Dzo kpo yi emenuwo dzi

Dzo kpo yi emenuawo dzi

 NU NYUI SIWO LE MÍAƑE NUDZRAÐOƑE

“Menɔ Abe Klo Si Meyia Nugbe Gblẽa Eƒe Go Ði O Ene”

“Menɔ Abe Klo Si Meyia Nugbe Gblẽa Eƒe Go Ði O Ene”

LE ŊKEKE asieke ƒe ɖaseɖiɖidɔ tɔxɛ si wowɔ le August kple September 1929 me la, gbeƒãɖela siwo wu 10,000 sɔŋ ye kaka nya nyuia afɔtsɔtsɔe le United States bliboa. Woma agbalẽ kple agbalẽvi siwo ade 250,000 sɔŋ. Nya nyui kakala akpe ɖeka nɔ Fiaɖuƒegbeƒãɖela siawo dome. Aleke gbegbe wodzi ɖe edzie nye esi! Bulletin, si woyɔna fifia be Míaƒe Fiaɖuƒe Subɔsubɔdɔ, gblɔ tso esia ŋu be, “enye nu wɔnuku” be tso ƒe 1927 va se ɖe ƒe 1929 me ko la, mɔɖelawo ƒe xexlẽme dzi ɖe edzi zi gbɔ zi etɔ̃.

Le ƒe 1929 ƒe nuwuwu lɔƒo la, ganyawo tɔtɔ le xexea me. Le October 29, 1929, si wova yɔ be Braɖa Vɔ̃e, dzi la, adzɔnuwo ƒe asi ɖiɖi le New York Gadedɔme Dɔwɔƒe la ale gbegbe be xexea me katã ge ɖe ɣeyiɣi si woyɔ be Ganyawo Ƒe Toyiyi Gãtɔ me. Gadzraɖoƒe akpe geɖe ɖu agba. Agbledela gãgãwo ƒe dɔ gblẽ. Adzɔnuwɔƒe gãwo tu woƒe dɔwɔƒewo. Woɖe asi le ame miliɔn geɖe ŋu le dɔ me. Le ƒe 1933 me la, woxɔa aƒe 1,000 sɔŋ le amewo si le Amerika gbe sia gbe le esi womegate ŋu le ga siwo wodo xem o ta.

Aleke ɣeyiɣiawo katã ƒe gbeƒãɖelawo wɔ te ŋu nɔ te ɖe ganyawo ƒe sesẽ ƒe ɣeyiɣi ma nu? Nu siwo kpe ɖe wo ŋu dometɔ ɖekae nye ʋu siwo ganye xɔdɔme si woto vɛ. Womexea xɔfetu alo xea adzɔ ɖe xɔdɔme siawo ta o, eye esia kpe ɖe mɔɖela geɖewo ŋu be woyi woƒe subɔsubɔdɔa dzi eye womegblẽa ga fũu o. * Le takpekpewɔɣiwo la, xɔdɔmeʋuawo zua dzeƒe na wo. Le ƒe 1934 me la, wowɔ xɔdɔmeʋu si le kpokploe evɔ womaxaxa le eme o, si me pɔmpi, mlekpui kple aba le, eye wotrɔ asi le eŋu be vuvɔ nagawɔ ame le eme o la ƒe nɔnɔmetatawo ɖe Bulletin la me hefia ale si woate ŋu awɔe tsitotsito.

Gbeƒãɖela veviedola siwo le xexea me godoo dometɔ geɖe dze woawo ŋutɔ ƒe xɔdɔmeʋuwo wɔwɔ gɔme. Victor Blackwell gblɔ be: “Nuteƒekpɔkpɔ aɖeke menɔ Noa si le tɔdziʋukpakpa me o, abe ale si ko nye hã nyemenya naneke tso xɔdɔmeʋuwɔwɔ ŋu o ene.” Gake nɔviŋutsu sia te ŋu wɔe.

Wole ʋu si ganye xɔdɔme la dem akro be woatsɔe atso tɔ le India

Ʋu si ganye xɔdɔme la le Avery kple Lovenia Bristow si. Avery gblɔ be, “Menɔ abe klo si meyia nugbe gblẽa eƒe go ɖi o ene.” Nɔviŋutsu kple Nɔvinyɔnu Bristow wɔ mɔɖeɖedɔa ɖekae kple Harvey kple Anne Conrow, siwo ƒe xɔdɔmeʋua ƒe gliwo nye agbalẽgo siwo ŋu wosi aŋɔ yibɔ ɖo. Ɣesiaɣi si woho woƒe ʋua la, agbalẽgoawo ƒe ɖewo flona. Avery gblɔ be, “Ame aɖeke mekpɔ xɔdɔmeʋu ma tɔgbi kpɔ do ŋgɔ o, eye womegakpɔ ɖeke kpɔ tso ɣemaɣi o!” Egblɔ kpee be Nɔviŋutsu kple Nɔvinyɔnu Conrow kple wo viŋutsu eveawoe nye “ƒome si kpɔa dzidzɔ wu.” Harvey Conrow ŋlɔ bena, “Naneke mehiã mí kpɔ o, míenɔ dedie le Yehowa subɔsubɔ me, eye wòkpɔa mía ta lɔlɔ̃tɔe.” Conrow-ƒome bliboa de Gilead Sukua emegbe eye woɖo wo ame eneawo ɖe Peru abe dutanyanyuigblɔlawo ene.

Giusto kple Vincenza Battaino hã wɔ mɔɖeɖedɔa ɖekae. Esi Giusto kpɔe be ye srɔ̃ fɔ fu la, wotrɔ asi le woƒe ʋu si nye ƒe 1929 ƒe Model A Ford ŋu wòzu xɔdɔmeʋu si “nya kpɔ abe amedzrodzeƒe nyui aɖe ene” ne wotsɔe sɔ kple avɔgbadɔ si me wonɔ tsã. Esi  wodzi wo vinyɔnuvia la, ƒome sia yi mɔɖeɖedɔ si dzɔa dzi na wo vevie la dzi, eye woɖea gbeƒã na Italiatɔ siwo ʋu va tsi Amerika.

Ame geɖe ɖoa to nya nyuia, gake esesẽna na ame dahewo kple ame siwo mekpɔ dɔ le wɔwɔm o be woana ga ɖe Biblia-srɔ̃gbalẽawo ta. Eya ta wonaa nu sia nu si nya le wo si ko ɖe agbalẽawo ta. Mɔɖela eve ŋlɔ nu vovovo 64 sɔŋ siwo ɖetsɔlemetɔwo na wo la ɖe agbalẽ dzi. Ðeko nu siwo woŋlɔ ɖi la “le abe fiase sue aɖe me nuwoe fiasetɔa ŋlɔ ɖi ene.”

Fred Anderson do go agbledela aɖe si lɔ̃ be yeaxɔ míaƒe agbalẽwo, eye wòtsɔ dadaa ƒe gaŋkui, alo tsitsi, na ɖe wo ta. Le agble si kplɔ ema ɖo me la, ŋutsu aɖe tsɔ ɖe le míaƒe agbalẽawo me vevie gake efa konyi be, “Gaŋkui mele asinye matsɔ axlẽ nui o.” Gake esi wòɖɔ agbledela kemɛa ƒe gaŋkuia la, ete ŋu kpɔ nuŋɔŋlɔawo hexlẽ wo nyuie, eye wòdzɔ ga ɖe agbalẽawo kple gaŋkuia ta dzidzɔtɔe.

Herbert Abbott tsɔa xadza dea eƒe ʋu me, si me wòdea koklo siwo amewo na ɖe agbalẽawo ta. Ne kokloawo de etɔ̃ alo ene ko la, eyina ɖadzraa wo le asi me eye wòtsɔa gaa dzea mɔ̃memi dea eƒe ʋu me. Egblɔ be: “Ðe wòdzɔna be penivi gɔ̃ hã menɔa mía si ɣeaɖewoɣi oa? Ɛ̃, edzɔna, gake míenana ema xea mɔ na mí o. Ne mɔ̃memi nya le ʋu me na mí ko la, míawoe nye ema yina ɖaa; míeɖoa ŋu ɖe Yehowa ŋu hekana ɖe edzi.”

Ŋuɖoɖo ɖe Yehowa ŋu kple tameɖoɖo kplikpaa ye kpe ɖe Mawu ƒe amewo ŋu le ɣeyiɣi sesẽ mawo me. Gbe ɖeka esi tsi gã aɖe nɔ dzadzam la, Maxwell kple Emmy Lewis ƒu du do go le woƒe xɔdɔmeʋua me teti koe ati gã aɖe mu dze ʋua dzi hefee ɖe eve. Maxwell gblɔ be: “Nu mawo menye mɔxenu na mí o, agbemenudzɔdzɔwo ko wonye, eye meva tame na mí kpɔ be míadzudzɔ dɔa alo ana ta o. Dɔ geɖe gali míawɔ, eye míedi vevie be míawɔe.” Vɔvɔ̃ meɖo Maxwell kple Emmy kura o. Wo xɔlɔ̃wo kpe ɖe wo ŋu wogbugbɔ wɔ xɔdɔmeʋu yeye.

Le míawo hã míaƒe ɣeyiɣi sesẽ siawo me la, ɖokuitsɔtsɔsavɔ ƒe gbɔgbɔ ma kee Yehowa ƒe Ðasefo veviedola miliɔn geɖeawo ɖena fiana. Abe mɔɖela gbãtɔ mawo ene la, míawo hã míeɖoe kplikpaa be míayi gbeƒãɖeɖedɔa dzi va se ɖe esime Yehowa nagblɔ be dɔa vɔ.

^ mm. 5 Ɣemaɣiwo la, mɔɖela akpa gãtɔ mewɔa ŋutilãmedɔ o. Woɖea Biblia-srɔ̃gbalẽwo ƒe asi dzi kpɔtɔ na wo, eye wozãa viɖe suesue siwo wokpɔna le ga siwo amewo na ɖe agbalẽawo ta dzi la tsɔ kpɔa woƒe nuhiahiã veviwo gbɔ.