“Ŋkeke sia nanye ŋkuɖodzigbe na mi, eye mianɔ eɖum na Yehowa.”—2 MOSE 12:14.

1, 2. Ŋkuɖodzizã ka mee wòle be Kristotɔwo katã natsɔ ɖe le vevie, eye nu ka tae?

NE ÈSE nya “ŋkuɖodzizã” la, nu kae vaa susu me na wò? Ne srɔ̃tɔe nènye la, ɖewohĩ àgblɔ be, “Nye srɔ̃ɖezã.” Le ame bubuwo gome la, ate ŋu anye ŋkeke vevi aɖe si dzi nane dzɔ le ŋutinya me, abe ŋkeke si dzi woƒe dukɔa xɔ ɖokuisinɔnɔ ene. Gake ènya ŋkuɖodzizã si dukɔ aɖe ɖu ƒe 3,500 kple edzivɔe nye esia?

2 Ŋkuɖodzizã mae nye Ŋutitotoŋkekenyui la. Blema Israel viwo ɖua ŋkekenyui sia tsɔ ɖoa ŋku gbe si gbe woɖe wo tso kluvinyenye me le Egipte dzi. Ele be azã ma nanɔ vevie wò. Nu ka tae? Elabena azã ma kpɔ ŋusẽ ɖe wò agbe dzi le mɔ vevi aɖe nu. Gake ɖewohĩ àbia be ‘Aleke wɔ? Yudatɔwoe ɖu Ŋutitotoŋkekenyui la, evɔ menye Yudatɔe menye o ɖe. Ke nu ka tae matsi dzi ɖe ŋkuɖodzizã ma ŋu?’ Míate ŋu akpɔ ŋuɖoɖoa le nya wɔdɔɖeamedzi sia me: “Wotsɔ Kristo, míaƒe ŋutitotolẽvi la, sa vɔe.” (1 Kor. 5:7) Be míase nyateƒenya ma gɔme la, ele be míanya nu geɖe tso Ŋutitotoŋkekenyui si Yudatɔwo ɖuna kpakple ƒomedodo si le azã sia kple se aɖe si wode na Kristotɔwo katã dome la ŋu.

NU KA TAE WOÐU ŊUTITOTOŊKEKENYUI LA?

3, 4. Nudzɔdzɔ kawoe do ŋgɔ na Ŋutitoto gbãtɔa?

3 Ame miliɔn alafa geɖe siwo menye Yudatɔwo o la nya nu tso nudzɔdzɔ siwo do ŋgɔ na Ŋutitoto gbãtɔa ŋu le xexea me godoo. Ate ŋu anye be woxlẽ nu tso eŋu le Biblia-gbalẽ si nye Mose ƒe Agbalẽ Evelia me, alo wogblɔ eŋutinya wose, alo woɖe nudzɔdzɔ ma ƒe film wokpɔ.

4 Esi Israel viwo nye kluviwo le Egipte ƒe geɖe megbe la, Yehowa dɔ Mose kple foa Aron ɖe Farao gbɔ be woabiae be wòaɖe asi le Yeƒe amewo ŋu. Egipte-fia dadala ma gbe be yemaɖe asi le Israel viwo ŋu o. Eya ta Yehowa he fuwɔame vɔ̃ɖiwo va Egipte-nyigba la dzi. Mlɔeba Mawu he fuwɔame ewolia, si me wòwu Egiptetɔwo ƒe ŋgɔgbeviwo katã le vɛ. Esia  ƒoe ɖe Farao nu woɖe asi le Israel viwo ŋu.—2 Mose 1:11; 3:9, 10; 5:1, 2; 11:1, 5.

5. Nu kae wòle be Israel viwo nawɔ atsɔ adzra ɖo ɖe wo ɖeɖe tso kluvinyenye me ŋu? (Kpɔ nɔnɔmetata si le nyati sia ƒe gɔmedzedze.)

5 Gake hafi woaɖe Israel viwo la, ehiã be woawɔ ɖe mɔfiame aɖewo koŋ dzi. Esia dzɔ le ƒe 1513 D.M.Ŋ. ƒe adame (si nye ɣeyiɣi si me ŋkeke kple zã ƒe didime sɔna le) le Hebritɔwo ƒe ɣleti Abib, si wova yɔ emegbe be Nisan me. * Mawu gblɔ be, le ɣleti ma ƒe ŋkeke ewolia dzi la, Israel viwo nadze dzadzraɖo gɔme ɖe wɔna vevi aɖe si ayi edzi le Nisan 14 lia dzi la ŋu. Ŋkeke ma dze egɔme le ɣeɖoto megbe, elabe Hebritɔwo xlẽa woƒe ŋkekewo tso ɣeɖoto yi ɣeɖoto. Wobia tso wo si be le Nisan 14 lia dzi la, ƒome sia ƒome nawu alẽtsui (alo gbɔ̃tsui) ɖeka atsɔ ʋua ƒe ɖe asisi ɖe ʋɔtruti eveawo kple etametɔ ŋuti. (2 Mose 12:3-7, 22, 23) Ele be ƒomea namè lã la eye woatsɔ abolo maʋamaʋã kple ama veve aɖui. Mawudɔla ato anyigba la dzi le zã me, eye wòawu Egiptetɔwo ƒe ŋgɔgbeviwo katã, gake akpɔ Israel vi toɖolawo ya ƒe agbe ta, eyome Egiptetɔwo aɖe asi le wo ŋu woadzo.—2 Mose 12:8-13, 29-32.

6. Nu ka tae wòhiã be Israel viwo nayi edzi anɔ Ŋutitotoŋkekenyuia ɖum ƒe sia ƒe?

6 Nu ma tututue dzɔ, eya ta wobia tso Israel viwo si be woaɖo ŋku gbe si gbe woɖe wo tso Egipte la dzi. Mawu gblɔ na wo be: “Ŋkeke sia nanye ŋkuɖodzigbe na mi, eye mianɔ eɖum na Yehowa; wòanye ɖoɖo na miaƒe dzidzimeviwo, be miaɖui tegbee.” Ne Israel viwo ɖu Ŋutitoto la le ŋkeke 14 lia dzi vɔ la, ele be woaɖu Abolo Maʋamaʋã Ŋkekenyui la hã ŋkeke adre. Ke hã wotea ŋu yɔa ŋkeke enyi siawo katã be Ŋutitotoŋkekenyui. (2 Mose 12:14-17; Luka 22:1; Yoh. 18:28; 19:14) Ŋutitoto la nye ŋkekenyui ɖoɖi (alo “ŋkuɖodzizã,” The Bible in Living English) siwo wobia tso Hebritɔwo si be woaɖu ƒe sia ƒe la dometɔ ɖeka.—2 Kron. 8:13.

7. Azã kae Yesu ɖo anyi le Ŋutitotoŋkekenyui mamlɛtɔ si wòɖu kple eƒe apostoloawo dzi?

7 Esi Yesu kple eƒe apostoloawo nye Yudatɔ siwo nɔ Mose ƒe Sea te ta la, woawo hã woɖu Ŋutitotoŋkekenyuia ƒe sia ƒe. (Mat. 26:17-19) Zi mamlɛtɔ si woɖu azã sia la, Yesu ɖo azã yeye aɖe anyi si wòle be eyomedzelawo naɖu ƒe sia ƒe tso ekema dzi—eyae nye Aƒetɔ ƒe Fiẽnuɖuɖu la. Gake ŋkeke ka dzie wòle be woaɖu azã yeye sia?

ŊKEKE KA DZIE WÒLE BE WOAÐU AƑETƆ ƑE FIẼNUÐUÐU LA?

8. Nu kae ɖea fu na ame aɖewo le Ŋutitotoŋkekenyui si woɖuna egbea kple Aƒetɔ ƒe Fiẽnuɖuɖua ŋu?

8 Esi wònye be Yesu ɖo Aƒetɔ ƒe Fiẽnuɖuɖua anyi le Ŋutitotoŋkekenyuia ɖuɖu vɔ megbe teti ko ta la, ŋkeke si dzi woɖua Ŋutitotoŋkekenyuia dzi tututue wòle be woawɔ Aƒetɔ ƒe Fiẽnuɖuɖu ƒe wɔna la. Gake ànya de dzesii be ɣeaɖewoɣi la, Ŋutitoto si Yudatɔwo ɖuna la ƒe ŋkeke si woŋlɔna ɖe ɣletigbalẽ aɖewo dzi egbea toa vovo na ŋkeke si dzi míeɖoa ŋku Kristo ƒe kua dzi. Etea ŋu toa vovo ŋkeke ɖeka alo esi wu nenema. Nu ka tae? Ŋuɖoɖoa dze le se si Mawu de na Israel viwo ku ɖe ɣeyiɣi si woadze Ŋutitotoa gɔme ŋu la me. Mawu gblɔ ɣeyiɣi si me wòle be dukɔa nawu alẽvia le Nisan 14 lia dzi, si nye ɣeyiɣi si Ŋutitotoa adze egɔme la na wo.—Mixlẽ 2 Mose 12:5, 6.

9. Le 2 Mose 12:6 ƒe nya nu la, ɣekaɣie wòle be woawu Ŋutitotolẽvi la? (Kpɔ aɖaka si nye,  “Ɣekaɣie?” hã.)

9 Biblia gɔmeɖegbalẽ aɖe ɖe eme be,  2 Mose 12:6 gblɔ be woawu alẽvia “le fiẽ eveawo dome.” (The Pentateuch and Haftorahs) Biblia gɔmeɖeɖe aɖewo zã nyagbɔgblɔ ma pɛpɛpɛ. Ke hã, Eʋegbe Bibliawo ɖe egɔme be “le fiẽ me.” Biblia bubu aɖewo hã ɖe egɔme be “esime xexea me le tsyɔtsyɔm,” alo “le ɣeɖoto lɔƒo.” Eya ta ele be woawu alẽvia le ɣeɖoto megbe esime viviti medo haɖe o, si anye Nisan 14 ƒe gɔmedzedze.

10. Le ame aɖewo ƒe susu nu la, ɣekaɣie wowua Ŋutitotolẽvia, gake biabia kae esia fɔ te?

10 Le ƒe siwo va yi me la, Yudatɔ aɖewo va susui be axɔ gaƒoƒo geɖe hafi woawu alẽvi siwo katã wotsɔ va gbedoxɔa me. Eya ta wose egɔme be Nisan 14 lia ƒe nuwuwu ŋu nya gblɔm 2 Mose 12:6 le, si nye tso ɣeyiɣi si ɣea trɔ (ɣetrɔme) va se ɖe ŋkekea ƒe nuwuwu le ɣeɖoto. Ne gɔmesesea ye nye ema la, ke ɣekaɣie woɖua nua? Agbalẽnyalagã Jonathan Klawans si nye blema Yudasubɔsubɔ ŋuti nunyala, gblɔ be: ‘Ŋkeke yeyea dzea egɔme ne ɣea ɖo to. Eya ta wosaa vɔa le ŋkeke 14 lia dzi gake Ŋutitotoa kple nuɖuɖua ƒe gɔmedzedze dzea ŋkeke 15 lia dzi, togbɔ be womegblɔe tẽe alea le Mose ƒe Agbalẽ Evelia me o hã.’ Egblɔ hã be: ‘Rabiwo ƒe agbalẽwo . . . meƒo nu tso ale si woɖua Seder [si nye Ŋutitotoa] do ŋgɔ na Gbedoxɔa tsɔtsrɔ̃ [le ƒe 70 M.Ŋ. me] ŋu o.’

11. (a) Nu kawo mee Yesu to le ƒe 33 M.Ŋ. ƒe Ŋutitotoŋkekea dzi? (b) Nu ka tae woyɔ ƒe 33 M.Ŋ. ƒe Nisan 15 lia be ‘Sabat gã’? (Kpɔ etenuŋɔŋlɔa.)

11 Eya ta esɔ be míabia be, Aleke wònɔ le Ŋutitotoŋkekenyui si woɖu le ƒe 33 M.Ŋ. ya gome? Le Nisan 13 lia dzi, esi ŋkeke “si dzi wòle be woatsɔ ŋutitotolã la asa vɔe le” gogo la, Kristo gblɔ na Petro kple Yohanes be: “Miheyi ɖadzra ŋutitoto la ɖo na mí, be míaɖu.” (Luka 22:7, 8) “Eye esi [Ŋutitotoŋkekenyuia ƒe] gaƒoƒo la de mlɔeba” le ɣeɖoto megbe le Nisan 14 lia, si nye Yawoɖa fiẽ la, Yesu ɖu Ŋutitotoŋkekenyuia kple eƒe apostoloawo. Le nuɖuɖua megbe la, eɖo Aƒetɔ ƒe Fiẽnuɖuɖu la anyi. (Luka 22:14, 15) Zã ma mee wolée hedrɔ̃ ʋɔnui le. Le ŋufɔke la, woklã Yesu ɖe ati ŋu le ŋdɔ ga 12 me lɔƒo le Nisan 14 lia ma ke dzi, eye wòku le ɣetrɔ me. (Yoh. 19:14) Eya ta “wotsɔ Kristo, míaƒe ŋutitotolẽvi la, sa vɔe” le ŋkeke si tututu wowu Ŋutitotolẽvi la dzi. (1 Kor. 5:7; 11:23; Mat. 26:2) Esi Yudatɔwo ƒe ŋkeke ma yina nuwuƒe la, woɖi Yesu—hafi Nisan 15 lia dze egɔme. *3 Mose 23:5-7; Luka 23:54.

ŊKUÐODZIZÃ SI ME NÀTE ŊU ASRƆ̃ NU GEÐE TSOE

12, 13. Mɔ ka nue Yuda-ɖeviwo hã wɔ akpa aɖe le Ŋutitotoŋkekenyuia ɖuɖu me le?

12 Na míagatrɔ susu ɖe Ŋutitoto si woɖu le Egipte ŋu ake. Mose gblɔ na Israel viwo be Mawu bia tso wo si be woanɔ Ŋutitotoŋkekenyuia ɖum; woaɖo ŋku ɖoɖo sia dzi “tegbee.” Ne wole azã ma ɖum la, ɖeviwo biaa nya wo dzilawo tso gɔmesese si le wɔna sia ŋu la ŋuti. (Mixlẽ 2 Mose 12:24-27; 5 Mose 6:20-23) Eya ta Ŋutitotoŋkekenyuia anye “ŋkuɖodzigbe” si me ɖeviwo kekeake asrɔ̃ nu tsoe.—2 Mose 12:14.

13 Israel viwo fiaa nu vevi aɖewo wo viwo tso Ŋutitotoŋkekenyuia ŋu tso dzidzime yi dzidzime. Ðekae nye be Yehowa kpɔa esubɔlawo ta. Wofiaa wo viwo be Yehowa li ŋutɔŋutɔ. Enye Mawu gbagbe si léa be na eƒe amewo eye wòkpɔa wo ta. Eɖe esia fia esi wòkpɔ Israel viwo ƒe ŋgɔgbeviwo ƒe agbe ta esime “wòwu Egiptetɔwo.”

14. Nu kawoe dzila Kristotɔwo ate ŋu azã nuŋlɔɖi si ku ɖe Ŋutitotoŋkekenyuia ŋu atsɔ afia wo viwo?

14 Womebia tso dzila Kristotɔwo si be woagblɔ gɔmesese si le Ŋutitotoŋkekenyuia ŋu na wo viwo ƒe sia ƒe o. Gake abe dzila ene la, ɖe nèfiaa nu siwo míate ŋu asrɔ̃ tso ŋkekenyui ma me la viwòwo, si nye be Mawu kpɔa eƒe amewo ta? Ðe nènana wokpɔnɛ be èka ɖe edzi bliboe be Yehowa ganye eƒe amewo Takpɔla egbea? (Ps. 27:11; Yes. 12:2) Eye ɖe nèfiaa nu siawo woamawo dzidzɔtɔe ne èle dze ɖom kpli woa, alo ɖe nèwɔnɛ abe dutoƒonuƒo ƒom nèle enea? Wɔ ɖoɖo miadzro nu siawo me ale be ƒome bliboa nagaka ɖe Yehowa dzi geɖe wu.

Ne miele nu srɔ̃m tso Ŋutitotoŋkekenyuia ŋu la, nu vevi kawoe nàfia viwòwo? (Kpɔ memama 14)

15, 16. Nu ka dzie míate ŋu azã nuŋlɔɖi si ku ɖe Ŋutitotoŋkekenyuia kple Israel viwo ƒe ʋuʋu tso Egipte ŋu atsɔ ate gbe ɖo?

15 Menye ŋutete si le Yehowa si be wòakpɔ eƒe amewo ta koe nye nufiame si le Ŋutitotoŋkekenyuia me o. Eɖe Israel viwo hã esi ‘wòkplɔ wo tso Egipte.’ Bu nu si ema fia ŋu kpɔ ko. Etsɔ alilikpo dodo si gaklẽna abe dzobibi ene le zã me fia mɔ wo. Wozɔ ƒuƒuiƒe to Ƒudzĩa me, esime ƒua ma ɖe eve hezu abe gli ene le woƒe ɖusi kple mia me. Esi wo katã woɖi go la, wokpɔ eteƒe tsiawo gbã ɖe Egiptetɔwo ƒe aʋakɔwo dzi. Eyome Israel vi siwo woɖe la, dzi ha be: “Madzi ha na Yehowa . . . Ede sɔ kple sɔdolawo ƒu. Nye ŋusẽ kple kafukafuha enye Yehowa, elabe eya gbɔ ɖeɖe tso va nam.”—2 Mose 13:14, 21, 22; 15:1, 2; Ps. 136:11-15.

16 Ne viwo le asiwò la, ɖe nèle kpekpem ɖe wo ŋu be woaka ɖe Yehowa dzi be enye mía Ðela? Ðe wokpɔna esia le ŋuwò, alo kpɔnɛ dzea sii le wò nuƒoƒo mea? Miate ŋu adzro Mose ƒe Agbalẽ Evelia ta 12 va se ɖe ta 15 me le miaƒe Ƒometadedeagu me eye nàte gbe ɖe ale si Yehowa ɖe eƒe amewo la dzi. Àte ŋu awɔ  esia ne miewɔ ɖoɖo dzro Dɔwɔwɔwo 7:30-36 alo Daniel 3:16-18, 26-28 hã me. Ɛ̃, ele be mí katã—ɖeviwo kple tsitsiawo siaa—míaka ɖe edzi be, menye blemaɣeyiɣiwo me koe Yehowa nye Ðela le o. Aɖe mí le etsɔme abe ale si ko wòɖe eƒe amewo le Mose ƒe ŋkekea me ene.—Mixlẽ 1 Tesalonikatɔwo 1:9, 10.

ŊKUÐODZI WÒNYE NA MÍAWO HÃ

17, 18. Nu ka tae Yesu ƒe ʋua xɔ asi wu alẽvi si wowu le Ŋutitotoŋkekea dzi la ƒe ʋu?

17 Kristotɔ vavãwo meɖua Yudatɔwo ƒe Ŋutitotoŋkekenyui la o. Ŋkuɖodzizã ma nye Mose ƒe Sea ƒe akpa aɖe, evɔ míegale Se ma te o. (Rom. 10:4; Kol. 2:13-16) Ke boŋ míeɖua ŋkuɖodzizã bubu, si nye Mawu ƒe Vi la ƒe ku ƒe ŋkuɖodzizã. Gake Ŋutitotoŋkekenyui si woɖo anyi le Egipte la fia nu geɖe mí.

18 Alẽvi ƒe ʋu si wosisi ɖe ʋɔtruti eveawo kple etametɔ ŋuti dzie woto kpɔ amewo ƒe agbe ta. Egbea mímetsɔa lãwo saa vɔe na Mawu le Ŋutitotoŋkeke alo ŋkeke bubu aɖeke dzi o. Gake vɔsa si nyo wu la li si ate ŋu ana ame nanɔ agbe tegbee. Apostolo Paulo ɖe eme be Yesu ƒe ʋu ‘si wohlẽ’ lae ʋu mɔ na Kristotɔ amesiamina, siwo nye “ŋgɔgbevi siwo ƒe ŋkɔwo woŋlɔ ɖe dziƒowo la ƒe hame” la, be woanɔ agbe tegbee le dziƒo. (Heb. 12:23, 24) Ʋu ma kee na mɔnukpɔkpɔ alẽ bubuawo be woava nɔ agbe tegbee le anyigba dzi. Ele be woaɖo ŋku kakaɖedzinya sia dzi ɣesiaɣi: “To eyama dzi wotsɔ tafea ɖe mí to eƒe ʋu la dzi, ɛ̃, míaƒe vodadawo ƒe tsɔtsɔke, le eƒe amenuveve ƒe agbɔsɔsɔ geɖe la nu.”—Ef. 1:7.

19. Aleke mɔ si nu Yesu ku le na míegaka ɖe nyagblɔɖiwo dzi geɖe wu?

19 Wogblɔ na wo be Israel viwo be ne wowu Ŋutitotolẽvia la, woagagbã eƒe ƒu aɖeke o. (2 Mose 12:46; 4 Mose 9:11, 12) Ke “Mawu ƒe Alẽvi” si va xe fe ɖe mía ta ya ƒe ƒuwo ɖe? (Yoh. 1:29) Wohee ɖe ati ŋu le adzodala eve dome. Yudatɔwo ɖe kuku na Pilato be wòana woaŋe ame siwo wohe ɖe ati ŋu la ƒe afɔwo. Esia ana woaku kaba ale be womagblẽ wo ɖe atia ŋu ʋuu Nisan 15, si nye Sabat gã la naɖo o. Asrafoawo ŋe adzodala eveawo ƒe afɔwo, “gake esi wova Yesu gbɔ, eye wokpɔe be eku xoxo ta la, womeŋe eƒe afɔwo o.” (Yoh. 19:31-34) Abe ale si ko womegbã Ŋutitotolẽvia ƒe ƒuwo o ene la, womeŋe Yesu hã ƒe ƒuwo o. Eya ta alẽvi si wowu le Ŋutitotoŋkekea dzi la nye vɔ si Yesu sa le ƒe 33 M.Ŋ. ƒe Nisan 14 lia dzi la “ƒe vɔvɔli.” (Heb. 10:1) Gawu la, ale si nuwo dzɔe la nye Psalmo 34:21 me vava, eye ele be esia nana míaka ɖe nyagblɔɖiwo dzi geɖe wu.

20. Vovototo ɖedzesi kae le Ŋutitotoŋkekenyuia kple Aƒetɔ ƒe Fiẽnuɖuɖu la dome?

20 Gake vovototo le ale si Yudatɔwo ɖua Ŋutitotoŋkekenyuia kple ale si Yesu gblɔ na eƒe nusrɔ̃lawo be woaɖu Aƒetɔ ƒe Fiẽnuɖuɖua dome. Le kpɔɖeŋu me, wogblɔ na Israel viwo be woaɖu alẽvi la ƒe lã, gake womegblɔ be woano eƒe ʋu o. Esia to vovo na nu si Yesu gblɔ na eƒe nusrɔ̃lawo be woawɔ. Egblɔ be ame siwo aɖu fia kpli ye ‘le Mawu fiaɖuƒea me’ naɖu aboloa ahano wain la, siwo tsi tre ɖi na eƒe ŋutilã kple eƒe ʋu. Míadzro Kristo ƒe ku ƒe Ŋkuɖodzia me tsitotsito le nyati si kplɔe ɖo me.—Marko 14:22-25.

21. Nu ka tae wòaɖe vi be míanya nu tso Ŋutitotoŋkekenyuia ŋu?

21 Ke hã ɖikeke mele eme o be Ŋutitotoŋkekenyuia nye wɔna vevi aɖe le Israel viwo ƒe ŋutinya me, eye nufiame geɖe le eme na mía dometɔ ɖe sia ɖe. Eya ta togbɔ be Ŋutitotoŋkekenyui la nye “ŋkuɖodzigbe” na Yudatɔwo ke menye na Kristotɔwo o hã la, ele be mí Kristotɔwo míanya nu tso eŋu ahasrɔ̃ nu vevi geɖe tso eme, elabena eya hã kpe ɖe ‘Ŋɔŋlɔ blibo si tso Mawu ƒe gbɔgbɔ me’ la ŋu.—2 Tim. 3:16.

^ mm. 5 Ɣeyiɣi si me Yudatɔwo trɔ gbɔ tso aboyo me hafi wote Hebritɔwo ƒe ɣleti sia yɔyɔ be Nisan. Gake be numedzodzroa nanɔ bɔbɔe na mí la, míayɔ Yudatɔwo ƒe ɣleti gbãtɔ sia ko be Nisan.

^ mm. 11 Nisan 15 lia, si nye ŋkeke si kplɔ Ŋutitotoa ɖo, ye nye Abolo Maʋamaʋã Ŋkekenyuia ƒe ŋkeke gbãtɔ, eye enyea Sabat ɣesiaɣi. Le ƒe 33 M.Ŋ. me la, Nisan 15 lia dze kwasiɖa sia kwasiɖa ƒe Sabat (Memleɖagbe) dzi. Esi Sabat eve siawo katã dze ŋkeke ɖeka dzi le ƒe ma me ta la, woyɔ ŋkeke ma be ‘Sabat gã.’—Mixlẽ Yohanes 19:31, 42.