‘Manɔ Mawu sinu kpɔm.’—MIXA 7:7.

1. Nu kae ate ŋu ana míatsi dzi?

TSO esime woɖo Mesia Fiaɖuƒea anyi le ƒe 1914 me la, Satana ƒe nuɖoanyia ge ɖe eƒe ŋkeke mamlɛawo me. Aʋa dzɔ le dziƒo ale be Yesu tsɔ Abosam kple eƒe gbɔgbɔ vɔ̃wo ƒu gbe ɖe anyigba ƒe nutowo me. (Mixlẽ Nyaɖeɖefia 12:7-9.) Satana nyae be “ɣeyiɣi vi aɖe koe le ye si.” (Nyaɖ. 12:12) Ke hã, ƒe 100 kloe nye esia míele eƒe “ɣeyiɣi” vi ma me, eye ate ŋu awɔ na ame aɖewo be ŋkeke mamlɛawo nɔ anyi wòdidi akpa. Esi míele Yehowa sinu kpɔm la, ɖe míeva le dzi tsim fũu akpaa?

2. Nyabiase kawo ŋue nyati sia aɖo?

2 Dzimagbɔɖi ate ŋu agblẽ nu le ame ŋu, elabena ate ŋu ana woawɔ nu ŋumaɖɔɖotɔe. Nu kae ana míayi edzi anɔ Mawu sinu kpɔm? Nyati sia akpe ɖe mía ŋu le esia gome to nyabiase siwo gbɔna la ŋu ɖoɖo me. (1) Nu kae míate ŋu asrɔ̃ tso nyagblɔɖila Mixa ƒe dzigbɔgbɔɖi me? (2) Nudzɔdzɔ kawoe aɖee afia be míeɖo ɣeyiɣi si lalam míele la ƒe nuwuwu? (3) Aleke míate ŋu aɖe ŋudzedzekpɔkpɔ afia ɖe Yehowa ƒe dzigbɔɖi ŋu?

NU KAE MÍATE ŊU ASRƆ̃ TSO MIXA GBƆ?

3. Le Mixa ƒe ɣeyiɣia me la, aleke nuwo nɔ le Israel?

3 Xlẽ Mixa 7:2-6. Yehowa ƒe nyagblɔɖila Mixa kpɔe be nuteƒewɔwɔ na Mawu nɔ tom yim le Israel va se ɖe esime nɔnɔmea va gblẽ kura le Fia Axaz vɔ̃ɖi la ƒe dziɖuɣi. Mixa tsɔ Israel vi mawɔnuteƒewo sɔ kple “ŋù” kple “aŋɔka.” Abe ale si ko ŋù kple aŋɔka wɔa nu vevi ame sia ame si ɖo afɔ wo dzi ene la, nenemae Israel vi mawɔnuteƒeawo nɔ nu vevi wɔm wo haviwoe. Nɔnɔmea va vɔ̃ɖi ale gbegbe be ƒomekadodowo gɔ̃ hã me gblẽ keŋkeŋ. Esi Mixa kpɔe be yemate ŋu awɔ naneke tso nɔnɔmea ŋu le ye ɖokui si o ta la, eɖe eƒe dzimenyawo gblɔ na Yehowa. Eyome ekpɔ  Mawu sinu dzigbɔɖitɔe. Mixa ka ɖe edzi be Yehowa awɔ nane tso nɔnɔmea ŋu le Eya ŋutɔ ƒe ɣeyiɣi dzi.

4. Kuxi kawoe míedoa goe?

4 Abe Mixa ene la, ɖokuitɔdilawo domee míawo hã míele egbea. Ame geɖewo nye “ame madakpewo, ame mawɔnuteƒewo, ame siwo melɔ̃a ame ƒe nya o.” (2 Tim. 3:2, 3) Etena ɖe mía dzi ne míaƒe dɔwɔhatiwo, sukuhatiwo kple aƒelikawo le nu wɔm ɖokuitɔdiditɔe. Gake Mawu subɔla aɖewo doa go kuxi siwo gasesẽ wu. Yesu gblɔ be ye yomedzelawo ado go tsitretsiɖeŋu tso ƒometɔwo gbɔ, eye wòzã nya siwo ɖi esiwo le Mixa 7:6 tsɔ ɖɔ nu si ado tso eƒe gbedeasia me. Yesu gblɔ be: “Meva be made mama amewo dome: ŋutsu ɖe fofoa ŋu, vinyɔnu ɖe dadaa ŋu, eye srɔ̃nyɔnu ɖe lɔ̃xoa ŋu. Ɛ̃, ame ƒe futɔwo anye ye ŋutɔ ƒemetɔwo.” (Mat. 10:35, 36) Esesẽna ŋutɔ ne ƒometɔ dzimaxɔsetɔwo le fewu ɖum le mía ŋu hele mía yome tim! Ne míedo go dodokpɔ siawo tɔgbi la, migana ƒometɔwo ƒe nyaƒoɖeamenua nawɔe be míana ta o. Ke boŋ mina míayi edzi awɔ nuteƒe eye míanɔ Yehowa sinu kpɔm dzigbɔɖitɔe be wòakpɔ nyawo gbɔ. Ne míebiaa eƒe kpekpeɖeŋu ɣesiaɣi la, ana ŋusẽ kple nunya si míehiã be míado dzi la mí.

5, 6. Aleke Yehowa ɖo eteƒe na Mixa, gake nu ka teƒee Mixa mekpɔ o?

5 Yehowa ɖo eteƒe na Mixa le esi wògbɔ dzi ɖi ta. Mixa kpɔ Fia Axaz vɔ̃ɖi la kple eƒe ŋutasẽdziɖuɖua ƒe nuwuwu teƒe. Ekpɔ eteƒe esime Axaz vi Xizkiya si va nye fia nyui xɔ fiazia eye wògbugbɔ tadedeagu dzadzɛ ɖo anyi. Eye ʋɔnudrɔ̃gbedeasi si Yehowa gblɔ to Mixa dzi ɖe Samaria ŋu la hã va eme eye wòkpɔ eteƒe esime Asiriatɔwo va dze Israel ƒe dziehefiaɖuƒea dzi.—Mixa 1:6.

6 Gake menye nya siwo katã Yehowa ƒe gbɔgbɔ ʋã Mixa wògblɔ ɖi la me vava teƒee wòkpɔ o. Le kpɔɖeŋu me, Mixa ŋlɔ bena: “Eye wòava me le ŋkeke mlɔeawo me be, Yehowa ƒe aƒe ƒe to la akɔ ta agbɔ towo ŋu, eye wòaƒo togbɛwo ta, eye anyigba dzi dukɔwo aƒo zi ɖe eŋu. Eye dukɔ geɖewo atso agblɔ bena: ‘Mina míayi Yehowa ƒe to la . . . gbɔ.’” (Mixa 4:1, 2) Ƒe gbogbo aɖe le Mixa ƒe ku megbe hafi nyagblɔɖi ma va eme. Ke hã, Mixa ɖoe kplikpaa be nu ka kee amewo ɖawɔ o, yeayi edzi awɔ nuteƒe na Yehowa va se ɖe ku me. Mixa ŋlɔ ku ɖe esia ŋu be: “Ne dukɔwo katã dometɔ ɖe sia ɖe le zɔzɔm le eƒe mawu ƒe ŋkɔ me hã la, míawo ya míazɔ le Yehowa, mía Mawu la ƒe ŋkɔ me ɖaa tegbee.” (Mixa 4:5) Mixa te ŋu kpɔ Yehowa sinu dzigbɔɖitɔe le ɣeyiɣi sesẽwo me elabena eka ɖe edzi bliboe be Yehowa awɔ Eƒe ŋugbedodowo katã dzi. Nyagblɔɖila wɔnuteƒea ka ɖe Yehowa dzi vavã.

7, 8. (a) Susu kawo tae wòle be míaka ɖe Yehowa dzi? (b) Nu kae ana ɣeyiɣi si susɔ hafi Yehowa nadrɔ̃ ʋɔnu amewo madidi le mía ŋkume o?

7 Ðe míawo hã míeka ɖe Yehowa dzi alea? Susu nyuiwo li siwo tae wòle be míaka ɖe edzi alea ɖo. Míele Mixa ƒe nyagblɔɖi ma me vava teƒe kpɔm egbea. Le ‘ŋkeke mamlɛ’ siawo me la, ame miliɔn geɖe siwo tso dukɔwo, towo kple gbegbɔgblɔ vovovowo me le zi ƒom ɖe “Yehowa ƒe aƒe ƒe to la” ŋu. Togbɔ be tadeagula siawo tso dukɔ siwo lé fu wo nɔewo me hã la, ‘wotsɔ woƒe yiwo tu agblenuwo,’ eye wogbe be ‘yewomagasrɔ̃ aʋawɔwɔ azɔ o.’ (Mixa 4:3) Mɔnukpɔkpɔ ka gbegbee nye esi wònye be míele Yehowa ƒe ame fafawo dome!

8 Nyateƒee, míedi vevie be Yehowa nahe xexe vɔ̃ɖi sia ava nuwuwu kpuie. Gake hafi míate ŋu akpɔ Yehowa sinu dzigbɔɖitɔe la, ehiã be míakpɔ nuwo abe ale si wòkpɔnɛ ene. Eɖo ŋkeke si dzi wòato “ŋutsu aɖe si wòɖo,” si nye Yesu Kristo, dzi adrɔ̃ ʋɔnu amegbetɔƒomea. (Dɔw. 17:31) Gake hafi ŋkeke ma naɖo  la, Mawu le mɔnukpɔkpɔ nam ameƒomevi ɖe sia ɖe be “nyateƒe ƒe sidzedze vavãtɔ la” nasu wo si ne woawɔ ɖe edzi ahakpɔ ɖeɖe. Amewo ƒe agbe ɖo afɔku me. (Mixlẽ 1 Timoteo 2:3, 4.) Ne míaƒe ŋku biã ɖe kpekpe ɖe amewo ŋu be Mawu ŋuti sidzedze vavãtɔ nasu wo si ŋu la, ekema ɣeyiɣi si susɔ hafi Yehowa nadrɔ̃ ʋɔnu amewo la madidi le mía ŋkume o. Ɣeyiɣia aɖo kpuie—le vo me. Ne ɣeyiɣia va ɖo la, aleke gbegbe dzi adzɔ mí be míewɔ Fiaɖuƒegbeƒãɖeɖedɔa ŋkubiãtɔe nye esi!

NUDZƆDZƆ KAWOE AÐEE AFIA BE MÍEÐO ƔEYIƔI SI LALAM MÍELE LA ƑE NUWUWU?

9-11. Ðe nyagblɔɖi si le 1 Tesalonikatɔwo 5:3 va eme xoxoa? Ðe eme.

9 Xlẽ 1 Tesalonikatɔwo 5:1-3. Eteƒe madidi o, dukɔwo anɔ gbɔgblɔm be “Ŋutifafa kple dedienɔnɔ!” li. Be woƒe nya mawo nagaflu mí o la, ele be “míanɔ ŋudzɔ, eye míanɔ mo xexi.” (1 Tes. 5:6) Be míate ŋu anɔ ŋudzɔ le gbɔgbɔ me la, mina míadzro nudzɔdzɔ aɖewo siwo le mɔ dzi dzram ɖo na dukɔwo be woagblɔ nya siawo la me kpuie.

10 Le xexemeʋa eveawo ƒe nuwuwu la, dukɔwo nɔ ŋutifafa dim vevie. Woɖo Dukɔwo ƒe Nubabla la anyi le xexemeʋa gbãtɔ megbe kple susu be wòahe ŋutifafa vɛ. Emegbe le xexemeʋa evelia yome la, Dukɔ Ƒoƒuawo dzie dukɔwo katã da woƒe mɔkpɔkpɔ ɖo be wòahe ŋutifafa ava xexea me. Dziɖuɖuwo kple subɔsubɔhakplɔlawo siaa le habɔbɔ sia sinu kpɔm be wòahe ŋutifafa vɛ na ameƒomea. Le kpɔɖeŋu me, Dukɔ Ƒoƒuawo ɖe gbeƒã be ƒe 1986 nye Dukɔwo Dome Ŋutifafaƒe. Le ƒe ma me la, Katoliko-ha la ƒe ŋgɔnɔla ƒo dukplɔla kple subɔsubɔhakplɔla siwo tso dukɔ vovovowo me nu ƒu ɖe Assisi, Italia, eye wodo gbe ɖa bia ŋutifafa.

11 Gake ŋutifafa ƒe gbeƒã si woɖe ɣemaɣi kple ɣebubuɣiwo la menye nyagblɔɖi si le 1 Tesalonikatɔwo 5:3 me vava o. Nu ka tae? Elabena “tsɔtsrɔ̃ kpata” si wogblɔ ɖi la meva haɖe o.

12. Nu kae míenya tso “Ŋutifafa kple dedienɔnɔ” ƒe gbeƒã si woaɖe ŋu?

 12 Ame kae ado “Ŋutifafa kple dedienɔnɔ” ƒe ɣli tɔxɛ sia le etsɔme? Akpa kae Kristodukɔa ƒe ŋgɔnɔlawo kple subɔsubɔhakplɔla bubuawo awɔ le esia me? Eye akpa kae dukplɔla vovovoawo awɔ le esia me? Ŋɔŋlɔawo megblɔe na mí o. Nu si míenyae nye be, mɔ ka ke dzie woɖato ɖe gbeƒã ma alo aleke gbegbe wòadze nu ŋutɔŋutɔe o, amefuflu koe wòanye. Nuɖoanyi xoxo sia ayi edzi anɔ Satana ƒe ŋusẽ te. Eƒaƒã keŋkeŋ, eye alea koe wòanɔ. Awɔ nublanui ŋutɔ be mía dometɔ aɖe naxɔ Satana ƒe ameflunya mawo dzi ase ahaɖe asi le míaƒe Kristotɔwo ƒe akpaɖekedzimademadea ŋu!

13. Nu ka tae mawudɔlawo kpɔtɔ lé tsɔtsrɔ̃ ƒe yawo ɖe asi?

13 Xlẽ Nyaɖeɖefia 7:1-4. Esi míele 1 Tesalonikatɔwo 5:3 me vava lalam la, mawudɔla sẽŋuwo kpɔtɔ lé xaxa gã la ƒe tsɔtsrɔ̃ ƒe yawo ɖe asi. Nu ka lalam wole? Eyae nye nudzɔdzɔ vevi aɖe si ŋu apostolo Yohanes ƒo nu tsoe, si nye amesiamina siwo nye “Mawu ƒe kluviwo” nu tetre mamlɛa. * Ne wonya wu wo nu tetre mamlɛtɔa nu ko la, mawudɔlawo aɖe asi le tsɔtsrɔ̃ ƒe yawo ŋu. Ekema nu kae adzɔ?

14. Nu kae ɖee fia be Babilon Gã la ƒe tsɔtsrɔ̃ ɖo vɔ?

14 Woatsrɔ̃ Babilon Gã si nye alakpasubɔsubɔ ƒe xexemefiaɖuƒe la. Tohehe mae wòdze na. “Amewo kple amehawo kple dukɔwo kpakple gbegbɔgblɔwo” mate ŋu ana kpekpeɖeŋu vavã aɖekee o. Fifia kura gɔ̃ hã la, míele dzesi siwo fia be eƒe nuwuwu ɖo vɔ la kpɔm. (Nyaɖ. 16:12; 17:15-18; 18:7, 8, 21) Le nyateƒe me la, ele dzedzem le nyadzɔdzɔwo me fifia be amewo le nu ƒom tsi tre ɖe subɔsubɔhawo kple subɔsubɔhakplɔlawo ŋu, eye woƒe nu megale wo ŋu dzem o. Togbɔ be ele alea hã, Babilon Gã la ƒe ŋgɔnɔlawo susunɛ be yewole dedie. Woda ƒu ŋutɔ! Ne wodo “Ŋutifafa kple dedienɔnɔ” ƒe ɣlia megbe la, Satana ƒe nuɖoanyia ƒe dunyahedziɖuɖuwo atrɔ ɖe alakpasubɔsubɔhawo ŋu le vo me ahatsrɔ̃ wo ɖa keŋkeŋ. Womagakpɔ Babilon Gã la akpɔakpɔ o! Kakaɖedzitɔe la, anyo be míayi edzi alala nudzɔdzɔ ɖedzesi mawo dzigbɔɖitɔe.—Nyaɖ. 18:8, 10.

ALE SI NÀÐE ŊUDZEDZEKPƆKPƆ AFIA ÐE MAWU ƑE DZIGBƆÐI ŊU

15. Nu ka tae Yehowa le lalam dzigbɔɖitɔe?

15 Togbɔ be wodo vlo Yehowa ƒe ŋkɔa ale gbegbe hã la, ele lalam dzigbɔɖitɔe be ɣeyiɣi si yeɖo la nade hafi yeaɖe afɔ. Yehowa medi be dzianukwaretɔ aɖeke natsrɔ̃ o. (2 Pet. 3:9, 10) Ðe míawo hã míesena le mía ɖokui me nenema? Hafi Yehowa ƒe ŋkekea naɖo la, míate ŋu aɖe míaƒe ŋudzedzekpɔkpɔ ɖe eƒe dzigbɔɖi ŋu afia le mɔ siwo gbɔna nu.

16, 17. (a) Nu ka tae wòle be míakpe ɖe ame siwo dzudzɔ gbeadzidede ŋu? (b) Nu ka tae wòhiã kpata be ame siawo nagatrɔ ava Yehowa gbɔ?

16 Kpe ɖe ame siwo dzudzɔ gbeadzidede ŋu. Yesu gblɔ be ne wogakpɔ alẽ búbu ɖeka pɛ la, enyea dzidzɔ le dziƒo. (Mat. 18:14; Luka 15:3-7) Edze ƒãa be Yehowa kpɔtɔ tsɔa ɖe le eme na ame siwo katã lɔ̃a eƒe ŋkɔa, ne womele esubɔm dzonɔamemetɔe fifia ale si dze o gɔ̃ hã. Ne míekpe ɖe ame siawo ŋu wogatrɔ va hamea me la, ekema míele dzidzɔ dom na Yehowa kple eƒe dɔlawo.

17 Ðe nèle ame siwo mele Mawu subɔm dzonɔamemetɔe fifia o la domea? Ðewohĩ hamea me tɔ aɖee wɔ nane si ɖe fu na wò vevie eye nèdzudzɔ hadede kple Yehowa ƒe habɔbɔa. Fifia si ɣeyiɣi aɖe va yi la, bia ɖokuiwò be: ‘Ðe nye agbenɔnɔ nyo ɖe edzi fifia eye mele dzidzɔ geɖe  wu kpɔma? Yehowae dze agɔ le dzinyea, alo nɔvinye madeblibo aɖe yea? Ðe Yehowa Mawu wɔ nane tsɔ do vevesese nam kpɔa?’ Le nyateƒe me la, nyui sɔŋ koe Yehowa wɔna na mí. Ne míele agbe nɔm ɖe míaƒe adzɔgbeɖeɖe nɛ nu o gɔ̃ hã la, eyia edzi wɔa nyui na mí. (Yak. 1:16, 17) Yehowa ƒe ŋkekea tu aƒe ŋutɔ. Fifiae nye ɣeyiɣi si wòle be míagbugbɔ ava mía Fofo lɔlɔ̃a si le dziƒo gbɔ ahatrɔ ava hamea me, elabena teƒe sia koe nye dedienɔƒe le ŋkeke mamlɛ siawo me.—5 Mose 33:27; Heb. 10:24, 25.

Yehowa ƒe amewo kpena ɖe ame siwo dzudzɔ gbeadzidede ŋu be woatrɔ ava Yehowa gbɔ (Kpɔ memama 16, 17)

18. Nu ka tae wòle be míawɔ ɖe ame siwo le ŋgɔ xɔm ƒe mɔfiamewo dzi?

18 Wɔ ɖe ame siwo le ŋgɔ xɔm ƒe mɔfiamewo dzi nuteƒewɔwɔtɔe. Yehowa si nye Alẽkplɔla lɔ̃ame le mɔ fiam mí hele mía ta kpɔm. Etia Via be wòanye yeƒe alẽwo ƒe Kplɔla Gã. (1 Pet. 5:4) Hamemetsitsi siwo le hame siwo wu 100,000 me la le Mawu ƒe alẽ ɖekaɖekawo kplɔm. (Dɔw. 20:28) Ne míewɔna ɖe ame siwo le ŋgɔ xɔm ƒe mɔfiamewo dzi nuteƒewɔwɔtɔe la, ekema míele eɖem fia be míekpɔa ŋudzedze ɖe nu siwo katã wɔm Yehowa kple Yesu le na mí ŋu.

19. Nu kae wòfia be míanɔ mía nɔviwo ŋu kplikplikpli?

19 Nɔ nɔviwòwo ŋu kplikplikpli. Nu kae esia fia? Ne futɔwo dze aʋakɔ si wona hehee nyuie dzi la, nu si asrafoawo wɔnae nye be wotena ɖe wo nɔewo ŋu kplikplikpli—womenaa dometsotso nɔa aʋakɔ la me tɔwo dome o. Esia nana wotea ŋu nɔa te sesĩe ɖe futɔawo nu. Satana le Mawu ƒe amewo dzi dzem vɔ̃ɖitɔe wu. Menye fifiae nye ɣeyiɣi si míanɔ dzre wɔm kple mía nɔviwo le hamea me o. Ke boŋ fifiae nye ɣeyiɣi si wòle be míanɔ mía nɔviwo ŋu kplikplikpli, aŋe aɖaba aƒu mía nɔviwo ƒe blibomademadewo dzi, eye míaka ɖe Yehowa ƒe amekpɔkplɔ dzi.

Fifiae wòle be míanɔ mía nɔviwo ŋu kplikplikpli ahatsi tre ɖe Satana kple eƒe gbɔgbɔ vɔ̃wo ŋu (Kpɔ memama 19)

20. Nu kawoe wòle be míawɔ fifia?

20 Neva eme be mí katã míayi edzi anɔ ŋudzɔ le gbɔgbɔ me eye míayi edzi anɔ Mawu sinu kpɔm. Mina míalala “Ŋutifafa kple dedienɔnɔ!” ƒe gbeƒã si dukɔwo aɖe kple ame tiatiawo nu tetre mamlɛa dzigbɔɖitɔe. Ema yome mawudɔla eneawo aɖe asi le tsɔtsrɔ̃ ƒe yawo ŋu, eye woatsrɔ̃ Babilon Gã la. Esi míele nudzɔdzɔ ɖedzesi siawo lalam la, mina míanɔ wɔwɔm ɖe mɔfiame siwo ame siwo wotia be woaxɔ ŋgɔ na mí le Yehowa ƒe habɔbɔ me naa mí la dzi. Mina míanɔ mía nɔewo ŋu kplikplikpli be Abosam kple eƒe gbɔgbɔ vɔ̃wo nagakpɔ mɔnu aɖeke le mía ŋu o! Fifiae nye ɣeyiɣi si wòle be míawɔ ɖe hakpalaa ƒe nuxlɔ̃amenya siawo dzi be: “Misẽ ŋu, eye milé dzi ɖe ƒo, mi ame siwo katã kpɔa mɔ na Yehowa la!”—Ps. 31:25.

^ mm. 13 Ne èdi numeɖeɖe ku ɖe vovototo si le amesiaminawo nu tetre gbãtɔ kple wo nu tetre mamlɛtɔ dome ŋu la, kpɔ January 1, 2007, ƒe Gbetakpɔxɔ, axa 30-31.