‘Mikafu eƒe ŋkɔ kɔkɔe la.’—NEH. 9:5.

1. Mawu ƒe amewo ƒe takpekpe ka ŋue míasrɔ̃ nu tsoe, eye nya kawoe míate ŋu abia mía ɖokui?

“MITSO, ne miakafu Yehowa, mía Mawu la, tso mavɔ me yi mavɔ me!” Nya ʋãme siawoe Lewi viwo tsɔ kpe Mawu ƒe amewo le blema be woawɔ ɖeka ado gbe ɖa. Gbedodoɖa mae nye esiwo didi wu le Biblia me la dometɔ ɖeka. (Neh. 9:4, 5) Yudatɔwo ƒe ɣleti adrelia si nye Tishri ƒe ŋkeke 24 lia dzie wowɔ takpekpe sia le Yerusalem, le ƒe 455 D.M.Ŋ. me. Esi míele nudzɔdzɔ siwo do ŋgɔ na takpekpe tɔxɛ ma me dzrom la, bia ɖokuiwò be: ‘Nu kawoe Lewi viwo wɔna edziedzi si hã na be takpekpe sia kpɔ dzidzedze? Nu kawoe mate ŋu asrɔ̃ tso Lewi viwo ƒe gbedodoɖa sia si ŋu wodzra ɖo ɖo nyuie me?’—Ps. 141:2.

ƔLETI TƆXƐ AÐE

2. Kpɔɖeŋu nyui kae Israel viwo ɖo ɖi si míasrɔ̃ egbea?

2 Ɣleti ɖeka tso esime Yudatɔwo gbugbɔgaɖo Yerusalem gliawo megbee wowɔ takpekpe sia. (Neh. 6:15) Mawu ƒe amewo wu dɔa nu le ŋkeke 52 ko me, eye eyome wotrɔ susu ɖe woƒe gbɔgbɔmenuhiahiãwo gbɔ kpɔkpɔ ŋu. Eya ta le ɣleti si kplɔe ɖo si nye Tishri ƒe ŋkeke gbãtɔ dzi la, wokpe ta ɖe dogba dzi be woase Mawu ƒe Se la me nya siwo Ezra kple Lewi vi bubuwo axlẽ ahaɖe eme na wo la. Ƒomewo katã, “ame sia ame, si ate ŋu ase egɔme” la, va tsi tre heɖo to “tso ŋdi kanya, va se ɖe esime ɣe ɖo ta.” Kpɔɖeŋu nyui kae nye esi woɖo ɖi na mí ame siwo kpena le Fiaɖuƒe Akpatawo me le dziɖeɖi me egbea! Togbɔ be ele alea hã la, ɖe wò susu nɔa tsatsam eye nènɔa nu siwo mele vevie o ŋu bum ɣeaɖewoɣi le kpekpeawo mea? Ne nenemae la, ekema gabu kpɔɖeŋu si blema Israel vi mawo ɖo ɖi na mí ŋu kpɔ. Menye ɖeko wolé to ɖe nya siwo wose ŋu vevie ko o, ke wode ŋugble, si na be nyaawo de dzi gbɔ na wo ale gbegbe  be wofa avi le ale si dukɔa mewɔ ɖe Mawu ƒe Se la dzi o ta.—Neh. 8:1-9.

3. Mɔfiame ka dzie Israel viwo wɔ ɖo?

3 Gake menye ɣeyiɣi ma mee dukɔ la aʋu eƒe nu vɔ̃wo me o. Esi wònye azãɖuɣie ta la, Yehowa di be wòanye dzidzɔkpɔɣi na wo. (4 Mose 29:1) Eya ta Nexemiya gblɔ na dukɔ la be: “Miyi, ne miaɖu aminu, eye miano aha vivi, eye miɖo ɖe ɖe ame siwo si ɖeke mele o la, elabena ŋkeke sia ŋu kɔ na mía Aƒetɔ la, migaxa nu o; elabena dzidzɔkpɔkpɔ ɖe Yehowa ŋu enye miaƒe mɔ́ sesẽ.” Enyo ŋutɔ be dukɔ la wɔ ɖe mɔfiame ma dzi eye gbe ma gbe ‘wotu aglo gã.’—Neh. 8:10-12.

4. Nu kae Israel viwo ƒe ƒome ƒe tawo wɔ, eye nu kae nye Agbadɔŋkekenyui sia ƒe akpa vevi aɖe?

4 Le ŋufɔke la, ƒome ƒe tawo va kpe be yewoakpɔ ale si dukɔa ate ŋu awɔ ɖe Mawu ƒe Sea dzi nyuie wu. Esi wodzro Ŋɔŋlɔawo me la, wokpɔe be ele be yewoaɖu Agbadɔŋkekenyuia kple takpekpe kɔkɔe si wotsɔna ƒoa eta la le ɣleti adrelia ma me, tso Tishri 15 va se ɖe 22, eya ta wodze dzadzraɖo ɖe eŋu gɔme. Tso Yosua ŋɔli la, womegaɖu Agbadɔŋkekenyui aɖeke wòdze edzi elea kpɔ o, eye “wònye dzidzɔ gã ŋutɔ” na dukɔa. Ŋkekenyui sia ƒe akpa vevi aɖee nye be, woxlẽ Mawu ƒe Se la na dukɔa “gbe sia gbe tso ŋkeke gbãtɔ dzi va se ɖe ŋkeke mlɔetɔ dzi.”—Neh. 8:13-18.

ŊKEKE SI DZI WOƲU WOƑE NU VƆ̃WO ME

5. Nu kae Mawu ƒe amewo wɔ do ŋgɔ hafi Lewi viwo xɔ ŋgɔ na wo do gbe ɖa na Yehowa?

5 Ŋkeke eve megbe la, ɣeyiɣia de be Israel viwo naʋu woƒe nu vɔ̃wo me. Ŋkeke sia menye aglotugbe o. Ke boŋ Mawu ƒe amewo tsi nu dɔ eye wota akpanya tsɔ ɖe ale si wose veve ɖe Mawu ƒe Se la dzi mawɔmawɔ ta fia. Wogaxlẽ Mawu ƒe Sea na dukɔa ake ŋdi ma abe gaƒoƒo etɔ̃ sɔŋ ene. Le ŋdɔ me la, dukɔ la “ʋu wo ɖokui me, eye wode ta agu ɖe Yehowa, woƒe Mawu la ŋkume.” Ema yomee Lewi viwo xɔ ŋgɔ na dukɔa do gbe sia si ŋu wodzra ɖo ɖo nyuie ɖa. Neh. 9:1-4.

6. Nu kae kpe ɖe Lewi viwo ŋu woƒe gbedodoɖaa nyo, eye nu kae míesrɔ̃ tso eme?

6 Ðikeke mele eme o be ale si Lewi viwo xlẽa Mawu ƒe Sea edziedzi lae kpe ɖe wo ŋu wodo gbe ɖa nyuie alea ɖo. Gbedodoɖaa ƒe akpa gbãtɔa ku ɖe Yehowa ƒe dɔwɔwɔwo kple eƒe nɔnɔme nyuiwo koŋ ŋu. Le gbedodoɖaa ƒe akpa susɔea me la, wote gbe ɖe Mawu ƒe “nublanuikpɔkpɔ gã la” dzi zi geɖe, eye wolɔ̃ ɖe edzi anukwaretɔe be Israel viwo medze na nublanuikpɔkpɔ sia o. (Neh. 9:19, 27, 28, 31) Abe Lewi vi mawo ene la, ne míedea ŋugble le Mawu ƒe Nya la ŋu gbe  sia gbe, eye míetoa esia dzi nana Yehowa ƒoa nu na mí la, eya ko hafi míate ŋu akpɔ nya geɖe agblɔ nɛ le gbedodoɖa me, eye gɔmesese geɖe wu nanɔ míaƒe gbedodoɖawo ŋu.—Ps. 1:1, 2.

7. Nu kae Lewi viwo bia Mawu, eye nu kae míesrɔ̃ tso esia me?

7 Nu ɖeka aɖe koe Lewi viwo bia le woƒe gbedodoɖaa me, eye menye nu gã aɖekee o. Esia dze le kpukpui 32 lia me, afi si gblɔ be: “Mía Mawu, wò Mawu gã ŋusẽtɔ, si ŋu ŋɔdzi le, wò ame si lé nubabla kple amenuveve me ɖe asi la, fu, siwo katã dzɔ ɖe mía kple míaƒe fiawo, amegãwo, nunɔlawo, nyagblɔɖilawo kple mía fofowo kpakple wò dukɔ blibo la dzi tso Asur-fiawo ŋɔli va se ɖe egbe la, megaɖi nu tsɛ le ŋkuwò me o!” Lewi viwo ɖo kpɔɖeŋu nyui ɖi na mí be míakafu Yehowa ahada akpe nɛ gbã hafi atsɔ míawo ŋutɔwo ƒe hiahiãwo aɖo eŋkume.

WOKAFU MAWU ƑE ŊKƆ KƆKƆE LA

8, 9. (a) Aleke Lewi viwo dze woƒe gbedodoɖaa gɔme ɖokuibɔbɔtɔe? (b) Edze ƒãa be dziƒoʋakɔ eve kawo ŋue Lewi viwo ƒo nu tsoe?

8 Togbɔ be Lewi viwo dzra ɖo ɖe woƒe gbedodoɖaa ŋu nyuie do ŋgɔ hã la, wobɔbɔ wo ɖokui eye wose le wo ɖokui me be kpekpeme mele yewoƒe nyawo ŋu aɖe kafukafu si Yehowa dze na la afia wòade edeƒe o. Eya ta woƒo koko na Yehowa ɖokuibɔbɔtɔe tsɔ dze gbe si wodo ɖa ɖe Mawu ƒe dukɔa ta la gɔme be: “Mikafu eƒe ŋkɔ kɔkɔe, si ƒo kafukafu kple ŋkɔxɔxɔwo katã ta.”—Neh. 9:5.

9 Woyi gbedodoɖaa dzi be: “Wò ɖeka koe nye Yehowa; wòe wɔ dziƒowo kple dziƒowo ƒe dziƒo kple wo ŋuti nuwo. Wòe wɔ anyigba kple atsiaƒu kpakple nu siwo katã le anyigba dzi kple atsiaƒu me. Wòe na agbe wo katã. Dziƒoʋakɔwo subɔa wò.” (Neh. 9:6, Eʋegbe Biblia, ƒe 2010 tɔ) Nyateƒee, Yehowa Mawu ye wɔ dziƒoʋakɔwo—siwo nye ɣleti kple ɣletivihatsotso gbogbo wɔnukuawo. Eye nenema ke eyae wɔ míaƒe anyigba dzeania hena ŋutetee be wòalé nu gbagbe hamehame gbogboawo—siwo yi edzi le dzidzim le wo ƒomeviwo nu—la katã ƒe agbe ɖe te. Mawudɔla kɔkɔewo, siwo hã woyɔ be “dziƒoʋakɔ” la, kpɔ eteƒe esime Mawu wɔ nu siawo katã. (1 Fia. 22:19; Hiob 38:4, 7) Mawudɔla siawo wɔa Mawu ƒe lɔlɔ̃nu ɖokuibɔbɔtɔe, eye wowɔa subɔsubɔdɔ na nu vɔ̃ me siwo “anyi ɖeɖekpɔkpɔ dome.” (Heb. 1:14) Kpɔɖeŋu nyui kae nye esi mawudɔlawo ɖo ɖi na mí, esi míawo hã míewɔ ɖeka le Yehowa subɔm abe aʋakɔ si wona hehee nyuie ene!—1 Kor. 14:33, 40.

10. Nu kae míesrɔ̃ tso ale si Mawu wɔ nu kple Abraham me?

10 Eyome Lewi viawo he susu yi ale si Mawu wɔ nu kple Abram dzi. Esi Abram xɔ ƒe 99 gɔ̃ hã la, srɔ̃a Sarai medzi vi ɖeka pɛ hã nɛ haɖe o. Ɣemaɣie Yehowa trɔ eŋkɔ be Abraham, si gɔmee nye  “dukɔ geɖewo fofo.” (1 Mose 17:1-6, 15, 16) Mawu gado ŋugbe na Abraham be eƒe dzidzimeviwo anyi Kanaan-nyigbaa dome. Zi geɖe la, amegbetɔwo ŋlɔa ŋugbe siwo wodo be; gake mele alea le Yehowa gome o. Esia dze le Lewi viawo ƒe gbedodoɖaa me, esi wogblɔ be: “Wòe nye Yehowa Mawu, ame si tia Abram, eye nèkplɔe tso Ur-Kaldea hetsɔ ŋkɔ nɛ be Abraham. Eye esi nèkpɔ be, eƒe dzi ɖi anukware le ŋkuwòme la, èbla nu kplii, be yeatsɔ Kanaanitɔwo . . . ƒe anyigba ana eƒe dzidzimeviwo, eye nèwɔ wò nya dzi, elabena dzɔdzɔetɔ nènye.” (Neh. 9:7, 8) Mina míawo hã míasrɔ̃ mía Mawu dzɔdzɔetɔ la, eye míadze agbagba awɔ míaƒe ŋugbedodowo dzi ɣesiaɣi.—Mat. 5:37.

NU SIWO YEHOWA WƆ NA EƑE DUKƆ LA XEXLẼ FIA

11, 12. Yehowa ƒe ŋkɔ gɔme ɖe, eye aleke esia dze le ale si wòwɔ nu kple Abraham ƒe dzidzimeviwo me?

11 Ŋkɔ Yehowa gɔmee nye “Enana Wòvaa Eme,” si fia be Mawu yia edzi nɔa nu sia nu si hiã la wɔm be eƒe ŋugbedodowo nava eme. Esia dze nyuie le ale si Mawu wɔ nu kple Abraham ƒe dzidzimeviwo esime wonye kluviwo le Egipte la me. Ɣemaɣi la, edze abe manya wɔ be woana ablɔɖe dukɔ bliboa be woayi aɖanɔ Ŋugbedodonyigbaa dzi o ene. Gake Mawu yi edzi wɔ nu sia nu si hiã va se ɖe esime eƒe ŋugbedodoa va eme heto esia dzi ɖee fia be yedze na yeƒe ŋkɔ gã tɔxɛ Yehowa.

12 Le Lewi viwo ƒe gbedodoɖa si Nexemiya ŋlɔ ɖi me la, wogblɔ tso Yehowa ŋu be: “Èkpɔ mía fofowo ƒe hiã le Egipte, eye nèse woƒe ɣli le Avaƒu la nu. Èwɔ dzesiwo kple nukunuwo ɖe Farao kple eƒe dɔlawo katã kpakple eƒe anyigba dzi dukɔ blibo la ŋu; elabena ènya be, dadam wole ɖe wo ŋu, eye nède ŋkɔ ɖokuiwò ŋu, abe ale si wògale egbe siawo ko ene. Èma ƒu la me le wo ŋgɔ, eye woto ƒuƒuiƒe le ƒu la titina; ke èxlã wo yometilawo ɖe tɔ me, abe ale si kpe dzea tɔ sesẽwo me ene.” Azɔ woƒo nu tso nu bubu siwo Yehowa gawɔ na eƒe dukɔa ŋu be: “Nèbɔbɔ anyigbadzitɔ, siwo nye Kanaanitɔwo, ɖe anyi le wo ŋku me . . . Woxɔ du sesẽwo kple anyigba wɔnuwo, eye woxɔ aƒe, siwo me kesinɔnu geɖewo le fũu, kple vudo ɖeɖewo, waingblewo kple amitiwo kpakple ati tseku ɖuɖuawo taŋtaŋ; woɖu nu ɖi ƒo da ami, eye wonɔ agbe vivi le wò kesinɔnu geɖeawo me.”—Neh. 9:9-11, 24, 25.

13. Ðoɖo kae Yehowa wɔ hena Israel viwo ƒe gbɔgbɔmenuhiahiãwo gbɔ kpɔkpɔ, gake aleke wowɔ nui?

13 Mawu gawɔ nu bubu geɖewo be eƒe ŋugbedodoa nava eme. Le kpɔɖeŋu me, esi Israel viwo ʋu le Egipte teti la, Yehowa wɔ ɖoɖo ɖe woƒe gbɔgbɔmenuhiahiãwo gbɔ kpɔkpɔ ŋu. Lewi viwo gblɔ le woƒe gbedodoɖa na Mawu me be: “Èɖi va Sinai-to la dzi, eye nèƒo nu kpli wo tso dziƒo; èna kɔnu dzɔdzɔewo, nufiame siwo le eteƒe, kpakple ɖoɖo kple se nyuiwo wo.” (Neh. 9:13) Yehowa tia Israel be wòanye yeƒe dukɔ eye wòɖoe be yeatsɔ Ŋugbedodonyigbaa ana wo. Eya ta efia nu wo be woanye ame siwo dze be yeƒe ŋkɔ kɔkɔe la nanɔ wo ŋu. Gake wogbe eƒe nufiamewo dzi wɔwɔ.—Mixlẽ Nexemiya 9:16-18.

TOHEHE NA ISRAEL VIWO

14, 15. (a) Aleke Yehowa kpɔ nublanui na eƒe dukɔ wɔnuvɔ̃ la helé be na woe? (b) Nu kae míesrɔ̃ tso ale si Mawu wɔ nu ɖe eƒe dukɔa ŋu me?

14 Le Lewi viwo ƒe gbedodoɖaa me la, woƒo nu tso nu vɔ̃ eve siwo Israel viwo wɔ esi wodo ŋugbe le Sinai-toa gbɔ be yewoawɔ ɖe Mawu ƒe Sea dzi vɔ megbe teti la ŋu. Ðe wòle be Mawu naɖe asi le wo ŋu woaku ɖe gbea dzi hafi. Gake ekpɔ nublanui na wo, eye wòyi edzi lé be  na wo. Lewi viawo kafu Yehowa le woƒe gbedodoɖaa me be: “Mègblẽ wo ɖe gbea dzi o le wò nublanuikpɔkpɔ gã la ta . . . Ƒe blane sɔŋ nènyi wo le gbea dzi, eye naneke mehiã wo o; woƒe avɔwo medo xoxo o, eye woƒe afɔwo mete o.” (Neh. 9:19, 21) Egbea hã Yehowa naa nu sia nu si míehiã be míate ŋu ayi edzi asubɔe nuteƒewɔwɔtɔe la mí. Megadzɔ gbeɖe be míava nɔ abe Israel vi akpe geɖe siwo ku le gbea dzi le woƒe tomaɖomaɖo kple xɔsemanɔamesi ta la ene o. Le nyateƒe me la, woŋlɔ nu siawo ɖi “be woanye nuxɔxlɔ̃ na mí ame siwo dzi nuɖoanyi siawo ƒe nuwuwuwo va ɖo la.”—1 Kor. 10:1-11.

15 Nublanuitɔe la, esi Israel viwo ɖo Ŋugbedodonyigbaa dzi la, wova ƒo wo ɖokuiwo ɖe Kanaanitɔwo ƒe mawusubɔsubɔ si me wowɔa ahasi le hetsɔa wo viwo saa vɔe le gɔ̃ hã me. Eya ta Yehowa ɖe mɔ dukɔ bubuwo te eƒe dukɔa ɖe anyi. Esi Yehowa ƒe amewo trɔ dzi me la, ekpɔ nublanui na wo, tsɔ woƒe nu vɔ̃wo ke wo, eye wòɖe wo tso woƒe futɔwo si me. Esia dzɔ ‘zi geɖe.’ (Mixlẽ Nexemiya 9:26-28, 31.) Lewi viwo ʋu eme be: “Èzi kpi kpɔ wo ƒe geɖe, eye nètsɔ wò gbɔgbɔ xlɔ̃ nu wo to wò nyagblɔɖilawo dzi, gake womeɖo to o, eya ta nètsɔ wo de asi na anyigba dzi dukɔwo.”—Neh. 9:30.

16, 17. (a) Esi Israel viwo gagbe toɖoɖo Yehowa ake la, nu kae do tso eme na wo? (b) Aleke Israel viwo ʋu wo ɖokui me, eye ŋugbe kae wodo?

16 Esi Israel viwo trɔ gbɔ tso aboyo me gɔ̃ hã la, wogagbe toɖoɖo Yehowa ake. Nu kae do tso eme? Lewi viawo yi gbedodoɖaa dzi be: “Kpɔ ɖa, míezu dɔlawo egbe siawo; anyigba, si nètsɔ na mía fofowo, be woaɖu edzi kutsetsewo kple edzi nu nyuiwo la dzie míezu dɔlawo le. Edzi agblemenuwo le dzidzim ɖe dzi na fia, siwo nètsɔ ɖo mía nu le míaƒe nu vɔ̃wo ta la, . . . eye míeɖo xaxa gã me.”—Neh. 9:36, 37.

17 Esi Mawu ɖe asi le eƒe amewo ŋu woɖo xaxa me la, ɖe Lewi viwo ƒe nyawo fia be Mawu tɔ medzɔ oa? Kura o! Woʋu eme be: “Tɔwò dzɔ le nu siwo katã va mía dzi la me, elabena èwɔe ɖe eteƒe, ke míawo míewɔ nu tovo.” (Neh. 9:33) Azɔ wowu gbe sia si wodo ɖa ɖokuitɔmadimaditɔe la nu kple ŋugbedodo vevi si nye be, dukɔa awɔ ɖe Mawu ƒe Sea dzi tso ekema dzi. (Mixlẽ Nexemiya 10:1; 10:30) Woŋlɔ ŋugbedodo sia ɖe agbalẽ me, eye Yuda-megã 84 de asi ete.—Neh. 10:2-28.

18, 19. (a) Nu kae míehiã hafi míate ŋu atsi agbe ayi ɖe Mawu ƒe xexe yeyea me? (b) Nu ka ŋue wòle be míanɔ gbe dom ɖa le, eye nu ka tae?

18 Hafi míadze na agbetsitsi ayi ɖe Yehowa ƒe xexe yeye dzɔdzɔea me la, míehiã eƒe amehehe alo tohehe. Apostolo Paulo bia be: “Vi kae li, si fofoa mehea to na o?” (Heb. 12:7) Ne míexɔa Mawu ƒe amehehe eye míeyia edzi subɔnɛ nuteƒewɔwɔtɔe la, ke míele eɖem fia be míeɖe mɔ wòle mía ɖɔm ɖo to eƒe gbɔgbɔa dzi. Azɔ hã, ne míewɔ nu vɔ̃ gã la, míate ŋu aka ɖe edzi be Yehowa atsɔe ake mí ne míetrɔ dzi me vavã eye míelɔ̃ xɔ eƒe tohehe ɖokuibɔbɔtɔe.

19 Eteƒe madidi o, Yehowa awɔ nu siwo gawɔ nuku wu esiwo wòwɔ esime wòɖe Israel viwo tso Egipte la gɔ̃ hã. Ɣemaɣi la, ame sia ame adze si Mawu gã si gbegbe wònye. (Eze. 38:23) Abe ale si ko Yehowa ƒe dukɔ si nɔ anyi le blema la nyi Ŋugbedodonyigbaa dome ene la, nenema ke Kristotɔ siwo katã ado dzi asubɔ Yehowa nuteƒewɔwɔtɔe la anyi Mawu ƒe xexe yeye si me dzɔdzɔenyenye anɔ la dome godoo. (2 Pet. 3:13) Esi míele mɔ kpɔm na nu nyui siawo la, mina míayi edzi anɔ gbe dom ɖa be Mawu ƒe ŋkɔ gã la ŋuti nakɔ. Le nyati si kplɔe ɖo me la, míadzro gbedodoɖa bubu si nu wòle be míanɔ agbe ɖo be Mawu nayra mí tso fifia yi ɖe mavɔmavɔ me la me.