“Migawɔ kuvia le miaƒe dɔ ŋu o. . . . Miwɔ dɔ na Yehowa abe kluviwo ene.” —ROM. 12:11.

1. Aleke kluvinyenye si ŋu woƒo nu tsoe le Romatɔwo 12:11 to vovo na ale si amewo bua kluviwoe?

BE WOANYE Mawu ƒe kluvi to vovo kura na ale si amewo bua kluviwoe egbea. Ne woƒo nu tso kluviwo ŋu la, woƒe susu yia ame siwo dzi woɖuna ŋutasesẽtɔe, siwo wotena ɖe anyi hewɔa nu madzɔmadzɔ ɖe wo ŋu la dzi. Gake Mawu ƒe Nya si tso gbɔgbɔ me la ƒo nu tso Kristotɔwo ŋu be wonye kluvi siwo lɔ̃na faa be yewoasubɔ yewoƒe Aƒetɔ lɔ̃ame la. Esi apostolo Paulo xlɔ̃ nu ƒe alafa gbãtɔ me Kristotɔwo be ‘woawɔ dɔ na Yehowa abe kluviwo ene’ la, ɖe wònɔ dzi dem ƒo na wo be lɔlɔ̃ si le wo si na Mawu naʋã wo woawɔ subɔsubɔdɔ kɔkɔe na eyama. (Rom. 12:11) Nu kae kluvinyenye sia bia? Nu kae míawɔ be míagazu kluviwo na Satana kple eƒe xexea o? Eye teƒeɖoɖo kawoe asu ame siwo subɔ Yehowa nuteƒewɔwɔtɔe abe kluviwo ene la si?

“MELƆ̃ NYE AƑETƆ” VEVIE

2. (a) Nu kae aʋã kluvi Israel vi be wòagbe be woagana ablɔɖe ye o? (b) Ne kluvi aɖe lɔ̃ be woaŋɔ to na ye la, nu kae esia fia?

2 Míekpɔa kluvi siwo tɔgbi Yehowa di be míanye ƒe kpɔɖeŋu le Mawu ƒe Se si wòtsɔ na Israel viwo me. Sea bia be woana ablɔɖe Hebri kluvi le eƒe kluvizuzu ƒe ƒe adrelia me. (2 Mose 21:2) Ke hã Yehowa wɔ ɖoɖo tɔxɛ aɖe na kluvi si lɔ̃ eƒe aƒetɔ eye wòdi be yeayi edzi asubɔe la. Eƒe aƒetɔ akplɔe ayi ʋɔtru alo ʋɔtruti la ŋu, eye wòatsɔ nuŋɔnui aŋɔ to nɛ. (2 Mose 21:5, 6) Eɖe dzesi be ɖoɖoa ku ɖe amea ƒe to ŋu. Le Hebrigbe me la, toɖoɖo do ƒome kple nusese. Eya ta efia be kluvi si woŋɔ to na la lɔ̃ faa be yeayi edzi aɖo to yeƒe aƒetɔ ahasubɔe. Esia kpe ɖe mía ŋu míekpɔ nu si míaƒe adzɔgbeɖeɖe na Yehowa bia, si nye be lɔlɔ̃ na Mawu naʋã mí míalɔ̃ faa aɖo toe.

3. Nu kae ʋãa mí míeɖea adzɔgbe na Mawu?

3 Esi míexɔ nyɔnyrɔ hezu Kristotɔwo la, míedo ŋgɔ ɖe adzɔgbe na Yehowa be míasubɔe, be míanye eƒe  kluviwo. Didi si le mía me be míaɖo to Yehowa awɔ eƒe lɔlɔ̃nu ye ʋã mí míeɖe adzɔgbe nɛ. Menye ame aɖekee zi esia ɖe mía dzi o. Le sɔhɛ kple ɖevi siwo xɔ nyɔnyrɔ gɔ̃ hã gome la, woawo ŋutɔwoe lɔ̃ faa tsɔ wo ɖokui ɖe adzɔgbe na Yehowa hafi, ke menye esi wodi be yewoadze yewo dzilawo ŋu tae o. Lɔlɔ̃ na Yehowa, mía Aƒetɔ si le dziƒo, ye nye nu si koŋ ʋãa Kristotɔwo woɖea adzɔgbe nɛ. Apostolo Yohanes ŋlɔ bena: “Nu si lɔlɔ̃ na Mawu fiae nye esi: be míawɔ eƒe seawo dzi.”—1 Yoh. 5:3.

WONA ABLƆÐE MÍ, GAKE MÍEKPƆTƆ NYE KLUVIWO

4. Nu kae wòhiã be míawɔ hafi azu “dzɔdzɔenyenye ƒe kluviwo”?

4 Aleke gbegbe míedaa akpe na Yehowae nye esi be wòʋu mɔnukpɔkpɔ ɖi mí be míanye yeƒe kluviwo! Ne míexɔ Kristo ƒe tafevɔsaa dzi se la, míekpɔa ablɔɖe tso nu vɔ̃ ƒe kluvinyenye me. Togbɔ be míekpɔtɔ nye ame madeblibowo hã la, míelɔ̃ faa be míaɖo to Yehowa kple Yesu. Paulo ɖe esia me nyuie le lɛta siwo gbɔgbɔ ʋãe wòŋlɔ la dometɔ ɖeka me, esi wògblɔ be: “Mibu mia ɖokui abe ame kukuwo ŋutɔŋutɔ ene na nu vɔ̃, gake abe ame gbagbewo ene na Mawu, to Kristo Yesu dzi.” Eyome exlɔ̃ nu mí be: “Ðe mienyae be, ne mieyi edzi le mia ɖokui tsɔm na ame aɖe abe kluviwo ene be yewoaɖo toe la, ekema miezu eƒe kluviwo le esi mieɖoa toe ta, eɖanye nu vɔ̃ tɔwo hena ku, alo toɖoɖo tɔwo hena dzɔdzɔenyenye oa? Ke woada akpe na Mawu be, mienye nu vɔ̃ ƒe kluviwo tsã, gake mieva zu ame siwo tso dzi me ɖoa to nufiafia ma si ƒomevi wotsɔ mi de asi na la. Ɛ̃, esi wona ablɔɖe mi tso nu vɔ̃ me ta la, mieva zu dzɔdzɔenyenye ƒe kluviwo.” (Rom. 6:11, 16-18) De dzesii be apostoloa ƒo nu tso ‘toɖoɖo tso dzi me’ ŋu. Nyateƒee, adzɔgbeɖeɖe na Yehowa nana míezua “dzɔdzɔenyenye ƒe kluviwo.”

5. Avu kae wòle be mí katã míanɔ wɔwɔm, eye nu ka tae?

5 Gake nu eve aɖewo li siwo wòle be míawɔ avu kple hafi ate ŋu ayi edzi anɔ agbe ɖe míaƒe adzɔgbeɖeɖe nu. Gbãtɔe nye míaƒe blibomademade. Paulo hã wɔ avu sia. Egblɔ be: “Mekpɔa dzidzɔ le Mawu ƒe se la ŋu ŋutɔ le ame si menye le ememe la gome, gake mekpɔ se bubu aɖe le nye ŋutinuwo me, si le aʋa wɔm kple nye susu ƒe se, eye wòléam aboyoe yina na nu vɔ̃ ƒe se, si le nye ŋutinuwo me.” (Rom. 7:22, 23) Esi míede blibo o ta la, ele be míayi edzi anɔ avu wɔm kple ŋutilã ƒe nudzodzrowo. Apostolo Petro ɖo aɖaŋu na mí be: “Minɔ abe ablɔɖemewo ene, ke hã menye be miatsɔ miaƒe ablɔɖe la atsyɔ nu vɔ̃ɖi wɔwɔ dzi o, ke boŋ abe Mawu ƒe kluviwo ene.”—1 Pet. 2:16.

6, 7. Aleke Satana dzea agbagba be yeana yeƒe xexea nadzro mí?

6 Nu evelia si wòle be míawɔ avu kple ye nye xexe sia si dzi gbɔgbɔ vɔ̃wo le ŋusẽ kpɔm ɖo. Satana, si nye xexe sia dziɖula, dzidzea eƒe aŋutrɔwo ɖe mía dzi kple susu be yeagblẽ míaƒe nuteƒewɔwɔ na Yehowa kple Yesu dome. Edina be yeana míazu yeƒe kluviwo. Be wòaɖo taɖodzinu sia gbɔ la, edzea agbagba be yeana yeƒe xexea nakpɔ ŋusẽ ɖe mía dzi. (Mixlẽ Efesotɔwo 6:11, 12.) Mɔ siwo dzi Satana tona ƒe ɖee nye be yeana xexea nadze abe nu si nya kpɔ alo nu si dzroa ame ene. Apostolo Yohanes xlɔ̃ nu mí be: ‘Miganɔ xexea alo nu siwo le xexea me la lɔ̃m o. Ne ame aɖe lɔ̃a xexea la, Fofo la ƒe lɔlɔ̃ mele eme o; elabena nu sia nu si le xexea me—ŋutilã ƒe nudzodzro kple ŋkuwo ƒe nudzodzro kple ame ƒe nunɔamesiwo tsɔtsɔ ƒo adegbee—la metso Fofo la gbɔ o, ke boŋ xexea me wotso.’—1 Yoh. 2:15, 16.

7 Didi be woazu kesinɔtɔ xɔ aƒe ɖe amewo me le xexea me. Satana dina be míaxɔe ase be gae nye ame—eyae nana wokpɔa dzidzɔ. Fiase gãgãwo bɔ. Wonana  wòdzena le boblododowo me be agbe blibaa nɔnɔ, nunɔamesi gbogbowo kple agbeɖuɖu ye le tsia dzi. Mɔzɔzɔ ŋuti dɔwɔlawo wɔa ɖoɖo ɖe mɔkekeyiyi kple xexemetɔwo le teƒe siwo nya kpɔ ŋu. Ɛ̃, afi sia afi si míato la, xexea ƒonɛ ɖe mía nu be “míaʋu ŋku vie”—be míanɔ agbe ɖe xexea ƒe dzidzenuwo nu.

8, 9. Nu kae ate ŋu anye afɔku gã aɖe na mí, eye nu ka tae?

8 Petro gblɔ tso ƒe alafa gbãtɔ me Kristo hamea me tɔ siwo va nɔ nuwo ŋu bum abe xexea ene la ŋu be: “Wobua agbeɖuɖu le ŋkeke me abe dzidzɔdonamenu ene. Ðiƒoƒowo kple nuwɔamewo wonye, eye wòdzɔa dzi na wo vevie be woatsɔ alakpanufiafiawo able mi ne wole nu ɖum kpli mi. Elabena wogblɔa nya gã nya gã siwo ŋu viɖe aɖeke mele o, eye wotsɔa ŋutilã ƒe nudzodzrowo kple agbenɔnɔ gbegblẽwo blea ame siwo si le nu gbegblẽ wɔlawo gbɔ teti koe nye ema la. Togbɔ be wole ablɔɖe ŋugbe dom na wo hã la, woawo ŋutɔwo wonye kluviwo na nu gbegblẽ wɔwɔ. Elabena ame si dzi ame aɖe ɖu la, ame ma wɔnɛ kluvii.”—2 Pet. 2:13, 18, 19.

9 Kɔɖiɖi na “ŋkuwo ƒe nudzodzro” menaa ablɔɖe ame o. Ke ɖe wònaa ame va zua xexea ƒe aƒetɔ makpɔmakpɔ, Satana Abosam, ƒe kluvi boŋ. (1 Yoh. 5:19) Afɔku gã aɖee wònye be ame nazu ŋutilãmenudidi vivivo ƒe kluvi—enye kluvinyenye si me wometea ŋu dona le bɔbɔe o.

AGBEMEDƆ SI ME DZIDZEME VAVÃ LE

10, 11. Ame kawo koŋue Satana tɔ ŋkui egbea, eye aleke suku kɔkɔ dede ate ŋu ana nuwo nasesẽ na wo?

10 Egbea hã Satana tɔa ŋku ame siwo si nuteƒekpɔkpɔ boo mesu o la, abe ale si ko wòwɔe le Eden bɔa me ene. Sɔhɛwo koŋ dzie wòdzidze eƒe aŋutrɔwo ɖo. Satana mekpɔa dzidzɔ kura ne sɔhɛ, alo ame bubu ɖe sia ɖe, tiae be yeazu Yehowa ƒe kluvi o. Mawu ƒe futɔ la di be ame sia ame si ɖe adzɔgbe na Yehowa nado kpo nuteƒewɔwɔ nɛ.

11 Mina míagatrɔ ɖe kluvi si lɔ̃ woŋɔ to nɛ ƒe kpɔɖeŋua ŋu. Kluvi si woŋɔ to na la ase veve ɣeyiɣi aɖe ya, gake vevesesea nu yina kaba, eye dzesi si nana amewo nyana be ekpɔtɔ nye kluvi la tsia anyi. Ate ŋu asesẽ na sɔhɛ ne etiae be yeawɔ nu si to vovo na ye hatiwo tɔ, alo ate ŋu ase veve gɔ̃ hã. Satana doa nukpɔsusu si nye be dɔ gã wɔwɔ le xexea me ye naa dzidzeme ame ɖe ŋgɔ, gake ele be Kristotɔwo nanyae be, gbɔgbɔmenuhiahiãwo gbɔ kpɔkpɔe nye nu vevitɔ le agbe me. Yesu gblɔ be: “Dzidzɔtɔwoe nye ame siwo nyae  be gbɔgbɔmenuwo hiã yewo.” (Mat. 5:3) Mawu ƒe lɔlɔ̃nu wɔwɔ tae Kristotɔ ɖeadzɔgbewo le agbe ɖo, ke menye Satana tɔ tae o. Wokpɔa dzidzɔ ɖe Yehowa ƒe se la ŋu eye wodea ŋugble le eŋu zã kple keli. (Mixlẽ Psalmo 1:1-3.) Gake egbea, nu siwo wosrɔ̃na le suku kɔkɔwo xɔa ɣeyiɣi geɖe ale gbegbe be, Yehowa subɔla si tiae be yeade suku kɔkɔ makpɔ vovo ade ŋugble le Mawu ƒe Nya ŋu ahakpɔ eƒe gbɔgbɔmenuhiahiãwo gbɔ ale si dze o.

12. Tiatia kae dzea ŋgɔ sɔhɛ geɖewo egbea?

12 Ne Kristotɔ nye kluvi le aƒetɔ xexemetɔ te la, aƒetɔ ma ate ŋu ana agbea nasesẽ nɛ. Paulo bia le eƒe lɛta gbãtɔ si wòŋlɔ na Korintotɔwo me be: “Ðe nènye kluvi esime woyɔ wòa?” Azɔ eɖo aɖaŋu be: “Mègana wòaɖe fu na wò o; gake ne àte ŋu axɔ ablɔɖe la, wɔ mɔnukpɔkpɔ ma ŋuti dɔ.” (1 Kor. 7:21) Ne kluvi si le aƒetɔ xexemetɔ te ate ŋu axɔ ablɔɖe la, ema anyo wu. Egbea le dukɔ geɖe me la, dziɖuɖu ƒe se bia be ame nade suku hena ƒe agbɔsɔsɔme aɖe. Le ema megbe la, sukuvia ŋutɔ ate ŋu atiae nenye be ayi edzi. Ne Kristotɔ tiae be yeade suku kɔkɔ kple susu be yeate ŋu akpɔ dɔ gã awɔ le xexe sia me la, ate ŋu asesẽ nɛ ŋutɔ be wòawɔ ɣeyiɣiawo katã ƒe subɔsubɔdɔa.—Mixlẽ 1 Korintotɔwo 7:23.

Aƒetɔ ka ƒe kluvie nànye?

SUKU KƆKƆ ALO SUKU KƆKƆTƆ KEKEAKE?

13. Sukudede ka ƒomevie Yehowa subɔlawo tiana?

13 Paulo xlɔ̃ nu Kolose Kristotɔwo be: “Mikpɔ nyuie: ɖewohĩ ame aɖe ato xexemenunya kple beble dzodzro dzi le amewo ƒe kɔnyinyiwo nu alé mi adzoe, le xexea ƒe gɔmedzenuwo nu, ke menye le Kristo nu o.” (Kol. 2:8) Nufialagãwo doa “xexemenunya kple beble dzodzro” kpakple “amewo ƒe kɔnyinyiwo” ɖe ŋgɔ. Zi geɖe la, suku kɔkɔ siwo me wofiaa xexemenunya le la nu wulawo mesrɔ̃a asinudɔ aɖeke o, eya ta wometea ŋu kpɔa nu suesue siwo wòle be ame ŋutɔ natsɔ asi awɔ le gbe sia gbe gbenɔnɔ me la gbɔ o. Gake Yehowa subɔlawo ya tiaa sukudede si akpe ɖe wo ŋu woasrɔ̃ aɖaŋudɔ siwo akpe ɖe wo ŋu woanɔ agbe tsɛ ahasubɔ Mawu dzidzedzetɔe. Wobua aɖaŋu si Paulo ɖo na Timoteo nya vevii, esi wògblɔ be: “Nyateƒee, ɖokuitsɔtsɔ na Mawu sia nye viɖenu gã, ne nu si le ame si la dzea ame ŋu. Eya ta esi nunyiame kple nudodo le mía si la, nu siawo adze mía ŋu.” (1 Tim. 6:6, 8) Kristotɔ vavãwo metsia dzi ɖe yunivɛsiti ɖaseɖigbalẽwo kple agbalẽnyalagãwo ƒe bubuŋkɔ gãgãwo ŋu o, ke wotsia dzi ɖe “kafukafugbalẽwo,” siwo  nye ame siwo ŋu wokpe ɖo wova zu Yesu ƒe nusrɔ̃lawo, boŋ ŋu to gomekpɔkpɔ le gbeadzisubɔsubɔdɔa me bliboe ale si woate ŋui me.—Mixlẽ 2 Korintotɔwo 3:1-3.

14. Le Filipitɔwo 3:8 la, aleke Paulo bu mɔnukpɔkpɔ si su esi be wòanye Mawu kple Kristo ƒe kluvi lae?

14 Bu apostolo Paulo ŋu kpɔ. Yudatɔwo ƒe Sefiala Gamaliel ƒe afɔ nue wofia nui le. Woate ŋu atsɔ suku si Paulo de ɣemaɣi la asɔ kple yunivɛsitisuku egbea. Gake esi Paulo tsɔ suku kɔkɔ ma dede sɔ kple mɔnukpɔkpɔ si su esi be wòanye Mawu kple Kristo ƒe kluvi la, aleke wòbui? Egblɔ be: “Mebua nuwo katã hã be wonye nu búbu le nye Aƒetɔ Kristo Yesu ŋuti sidzedze ƒe asixɔxɔ, si nyo wu sãsãsã la ŋuti.” Egblɔ kpee be: “Le eyama ta melɔ̃ nuwo katã zu nu búbu, eye mebua wo abe gbeɖuɖɔ dzro aɖe ko ene, bene Kristo nasu asinye.” (Flp. 3:8) Nya siawo kpena ɖe sɔhɛ Kristotɔwo kple wo dzila Mawu vɔ̃lawo ŋu wowɔa nyametsotso siwo me nunya le le sukudenyawo me. (Kpɔ nɔnɔmetatawo.)

NA SUKU KƆKƆTƆ KEKEAKE DEDE NAÐE VI NA WÒ

15, 16. Suku ka tɔgbie míakpɔ le Yehowa ƒe habɔbɔa me, eye nu kae nye eƒe taɖodzinu?

15 Aleke nɔnɔmea le le xexea ƒe suku kɔkɔwo me egbea? Zi geɖe la, ɖe menye teƒe mawoe tsitretsitsi ɖe dziɖuɖuwo kple amegãwo ŋu xɔ aƒe ɖo oa? (Ef. 2:2) To vovo na ema la, Yehowa ƒe habɔbɔa mee míakpɔ suku kɔkɔtɔ kekeake le, si míedena le Kristo hame si me ŋutifafa le la me. Mɔnukpɔkpɔ sua mí katã si be míakpɔ viɖe tso Teokrasi Subɔsubɔ Sukua me kwasiɖa sia kwasiɖa. Woɖo suku tɔxɛ na nɔviŋutsu mɔɖela trewo (si nye, Nɔviŋutsu Trewo Ƒe Bibliasrɔ̃suku) kple na mɔɖela srɔ̃tɔwo (si nye, Kristotɔ Srɔ̃tɔwo Ƒe Bibliasrɔ̃suku). Teokrasi suku siawo kpena ɖe mía ŋu be míaɖo to Yehowa, mía Aƒetɔ si le dziƒo.

16 Míate ŋu awɔ numekukuwo le Index la alo Watchtower Library si le CD-ROM dzi me ake ɖe gbɔgbɔmekesinɔnu gbogbo aɖewo ŋu. Hehexɔxɔ siawo katã ƒe taɖodzinu koŋue nye be wòakpe ɖe mía ŋu míasubɔ Yehowa. Wofiaa ale si míakpe ɖe amewo ŋu woadzra wo kple Mawu dome ɖo la mí. (2 Kor. 5:20) Esia kpena ɖe woawo hã ŋu be woasu te afia nu ame bubuwo.—2 Tim. 2:2.

TEƑEÐOÐO SI MAWU ƑE KLUVIWO AKPƆ

17. Teƒeɖoɖo kawoe míakpɔ ne míetia suku kɔkɔtɔ kekeake?

17 Le Yesu ƒe talento ŋuti lododoa me la, wokafu kluvi wɔnuteƒe eveawo, wokpɔ dzidzɔ kple woƒe aƒetɔ, eye woƒe aƒetɔ de dɔ geɖe wu asi na wo. (Mixlẽ Mateo 25:21, 23.) Ne míetia suku kɔkɔtɔ kekeake egbea la, míakpɔ dzidzɔ eye viɖe geɖe anɔ míaƒe agbe ŋu. Bu Michael ƒe kpɔɖeŋua ŋu kpɔ. Ekpɔ dzidzedze le suku ale gbegbe be eƒe nufialawo kpe kplii be yewoadzro yunivɛsitidede ƒe mɔnukpɔkpɔ siwo ʋu ɖi nɛ me kplii. Ewɔ nuku na wo ŋutɔ esi Michael tiae boŋ be yeade dɔsrɔ̃suku ƒe ʋɛ aɖewo; eye eteƒe medidi o, esia kpe ɖe eŋu wòkpɔ dɔ si na wòle eɖokui dzi kpɔm hele gbesiagbe mɔɖeɖedɔa wɔm. Ðe wòwɔ nɛ be nu gã aɖe to ye ŋua? Egblɔ be: “Asixɔxɔ si le teokrasihehe si mexɔ le mɔɖelawo ƒe sukua kple esi xɔm mele abe hamemetsitsi ene fifia ŋu la nye esi ƒo ɖe sia ɖe ta. Yayra kple mɔnukpɔkpɔ siwo su asinye va se ɖe fifia la xɔ asi nam sãsãsã wu ga. Dzi dzɔam ŋutɔ be nyemetiae be made suku kɔkɔ o.”

18. Nu kae ʋã wò nètiae be yeade suku kɔkɔtɔ kekeake?

18 Suku kɔkɔtɔ kekeake dede nana míesrɔ̃a Mawu ƒe lɔlɔ̃nu eye wòkpena ɖe mía ŋu míewɔa dɔ na Yehowa abe kluviwo ene. Enaa mɔkpɔkpɔ mí be ‘woaɖe mí tso gbegblẽ ƒe kluvinyenye me,’ eye míava kpɔ “Mawu ƒe viwo ƒe ablɔɖe si me ŋutikɔkɔe le” la mlɔeba. (Rom. 8:21) Gawu la, míesrɔ̃a mɔ nyuitɔ si dzi míato aɖee afia be míelɔ̃ Yehowa, mía Aƒetɔ si le dziƒo, tso dzi blibo me.—2 Mose 21:5.