɔ tso nuwɔwɔ ƒe gɔmedzedze la ene.’” (2 Pet. 3:3, 4) Mawu ƒe Nya la xexlẽ gbe sia gbe kple esɔsrɔ̃ edziedzi akpe ɖe mía ŋu be míaƒe susu nanɔ afi si míeɖo na ɣeyiɣia ŋu, eye míanyae nyuie be “ŋkeke mamlɛawo” mee míele. Xɔsegbegbe si ŋu nya wogblɔ ɖi la va xoxoxo eye wògali va se ɖe egbea. “Sedzimawɔla la” kpɔtɔ li, eye wòyi edzi le tsitre tsim ɖe Mawu subɔlawo ŋu. Eya ta ehiã be míanɔ ŋudzɔ ɖe Yehowa ƒe ŋkeke si tu aƒe ŋutɔ la ŋu fifia wu ɣeyiɣi ɖe sia ɖe.—Zef. 1:7.

Dzadzraɖo nyuie ɖe gbeƒãɖeɖedɔa ŋu kple gomekpɔkpɔ le eme akpe ɖe mía ŋu be míagana míaƒe susu natɔtɔ kaba o (Kpɔ memama 14, 15)

14. Aleke veviedodo nu le Mawu subɔsubɔdɔa me kpɔa mía tae?

14 Nuteƒekpɔkpɔwo ɖee fia be Fiaɖuƒe ŋuti nya nyuia gbɔgblɔ edziedzi nye mɔ vevitɔ si dzi míato anɔ ŋudzɔ eye míagana míaƒe susu natɔtɔ o. Eya ta esi Kristo Yesu, si nye hamea ƒe Ta, de se na eyomedzelawo be woawɔ dukɔwo katã me tɔwo woanye nusrɔ̃lawo, eye woafia nu wo be woawɔ nu siwo katã ƒe se yede na wo la, nu si akpɔ eyomedzelawo ta ŋuti ɖaŋu ɖom wònɔ na wo. (Mat. 28:19, 20) Eƒe mɔfiame sia dzi wɔwɔ bia be míawɔ gbeƒãɖeɖedɔa dzonɔamemetɔe. Ðe nèsusu be mía nɔvi siwo nɔ Tesalonika anɔ gbeƒã  ɖem ahanɔ nu fiam amewo ɖewoɖewoe, abe dɔ dzro aɖe si woawɔ kuviatɔe enea? Ðo ŋku nya si Paulo gblɔ na wo dzi, be: “Migatsi gbɔgbɔ la ƒe dzo la o. Migado vlo nyagbɔgblɔɖiwo o.” (1 Tes. 5:19, 20) Aleke gbegbe nyagblɔɖi siwo srɔ̃m míele hele eŋu nya gblɔm na amewo la doa dzidzɔ na míe nye esi!

15. Nu nyui kawo mee míate ŋu adzro le míaƒe ƒometadedeagu me?

15 Míedi be míakpe ɖe míaƒe ƒomea me tɔwo katã ŋu be woazu gbeƒãɖela bibiwo. Nɔvi geɖe kpɔe be nu si akpe ɖe yewo ŋu be yewoaɖo taɖodzinu sia gbɔe nye be yewoazã yewoƒe ƒometadedeagu ƒe akpa aɖe atsɔ adzra ɖo ɖe gbeƒãɖeɖedɔa ŋu. Miate ŋu adzro ale si miatrɔ ayi ame siwo ɖe ɖetsɔleme fia gbɔ me. Nya kae miagblɔ ne mietrɔ yi amea gbɔ? Nyati kawoe ate ŋu atu eƒe ɖetsɔlemea ɖo? Ɣekaɣie wòanyo wu be miatrɔ ayi amea gbɔ? Nɔvi geɖewo zãa ƒometadedeagua ƒe akpa aɖe tsɔ dzrana ɖo ɖe hamea ƒe kpekpewo hã ŋu. Ðe miate ŋu adzra ɖo ɖe nyaŋuɖoɖowo ŋu geɖe wua? Nyaŋuɖoɖo le kpekpeawo me ado ŋusẽ miaƒe xɔse, eye esia akpe ɖe mia ŋu be miagana miaƒe susu natɔtɔ o. (Ps. 35:18) Ɛ̃, ƒometadedeagu ate ŋu akpɔ mía ta tso nususugblɔwo kple ɖikekewo me.

16. Nu kae ʋãa Kristotɔ amesiaminawo be woagana woƒe susu natɔtɔ o?

16 Ne míedea ŋugble le ale si Yehowa le eƒe amewo yram va se ɖe fifia ale be wole Biblia me nyagblɔɖiwo gɔme sem ɖe edzi ŋu la, míate ŋu aka ɖe edzi be teƒeɖoɖo nyui geɖewo asu mía si le etsɔme. Amesiaminawo le mɔ kpɔm be yewoawɔ ɖeka kple Kristo le dziƒo. Aleke gbegbe esia ʋãa wo be woagana woƒe susu natɔtɔ o ye nye esi! Míate ŋu agblɔ kple kakaɖedzi be nya siwo Paulo ŋlɔ na Tesalonikatɔwo la yi na wo; egblɔ be: “Mi nɔvi siwo Yehowa lɔ̃, agba le mía dzi be míada akpe na Mawu ɣesiaɣi ɖe mia ta, elabena Mawu tia mi . . . to gbɔgbɔ la tsɔtsɔ kɔ mia ŋu kple miaƒe nyateƒe la dzi xɔxɔse me.”—2 Tes. 2:13.

17. Nu kae de dzi ƒo na wò le nya siwo le 2 Tesalonikatɔwo 3:1-5 me?

17 Ele be ame siwo le mɔ kpɔm be yewoava nɔ agbe tegbee le anyigba dzi hã naʋli vevie be woagana woƒe susu natɔtɔ kaba o. Ne anyigbadzinɔnɔ ƒe mɔkpɔkpɔe le asiwò la, ke na Paulo ƒe nya dedziƒoname siwo wòŋlɔ ɖo ɖe ehati amesiamina siwo nɔ Tesalonika la nade dzi gbɔ na wò. (Mixlẽ 2 Tesalonikatɔwo 3:1-5.) Ele be mía dometɔ ɖe sia ɖe nada akpe ɖe nya dedzigbɔname siawo ta vevie. Woxlɔ̃ nu mí vevie le Tesalonikatɔwo ƒe agbalẽa me tso ame ŋutɔ ƒe susuwo alo susu totrowo dodo ɖe ŋgɔ ŋu. Esi nuwuwua te tu mí alea gbegbe ta la, míekpɔa ŋudzedze ɖe nuxlɔ̃amenya siawo ŋu vevie ŋutɔ.

^ mm. 6 Abe ale si wòdze le Dɔwɔwɔwo 20:29, 30 ene la, Paulo ɖee fia be le Kristo hamea me la, “ame aɖewo atsi tsitre, eye woagblɔ nya totrowo, be woahe nusrɔ̃lawo ɖe wo ɖokuiwo ŋu.” Ŋutinyawo ɖo kpe edzi be le ɣeyiɣi aɖe megbe la, wova nɔ vovototo dem hakplɔlawo kple hameviwo dome. Kaka ƒe alafa etɔ̃lia M.Ŋ. naɖo la, “sedzimawɔla la” va dze ƒãa, eye eyae nye Kristodukɔa ƒe hakplɔlawo ƒe ƒuƒoƒo.—Kpɔ February 1, 1990 ƒe Gbetakpɔxɔ, axa 2-6 (yevugbe me tɔ, February 1, 1990, axa 10-14).