“Esi wòda akpe ɖe [aboloa ta] vɔ la, eŋe eme, gblɔ be: ‘Esia tsi tsitre ɖi na nye ŋutilã, si wotsɔ na ɖe mia ta. Minɔ esia wɔm hena ŋkuɖoɖo dzinye.’”—1 KOR. 11:24.

1, 2. Nya kawoe anya nɔ susu me vam na apostoloawo do ŋgɔ na Yesu ƒe mɔzɔzɔ yi Yerusalem zi mamlɛtɔ?

‘FIFIA dzinu yeye dze dzi. Zãdzɔla siwo le Yerusalem anya kpɔe le zã si va yi me esime wòdo teti. Esi Yudatɔwo ƒe Ʋɔnudrɔ̃ƒe Kɔkɔtɔ me tɔwo se be wokpɔ dzinu yeye si dze dzi ko la, woɖe gbeƒãe be ɣleti si nye Nisan dze egɔme. Eyome woto ame dɔdɔwo alo dzesi tɔxɛwo dzi ɖo nyatakaka sia ɖe dukɔa ƒe akpa sia akpa, eye wòva ɖo afi sia gɔ̃ hã. Kakaɖedzitɔe la, Yesu adi be yeadze Yerusalem mɔ kaba ale be yeaɖo afi ma do ŋgɔ na Ŋutitotoŋkekenyuia.’

2 Nya siawoe anya nɔ susu me vam na Yesu ƒe apostoloawo esi wonɔ eŋu le Perea (le Yordan godo) do ŋgɔ na eƒe mɔzɔzɔ yi Yerusalem zi mamlɛtɔ. (Mat. 19:1; 20:17, 29; Marko 10:1, 32, 46) Esi wonya ɖe gbeƒã Yudatɔwo ƒe ɣleti Nisan ƒe ŋkeke gbãtɔ ko la, efia be woaɖu Ŋutitotoŋkekenyuia le ŋkeke 13 megbe, le Nisan 14 lia dzi ne ɣea ɖo to.

3. Nu ka tae wòsɔ be Kristotɔwo tsɔ ɖe le ŋkeke si dzi Ŋutitotoŋkekenyuia dze la me?

3 Míawɔ Aƒetɔ ƒe Fiẽnuɖuɖua le April 14, 2014 dzi le ɣeɖoto megbe; esia nye ŋkeke si dzi Ŋutitotoŋkekenyuia dze. Esia anye ŋkeke tɔxɛ na Kristotɔ vavãwo kple ɖetsɔlemetɔwo siaa. Nu ka tae? Nya si le 1 Korintotɔwo 11:23-25 tae. Afi ma gblɔ be: “Le zã si me woade Aƒetɔ Yesu asi la, etsɔ abolo, eye esi wòda akpe ɖe eta vɔ la, eŋe eme, gblɔ be: ‘Esia tsi tsitre ɖi na nye ŋutilã, si wotsɔ na ɖe mia ta. Minɔ esia wɔm hena ŋkuɖoɖo dzinye.’ Nenema kee wòwɔ le kplu la hã gome.”

4. (a) Nya kawoe nàte ŋu abia tso Ŋkuɖodzia ŋu? (b) Aleke wobua ŋkeke si dzi woawɔ Ŋkuɖodzia le ƒe sia ƒe? (Kpɔ aɖaka si nye  “Ƒe 2014 Ƒe Ŋkuɖodzi La.”)

4 Ðikeke mele eme o be àde wɔna sia teƒe, elabena ŋkuɖodzizã sia koe Yesu de se na eyomedzelawo be woanɔ ɖuɖum ƒe sia ƒe. Hafi ɣemaɣi naɖo la, bia ɖokuiwò be: ‘Aleke madzra ɖo ɖe fiẽ ma ŋu? Nu kawo  tututu woazã le Ŋkuɖodzi wɔnaa me? Ðoɖo ka dzie woazɔ ɖo? Eye gɔmesese kae wòle be wòanɔ wɔnaa kple nu siwo woazã ŋu nam?’

KPƆÐEŊUNUAWO

5. Dzadzraɖo kae Yesu na apostoloawo wɔ hena Ŋutitotoŋkekenyui mamlɛtɔ si wòɖu kpli wo?

5 Esi Yesu gblɔ na apostoloawo be woadzra xɔ aɖe me ɖo hena Ŋutitotoa ɖuɖu la, megblɔ na wo be woaɖo atsyɔ̃ na teƒea fũu o; ke ɖe wòdi boŋ be woakpɔ xɔ si sɔ eye eme le dzadzɛ, afi si keke nyuie be nusrɔ̃la siwo wòaɖu nua kplii la nakpɔ teƒe anɔ. (Mixlẽ Marko 14:12-16.) Ele be woadi nu sia nu si hiã la, si me abolo maʋamaʋã kple wain dzĩ hã le. Esi woɖu Ŋutitotoa vɔ la, Yesu ƒo nu tso kpɔɖeŋunu eveawo, siwo nye aboloa kple wain la, ŋu.

6. (a) Esi woɖu Ŋutitotoa vɔ la, nya kae Yesu gblɔ tso aboloa ŋu? (b) Abolo ka tɔgbie wozãna na Ŋkuɖodzia?

6 Apostolo Mateo nɔ wɔnaa teƒe, eye wòŋlɔ emegbe be: “Yesu tsɔ abolo . . . eye esi wòyra ɖe edzi vɔ la, eŋe eme, eye wòtsɔe na nusrɔ̃lawo gblɔ be: ‘Mixɔe, miɖui.’” (Mat. 26:26) “Abolo” la nye amɔwɔ maʋamaʋã bolo, eye enye abolo si tututu wozã na Ŋutitotoŋkekenyuia. (2 Mose 12:8; 5 Mose 16:3) Yevuwɔ si woblu kple tsi ye wotsɔ mè aboloa, eye womede amɔwɔʋãnu, dze alo nu bubu aɖeke eme o. Esi amɔwɔa meʋã o ta la, meho hafi womèe o. Enye abolo ƒuƒlu, eƒu, eye woate ŋu aŋe eme bɔbɔe. Egbea, do ŋgɔ na Ŋkuɖodziŋkekea la, hamemetsitsiwo ate ŋu ana ame aɖe nazã yevuwɔ kple tsi amè aboloa, eye woate ŋu azã abolomegba siwo me wosisi ami vi aɖe ko ɖo la atsɔ amèe. (Ne womate ŋu akpɔ yevuwɔ o la, woate ŋu azã mɔluwɔ, bliwɔ, alo nuku siawo tɔgbi ƒe wɔ atsɔ amèe).

7. Wain ka ƒomevie nɔ kplu si Yesu zã le Aƒetɔ ƒe Fiẽnuɖuɖua me la me? Wain ka tɔgbie míate ŋu azã le Ŋkuɖodzi wɔnaa me?

7 Mateo yi edzi be: “[Yesu tsɔ] kplu hã, eye esi wòda akpe vɔ la, etsɔe na wo gblɔ be: ‘Mi katã minoe le enu.’” (Mat. 26:27, 28) Wain dzĩ ye le kplu si Yesu tsɔ ɖe asi la me. (Manye wain si wofiã yeyee ye o, elabena wainxaɣi va yi xoxoxo.) Wain mekpe ɖe Ŋutitoto gbãtɔ si  woɖu le Egipte la ŋu o, gake Yesu metsi tre ɖe ezazã le Ŋutitotoŋkekenyuia ɖuɖu me ŋu o. Ezã wain la ƒe ɖe le Aƒetɔ ƒe Fiẽnuɖuɖu la me gɔ̃ hã. Eya ta Kristotɔwo hã zãa wain le Ŋkuɖodzi wɔnaa me. Mele be woatsɔ naneke, abe aha sesẽ alo nu ʋeʋĩwo ene, ade wain si woazã la me o, abe ɖe wòhiã be woatsɔ nane akpe Yesu ƒe ʋua be woadzi asixɔxɔ si le eŋu ɖe edzi ene o. Ele be woazã wain dzĩ ƒuƒlu; ate ŋu anye wain si ame ŋutɔ fiã le aƒe me alo wain dzĩ si wodzrana le fiase me abe Burgundy, Cabernet Sauvignon, alo Shiraz ene.

GƆMESESE SI LE KPƆÐEŊUNUAWO ŊU

8. Nu ka tae Kristotɔwo tsɔ ɖe le nu si aboloa kple wain la fia me vevie?

8 Apostolo Paulo na eme kɔ ƒãa be Kristotɔwo katãe anɔ Aƒetɔ ƒe Fiẽnuɖuɖu ƒe wɔna la wɔm, ke menye apostoloawo ko o. Eŋlɔ na xɔsetɔ siwo nɔ Korinto be: “Nu si mexɔ tso Aƒetɔ la gbɔ lae metsɔ de asi na mi, be . . . Aƒetɔ Yesu . . . [tsɔ] abolo, eye esi wòda akpe ɖe eta vɔ la, eŋe eme, gblɔ be: ‘Esia tsi tsitre ɖi na nye ŋutilã, si wotsɔ na ɖe mia ta. Minɔ esia wɔm hena ŋkuɖoɖo dzinye.’” (1 Kor. 11:23, 24) Le esia ta, Kristotɔwo le wɔna tɔxɛ sia wɔm ƒe sia ƒe va se ɖe egbea, eye wotsɔ ɖe le nu si aboloa kple wain la fia me vevie ŋutɔ.

9. Susu masɔmasɔ kae le ame aɖewo si ku ɖe abolo si Yesu zã ŋu?

9 Sɔlemedela aɖewo gblɔna be Yesu ŋutɔ gblɔ be: ‘Esiae nye nye ŋutilã,’ eya ta woxɔe se be aboloa trɔ zu Yesu ƒe ŋutilã ŋutɔŋutɔ. Gake menye nyateƒee o. * Yesu nɔ apostolo wɔnuteƒeawo ŋkume eye abolo maʋamaʋã si wòbe woaɖu la hã nɔ wo ŋkume. Eme kɔ ƒãa be kpɔɖeŋunya gblɔm Yesu nɔ. Ezã kpɔɖeŋunyagbɔgblɔ siawo tɔgbi zi geɖe.—Yoh. 2:19-21; 4:13, 14; 10:7; 15:1.

10. Nu kae abolo si wozãna le Aƒetɔ ƒe Fiẽnuɖuɖua me la tsi tre ɖi na?

 10 Abolo si kpɔm apostoloawo nɔ si woaɖu kpuie la tsi tre ɖi na Yesu ƒe ŋutilã. Ŋutilã ka? Ɣeaɖeɣi va yi la, Mawu subɔlawo susui be esi wònye be Yesu ŋe aboloa gake womeŋe eya ŋutɔ ƒe ƒuwo o ta la, efia be aboloa tsi tre ɖi na “Kristo la ƒe ŋutilã” si nye amesiaminawo ƒe hame la. (Ef. 4:12; Rom. 12:4, 5; 1 Kor. 10:16, 17; 12:27) Gake emegbe la, numekuku siwo wowɔ le Ŋɔŋlɔawo me la na eme va kɔ na wo be aboloa tsi tre ɖi na Yesu ƒe amegbetɔŋutilã. Ŋɔŋlɔawo gblɔ be Yesu “kpe fu le ŋutilã me,” eye wohee ɖe ati ŋu gɔ̃ hã. Eya ta abolo si wozãna le Aƒetɔ ƒe Fiẽnuɖuɖua me la tsi tre ɖi na Yesu ƒe amegbetɔŋutilã si wòtsɔ sa vɔ ɖe míaƒe nu vɔ̃wo ta.—1 Pet. 2:21-24; 4:1; Yoh. 19:33-36; Heb. 10:5-7.

11, 12. (a) Nya kae Yesu gblɔ tso wain la ŋu? (b) Nu kae wain si wozãna le Aƒetɔ ƒe Fiẽnuɖuɖua me la tsi tre ɖi na?

11 Esia kpe ɖe mía ŋu míese nya si Yesu gblɔ ku ɖe wain la hã ŋu gɔme. Biblia gblɔ be: “Nenema kee wòwɔ le kplu la hã gome le fiẽnuɖuɖu la megbe, esi wògblɔ be: ‘Kplu sia tsi tsitre ɖi na nubabla yeye, si wowɔ to nye ʋu dzi la.’” (1 Kor. 11:25) Biblia gɔmeɖeɖe geɖe ɖe nya sia gɔme abe ale si Robert Young ƒe gɔmeɖeɖea gblɔe ene be: ‘Kplu siae nye nubabla yeye si wowɔ le nye ʋu me.’ Kplu si Yesu lé ɖe asi la ŋutɔŋutɔe nye nubabla yeye la? Ao. Wain si nɔ “kplu” la me ye wòwɔnɛ. Ke nu kae Yesu gblɔ be wain la fia alo tsi tre ɖi na? Efia eƒe ʋu si wòkɔ ɖe anyi.

12 Le Marko ƒe Nyanyuigbalẽa me la, Yesu ƒe nyawo yi ale: “Esia tsi tsitre ɖi na nye ‘nubabla ƒe ʋu,’ si woakɔ ɖe anyi le ame geɖewo ta.” (Marko 14:24) Ɛ̃, “woakɔ [Yesu ƒe ʋu] ɖe anyi le ame geɖewo ta hena nu vɔ̃wo ƒe tsɔtsɔke.” (Mat. 26:28) Eya ta esɔ be wain dzĩ la tsi tre ɖi na Yesu ƒe ʋu ŋutɔŋutɔ. Woto eƒe ʋu ma dzi xe fe ɖe mía ta hena “míaƒe vodadawo ƒe tsɔtsɔke.”—Mixlẽ Efesotɔwo 1:7.

Apostoloawo no wain si tsi tre ɖi na Yesu ƒe nubabla ƒe ʋu la (Kpɔ memama 11, 12)

ALE SI WOWƆA KRISTO ƑE KU ƑE ŊKUÐODZI LA

13. Gblɔ ale si wowɔa Kristo ƒe ku ƒe Ŋkuɖodzi lae.

13 Ne zi gbãtɔe nye esia nàde Ŋkuɖodzia kple Yehowa Ðasefowo la, nu kae nàkpɔ mɔ na? Woawɔe le teƒe dzadzɛ, si womeɖo atsyɔ̃ na fũu o, afi si ame sia ame aɖe dzi ɖi ase vivi na wɔna la le. Ðewohĩ woada seƒoƒowo ʋɛ aɖewo ɖe nuƒolanɔƒea, gake womatsi pepa kakɛ alo aŋe falɛfalɛ siwo le amedede vovovowo me ɖe teƒea o, eye womaɖo atsyɔ̃ na teƒea abe kplɔ̃ɖoƒe ene o. Hamemetsitsi si dze aƒo nuƒo ahaɖe nu si Biblia fia tso wɔna sia ŋu la me eme nakɔ. Akpe ɖe vavalawo katã ŋu be woase nu si gbegbe Kristo wɔ na mí gɔme. Kristo ku hexe fe ɖe mía ta be míate ŋu anɔ agbe. (Mixlẽ Romatɔwo 5:8-10.) Nuƒolaa aɖe mɔkpɔkpɔ eve siwo le Kristotɔwo si, si ŋu Biblia ƒo nu tsoe la me nyuie.

14. Mɔkpɔkpɔ kawo mee woadzro le Ŋkuɖodzinuƒoa me?

14 Mɔkpɔkpɔ gbãtɔe nye be Kristo yomedzela ʋɛ aɖewo, abe apostolo wɔnuteƒeawo ene, aɖu fia kple Kristo le dziƒo. (Luka 12:32; 22:19, 20; Nyaɖ. 14:1) Mɔkpɔkpɔ evelia le ʋuʋu ɖi na Kristotɔ akpa gãtɔ siwo le Mawu subɔm nuteƒewɔwɔtɔe le míaƒe ɣeyiɣia me. Wole mɔ kpɔm be yewoava nɔ agbe tegbee le paradiso si woagaɖo anyi la me le anyigba dzi. Ɣemaɣi la, woawɔ Mawu ƒe lɔlɔ̃nu le anyigba dzi abe ale si wowɔnɛ le dziƒo ene, eye esia nye nu si ŋu Kristotɔwo le gbe dom ɖa le ɣeyiɣi didi aɖee nye esia. (Mat. 6:10) Eye Ŋɔŋlɔawo ƒo nu tso yayra gbogbo siwo asu wo si le agbe me yi ɖe mavɔmavɔ me la hã ŋu.—Yes. 11:6-9; 35:5, 6; 65:21-23.

15, 16. Nu kae wowɔna kple aboloa le Aƒetɔ ƒe Fiẽnuɖuɖu wɔna la me?

 15 Le nuƒoa ƒe nuwuwu lɔƒo la, nuƒolaa agblɔ be ɣeyiɣia de be míawɔ nu si Yesu gblɔ na eƒe apostoloawo be woanɔ wɔwɔm. Abe ale si míegblɔe va yi ene la, woazã kpɔɖeŋunu eve, siwo nye abolo maʋamaʋã kple wain dzĩ. Woada wo ɖe kplɔ̃ dzi le nuƒolaa gbɔ. Ahe susu ayi Biblia me nuŋlɔɖi si ku ɖe nya si Yesu gblɔ kple nu si wòwɔ esi wònɔ azã sia ɖom anyi ŋu la dzi. Le kpɔɖeŋu me, Mateo ƒe nuŋlɔɖia gblɔ be: “Yesu tsɔ abolo . . .  eye esi wòyra ɖe edzi vɔ la, eŋe eme, eye wòtsɔe na nusrɔ̃lawo gblɔ be: ‘Mixɔe, miɖui. Esia tsi tsitre ɖi na nye ŋutilã.’” (Mat. 26:26) Yesu ŋe abolo maʋamaʋã la me kple susu be wòate ŋu ama wo na eƒe apostolo siwo le eƒe ɖusi kple mia me. Le kpekpe si woawɔ le April 14 dzi me la, àkpɔ abolo maʋamaʋã siwo me woŋe xoxo la le agba gbadzɛwo me le kplɔ̃a dzi.

16 Woazã agba gbadzɛ agbɔsɔsɔ si hiã ale be woate ŋu atsɔ aboloawo atsa vavalawo dzi kaba ale si dze. Womawɔ kɔnu tɔxɛ aɖeke o. Woado gbe kpui aɖe ɖa hafi atsɔ aboloawo atsae le ɖoɖo si sɔ nu. Le hame akpa gãtɔ me la, ame ʋɛ aɖewo koe aɖu aboloa (alo ɖewohĩ ame aɖeke maɖui o) abe ale si wònɔ le ƒe 2013 me ene.

17. Le Ŋkuɖodzia dzi la, aleke woawɔ mɔfiame si Yesu na ku ɖe wain la ŋu dzi?

17 Eyome nuƒolaa ahe susu ayi nya si Mateo gblɔ yi edzi la dzi be: “[Yesu tsɔ] kplu hã, eye esi wòda akpe vɔ la, etsɔe na wo gblɔ be: ‘Mi katã minoe le enu; elabena esia tsi tsitre ɖi na nye “nubabla ƒe ʋu,” si woakɔ ɖe anyi le ame geɖewo ta hena nu vɔ̃wo ƒe tsɔtsɔke.’” (Mat. 26:27, 28) Le mɔfiame sia dzi wɔwɔ me la, woagado gbe kpui aɖe ɖa, eye eyome woatsɔ “kplu” siwo me wain dzĩ le la atsae.

18. Ne ame ʋɛ aɖewo koe aɖu kpɔɖeŋunuawo, alo ame aɖeke maɖui o gɔ̃ hã la, nu ka tae wòle vevie be míade Ŋkuɖodzia?

18 Vavala akpa gãtɔ maɖu kpɔɖeŋunu siwo woatsɔ atsae la o, elabena abe ale si Yesu gblɔe ene la, ame siwo aɖu fia kplii le Dziƒofiaɖuƒea me koe wòle be woaɖui. (Mixlẽ Luka 22:28-30; 2 Tim. 4:18) Togbɔ be ame bubu siwo katã dea Ŋkuɖodzia nyea nuteƒekpɔla siwo meɖua aboloa alo noa wain la o hã la, ehiã vevie be woade Aƒetɔ ƒe Fiẽnuɖuɖu ƒe wɔnaa teƒe. Nu ka ta? Elabena afi ma yiyi ɖenɛ fiana be wodea asixɔxɔ gã Yesu ƒe vɔsaa ŋu. Le Ŋkuɖodzia ɖuɣi la, woate ŋu ade ŋugble le yayra gbogbo siwo ƒe mɔnu Yesu ƒe vɔsaa ʋu ɖi na wo la ŋu. Mɔkpɔkpɔ ate ŋu asu wo si be woanɔ “ameha gã” siwo atsi agbe le “xaxa gã” si gbɔna me la dome. Woawoe nye mawusubɔla siwo “[nya] woƒe awu ʋlayawo, eye wowɔ wo ɣie le Alẽvi la ƒe ʋu la me.”—Nyaɖ. 7:9, 14-17.

19. Nu kawoe nàte ŋu awɔ atsɔ adzra ɖo ɖe Aƒetɔ ƒe Fiẽnuɖuɖua ŋu be wòaɖe vi na wò?

19 Yehowa Ðasefo siwo le xexea me godoo dzrana ɖo ɖe kpekpe tɔxɛ sia ŋu. Kwasiɖa aɖewo do ŋgɔ na wɔnaa la, míakpe ame geɖe ale si nu míate ŋui be woadee kpli mí. Eye le ŋkeke siwo do ŋgɔ na Ŋkuɖodzia la, míaxlẽ Biblia me nuŋlɔɖi siwo ku ɖe nu siwo Yesu wɔ kple nu siwo dzɔ le ŋkeke mawo me le ƒe 33 M.Ŋ. me ŋu. Míawɔ ɖoɖo ɖe sia ɖe si hiã ale be wɔna vevi sia nagato mía ŋu o. Anyo ŋutɔ be míaɖo teƒea kaba ale be míate ŋu ado wòezɔ na vavalawo, akpɔ gome le hadzidzi kple gbedodoɖa si woatsɔ aʋu enui me ahase nuƒo bliboa. Aɖe vi na mí hamea me tɔwo kple ame kpekpeawo siaa ne míeʋua míaƒe Bibliawo hekplɔa nuƒolaa ɖo ne ele exlẽm. Vevietɔ wu la, Ŋkuɖodzia dede aɖee afia be míekpɔa ŋudzedze ɖe Yesu ƒe vɔsaa ŋu tso dzi blibo me, eye be míele se si Yesu de be, “Minɔ esia wɔm hena ŋkuɖoɖo dzinye” la dzi wɔm.—1 Kor. 11:24.

^ mm. 9 Germanytɔwo ƒe agbalẽnyala Heinrich Meyer gblɔ be: “Esi wònye be . . . womeŋe Yesu ƒe ŋutilã haɖe o (ekpɔtɔ nɔ agbe), eye be womekpɔ kɔ Eƒe ʋu ɖe anyi haɖe ɣemaɣi o ta la, eƒe ame kpekpeawo [apostoloawo] dometɔ aɖeke mate ŋu abui . . . be Aƒetɔ la ƒe ŋutilã ŋutɔŋutɔ ɖum yewonɔ alo eƒe ʋu ŋutɔŋutɔ nom yewonɔ o, [eya ta] Yesu Ŋutɔ mekpɔ mɔ be woase yeƒe nya bɔbɔe mawo gɔme le mɔ bubu si meva susu me na wo gɔ̃ hã nu o.”